Salmos 49
49
1Nʉʉˉ hnähꜘ kweeˉ heˉ jwahnꜙ laˉ,
läꜙjë̱ë̱ꜙ hnähꜘ hi̱ˉ cha̱a̱ˉ jmɨˉgyʉʉꜙ laˉ.
2Läꜙja̱ˉ hi̱ˉ kyʉʉh˜ hiꜙ hi̱ˉ saꜙ kyʉʉh˜,
hi̱ˉ chaˉ kuuˊ hiꜙ hi̱ˉ täˉñeeꜘ ko̱ˉjø̱hꜘ baˊ läꜙjë̱ë̱ꜙ.
3Jnäꜘ hlëëhnˊ kya̱a̱hˊ hʉʉˊdsëˉ lluꜗ,
hiꜙ miˉjnäänˈ hʉʉˊdsëˉ heˉ häˊ ñiihˊ gaˊ nehꜙ tuhˉdsënꜙ.
4Ka̱nˋ kwa̱a̱t˜ haˉ läꜙ ngooꜗ ko̱o̱ˉ juuˈ jwë̱ë̱hˋ.
Jeeˊ hänꜙ kya̱a̱hˊ tu̱ˉ miˊjnäänꜗ juuˈ heˉ naˉhmääˊ ja̱ˉ.
5¿Heˉlaˈ jmeenˋ gohnꜙ waˊraˉ jaꜗ jmɨɨˊ hlɨɨhꜗ,
waˊraˉ gaꜙjlë̱ë̱nˉ läꜙjëꜙ heˉ hlɨɨhˈ heˉ jmeeꜙ hi̱ˉ naˉhøøhˊ kinꜙ?
6Läꜙjë̱ë̱ꜙ hi̱ˉ heꜘ kye̱ˉ oˉjø̱hꜙ dsëˉ kihꜗ kuuˊ,
hiꜙ jmääy˜ hñiiyꜘ ka̱a̱hˊ kya̱a̱hˊ läꜙjëꜙ heˉ chaˉ kiyhꜗ.
7Pero niꜙ ja̱a̱ˉ saꜙ lihꜙ lä̱ä̱ꜗ ja̱a̱ˉ ø̱ø̱hꜚ,
niꜙ heˉ miˉhmaayhˋ kihꜗ Dio mahꜗ lä̱ä̱yhꜙ.
8Jëëhꜘ, kye̱e̱ꜘ hmoohˈ chaˉmiihˉ heˉ lä̱ä̱ꜘ dsaˉ.
Ji̱hˊko̱hꜘ saꜙ të̱ˊdsë̱ë̱yꜗ miˉhmaayhˋ,
9mahꜗ läꜙcha̱a̱yˉ läꜙjëꜙ johꜘ jmɨɨˊ chaˉ,
mahꜗ ji̱hˊko̱hꜘ moꜙsoꜙ ju̱u̱yꜘ.
10Pero jnäꜘ lii˜ haˉ läꜙ dsaˉju̱u̱ꜘ hi̱ˉ kyʉʉh˜.
Kweeˉ baˊ dsaˉhe̱e̱yꜘ kya̱a̱hˊ hi̱ˉ tooˉ hi̱ˉ jlä̱ä̱ˊ.
Kihꜗ jñahꜘ baˊ jä̱ä̱ꜙ kuuˊ kiyhˈ.
11Toˉhø̱ø̱ˉ baˊ laˈ tä̱ä̱ꜘ hneꜗ kiyhꜗ.
Jeeˊ ja̱ˉ baˊ laˈ hø̱ø̱yˈ läꜙjëꜙ johꜘ jmɨɨˊ chaˉ.
Maꜙkeꜙ hwaꜗ kiyhꜗ che̱e̱ˉ läꜙko̱o̱ˉ che̱e̱yˉ hñiiyꜘ.
12Saꜙ cha̱a̱yˉ tä̱ä̱ꜘ maꜙkeꜙ chayˉ kuuˊ.
Dsaˉju̱u̱yꜘ läꜙko̱hꜘ dsaˉju̱u̱ꜘ ja̱a̱ˉ jahꜘ baˊ.
13Läꜙja̱ˉ baˊ dsaˉlla̱a̱ꜙ hi̱ˉ kye̱ˉ oˉjø̱hꜙ dsëˉ kihꜗ hñiiꜘ.
Läꜙja̱ˉ laꜗ kihꜗ läꜙjë̱ë̱ꜙ hi̱ˉ jmeeꜙ läꜙja̱ˉ.
14Läꜙhiiꜘ nëˊ baˊ dsaˉnääyꜗ nehꜙ tooꜙ, jeeˊ ja̱ˉ ju̱u̱ꜘ läꜙjë̱ë̱ꜙ.
Maˊja̱ˉ løøꜗ hi̱ˉ llu̱u̱ꜗ jmeeꜗ hihꜙ kihꜗ hi̱ˉ kye̱ˉ oˉjø̱hꜙ dsëˉ kihꜗ hñiiꜘ.
Maꜙkeꜙ maˊ jnä̱ä̱yꜘ naˊhñaahꜗ maꜙraꜙ heˉ lla̱a̱ꜙ bihꜗ, chaˊjeˉ baˊ leꜘ hneꜗ kiyhꜗ.
15Pero Dio lä̱ä̱ꜗ jnäꜘ mahꜗ saꜙ jä̱nˋ nehꜙ toˉhø̱ø̱ˉ,
tëëyꜙ baˊ jnäꜘ mahꜗ nahnꜚ kya̱a̱yhˊ.
16Taꜙ jehꜙ hohꜘ waˊraˉ gaꜙjëëhˋ dsaˉläˉchaˉ dsaˉ kuuˊ
hiꜙ waˊraˉ gaꜙjmeeyꜘ naˊhñaahꜗ hneꜗ kiyhꜗ.
17Waˊraˉ gaꜙju̱u̱yꜗ saꜙ ko̱o̱yꜙ niꜙ miihˉ heˉ chaˉ kiyhꜗ.
Läꜙja̱ˉ saꜙ dsooꜗ ko̱ˉjø̱hꜘ kya̱a̱yhˊ heˉ jnäꜘ naˊhñaahꜗ kiyhꜗ läꜙ gaꜙtëꜘ toˉhø̱ø̱ˉ.
18Maꜙkeꜙ la̱a̱yꜘ dsaˉngëëyꜘ lluꜗ jmɨˉgyʉʉꜙ laˉ,
maꜙkeꜙ jmää˜ dsihꜘ jø̱ø̱hˈ kihꜗ heˉ chayˉ kuuˊ,
19pero lloo˜ ko̱o̱ˉ jmɨɨˊ ju̱u̱yꜘ, moꜙsoꜙ jëëꜗ gyihꜗ jeˉ.
20Hi̱ˉ dsaˉngëëꜘ lluꜗ jmɨˉgyʉʉꜙ laˉ
mahꜗ saꜙ ñeyˉ haˉ läꜙ leꜘ kiyhꜗ,
dsaˉju̱u̱yꜘ läꜙko̱hꜘ dsaˉju̱u̱ꜘ ja̱a̱ˉ jahꜘ baˊ.
Currently Selected:
Salmos 49: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.