Juan 6
6
Pisqa waranqa runakuna mikuyashqan
Mateo 14.13-21; Marcos 6.30-44; Lucas 9.10-17
1Saypitanami Tiberias niyashqan Galilea qochata Jesús simparqan. 2Qeshyaqkunata aliyäsishqanta rikarmi Jesúspa qepanta aska runakuna aywayarqan. 3Qocha simpanchönami lömaman aywaykur discïpulunkunawan jamakuyarqan. 4Say junaqkuna Israel runakunapa Pascua fiestan chaykämurqannami. 5Paykuna kaykäyashqanman aska runakuna chäyashqanta rikarmi Felipita Jesús nirqan: <<Kaysika runakunapaq ¿maypitataq mikuyta rantimushun?>>
6Sayno nirqan <<mä Felipe ima nimänaqshi>> nishpanmi. Jesús musyarqannami imata rurananpaq kashqantapis. 7Saymi Felipe nirqan: <<Ishkay pachak (200) junaq arur gänapakushqansiwan rantimushqapis manami ichik ichikla yawarkuyänalanpaqpis aypanqasu>>.
8Sayno niptinmi Jesúspa discïpulun Andrés nirqan (Andrésqa Simón Pedrupa wawqinmi karqan): 9<<Kaycho juk wamrapami pisqa cebäda tantan y ishkay pescädun kaykan. Saylaqa manami kaysika runapaq aypanqasu>>.
10Niptinmi discïpulunkunata Jesús nirqan: <<Lapan runakunata jamasiyay>>. Discïpulunkuna jamakuyänanpaq niyaptinmi aska qewa jananman runakuna jamakuyarqan. Runakuna pisqa waranqanömi (5,000) kaykäyarqan. 11Say pisqa tantata Jesús aptarkushpanmi Tayta Diosta manakur päkilä nirqan. Nirkurnami jamaraykaq runakunata [discïpulunkuna] aypuyarqan. Saynölami pescädutapis aypuyarqan. Aypuyaptinmi lapanpis pacha junta mikuyarqan.
12Runakuna mikuskiyaptinnami discïpulunkunata nirqan: <<Pusuqkunata lapanta shuntayämuy. Ama imatapis perdisishunsu>>.
13Sayno niptinmi pisqa cebäda tantalapita pusuqta chunka ishkay canasta juntata shuntayarqan. 14Say milagru rurashqanta rikaykurmi runakuna niyarqan: <<¡Kay runaqa Tayta Dios kachamunanpaq kaq profëtami kaykan!>>#Deut. 18.15-18.
15Sayno niyashpanmi mandaqnin rey kananpaq imaykanöpapis churayta munayarqan. Sayta tantiyarmi jirkapa Jesús japalan aywakurqan.
Yaku jananpa Jesús aywashqan
Mateo 14.22-27; Marcos 6.45-52
16Pasa sakaykaptinnami Jesúspa discïpulunkuna qocha kuchunman kutiyarqan. 17Pasa sakashqanyaqpis Jesús mana kutimuptinmi büquiman wisarkur Capernaúm markaman aywayarqan. 18Aywaykäyaptinmi fiyupa wayraptin yaku sharkur qalaykurqan. 19Saypita juk lëwatano aywaykäyashqanchömi Jesústa rikayarqan yaku jananpa paykuna kaqmanpa aywaykaqta. Sayta rikaykurmi fiyupa mansakäyarqan. 20Saymi Jesús nirqan: <<¡Noqami kaykä! ¡Ama mansayämaysu!>>
21Niptinmi Jesús wisänanpaq büquita ichisiyarqan. Saypita raslami qocha kuchunman chäyarqan.
Imayyaqpis kawasikuq tanta kashqanta Jesús nishqan
22Pasa wararkuptinnami quëdaq runakuna tantiyakuyarqan saycho kaykaq juklayla büquiwan discïpulunkuna aywakuyashqanta. Saynöpis tantiyakuyarqan paykunawan Jesús mana aywashqantami. 23Sayno kaykäyaptinmi Tiberias markapita büquikuna chäyarqan Señor Jesús tantata qarashqan cercanman. 24Jesústapis ni discïpulunkunatapis mana tariyashpanmi say büquikunawanna Jesústa ashir Capernaúm markaman aywayarqan.
