Johaneb 8
8
ǃGamekhôa-aos
[1Mâ-i hoa-i ge ǁî-i di ǁgâus ǃoa ge ǁaru. Xaweb ge Jesuba ǀKheraǃhommi ǁga ge ǃgû. 2ǃNauǁgoagab ge Tempeli ǁga ge oa. ǂNubis khoen ge ge ǀhao tsîb ge ǂnû hâse ǁîna gere ǁkhāǁkhā. 3ǁNā ǁaeb ǃnâ gu ge Moseb ǂhanub* di ǁkhāǁkhā-aogu tsî Farisegu* tsîga ǃgamekhôas ǃnâ ge ǃkhōhe tarasa ǂgâxa-ū tsî khoen ǁaegu ge mâ kai.
4Tsî gu ge Jesub ǃoa ge mî: “ǁKhāǁkhā-aotse, nē tarasa ge ge ǃgamekhôas ǀkhas ǀhabe hîa go ǃkhō. 5#Lev. 20:10; Deu. 22:22, 24Nēs ǃnâb ge Moseb ǂHanuba ǁnāti ī taradi ge nî ǀuiǁhomhe ti ra mîmā. Satsa mâti ra mî?”
6Nēs ǀkha gu ge Jesuba gere ǃâitsâ, î gu ǁîba gu nî ǀhapiǀhapi-ū xū-e hō ǁkhā, xaweb ge Jesuba ǃgamǃgâ tsî ǀkhunub ǀkha ǃhūb ai ge xoa. 7Tsî ǃeream-e gu ge ǂgaoǀkhā bi, ob ge khâimâ tsî ǁîgu ǃoa ge mî: “ǁNāb hîa sago ǃnâ ǁoreoba ab ǂguro ǀuisa ūkhâi tsî ǁîsa ǂnoa re!” 8Tsîb ge ǁkhawa ǃgamǃgâ tsî ǃhūb ai ge xoa.
9ǀHapiǀhapi-aogu ge nēsa ǁnâu, o gu ge ǀguiǀguibese ge ǃgûbē, kaiba xu tsoatsoa tsî ǂkhammi kōse. Tsîb ge Jesuba nē taras ǀkha ǀguri ge ǃgau. 10Ob ge ǁkhawa khuisen tsî ǁîsa ge dî: “Sa ǀhapiǀhapi-aoga mâpa hâ? ǀGuib ǁîgu dib tsîna ǀgoraǃgâ si tama hâ?”
11Os ge “Hî-î, ǃKhūtse” ti ge mî.
Ob ge Jesuba ǁîsa ge mîba: “Tita on ge ǀgoraǃgâ si tama. ǃGû, î ǃaruǀî tā ǁore.”]
Jesub ge a ǃhūbaib di ǃnâ
12Ob ge Jesuba ǁîgu ǃoa ge mî: “Tita ge ǃhūbaib di ǃnâta. Tita ra sao-i ge tātsē ǃkhaenab ǃnâ ǃgû tide, xawe-i ge ûib di ǃnâba nî ūhâ.”
13 #
Jhn. 5:31
O gu ge Farisega ge ǃeream: “Sats ge aitsama, ama tama ǃkhō-amde sats xa ra dī!”
14Ob ge Jesuba ǁîgu ǃoa ge mî: “Tita xa ta ga aitsama ǃkhō-am, xawes ge ti ǃkhō-amsa a ama. ǂAn ta a mâpa xu ta ge hā tsî maǀî ta garu ǃkhaisa amaga. Xawe go ge nēna tita xa a ǀū. 15Sadu ge khoesi mûǂgāb ǃoa tita ra ǀgoraǃgâ, xawe ta ge tita khoe-i xare-e ǀgoraǃgâ tama hâ. 16Tsî ta ga ǀgoraǃgâ, xawes ge ti ǀgoraǃgâsa a ama, ǀguri ta hâ tama tsî ta ti Îb tita ge sîb ǀkha hâ xui-ao. 17#Deu. 19:15Sadu ǂhunuma ǂhanub ra mîs ge ǀgam khoen ga xū-i ai mîǀgui, os ǁnā ǃkhō-amsa a ama ǃkhaisa. 18Tita ǂûta xa ta ge ra ǃkhō-am tsî ti Îb, tita ge sîb ge tita xa ra ǃkhō-am.”
19“Sa îba mâpa hâ?” ti gu ge ge dî bi.
Ob ge Jesuba ge ǃeream: “Tita a tari ǃkhaisa go a ǀū, xui-ao go ge ti Îb a tari ǃkhais tsîna a ǀū. Tita du ga ǂan hâ io, o du ge ti Îb tsîna ga ǂan hâ.” 20Tempeli ǃnâ, ǁuiǂgaes mâǃnâ ǃnā-oms ǃnâb ge Jesuba nē mîde Tempeli ǃnâ ra ǁkhāǁkhāǃâ ge mî. Xaweb ge ǃkhōhe tama ge i, ǁîb ǁaeb ge ganupe ǀoa tama hâ i amaga.
