Jṉ. 5
5
Pitistanam Jesus emearun tsuarma
1Nu naṉkaamasmatai Israer shuar namperan najanainiakui Jesus ataksha Jerusaréṉnum waketkimiayi. 2Jerusaréṉ yama waya̱munam Murik Wáitiniam ayamach entsa pajamtai ámiayi. Nu pajamtain Pitista tiniu ármiayi. Nuna wáitiri̱ṉkia seṉku ármiayi. 3Nui̱ untsurí jainia kusurúsha shutuapsha emearusha entsa miartukat tusa nákak tepearmiayi. 4Kame Yusa suntarí̱sha entsá miarmamtikiataj tusa ni tátaj taku táuyayi. Nuya̱ṉka emka jaa entsá wayá̱ ni jáamuri̱ya̱ tsuámamiayi. 5Áishmaṉ traintiúchu uwí jaa nui̱ tepemiayi. 6Jesussha nu áishmaṉ jaa tepan wainkiamiayi. Tura untsurí uwí jaan nekáa chicharuk “¿Péṉker ajastin wakeramek?” 7Tutai jaasha chichaak “Uuntá, entsa miartukmatai ¿winia yaki eṉketat? Kame wi eṉkemátaj tai̱ chíkich emka eṉkemáiniawai” tímiayi. 8Nuyá̱ Jesus chicharuk “Nantakim ame peakrum jukim wetá” timiayi. 9Tutai nu chichamtaik áishmaṉ shiir ajasmiayi. Tura ni peakri̱n jukí̱ wémiayi. Nusha ayampratin tsawantai̱ túrunamiayi. 10Tuma asamtai Israer shuar shiir ajasún chicharainiak “Yamái ayampratin tsawantaiti. Peakrum júkishtiniaitme” tiármiayi. 11Áishmaṉsha chichaak “Winia tsuara nu peakrum jukim wetá turutní̱” tímiayi. 12Takui̱ “¿Ya peakrum jukim wetá túramam?” tiármiayi. 13Tura áishmaṉsha Nin tsuárun nékachmiayi. Untsurí shuar írunu asamtai tura Jesus wéu asamtai nin nekaachmiayi.
14Atak Jesus Yusa Uunt Je̱e̱n áishmaṉkan wainiak chicharuk “Antukta. Yamaikia shiir ajasume. Atak awaiṉkim yajauch túrawaip nu arant ajasá̱i̱m” tímiayi. 15Nuiṉkia áishmaṉsha tsuarama nuka Jesusaiti tusa Israer shuaran werí ujakmiayi. 16Núnaka ayampratin tsawantin tura asamtai Israer shuar Jesusan maatai tusar patatiarmiayi. 17Tura Jesus chichaak “Wina Aparka yamaisha tuke takaawai. Núnisnak wisha takaajai” 18takui̱ Israer shuar nuna naṉkaamas maatai tusa wakeriarmiayi. Ayampratin tsawantai̱ takaakui kajerkarmiayi. Tura nu arantcha “Yus Winia Aparuiti” takui̱ Yusja̱i̱ métek enentáimtumawai tusar nu arant kajerkarmiayi.
Yusa Uchirí̱ túramu
19Nuyá̱ Jesus chichaak “Tí nekas tájarme, Yusa Uchirí̱ṉkia ni enentái̱ji̱a̱i̱ṉ takaatsui. Antsu aya Winia Apar takaana nuna iisan métek takaajai. Ashí Winia Apar túramun Wisha ni Uchirí̱ asan métek takaajai. 20Ni Uchirí̱ asamtai Winia Apar anentui. Ashí túraj nuna iniakturui túrasha Wi túratniunka nuna naṉkaamas tujintkiachminian iniaktursattawai. Atumsha Wi nuna túrakui nekas ashamkattarme. 21Winia Apar jakamunmaya̱n iwiaaku ajasat tusa Ni wakerana nuna inianteatsuk. Núnisnak ni Uchirí̱ asan Wi wakeraj nuna iwiaaku awajsámniaitjiai. 22Winia Aparka sumamtiktsui antsu shuar sumamtikiatniunka ni Uchirí̱n súsaiti. 23Tuma asamtai ashí shuar Yus Apan shiir awajainia áintsaṉ ni Uchirí̱ncha métek shiir awajsatin áiniawai. Yus Apa ni Uchirí̱n akupka asamtai Uchirí̱n shiir awajeatsna nuka Yus Apancha shiir awajeatsui” tímiayi.