25Capernaúmcho tariykurmi tapuyarqan: <<Rabí, ¿imaytaq kaypa shamushkanki?>>
26Saymi Jesús nirqan: <<Rasunpami nï: Manami qamkunaqa milagrukunata rikarsu ashiykäyämanki, sinöqa pacha junta mikuyashlaykipitami. 27Pachalaykipaq aruyänaykipa trukanqa imayyaqpis kawasikuq mikuyta tariyänaykipaq aruyay. Say mikuytaqa Runapa Surinmi kamaripäyäshunki. Saypaqmi Tayta Dios kachamush>>.
28Sayno niptinmi tapuyarqan: <<Tayta Diospa aruynincho aruyänäpaq ¿imatataq rurayäman?>> nir.
29Saymi Jesús nirqan: <<Tayta Diospa aruyninqa kaykan kachamushqanman yärakuyashqaykimi>>.
30Sayno niptinmi niyarqan: <<Tayta Dios kachamushushqaykita criyiyänäpaqqa mä juk milagruta ruray. 31Unay ayllunsikunaqa sunyaq jirkacho manátami mikuyarqan. Tayta Diospa palabranchöpis kaynömi qelqaraykan: <Jana pasapita kaq tantatami mikuyänanpaq kamariparqan> >>.#Éxo. 16.4, 15; Sal. 78.24.
32Saymi Jesús nirqan: <<Rasunpami nï: Manami Moiséssu jana pasapita kaq tantata kamariparqan, sinöqa Taytämi. Paymi jana pasapita rasunpaypa kawasikuq tantataqa qarayäshunki. 33Say tantaqa jana pasapita shamuq runami kaykan. Paymi pïmaytapis mana ushakaq kawayta qonqa>>.
34Saymi niyarqan: <<Taytay, say tantataqa imaypis kamaripaykayälämay>>.
35Sayno niyaptinmi Jesús nirqan: <<Noqami kawasikuq tanta kaykä. Noqata chaskikamaq kaqqa imaypis manami mikananqanasu ni yakunanqanasu. 36Mayna nishqänölami rikaykämarpis criyiyämankisu.
37<<Taytä qomashqan runakunaqa lapanmi chaskikayäman. Noqata chaskikamaqkunataqa manami pitapis qarqushaqsu. 38Manami kikï munashqäta ruranäpaqsu jana pasapita shamushkä, sinöqa kachamaqnï munashqanta ruranäpaqmi. 39Kachamaqnï [Taytä] manami munansu qomashqan runakunata ni juklaylatapis oqranäta, sinöqa lapantapis juiciu finalcho kawarisimunätami. 40Pay munan lapanpis Surinman criyiqkuna mana ushakaq kawayta tariyänantami. Paykunataqa juiciu finalchömi kawarisimushaq>>.
41<<Noqaqa jana pasapita shamuq tantami kaykä>> niptinmi saycho kaykaq Israel runakuna Jesústa manakaqman churar 42niyarqan: <<Kay runaqa ¿manaku Josépa surin Jesús kaykan? Musyansimi maman taytan pï kashqantapis. ¿Imanirtaq payqa <jana pasapitami shamushkä> nikämansi?>>
43Sayno niyaptinmi Jesús nirqan: <<Manakaqman ama churayämaysu. 44Kachamaqnï Taytä mana tantiyasiptinqa manami pipis chaskikamanmansu. Chaskikamaqkunataqa juiciu finalchömi kawarisimushaq. 45Profëtakuna qelqayashqanchöpis kaynömi nikan: <Lapan runakunata kikïmi yachasishaq>.#Isa. 54.13. Say nishqannölami Tayta Dios tantiyasishqanta chaskikuq kaqkunaqa lapanpis chaskikayäman. 46Tayta Diosta manami pipis rikashsu. Diospita shamuq runalami payta rikash. 47Rasunpami nï: Noqata chaskikamaqkunaqa mana ushakaq kawaytami tariyanqa.
48<<Noqami kawasikuq tanta kaykä. 49Unay aylluykikuna sunyaq jirkacho manáta mikurpis wanuyarqanmi. 50Jana pasapita shamuq tantata mikuqkunami isanqa wanuyanqasu. 51Noqami jana pasapita shamuq kawaykaq tanta kaykä. Pipis kay tantata mikurqa mana ushakaq kawaytami tarinqa. Kay tantaqa kikïpa aysämi. Runakuna mana ushakaq kawayta tariyänanpaqmi aysäta sacrificiutano Tayta Diosman entregashaq>>.