Tita ra ǃgûpa du ge a sī ǁoa
21Egab ge Jesuba ǁîn ǃoa ge mî: “Tita ge nî ǃgû. Tsî du nî ôa te, xawe du ga sadu ǁoreb ǃnâ hâhâ, o du nî ǁîb ǃnâ ǁō. Sadu ge tita ra ǃgûba ǃkhais tawa a sī ǁoa.”
22O gu ge Jodeǁî ǂgaeǂgui-aoga ge dî: “ǃGamsen ǂgaob kha ra? Tare-eb ra ǂâibasen, ‘Tita ra ǃgûba ǃkhais tawa du a sī ǁoa’ ” tib ra mîo?
23Ob ge Jesuba ǁîn ǃoa ge mî: “Sadu ge ǃnakaba xu hâ tsî tita ǀgapiseba xu. Sadu ge nē ǃhūbaib di; tita ose. 24ǁNās ge ǁoren âdu ǃnâ du nî ǁō ti ta ra mîba du ǃkhaisa; tita a ǁî ǃkhai-e du ga ǂgom tama io, du kom ǁoren âdu ǃnâ nî ǁō-o.”
25“Tarits asa mîba da re” tin ge ge ǂgaoǀkhā bi.
Ob ge Jesuba ge ǃeream: “Tita ge a ǁnā, ǀases tsîna sadu ǀkha goro ǃhoa ta. 26ǂGuina ta ge sado xa mî tsî ǀgoraǃgâsa gowaǂui ǁkhā, xawe tita ge sîb ge a ǂgomǂgomsa tsî ta ge ǁîb tawa ta ge ǁnâun ǀguina ǃhūbaiba ra mîba.” 27Xawen ge ǁnâuǃā tama ge hâ i, ǁGûb xab ra ǁîna ǃhoaba ǃkhaisa.
28Ob ge Jesuba ge mî: “Khoen Ôaba du ga ǃgâuhaib* ai ǀgapiǀgapi, o du ge nî mûǂan tita a ǃkhaisa tsî ti ǁkhāsiba xu ta aitsama xū-e dī tama ǃkhaisa, xawe ta ti Îb xa ta ge ǁkhāǁkhāhe khami ra ǃhoasa. 29Tsî tita ge sîb ge tita ǀkha hâ, ǁîb ge ǀguri ǁnāxū te tama hâ. ǁÎba ǃgâiba xūna ta hūgaǀgui ra dī xui-ao.” 30Khoen nē xūnab ra mîse ge ǁîba ǁnâun ge ǁîb ǃnâ ge ǂgom.
Amab ǀguib ge nî ǃnoraǃnora du
31Tsîb ge Jesuba ǁîb ǃnâ ǂgom hâ Jodeǁîn ǃoa ge mî: “Sadu ge amase a ti ǁkhāǁkhāsabe,* ti ǁkhāǁkhāde du ga ǁnâuǀnamo. 32Tsî du ge amaba nî ǂan, tsîb ge amaba nî ǃnoraǃnora du.”
33 #
Mat. 3:9; Luk. 3:8 “Xawe sida kom Abrahammi di suridao” tin ge ge mî. “Sida kom tātsēs tsîna khoe-i xare-i di khobo tama ge hâ io. Tare-ets ‘ǃnoraǃnora du’ ti mîs ǀkha ra ǂâibasen?”
34Ob ge Jesuba ǁîn ǃoa ge mî: “Amase, amase ta ra mîba du, mâ-i hoa-i ǁoreba ra dī-i ge a ǁoreb di khobo. 35Khobo-i ge omaris di hâhâ ra ǁani tama, xawe ǀgôab ge ǀamose a omaris di. 36Tsî ǀGôab xats ga ǃnoraǃnoraheo, ots ge amase a ǃnorasa. 37Ā, ǂan ta ge a Abrahammi di suridu a ǃkhaisa. Tsî xawen ge ǀnîn âdo ra ǀapeǀape tita ǃgamsa, ti mîs sadu ǂgaogu ǃnâ ǂgâǃkhai-e hō tama xui-ao. 38Tita ge ti Îb tawa ta ge mûn xa ra ǃhoa. Xawe du ge sado sadu îb di ǀapemāsa ra sao.”
39“Sida îb ge Abrahamma” tin ge ǁîba ge mîba.
“Hî-î” tib ge Jesuba ge ǃeream. “Abrahammi di ôadu ga hâo, o du ge ǁîb di ǃgâi aiǁgausa ga sao hâ i. 40Tita ge Eloba xu ta ge ǁnâu amaba ra mîba du, xawe du ge tita ra ǃgam ǂgao. Abrahammi ge ǁnāti ī xū-e dī tama hâ. 41Sadu ge sadu îb di sîsenga ra dī. Hî-î, sadu ge sadu ǂhunuma îba ra ǁnâuǀnam, ǁnāti ī xū-e du ga dīo.”
