Romanos 5
5
Dioswanqa allinyanakusqaña kasqanchikmanta
1Iñisqallanchikraykum Diosqa mana huchayuqpaqña chaskiwanchik, Señorninchik Jesucristontakamam Dioswan hawkayayta haypanchik. 2Iñisqanchikraykum Jesucristontakama Diosman asuykunchik hinaspa kuyakuyninwan allinta takyachkanchik. Hinaspataqmi kusikuchkanchik Diosman rikchakuq kancharichkaq suma-sumaq kananchikta confianzawan suyaspa. 3Chaynataqmi ñakariykunapipas kusikunchik, ñakariykunaqa pacienciakuytam yachachiwanchik, 4pacienciakuyñataqmi allinpaq hapisqa kayta, allinpaq hapisqa kayñataqmi Diosman hapipakuyta; 5Diospi hapipakuyñataqmi paypi takyachiwanchik, Diosmi kuyakuyninta sonqonchikman huntaykuwarqanchik qowasqanchik Chuya Espirituntakama.
6Salvakuyta mana atichkaptinchikmi Diospa akllasqan tiempo chayaramuptin ñoqanchik huchasapakunapa rantinchikpi Cristo wañurqa. 7Cheqaptapas huk allin ruwaq runapa rantinpi wañuruyqa sasallañam, ichapas allin ruwaq runapa rantinpi hukkaq wañurunman. 8Diosmi ichaqa kuyakuyninta qawachiwanchik huchasapa kachkaptinchikpas ñoqanchikrayku Cristo wañupuwasqanchikwan. 9Cristopa yawar chaqchusqanwanmi mana huchayuqtaña Dios ruwaykuwanchik, chaynapim paynintakama tukupay punchawpi Diospa piñakuyninmanta salvasqaña kasunchik. 10Diospa enemigon kachkaptinchikpas, Churin Jesuspa wañusqanwanmi kikinwan allinyanaykachiwanchik. Chaynaqa, Dioswan allinyanakusqaña kaspanchikqa, aswanraqmi vidanrayku salvasqa kasunchik. 11Manataqmi chayllachu, Señorninchik Jesucristontakamam Diospi kusikusunchik, Jesucristontakamam Dioswan allinyanakuyta haypaykunchik.
Adanmantawan Cristomanta
12 #
Gn 3.6. Huk runantakamam kay pachaman hucha yaykuramurqa, huchantakamañataqmi wañuypas yaykuramurqa, chay wañuymi lliw runakunaman chayarun llapallanku huchayuq kasqankurayku. 13Manaraqpas kamachikuykuna qomusqa kachkaptinqa, ñam huchaqa kay pachapi karqaña; chaywanpas maypim kamachikuypa mana kasqanpiqa manam pipas huchayuqpaq hapisqachu. 14Ichaqa Adanmanta Moiseskamam lliw huchallikuqkunapi wañuy munaychakurqa, paykunaqa manam Adán hinachu kamachikuypa contranpi huchallikurqaku. Adanmi karqa hamuq Cristopa rikchaynin.
15Chaywanpas Adanpa mana kasukuyninqa manam rikchakunchu Diospa kuyakuynin qowasqanchikmanqa. Huk runapa huchallikusqanmantam lliw runa wañun, Diospa mana imallapaq huk runantakamalla otaq Jesucristontakamalla kuyakuy qowasqanchikmi ichaqa lliwpa allinninpaq, chayqa hatu-hatunmi. 16Adanpa huchallikusqantaqa manam tupachichwanchu Diospa qowasqanchik kuyakuywanqa. Huk huchallamantam wañuy hamurqa, Diospa kuyakuy qomusqanmi ichaqa mayna huchayuq kachkaptinpas runakunata mana huchayuqtaña ruwaykun. 17Imaynam huk runapa huchallanmanta wañuy munaychakurqa, chaynam mana imallapaq Diospa salvasqan runakunapas sapallan Jesucristopa ruwasqallanwan musoq kawsakuypi aswanraq munaychakunqaku.
18Chaynaqa, imaynam huk runapa huchallamanta lliw runakuna wañuypaq condenasqa karqanchik, chaynapunim sapallan Jesucristopa allin ruwasqanpas llapa runakunata mana huchayuqtaña ruwaykun chaynapi wiñay kawsanankupaq. 19Imaynam chullalla runapa mana kasukusqanwan achkallaña runakuna huchasapa rikurirurqaku, chaynam chullalla runapa kasukusqanwanpas achkallaña runakuna mana huchayuqña rikurinqaku.
20Leyqa qomusqa karqa hucha astawan achkayananpaqmi, ichaqa hucha astawan rikuriptinmi, Diospa kuyapayakuyninpas aswan chaninchasqa karqa. 21Imaynam huchaqa wañuyta aparamuspan munaychakurqa, chaynam Diospa kuyakuyninpas mana huchayuqtaña ruwawaspanchik munaychakurqa, Jesucristontakama wiñay kawsakuyta qowaspanchik.
Currently Selected:
Romanos 5: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012