Lugu 16
16
Gosɔta gə́ wɔji dɔ njekaa dɔ néje gə́ ra goso lé
1Jeju ula njékwakiláje pana: Dəw kára gə́ to bao lé njekaa dɔ néje ləa si gən, nɛ deḛ səg njekaa dɔ néje ləa neelé rəa’g mbata néje lə ɓéeje gə́ yeḛ sané yaa̰ lé. 2Yeḛ ɓaree dəjee pana: See ta ɗi ɓa pa dɔi’g ɓa m’oo nee wa. Tura goo néje ləm gə́ m’ɔm jii’g lé am m’oo mbata i askəm to njekaa dɔ néje ləm gogo el ŋga. 3Njekaa dɔ néje neelé pata mée’g pana: See m’a ra ban ŋga wa mbata ɓémje ɔr kula kaa dɔ néje ləa jim’g mba̰. Ndɔ lé kara ma m’askəm to gə́ njḛdəa el ləm, né gə́ kwɔi gə́ kəmndoo lé kara to rɔkul am-ma yaa̰ ləm tɔ. 4Né gə́ m’a gə ra mba kar dəwje d’wam ne gə́ rɔ dee’g mee kəije’g lə dee loo gə́ d’ɔrm kula’g lé ma m’gər ɓasinè ya. 5Togə́bè yeḛ ɓar njéɓaŋje lə mbai ləa kára-kára lai rəa’g dəji yeḛ gə́ kára pana: See ɓaŋg lə mbai ləm tɔ dɔi’g ka̰da wa. 6Dəw neelé ndigi təa’g pana: Ku-ubu tɔl. Yeḛ tel ula njeɓaŋ neelé pana: Un maktub nétona ləi rəm sí ne naŋg kalaŋ tel ndaŋg rɔ-mi ba keneŋ. 7Tɔɓəi yeḛ dəji njeɓaŋ gə́ raŋg pana: See kaḭ ka̰da ɓa to dɔi’g to wa. Njeɓaŋg neelé tel ulá pana: Ko as budu tɔl. Tɔɓəi yeḛ tel ula njeɓaŋ lé pana: Un maktub nétona ləi tel ndaŋg rɔ-jinaijoo ba keneŋ. 8Loo gə́ ɓéeje oo goso lə njekaa dɔ néje ləa gə́ to majikoji el lé yeḛ ɔree ndəŋ ɔs ne gajee. Mbata ŋganje gə́ ɓasinè lé goso lə dee gə́ deḛ ra wɔji ne dɔ mar deeje lé dum ka̰ ŋgan lookàrje ya.
9Ma nja m’ula sí təsərə, odoje nékiŋgaje lə sí gə́ dɔ naŋg nee lé waje ne baokura gə dəwje, mba kar loo gə́ nékiŋgaje lé d’a godo ji sí’g ndá deḛ neelé d’a kwa sí gə́ rɔ dee’g mee kəije gə́ to gə no̰ lé ɓəi. 10Nana ɓa gə́ to majikoji dɔ néje gə́ tḛ́-tḛ́ ndá yeḛ a to majikoji dɔ néje gə́ boi-boi ya tɔ, nɛ nana ɓa gə́ to dəw gə́ kori-kori dɔ néje gə́ tḛ́-tḛ́ ndá yeḛ a to gə́ dəw gə́ kori-kori dɔ néje gə́ boi-boi ya tɔ. 11Ɓó lé seḭ toje majikojije dɔ nékiŋgaje gə́ dɔ naŋg nee el ndá see na̰ ɓa a kɔm kankəm néje ji sí’g wa. 12Nɛ ɓó lé seḭ toje gə́ majikojije dɔ néje gə́ lə mar síje el ndá see na̰ ɓa a kar sí né gə́ ka̰ sí-seḭ gə́ a kɔs dɔ sí wa.
13Dəw kára as ra kula kar ɓéeje joo el. Mbata yeḛ a kaw gə yeḛ gə́ kára mée’g, nɛ a kunda yeḛ gə́ kára dan kəmee’g tɔ, əsé yeḛ a kii rəa kər-kər gə́ rɔ nje gə́ kára’g nɛ a ɓar yeḛ gə́ kára tɔ. Seḭ asjekəm raje né kar Ala ləm, gə raje néhulaije gə́ dɔ naŋg nee ləm tɔ, korè dee na̰’d el#Mat 6.24.
Tandooje lə Jeju lé
Mat 11.12-13, 5.31-32, Mar 10.11-12
14Parisiḛje gə́ to njéko̰laolarje d’aar keneŋ d’oo ta ləa lai neelé ndá deḛ kogo ne. 15Jeju ula dee pana: Seḭ lé seḭ rabje rɔ sí kəm dəwje’g mba kar dee d’oo sí gə́ njémeekarabasurje nɛ Ala gər meḛ sí gao ya. Mbata né gə́ rab rəa kəm dəwje’g raga lé Ala lé oo gə́ ram né ya.