24 “Tí nekasan tájarme. Winia chichamprun ántana nú shuarka Winia Akuptúkun enentáimtak ni iwiaakmari̱ peṉké amuukashtinian tákakui. Nu shuarsha aya̱shí̱ iwiaakuitiat jákauyi antsu yamaikia nekas iwiaakui. Tuma asa sumamashtatui. 25Tí nekasan tájarme. Tsawant átatna nu jeayi. Nu tsawant jaka ainia nu Yusa Uchirí̱ untsumman antukar iwiaaku ajasártatui. 26Iis, Winia Apar iwiaaku awajsatniun ímia Niṉki takakui. Tura Winiasha ni Uchirí̱ asamtai iwiaaku awajsatniun surusuiti. 27Nu arantcha Wi Aents Ajasu asamtai shuaran súmamtikiatniun surusuiti. 28‘Ju̱ chicham itiurchataiti’ enentáimprairap. Tsawant jeattana nui̱ṉkia ashí jákaru ainia nuka Wi untsumman antukartatui. 29Tura ashí iwiarsamunmaya̱ jíintrartatui. Tura péṉkeran túrawaruka nantakiar tuke iwiaaku pujusártatui. Antsu yajauchin túrawaruka nantakiar jinium surunkartatui” tímiayi.
Jesus nekas Yúsaiti tama
30 “Wikia, Wi wakeramun e̱a̱tsjai antsu Winia akuptúkua nu wakeramun túrajai. Tuma asan Wíkikia warinkisha túratsjai. Wi itiur ántaj tímiatrusnak súmamtikiajai. Witjiai súmamtikiunka nekasa nuja̱i̱ métek súmamtikiajai. 31Wiki ‘Wínian etsertumaknaka’ aya Winia chichampruk ainti. 32Chikicha Wínian etserturna nu awai. Ni chichame̱sha imiá nekasaiti. 33Atumsha Juaṉkai̱ chícham akupkámarme. Nisha nekasa nuna ujatmákmarme. 34Túrasha wi yáitiaj núnaka aentsun ujaktinian atsumatsjai. Antsu Wi tájana nuka átum uwemprakᵘ tusan tájarme. 35Kame Wínian etserturna nuka Juáṉnaka naṉkakaiti. Winia Apar takastinian surusua nuna takaakun Winia Apar akupkámuitiaj núnaka Wi túrajna nuke Wínianka étserui. 36Tura Winia ‘Yusai̱ya̱iti’ túrutna nuka, Juaṉja̱i̱ naṉkaamas péṉkeran Wikia takakjai. Wi takasmajna nuiti. Winia Apar takastinian surusma nuna takaakun nuja̱i̱ páantaiti Yus Apa akupkámuitjiai. 37Winia Aparsha akuptúku asa ayamprutui. Túrasha átumka ni chichame̱sha antukchaitrume tura waintiasha wáinkiachuitrume. 38Yus Apa akuptúkuiti. Tuma asamtai Winia enentáimturchakrum winia Aparu chichame̱sha atumí enentái̱n waya̱chuiti. 39Átumka Yus Chicham yaunchu aarma nui̱ iwiaaku átinian wáinkiataj tusarum tí unuimiaruitrume. Nu chichamsha Wínian áujmatui. 40Tuma ai̱ṉ nekas iwiaaku átaj tusarum Winí̱ tátin nakitiarme.
41 Shuar Winia shíiraiti turutainiakuisha núnaka páchiatsjai. 42Maa, Wi nékajrume. Átumka Yus aneatsrume. 43Winia Apar akuptúkmatai táwitjiai túrasha nakitrarme. Antsu chíkichkia ní enentái̱ji̱a̱i̱ṉ jeartámkuiṉkia nuka átum wakerarme. 44Aya nuamtak ‘Shiir enentáimtursarti’ tu enentáimtunaiyakrum tura nekas Yusa nu enentáimturmana nuka enentáimtutsuk ¿itiurak nuikia Yus tana nu nekaatniusha jeatarum? 45‘Ii yajauch túrutairi̱n Yusai̱ etserturmaktatji’ turutiirap. ‘Muisais akupkámun umirkan uwemprattajai’ tátsurmek. Antsu Muisais aarma nuja̱i̱ atumí tunaarí̱ etsernaktatui. 46Iis, Muisais Winia áatrurmiayi. Atumsha ni timia enentáimtakrumka Winiasha enentáimturaintrume. 47Tura ni aarma enentáimtachkurmeka ¿itiurak wi tájarmena nusha enentáimtustarum?” tímiayi Jesus.
Currently Selected:
Jṉ. 5: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.