Mark 11
11
Jeju andə mee ɓee gə́ Jerusalem
Mat 21.1-11, Lug 19.28-40, Ja̰ 12.12-19
1Loo gə́ deḛ d’unda dɔ Jerusalem dəb ndá deḛ teḛ mbɔr Betpage gə Betani gə́ to mbɔr mbal gə́ ria lə Koiyoje ndá Jeju ɔr njékwakiláje joo ula dee pana: 2Ɔd awje mee ɓee gə́ to no̰ sí’g kédé lé. Loo gə́ seḭ uruje keneŋ mba̰ ndá seḭ a teḛje dɔ ŋgon mulayḛ̀je gə́ teá naŋg gə́ dəw uba giree ɗab kəm kára el ɓəi lé, tudeeje reeje səa amje. 3Ɓó lé dəw a dəji sí pana: See ban ɓa seḭ raje bèe wa ndá seḭ a kuláje pajena: Mbaidɔmbaije ɓa aw ndée ndá léegəneeya d’a kya̰ kar sí reeje səa ya.
4Deḛ d’ɔd d’aw ndá d’iŋga ŋgon mulayḛ̀je gə́ teá naŋg takəi’g raga mbɔr rəbə ndá deḛ tudee. 5Njé gə́ na̰je gə́ d’aar keneŋ lé dəji dee pana: See ɗi ɓa seḭ raje bèe wa. See tuduje ŋgon mulayḛ̀je lé gə mba riwa.
6Deḛ d’ila dee keneŋ to gə́ Jeju ula dee lé ndá d’ya̰ d’ar dee d’aw səa ya tɔ. 7Deḛ ree gə ŋgon mulayḛ̀je lé d’ar Jeju ndá deḛ d’ɔm kubuje lə dee giree’g d’ar Jeju uba dəa ɗao si keneŋ. 8Dəwje bula mbalé kubuje lə dee naŋg rəbə ləm, njé gə́ raŋg ti kam kagje gə́ mee ndɔ’g lab naŋg nea̰’g ləm tɔ. 9Deḛ gə́ d’aw nea̰’g kédé gə deḛ gə́ d’aw gée’g gogo lé deḛ ra né tar u-u-u pana: Hosana! Maji kar dɔkaisəgərə nai gə yeḛ gə́ ree gə ri Mbaidɔmbaije lé#Pak 118.25-26. 10Maji kar ndutɔr nai gə ɓeeko̰ gə́ si ree, to ɓeeko̰ lə ka síjeḛ Dabid. Hosana par gə́ sém looje gə́ tar lé tɔ.
11Loo gə́ Jeju teḛ Jerusalem mba̰ ndá yeḛ andə mee kəi-Ala’g. Loo gə́ Yeḛ tən néje lai gə́ to keneŋ njal ɔr ndá yeḛ ɔd gə njékwakiláje gə́ dɔg-gir-dee-joo lé na̰’d aw sə dee Betani mbata kàr godo ŋga.
Jeju man kodé
Mat 21.18-19
12Bèlè lookàree d’ḭ Betani d’isi d’aw rəbee ndá ɓó tɔl Jeju. 13Yeḛ aa loo oo kodé gə́ kamee idi keneŋ nu bèe ndá yeḛ ɔd aw keneŋ mba koo ɓó banelə kiŋga né keneŋ, loo gə́ yeḛ ree pər gə́ gelee’g ndá yeḛ oo kamee ba mbata to naḭ kandə lə kodé el ɓəi. 14Yen ŋga, yeḛ un ta pa gə kodé lé pana: Maji kar dəw kára kara sɔ ka̰di gogo pai godo.
Njékwakiláje d’oo ta gə́ yeḛ pa lé tɔ.
Jeju tuba njérab-njérɔko̰je mee kəi-Ala’g
Mat 21.12-17, Lug 19.45-48, Ja̰ 2.13-22
15Loo gə́ deḛ teḛ Jerusalem mba̰ ndá Jeju andə mee kəi-Ala’g. Yeḛ un kudu tuba deḛ gə́ d’isi rab néje lə dee mee kəi-Ala’g ləm, gə deḛ gə́ ndogo sə dee ləm tɔ. Yeḛ tila tabulje lə njémbél-larje ləm, gə tila nési lə njérab-dərje bigiri-bigiri ləm tɔ. 16Yeḛ ya̰ rəw ar dəw kára kara odo né dəs ne mee kəi-Ala’g el. 17Yeḛ ndoo dee ula dee pana: See deḛ ndaŋg ta mee maktub’g pana: Kəi ləm lé d’a ɓaree kəi ra tamaji keneŋ mbata lə ginkoji dəwje gə raŋg lai lé, see deḛ ndaŋg taree togə́bè el wa. Nɛ seḭ ɓa seḭ telee undaje gə́ duu-loo lə njéɓogoje#Esa 56.7, Jer 7.11.