On ge ǁîb ǃoa ge mî: “Sida ge ǀaiba xu ǃnae tama hâ. ǀGui ǁGûb ǀguiba da ge ūhâ tsî ǁnāb ge Eloba.”
42Ob ge Jesuba ǁîn ǃoa ge mî: “Elob ga sadu Î hâ io, o du ga tita ǀnam hâ i, Eloba xu ta ge sadu ǃoa a hā xui-ao. Tita ge tita xu nēpa hā tama, xaweb ge ǁîba ge sî te. 43Tare-i xa du tita ra mîna ǁnâuǃā tama? ǁNās ge ti mîsa du ǁnâu ǂgao tama amagasa! 44Sadu ge ǁgâuaba* sadu îb ase ūhâ tsî du ge ǂkhaba xūna dīsa a ǀnam, ǁîb ǁkhāb khami. ǁÎb ge tsoatsoasa xu a ǃgamao tsîb ge hoaǁae amaba ǁkhan hâ. Ama-i xare-i ge ǁîb ǃnâ hâ tama hâ. ǃHoab kao, ob ge ǂhumib ǂgaoba xu hâb ǀguiba ra ǃhoa, ǂhumi-ao tsîb a ǂhumib di î amaga. 45Amaba ta ra ǃhoa, xawe du ge ǂgom te tama hâ. 46Tari-e sadu xa tita ǁore-i ǀkha a ǀhapiǂnûiǀkhā ǁkhā? Tsî amaba ta ra mîba du, o tare-i xa du ǂgom te tama hâ? 47Mâ-i hoa-i Eloba xu hâ-i ge Elob di mîde ra ǃgâ. Sadu ge Eloba xu hâ tama hâ, ǁnā-amaga du ge ǃgâ tama hâ.”
Jesub tsî Abrahammi
48On ge Jodeǁîna ge ǃeream: “ǂHanu tama da ge hâ i, sats ge a Samariaǁî tsîts ge ǁgâua-e sats tsîna ūhâ ti ta ge mîo?”
49“Hî-î” tib ge Jesuba ge mî: “Tita ge ǁgâua-e tita ǃnâ ūhâ tama. Tita ge ti Îba ǃgôa hâ tsî sadu ge tita ǃgôa tama. 50Tsî tita ge ǁnā ǁkhoreba ūhâ tama hâ aitsama ta nî ǃgôasensa, Elob ge ǃgôahe ta nîsa ǂhâba hâ. Ab ǁîba ǀgoraǃgâ-ao. 51Amase, amase ta ra mîba du, khoe-i ga ti ǁkhāǁkhāsa ǁnâuǀnamo, ǁnā-i ge tātsē ǁō tide!”
52On ge Jodeǁîna ǁîb ǃoa ge mî: “Nēsi da a ǁaposase ǂans ge ǁgâua-ets ūhâsa. Abrahammi tsî kēbo-aogu tsîn ge ge ǁō, xawets ge satsa sa ǁkhāǁkhāde ra ǁnâuǀnam-i tātsē ǁō tide ti ra mî! 53Satsa kha sida îb Abrahammi, ǁō geb ǃgâ-ai a kai? Satsa kēbo-aogu ǁō ge gu ǃgâ-ai a kai? Tarits a tits ra ǂâi?”
54Ob ge Jesuba ge ǃeream: “Tita ga aitsama a ǃgôasen, os ge ti ǃgôasensa a ǁau. Xawe ti Îb ge nē ǂkhaisa xūna ti xa ra mî. ‘ǁÎb ge sida Eloba’ ti du ra mîba. 55Xawe du ge a ǀū bi. Tita ge a ǂan bi. ǁÎba ta ǀū ti ta ga mîo, o ta ge sadu ǁkhādu khami a ǂhumi-ao! Xawe i ge a ama, tita ge ǁîba ǂan tsî ǁîba ra ǁnâuǀnam. 56Abrahammi sadu aboxab ge gere ǃgâiaǂgao, ti hās di ǁaebab gere mûo. ǁÎb ge ǁnāsa mû tsî gere ǃgâiaǂgao.”
57On ge Jodeǁîna ǁîb ǃoa ge mî: “Ganupets kom korodisi kurixa tamao. Mâtits Abrahammats ge mû ti a mî ǁkhā?”#8:57 Mâtits Abrahammats ge mû ti a mî ǁkhā? ǀNî xoaǁguigu ge Mâtits Abrahammi xats ge mûhe ti a mî ǁkhā? ti ūhâ.
58Ob ge Jesuba ge ǃeream: “Amase, amase ta ra mîba du, tita ge Abrahammi nî ǃnaes aiǃâ ǀnai ge hâ i!” 59On ge ǁnā ǁaeb ai ǀuide ge ūkhâi ǁîban nî ǃgamse. Xaweb ge Jesuba ǁîna xu gaugausen tsî Tempela xu ge ǂoa.
Currently Selected:
Johaneb 8: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.