Génesis 14
14
Lotta prësu apakuyaptin Abram kutitsimunqan
1Tsë witsanmi Sinar markapa reynin Amrafel këkarqan. Elasar markapa reyninnam Arioc këkarqan. Elam markapa reyninnam Quedorlaomer këkarqan. Goim markapa reyninnam Tidal këkarqan. 2Tsë reykunam guërrachö këkäyarqan Sodoma markapa reynin Berawan, Gomorra markapa reynin Birsawan, Adma markapa reynin Sinabwan, Zeboim markapa reynin Semeberwan y Bela markapa reyninwan. Bela markapa juk kaq shutinmi karqan Zoar. 3Tsë pitsqan reykunam soldädunkunata juntayarqan Sidim pampaman. Tsë pampachömi kananqa Kachi Lamar këkan. 4Tsë reykunataqa rey Quedorlaomermi munëninchö tsarararqan chunka ishkë wata. Tsëpita juk wata pasariptinnam pitsqan reykuna yachatsinakur Quedorlaomerpa contran sharkukurkuyarqan.
5Tsëmi shamuq watachöna Quedorlaomer yanapaqnin reykunawan y soldädunkunawan ëwayarqan Astarot Karnaimman. Tsëchönam refaíta nunakunata pelyachö vencirnin wanutsiyarqan. Tsënöllam Ham markapa ëwar zuzita nunakunatapis wanutsiyarqan. Tsëpita Save-Quiriataimpa ëwarnam emita nunakunatapis wanutsiyarqan. 6Tsëpitanam Seir jirkakunapa ëwar horeo nunakunatapis wanutsiyarqan. Safayaptinpis Parányaq qatirmi wanutsiyarqan. Paránqa këkan chusyaqmanpanam. 7Tsëpita kutirnam Quedorlaomer y pëwan ëwaqkuna En-mispatman chäyarqan. Tsëpa juk kaq shutinmi karqan Cades. Tsë kinrëpa ëwarmi amalecita nunakunata limpu ushakätsiyarqan. Tsëpita pasarnam Hazezon-tamarchö täraq amorreo nunakunatapis ushakätsiyarqan.
8Tsëmi Sodomapa, Gomorrapa, Admapa, Zeboimpa y Belapa reyninkuna alistakuyarqan Sidim pampachö pëkunawan pelyayänanpaq. (Bela markapa juk kaq shutinmi karqan Zoar.) 9Tsëchönam tsë pitsqan reykuna chuskun reykunawan pelyayarqan. Tsë chuskun reykunam kayarqan Elampa reynin Quedorlaomer, Goimpa reynin Tidal, Sinarpa reynin Amrafel y Elasarpa reynin Arioc. 10Sidim pampachöqa brea#14.10 Breaqa yanam imëka yana seniganö. pözukunam atska karqan. Tsëmi Sodomapa y Gomorrapa reyninkuna soldädunkunawan guërrapita safayanqanchö tsë brea pözukunaman jeqayarqan. Wakin kaq reykunaqa soldädunkunawan safayarqan jirkakunapam.
11Tsë pelyachö vencïkurmi chusku reykuna soldädunkunawan Sodoma y Gomorra markakunaman yëkïkur llapan imëkatapis mas alli kaqta apakuyarqan. Tsënöllam llapan mikïninkunatapis apakuyarqan. 12Abrampa sobrinun Lottapis Sodomachö tëkaptinmi llapan imëkankunatawan prësu apakuyarqan. 13Tsënö apëkäyaptinmi juk nuna safëkur Abramta willaq ëwarqan.
(Abramqa hebreo nunam karqan. Pëqa tëkarqan amorreo nuna Mamripa encina montinkuna kaqchömi. Mamriqa Escolpa y Anerpa wawqinmi karqan. Pëkunaqa Abrampa yanapaqninkunam kayarqan.)
14Abramqa sobrinun Lotta prësu apëkäyanqanta musyëkurmi makinchö yuriq kaq sirwiqninkunata juntarqan. Tsë nunakunaqa kayarqan kima pachak chunka puwaqmi (318). Pëkunata pusharkurmi prësu apëkaqkunata Abram qatiparqan hasta Dan markayaq. 15Taripëkurmi sirwiqninkunawan paqaspa atacarnin venciyarqan. Escapaqkunatapis qatipayarqan hasta Hoba markayaqmi. Tsë markaqa këkan Damasco markapa norti kaq lädunpam. 16Y llapan apayanqantam qochir kutitsiyämurqan. Tsënöpam sobrinun Lottapis llapannintawan kutitsimurqan. Warmitapis ollqutapis prësu apayanqantaqa llapantam kutitsimurqan.
Abramta Melquisedec bendisinqan
17Quedorlaomerta y pëta yanapaq reykunata vencirir Abram kutikämuptinnam Sodoma markapa reynin tariparqan Save pampaman. Tsë pampapa juk kaq shutinmi Mandakuq Reypa Pampan. 18Tsënöllam Salem markapa reynin Melquisedecpis tsëman chëkur tantatawan vïnuta Abramta qararqan. Melquisedecqa puëdiq Teyta Diosta sirwiq sacerdötim karqan.#14.18 Hebreo idiömachömi kënö nin: Melquisedecqa El-Eliónta sirwiq sacerdötim karqan. El-Eliónqa Teyta Diospa juk kaq shutinmi karqan. Tsënöllam nin Gén. 14.19-20, 22 versïculukunachöpis. 19Tsëpitanam Abramta bendisir nirqan:
<<Kë patsata y ciëluta kamaq puëdiq Teyta Diosmi yanapëkushunki.
20Puëdiq Teyta Dios alabashqa këkullätsun.
Pëmi yanapashurqunki contrëki nunakunata vencinëkipaq>>.
Tsënam Abramqa llapan kutikätsimunqanpita Melquisedecta diezmuta qoykurqan.#Heb. 5.6, 10; 6.20—7.17.
21Sodomapa reyninnam Abramta nirqan: <<Marka mayïkunallata kutïkatsimë. Tsëpita kaqtaqa llapanta apakï>>.
22Abramnam tsë reyta nirqan: <<Kë patsata y ciëluta kamaq puëdiq Teyta Diospa shutinchö jurarmi nirqü 23qampa kaqtaqa juk jïlullatapis ni llanqi watullatapis mana apanäpaq. Tsëmi <noqapa kaqllawanmi Abramqa kapuqyuq këkan> nir parlamankitsu. 24Sirwimaq nunäkuna mikunqanllana kallätsun. Yanaqämaq Aner, Escol y Mamriqa tocayanqankunata apakuyätsun>>.
Currently Selected:
Génesis 14: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.