18Mbai dɔ njékinjanéməsje-je gə njéndaji-maktubje lé loo gə́ deḛ d’oo ta ləa lé ndá deḛ saŋg rəw gə mba karee udu, mbata ta gə́ yeḛ ndoo dee lé ar kaar dəwje lai wa dee paḭ.
19Loo gə́ kàr andə mba̰ ndá Jeju deḛ gə njékwakiláje d’unda loo mee ɓee-boo’g neelé teḛ d’aw.
Kodé gə́ tudu lé
Mat 21.20-22
20Bèlè gə ndɔ, loo gə́ deḛ gə njékwakiláje dəs ndá d’oo kodé lé ndòlé njal ɔr ŋgira’g naŋg njɔd. 21Yen ŋga mee Piɛrə olé teḛ dɔ ta gə́ Jeju pa tagə́nè lé aree ula Jeju pana: Mbai, aa loo oo kodé gə́ i manee lé tudu wa mèŋgèŋgḛ̀ kən.
22Jeju un ta ula dee pana: Maji kar sí ɔmje meḛ sí dɔ Ala’g ɓa. 23Ma m’ula sí təsərə, ɓó lé nana ɓa ula mbal neelé pana: Ɔr rɔi loo gə́ nee’g al uru dan baa-boo’g, ɓa yeḛ ɔm mée dɔ’g jəb-jəb pana: A to bèe ya to ɓó maḭ gə rəa dɔ’g el ndá yeḛ a koo née gə́ a to torndia’g lé gə kankəmee ya tɔ#Mat 17.20, 1Kɔr 13.2. 24Gelee gə́ nee ɓa ma m’ula sí, loo gə́ seḭ raje tamaji ndá né lai gə́ seḭ kwɔije lé ɔmje meḛ sí dɔ’g to gə́ seḭ toje njékiŋgaje mba̰ ndá a kooje née lé gə kəm sí ya tɔ. 25Loo gə́ seḭ aarje tar gə mba ra tamaji ɓa ooje to gə́ seḭ gə́ mari awje gə na̰ gə ta ndá arje meḛ sí oso lemsé dɔ’g mba kar Bɔ síje gə́ si dara lé a kar mée oso lemsé dɔ meekɔsgel’g lə sí-seḭ lé tɔ. 26Nɛ ɓó lé seḭ arje meḛ sí oso lemsé dɔ’g el ndá Bɔ síje gə́ sí dara lé kara a kar mée oso lemsé dɔ ka̰ sí-seḭ’g lé el tɔ#Mat 6.14-15#11.26 Ta neelé godo mee maktubje gə́ ləw gə́ na̰je’g..
Siŋgamoŋ lə Jeju lé
Mat 21.23-27, Lug 20.1-8
27Deḛ d’ɔs tel gɔl joo d’aw Jerusalem, nɛ loo gə́ Jeju njaa mee kəi-Ala’g ndá mbai dɔ njékinjanéməsje-je gə njéndaji-maktubje gə njé gə́ tɔgje to lé rəm pər gə́ rəa’g 28ndá deḛ dəjee pana: See torndu na̰ ɓa i ra ne néje togə́bè wa. See siŋgamoŋ lə na̰ ɓa i ra ne né togə́bè wa.
29Jeju ila dee keneŋ pana: Ma kara m’a dəji sí ta kára koo tɔ. Ɓó lé seḭ ndigije tam’g ndá ma kara m’a kula sí yeḛ gə́ njekun ndia karm m’ra ne néje togə́bè lé ya tɔ. 30Batɛm lə Ja̰ lé see ḭ dara əsé ḭ rɔ dəwje’g wa. Ilamje’g ɓa.
31Nɛ deḛ jém ta gə na̰ pana: Ɓó lé j’a kulá pana: Batɛm gə́ Ja̰ ra dəwje lé ḭ dara ndá yeḛ a tel kila sí keneŋ pana: Bèe ŋga see ban ɓa jeḛ j’ɔm meḛ sí dəa’g el wa. 32Tɔɓəi ɓó lé j’a kilá keneŋ pana: Batɛm gə́ Ja̰ ra dəwje lé ḭ rɔ dəwje’g ndá kara ... Deḛ ɓəl dəwje mbata dəwje lai d’oo Ja̰ gə́ njetegginta gə́ gəd ya ləm.
33Yen ŋga deḛ d’ila Jeju’g pana: Jeḛ n’gər el.
Ndá Jeju tel ila dee keneŋ pana: Ma kara m’a kula sí dəw gə́ njekun ndia karm m’ra ne néje neelé el tɔ.
Currently Selected:
Mark 11: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.