Salmos 48
48
1Peerꜙ jø̱ø̱hˈ la̱a̱ꜗ DSAˉJØ̱Ø̱Hˈ jnänˋ,
heˉja̱ˉ lleˋ jmeenˊ jʉʉhˉ kiyhꜗ chaˉgaˊmiihˉ kya̱a̱hˊ su̱ꜚ.
La̱a̱yꜗ jø̱ø̱yhˈ jeeˊ laˈ jwɨɨˉ kiyhꜗ
heˉ nøøꜘ mohꜘ naˉjngɨɨˈ kiyhꜗ.
2Peerꜙ naˊhñaahꜗ laꜗ mohꜘ Sión,
heˉja̱ˉ tɨh˜ dsëꜗ dsaˉ jmɨˉgyʉʉꜙ.
Mohꜘ Sión ja̱ˉ hlaˉ jwooˈ taꜙ ñiiꜘ kihꜗ jeeˊ jwɨɨˉ,
ja̱ˉbaˊ jwɨɨˉ kihꜗ Dsaˉtaˊ jø̱ø̱hˈ jnänˋ.
3Jeeˊ ja̱ˉ naˉ gyaꜗ Dio nehꜙ ko̱o̱ˉ hneꜗ ñiiꜘ,
jeeˊ ja̱ˉ gaꜙkwëëyhꜗ dsaˉ kya̱a̱yꜗ
jeeˊ saꜙ hiiꜘ gooˉ kiyhꜗ niꜙ miihˉ.
4Gaꜙku̱hꜗ läꜙjë̱ë̱ꜙ dsaˉtaˊ ka̱a̱hˊ hi̱ˉ cha̱a̱ˉ hwaꜗ laˉ
mahꜗ te̱e̱yꜗ kya̱a̱hˊ jeeˊ jwɨɨˉ ja̱ˉ.
5Maˊ gaꜙllaꜙnääyꜗ jeeˊ ja̱ˉ, gaꜙta̱a̱yhˋ jëë˜ dsa̱yhꜙ,
gaꜙhe̱e̱ꜗ baˊ dsëyˈ hiꜙ läꜙcha̱hꜘ ja̱ˉ gaꜙkyʉ̱ʉ̱yꜗ.
6Gaꜙjehꜗ dsëyꜗ läꜙji̱i̱hˈ gaꜙjlä̱ä̱yˉ.
Hiꜙ gaꜙji̱i̱ꜗ kiyhꜗ läꜙko̱hꜘ dsaˉji̱i̱ꜗ kihꜗ ja̱a̱ˉ dsaˉmëꜘ
maˊ dsaˉläˉcha̱a̱ˉ gyʉ̱ʉ̱ˉ kya̱a̱yꜗ.
7Gaꜙjmeehˊ kiyhˈ läꜙko̱o̱ˉ jmeeꜙ lleꜘ täꜘ
heˉ gwaꜘ taꜙ jeeˊ dsaˉhyaꜙ hyooˉ
heˉ chiˉjøø˜ barco kihꜗ Tarsis.
8Hneˉ DSAˉJØ̱Ø̱Hˈ kya̱a̱nꜙ hi̱ˉ chaˉ gaꜙläꜙjëꜙ beꜘ kihꜗ,
jeeˊ jwɨɨˉ kyahꜗ maˉnʉʉˊ jnäähꜗ
haˉ ko̱hꜘ jø̱ø̱hˈ saꜙ la̱a̱hꜗ hneˉ.
Hiꜙ naꜗ maˉjëëˊ jnäähꜗ hñaaꜗ jnäähꜗ, maꜙraꜙ heˉ høøhˉ baˊ hneˉ jeeˊ jwɨɨˉ kyahꜗ läꜙjëꜙ johꜘ jmɨɨˊ chaˉ.
9Dsaˉläˉdsooh˜ dsëˉ jnäähˈ nehꜙ gwahꜙ kyahꜗ
heˉ läˉñihꜘ hohꜘ jnäähˈ.
10Läꜙka̱a̱ˉ jmɨˉgyʉʉꜙ jmeeꜙ jʉʉhˉ kyahꜗ,
ja̱ˉbaˊ läꜙko̱hꜘ hiiꜘ juuˈ kyahꜗ läꜙka̱a̱ˉ.
Jëëhꜘ hneˉ Dio jmeehˉ heˉ lluꜗ jmahꜗ baˊ.
11Waˊ cha̱a̱ˉ lluꜗ läꜙjë̱ë̱ꜙ hi̱ˉ cha̱a̱ˉ mohꜘ Sión,
waˊ jë̱ë̱˜ dsëˉ läꜙjë̱ë̱ꜙ dsaˉ hi̱ˉ cha̱a̱ˉ Judá,
waˊraˉ gaꜙjëëyꜗ llahˉ taˊ kya̱a̱hˊ juꜗdsooꜘ jmahꜗ.
12Ngëëˊ hnähꜘ läꜙkuˊ läꜙji̱i̱ꜗ kihꜗ Sión,
mahꜗ heˊ hnähꜘ johꜘ hneꜗ ñiiꜘ tø̱ø̱ꜘ jeeˊ läꜙjëꜙ.
13Jëëˋ hnähꜘ haˉ läꜙ chihꜗ naˊhyahˉ kihꜗ,
hiꜙ haˉ läꜙ laꜗ hneꜗ jeeˊ dsaˉta̱a̱hˋ dsaˉ hi̱ˉ høøꜙ jeeˊ jwɨɨˉ ja̱ˉ,
mahꜗ jmeehˈ hnähꜘ juuˈ kihꜗ dsaˉ hi̱ˉ naꜗ gaˊ läꜙcha̱a̱ˉ.
14Jëëhꜘ Dio jnänˋ,
la̱a̱ꜗ Dio hi̱ˉ cha̱a̱ˉ gaꜙläꜙjëꜙ johꜘ jmɨɨˊ chaˉ.
Hiꜙ läꜙja̱ˉ jøøyꜙ jnänˋ tä̱ä̱ꜘ kaˉlähꜘ.
Currently Selected:
Salmos 48: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.