Hechos 12
12
Jacobota wañuchisqankumantawan Pedrota carcelasqankumanta
1Chay tiempopim rey Herodesqa wakin iñiqkunata ñakarichinanpaq qatikachayta qallaykurqa. 2Juanpa wawqen Jacobotapas espadawan wañuchinankupaqmi kamachikurqa. 3Chaymi Judiokunapa gustonpaq kasqanta qawaspan Pedrotapas presocharurqa. Chayqa pasakurqa mana levadurayuq tantata mikunanku fiesta punchawpim. 4#Ex 12.1-27.Pedrota presocharuspanmi carcelman wichqarurqa, hinaspam chunka soqtayuq soldadokunata tawaman rakinaruspan turnonpi cuidachirqa. Payqa Pascua fiesta pasaruptinñam Pedrota juzgananpaq runakunapa qayllanman hurqomuyta munarqa. 5Chaynapim Pedroqa carcelpi allin cuidasqa karqa, llapa iñiqkunañataqmi paypaq tukuy sonqonkuwan Diosta mañakurqaku.
Pedrota Dios librasqanmanta
6Chay tutam Pedroqa iskay cadenawan watasqa hinaspa iskay soldadokunapa chawpinpi puñuchkarqa, wakin soldadokunañataqmi punkupi kachkarqaku carcelta cuidaspanku. Chayqa karqa llapa runakunaman Pedrota Herodespa hurqomunan punchawpa ñawpaqnin tutatam. 7Hinaptinmi qonqayllamanta Señorpa angelnin chaypi rikuriykuspan chay carcelta kanchayninwan huntaykurqa. Chay angelmi Pedrota waqtanpi llapchaykuspan rikcharichirqa, hinaspanmi nirqa:
Utqayman hatariy, nispa.
Hinaptinmi Pedropa makinmanta cadenakuna wichirurqa. 8Angelñataqmi nirqa:
“Weqawnikita allinta watakuy hinaspa usutaykiwan churakuy”, nispa.
Chaynata Pedro ruwaruptinmi chay angelqa nirqa:
Capaykiwan wankukuspayki qatiway, nispa.
9Pedroñataqmi lloqsiruspan angelta qatirqa, ichaqa manam yacharqachu angelpa ruwasqanqa cheqap kasqanta, aswanqa piensarqa visionlla kasqantam. 10Ichaqa iskay punkupi kaq soldadokunapa ñawpaqninta pasaruspankum calleman lloqsiq fierro punkuman chayarurqaku, hinaptinmi chay punku kikillanmanta kichakuykurqa. Lloqsiruspanku huk calletaña richkaptinkum chay angelqa qonqayllamanta sapallanta saqerurqa. 11Hinaptinmi Pedroqa musyakuruspan nirqa:
Kunanmi ichaqa cheqappuni kasqanta yacharuni. Señormi angelninta kachamuwarqa Herodesmanta hinaspa llapa judiokunapa makinmanta librawananpaq, nispa.
12Chaynata yuyaymanastinmi Pedroqa Juan Marcospa maman Mariapa wasinman rirqa. Chay wasipim achka runakuna huñunakuspanku Diosta mañakuchkarqaku. 13Hawa punkuta Pedro takaykuptinmi Rode sutiyuq sipascha lloqsiramurqa. 14Ichaqa Pedropa rimasqanta musyaruspanmi kusikuyllawanña mana punkutapas kichaspan ukuman kallparqa, hinaspam nirqa:
¡Pedrom punkupi kachkan! nispan.
15Chaymi sipaschata nirqaku:
¡Icha locayarunki! nispanku.
Payñataqmi nirqa:
¡Pedropunim! nispa.
Paykunañataqmi aswanraq nirqaku:
¡Manam payqa kanmanchu, angelninchá! nispanku.
16Pedroñataqmi punkuta takay-takachkarqa, hinaptinmi kichaykuspa pay kasqanta rikuykuspanku llumpayta hukmanyarurqaku. 17Pedroñataqmi makinwan señaschaspan upallachirqa, hinaspam paykunaman willarqa, Señorpa imaynam carcelmanta hurqomusqanta. Nirqataqmi:
Kaytayá willaychik Jacobomanwan iñiqmasinchikkunaman, nispa.
Chaymantam lloqsiruspan huklawman pasakurqa.
18Achikyaruptinmi soldadokuna llumpay chaqwapi karqaku, imaynanpim Pedro chinkarusqanta mana yachaspanku. 19Herodesñataqmi Pedrota maskachimuspan mana tarimurqakuchu, hinaptinmi cuidaq soldadokunata allinta tapuykuspan paykunataña wañuchinankupaq kamachirqa. Chaymantam Herodesqa ripukurqa Judeamanta Cesarea llaqtapi yachananpaq.
Herodespa wañusqanmanta
20Tiro llaqtapi hinaspa Sidón llaqtapi runakunam Herodespa llaqtanmanta kawsaykunata chaskiqku; ichaqa Herodesmi paykunapaq piñakuruspan manaña apachirqañachu, chaymi paykuna tanteanakuruspanku rey Herodespa confianza serviqnin Blastowan amistadta armarurqaku, chaynapi paypa yanapakuyninwan Herodeswan allinyanakuyman yaykunankupaq. 21Chaymi Herodesqa paykunata qayachirqa huk punchaw rimanakunankupaq. Chay punchaw chayaramuptinmi rey pachanwan pachakuruspan trononpi tiyaykuspan llapa runakunaman rimarirqa. 22Hinaptinmi chay runakuna qaparispanku nirqaku:
¡Kayqa diospa rimayninmi, manam runapachu! nispanku.
23Chayllamanmi Señorpa angelnin hamuruspan Herodesta onqorachirqa, Diosta mana hatunchasqanmanta. Hinaptinmi urukunapa mikusqan wañururqa.
24Diospa palabranmi ichaqa tukuy hinastinpi willakuptinku mirarqa.
25Bernabeywan Sauloñataqmi yanapakuyninkuta tukuruspanku Jerusalenmanta kutikurqaku Marcoswan sutichasqa Juanta pusarikuspanku.
Currently Selected:
Hechos 12: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012