ZLI VIRZI 13
13
1Dar Abram a mo ti Ezipte nga ruwuy Kanaˀan vay ruwuy ati ngwas naŋ waɗ gwat naŋhay gar. Taŋ bummoˀ ati Loto.
Abram ati Lot muwunkam
2Abram i mbur misi zlili haɗa teˀe, naŋ ti gezleŋ ngi ginewey haɗa, ti dala waɗ ɓiri tapals tapasl. 3A slikiɗ nga mbuŋ neˀneˀ, hã sesẽŋ a Betel, ar li naŋ micifi dumbuŋ, ar wala ngi Betel ati Ay tuwa. 4Ar li naŋ miɗiya li gi mikuli ara zleˀe tuwa, Abram a tumbulo Bumbulvuŋ a diga, a zila Buymisemuŋ ti slimiɗ naŋ Bumbulvuŋ. 5Lot mubummoˀ ati Abram tuwa kwana, naŋ da ti gezleŋ ngi tumuŋhoy, ˀaway, slahay waɗ guɗukoy ma. 6Li a ndila taŋ ɓa a cifam cuwa arleˀe gu ta. Asi zlili taŋhay a gam le haɗi kuyta wãˀ, hã a cifam jom arleˀe gu ta. 7Tiri a slikiɗ ar wala ngi mijigin ngi Abramay ati ngi Lotoyo. Ti nah na, i Kanaˀanay ati Perizihey misi asi hirwuyo. 8Joˀ Abram a ɓa Loto na: «Anja tiri a slikiɗ ar wala ndra ati ka ta, malla ar wala ngi mijigin ɗuwoy ati ngi ɗikey ta, asi ndr'i ngi wazlaray purla. 9Hirwuyo n'ani a mbuŋ ɗike takwa? Hunukukum so: da ki ru tir vay muŋ na, yi ru tir vay ruwuy. Da ki ru tir vay ruwuy na, naɓa yi ru tir vay muŋ.» 10Lot, a pura hirwuy ngi mi mizaw Zurdeŋ keɗ keɗ na, li ara hir haɗa. Dumbuŋ ti Bumbulvuŋ mususuyumo Sodom ati Gomoro t'aruŋ na, zle a diga hã a Suwara, naŋ kaɓa guva ngi Bumbulvuŋ a Eden, kaɓa Sozo ngi ruwuy Ezipte. 11Lot a zuɓ nga naŋ, i hirwuy ngi mimizaw Zurden gar, a slikiɗ kini ng'asi pas ngi miprik. A wunkam ar wala taŋ kahana. 12Abram a cifi a ruwuy Kanaˀan, yo Loto kwana a cifi a ruwuy ngi mi mizaw Zurdeŋ, ara ɗiya guɗuk naŋhay sesẽŋ a Sodom. 13Na mizli ngi Sodomoy vuna i misi moˀorehey haɗi, i migi mungrahay kuyta wãˀ a mbuŋ Bumbulvuŋ. 14A dirba Lot muguh na, Bumbulvuŋ a ɓa Abrama: «Zuɓa hiri, pura li bal bal gar, tir vay muŋ, tir vay ruwuy, tir vay si pas ngi miprik waɗ tir vay sipas ngi pastaˀ. 15Haˀaw, hirwuy ka mapura hana gar na, i sa vuluw di da ka ati dideˀ ɗikey hã ngi sete. 16I sa ga ɓa dideˀ ɗikey a sikam haɗi kaɓa murɓuk ngi ruwuy. Da mbur a slufa murɓuk ngi ruwuyo gu na, naɓa a sa slufa dideˀ ɗikeye gu ya. 17Slikiɗ, bula hirwuyo bal bal gar. Vur i sa vuluw di da ka.» 18Abram a kiroho guɗuk naŋhaya, a so cifi asi widis madiɗa a Mamre, gweˀ avu Hebroŋ. A ɗiyi li gi mikuli da Bumbulvuŋ a diga.
Currently Selected:
ZLI VIRZI 13: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.