52Sayno niptinmi Israel runakuna kikinpura parlar niyarqan: <<¿Imanöpataq kay runa aysanta mikasimäshun?>>
53Saymi Jesús nirqan: <<Rasunpami nï: Runapa Surinpa aysanta mana mikurqa y yawarninta mana upurqa manami mana ushakaq kawayta tariyankisu. 54Aysäta mikur y yawarnïta upurmi isanqa mana ushakaq kawayta tariyanki y juiciu finalchöpis kawarisimushayki. 55Noqapa aysäqa rasunpaypa kaq mikuymi y yawarnïpis rasunpaypa kaq yakumi. 56Aysäta mikuq kaqqa y yawarnïta upuq kaqqa noqawanmi juklaylano kanqa y noqapis paywanmi juklaylano kashaq.
57<<Noqa kawaykä kachamaqnï y imayyaqpis kawaq Taytä kawayta qomaptinmi. Taytäpita kawayta chaskishqänölami aysäta mikuq kaqkunapis noqapitaraq kawayta chaskiyanqa. 58Jana pasapita shamuq tantami noqa kaykä. Say tantaqa manami unay aylluykikuna manáta mikuyashqannösu kaykan. Paykunaqa manáta mikurpis wanuyarqanmi. Kay tantata mikuqkunami isanqa imayyaqpis kawayanqa>>.
59Jesús sayno yachasirqan Capernaúmcho kaykaq sinagögachömi.
Jesús yachasishqankuna mana ushakaq kawayta qomänansipaq kashqan
60Sayno yachasishqanta wiyayashpanmi Jesúspa askaq discïpulunkuna niyarqan: <<Kay yachasikuykunaqa aja tantiyaymi kaykan. Sayno parlaptinqa ¿piraq payta criyinqa?>>
61Sayno nikäyashqanta tantiyarmi Jesús nirqan: <<¿Yachasishläpitaku rabyanäyanki? 62Sayno rabyanarqa ¿ima niyankimanraq Runapa Surin jana pasaman kutiykaqta rikar? 63Manami pipis kikilanpitasu mana ushakaq kawayta tarin, saypa trukanqa Espïritupitaraqmi. Noqa yachasishqäqa Espíritu Santupita karmi mana ushakaq kawayta qoyäshunaykipaq kaykan. 64Sayno kaykaptinpis wakinnikiqa nishqäkunata manami criyiyankisu>>.
Jesús sayno nirqan mayqan runakuna payta mana chaskikuyashqanta musyarmi. Saytaqa qalaykunanpita pasami musyarqan. Saynölami musyarqan mayqan discïpulun payta rantikunanpaq kashqantapis.
65Saymi Jesús nirqan: <<Wakinniki mana criyiyashqaykita musyarmi mayna nishkä: <Taytä mana tantiyasiptinqa manami pipis chaskikamanmansu> >>.
66Jesús nishqankunata wiyarmi aska discïpulunkuna payta kacharir aywakuyarqan. 67Aywakuyaptinmi chunka ishkay akrashqan kaq discïpulunkunata Jesús tapurqan: <<¿Qamkunapis aywakuytaku munaykäyanki?>>
68Saymi Simón Pedro nirqan: <<Taytay, qampita mas jukqa manami pipis kansu qatiränäpaq. Nishqaykikunaqa mana ushakaq kawayta tariyänäpaqmi kaykan. 69Noqakuna qammanmi criyiyä. Qamqa Tayta Dios kachamushqan santu runami kaykanki#6.69 Wakin qepa kaq griego copiakunaqa niyan: Qamqa kawaykaq Tayta Diospa Surin Cristumi kaykanki.>>.#Mat. 16.16; Mar. 8.29; Luc. 9.20.
70Saymi Jesús nirqan: <<¿Manaku discïpulükuna kayänaykipaq qamkunata chunka ishkayta akrashkä? Sayno kaptinpis juknikiqa diablupa munayninchömi kaykan>>.
71Jesús sayno nirqan Simónpa surin Judas Iscariotipaqmi. Payqa apostolnin kaykarpis Jesústa wanusiyänanpaqmi rantikurqan.
Currently Selected:
Juan 6: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.