16Godndu ləm, gə njéteggintaje ləm tɔ lé deḛ to keneŋ saar ndəa’g lə Ja̰, nɛ un ginee ndɔ gə́ lə Ja̰ lé deḛ d’ɔr goo ta ɓeeko̰ lə Ala, ar dəwje nar ne na̰ loo gə mba kandə kaw keneŋ#Mat 11.12-13. 17Dara gə naŋg nee d’a dəs wuduru gə lèlé ba, nɛ néje gə́ tḛ́-tḛ́ gə́ tɔs dɔ kandə ta’g lé loo karee udu yɔm a kuba mu el#Mat 5.18.
18Nana ɓa gə́ tuba dené ləa gə mba taa dené gə́ raŋg ndá ta mɔdkaiya wa dəa ya. Tɔɓəi nana ɓa gə́ taa dené gə́ ŋgabeeje tubá lé ndá ta mɔdkaiya wa dəa ya tɔ#Mat 5.32, 1Kɔr 7.10-11.
Bao gə́ oo kəmndoo lə Lajarə el
19Dəw kára gə́ to bao lé ula kubu gə́ ndul piro-piro gə́ bḭ maji rəa’g ləm, si dan maji’g gə dan rɔlel’g gə ndəa-ndəa ləm tɔ. 20Njendoo kára gə́ ria lə Lajarə lé bairaŋ to rəa’g mbərərə to takəi’g lə bao lé. 21Njendoo lé ndiŋga rəa gə mba sɔ bum muru lə bao gə́ ɔm naŋg gel tabul’g. Ndá bisije ɓa ree to̰ ta doo bairaŋ ləa. 22Njendoo lé wəi ndá kuraje lə Ala gə́ dara ree d’unee d’aw d’unda mbɔr Abrakam’g. Bao lé kara wəi tɔ ndá deḛ dubee tɔ. 23Yeḛ si loo-si njé gə́ d’wəi’g ndá dan néurti gə́ rəa lé yeḛ un kəmee gə́ tar aa ne loo oo Abrakam si ŋgərəŋ ndá yeḛ oo Lajarə si mbɔree’g tɔ. 24Yeḛ ula təa no̰’g wəl pana: Bɔm Abrakam, oo kəmtondoo ləm ya kari ndá ula Lajarə aree ula ŋgaw jia mán’g ree ɔs ndɔm’g aree kul ne bəl lɔm, mbata pər ulam ndubu yaa̰. 25Abrakam ilá keneŋ pana: Ŋgonəm, ar məəi olé dɔ némajije’g ləi loo gə́ i si ne gə kəmi danee’g lé nɛ Lajarə lé loo gə́ yeḛ si gə kəmee ɓəi lé yeḛ si dan némeeko̰’g ya, ɓasinè ndá yeḛ si dan meekulɔm’g ŋga, nɛ i ɓa yḛ̀ i si dan néurti’g gə́ si ya to ŋga. 26Tɔɓəi boo-wəl gə́ uru yaa̰ to dan sí’g dana, togə́bè ɓa loo kḭ rɔ síjeḛ’g kaw rɔ sí-seḭ’g godo ləm, loo kḭ rɔ sí-seḭ’g ree rɔ síjeḛ’g kara godo ləm tɔ. 27Bao lé tel ulá pana: Bɔm Abrakam, ma m’ra ndòo rɔi’g kɔgərɔ kari, gə mba kari ula Lajarə aree aw kəi lə bɔm mbata ŋgakɔmje gə́ diŋgam deḛ mi d’isi keneŋ, 28mba karee ɔr gin néje neelé ar dee d’oo gə mba kar dee ree d’isi dan néurti’g neelé el. 29Abrakam tel ilá keneŋ pana: Deḛ d’isi gə ta lə Moyis gə njéteggintaje mba̰, maji kar dee d’oo ta lə dee ya. 30Yeḛ tel ulá pana: Wah! bɔm Abrakam, ɓó lé dəw kára a kunda loo-yoo teḛ kaw rɔ dee’g ndá d’a kwa ndòo rɔ dee dɔ kaiya’g lə dee ya. 31Nɛ Abrakam tel ulá pana: Ɓó lé d’oo ta lə Moyis gə njéteggintaje el ndá lé dəw a kunda loo teḛ loo-yoo’g lé kara a koo loo kula ta meḛ dee’g el tɔ.
Currently Selected:
Lugu 16: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.