Exodo 20
20
Diez rupaa Pueyaso sequesano seetanujuanaa na pueya tojishocoriquiano
1Na nuhuaji, Pueyasojuanaari pocuaree. Puetunu niojuanaari na sequesano Israelcuajinio caneno pueya tojishocoriquiano: Naa sequereeri: 2“Janiyajanaari nia Camarnuni, nia Pueyasotuhuaj. Janiyajanaacuajaari nia mashiquiquiaari Egipto jiyajinijini, teyano jiyajinia seya nia quiquiaaricuajani, jiyareta poonijiotesano pueya.
3“Majaari casaa jiyatenu tama nia pueyasohuarajaaja cua niti nia shocotenura janiya.
4“Majaari nia timitiasocoriquiano nia pueyasora shipininiu casaa juhua jiya cajiniocua quijia niquishano, juhua jiyocua quijia niquishanojuhuaj, juhua shoniniacu caminiajinia quijia niquishano casaanio. 5Majaari naa nia shipinijiosano casaacuara jacamanutej nia timitiasacari cuno casaa. Janiyajanaacuajaari nia Camarnu Pueyasoni, saa neraja nia panijia Pueyasotuhuaj. Janiyajanaari noo pojori queya saniitioriquianoni, cua paracaajiaca sesa pueyatej. Janiyari naa saniitioriquiano cuno cua paniyaquijiaca pueya niquiohuani, na jiuhuajuhuaj, na jiuhua niquiohuajaajanio. 6Saniniuujia, janiyari jiyanohua cua paniniutia maninia miiriquiano cua panijiaca pueyani, pueyaracaanu nojoriicuajinio caneno pueyajaajanio. Naa maninia nojori miiriquianonijia, nojoririano cua sequesano tojijiaca nojori quiniuucua.
7“Majaari cua sesa jiyaniquiniu nia sapojonura niarta pueyano. Janiyajanaacuajaari nia Camarnu Pueyasoni. Janiyari najuhuana cua sesa jiyaniquijiaca pueya saniitioriquianoni.
8“Naajuhuaj, saabado juuca nia niishiriojoriquia saa quiriaja nia jiyatenura cuno juuca. 9Puetunu semaana seis juucajiniajanaa nia miiriquia puetunu nia poonijiosanojuanaa. 10Saniniuujia, saabadoori samaatenu juucaaja. Nia Camarnu Pueyaso nia timitiare cuno juuca. Majaari tojetaarucuajanaa cuno juuca poonijionu. Naajuhuaj, majaari cuno juuca quia niyanu poonijiotenu, quia niyatu, quiarano poonijiona pueyano, quia tiaco quiara pueraquena maaji soj. Naajuhuaj, majaari cuno juuca quia cuhuariquiajinia quia poonitijiosano juyaca poonitijionu, quia tiacajinia quijia tahuejaajanio. 11Niaacuajaari maninia nio niishiya: Pueyaso cortanijiosacari mijiria puetunu nia niquishanojuanaani, nojuajaari seis juucajinia shipinijioquiaari jiya cajiniocua, nio jiya, shoniniacu caminiajuhuaj, puetunu shoniniacu caminiajinia quijiaca casaajaajanio. Naa na poonijionu nuhuajitij, Pueyasoori saabado juucajinia samaatequiaari. Naacuatej, Pueyasojuanaari puetunu cuno saabado juucajanaa jiyatequiaari samaatenu juucara. Na juucara na jiyatequiaariiri.
12“Nia que tojijia nia quiriquia, nia nucua tojijiajuhuaj. Niaa jaara naa maninia miijiaca quiritij, nia Camarnu Pueyasoori pueyaracaanu rishijiacara nia jiyatenutaniya mijiria nio na niquitiosano jiyajiniani.
13“Majaari quiarta pueyano monu.
14“Majaari quiarta pueyano niquiocua canunuujua.
15“Majaari nohuasenu.
16“Maja quiarta pueyanoocuara coriaacojonu.
17“Majaari quiarta pueyano tiaacua jiaatianu. Majaari necocuaacua jiaatianujuhuaj. Naajuhuaj, majaari na poonijiotesano pueyanoocua jiaatianu, nera pueraquena maajiicuajaajanio. Majaari na burroocua jiaatianujuhuaj, puetunu na jiitiasano casaacuajuhuanajaj.”
Israel pueya pueresacari Pueyaso
18Puetunu Israelcuajinio caneno pueyajanaani, Sinaii tuhuananu cari nojori quishacari, puetunu nojorijianaari jiyanohua miacana majacunu niquitiuquiaari, jiyanohua miacana nunujunujaajanio. Puetunu nojorijianaari shiriiquitiuquiaarijuhuaj Pueyaso seya trompeta jonenenuunu nojori tojishacari. Jiyaconaja Sinaii tuhuananuuri najacata mishiquiiquiaarijuhuaj. Puetunu Israelcuajinio caneno pueyapue puerenuucua, puetunu nojorijianaari tucuaji naata shootiariquiaa. 19Naacuatej, puetunu nojorijianaari Moisees sequeturee:
—Quiajaniyajanaa mariqui canaacua tequejore. Canaacuajaari quia sequesano tojiniutianiyani. Maja cutaraari canaa paniniu Pueyasojuanaa pocuanura canaacua, canaa mariqui cusonuuquee socuani.
20Jiyacaritij, Moiseesri naa nojori riucuaree:
—Maja puereconu. Pueyasocuajaari niya niaacua muetaree na niatanura niajaniya taa nia miiquionutaniyani nojuajanaa nia tojishacari. Niaa jiyoteeri naacua na puerejaca quiniutianiyaquij, maja socua sesa nia miijionura.
21Naa Israelcuajinio caneno pueya shiriiquitiuniuucua, Sinaii tuhuananu shootiaturiquiaa tucuaji naataari. Jiyacaritij, Moiseesri nojori niquiara tacaquiaari Sinaii tuhuananuucua ninishiqui, tee Pueyaso quiriquiaacuajani.
Currently Selected:
Exodo 20: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.