Zɛnɛse 3
3
Sɔnyɔ̂ŋ kɔ́ɔ pîlanii
1Galii è kɛ̀ a dáreɛɛ, ŋ̀óyaa é tɛ́ɛ lɔɔ fɛnɛ-sãa kélee dîa Yâwɛɛ Ɣâla è gbɛ̀tɛi. Nya ƃe è mò nɛnîi ma ǹyɛɛi, “Ɣâla è mò a tɔ̃yâ a gɛɛ káfe ŋ̀úru-ŋai ŋí zûai sui m̀á da mii?”
2Nɛnîi ǹyɛɛ galii mai, “Kwa pɔ̂ri ŋ̀úru-ŋai ŋí zûai sui m̀á da miî, 3Kɛ́lɛ Ɣâla è mò ǹyɛɛ, ‘ŋ̀úrii nyii gáa tɔɔni zûai sámai káfe m̀á da mìi, kpaa máŋ ká lɛ́ɣɛ ma, kà gɛ̀ tí, ka pâi saâi.’ ”
4Kɛ́lɛ galii è mò ǹɛnîi ma ǹyɛɛi, “Káfe pâi saâi. 5Kpɛ́ni fêi, Ɣâla è gɔ́lɔŋ a gɛɛ tãi kà ŋ̀úrii ŋí m̀á da mii lai, káŋɛi lá a pâi ƃôi kákɛ yɛ̂ɛ ǹyaa Ɣâla, ǹyaŋ gɛ̀ ní ka pâi mɛni lɛ́lɛɛ kɔ́lɔnîi da mɛni nyɔ́mɔɔ.”
6Nɛnîi è ŋ̀úrii kàa a gɛɛ m̀á lɛ̂lɛɛi mii mɛni ma, ǹɛ́lɛɛ núu ŋɛ́i, gɛ́ tela núu tàre. È m̀á da kùla é mii. É da tɛ́ɛ ŋɔsurɔ̂ŋ pɔ́ ǹyaa máŋ é mii. 7Nya ƃe dífeerɛ díŋɛi lá è ƃò. Dí nâa gɔ́lɔŋ a gɛɛ díkaa a díkaŋ. Nya ƃe dí fîi wuru laa sɔ̂lɔ dí ŋiri dîa.
8È nâa kɛ̀ tí, dí Yâwɛɛ Ɣâla wóo mɛni gɛ́ sîa zûai su a ɣele-wulii. Nya ƃe nalôŋ da ŋɔnɛnîi dí dílòo Yâwɛɛ Ɣâla ma ŋ̀úru-ŋai sáma zûai su. 9Kɛ́lɛ Yâwɛɛ Ɣâla è nalôŋ tòli ǹyɛɛ mai, “Íkaa mí?”
10Nalôŋ ǹyɛɛ mai, “Ŋá íwoo mɛni zûai su, ǹyaŋ ŋá kɛ̀ yaôi, mɛni ƃé ŋá nòo la, kpɛ́ni fêi, ŋá kɛ̀ a ŋ́gaŋ.”
11Nyɛɛ mai, “Gbɛ̂ɛ ƃé mò yâ a gɛɛ íkaa a íkaŋ? Ŋ̀úrii ŋá mò yâ a gɛɛ ífe m̀á da mii, ƃa da mii?”
12Nalôŋ ǹyɛɛ ma, “Nɛnîi í dɛ̀ɛ ḿbɔi è ŋ̀úrii m̀á da tɛ̀ɛ ḿbɔ ŋá mii.”
13Nya ƃe Yâwɛɛ Ɣâla è mò nɛnîi ma ǹyɛɛi, “Lé ƃé ŋí ƃa gɛ́i?”
Nɛnîi ǹyɛɛ mai, “Galii ƃé ńdûmo ŋá mii.”
Ɣâla ŋɔtɔŋ kpɛ́-maai
14Yâwɛɛ Ɣâla ǹyɛɛ galii mai, “Náɣaŋ káa yâ, lɔɔ fɛnɛ-sãa kélee sáma, kpɛ́ni fêi, ƃía ƃé mɛnii ŋí kɛ̀. Ƃa pâi kɛ̂i siâi íkoo mɛi, í pɔ̂rɔ mii ífulu-laai su. 15Ŋa pâi kpɔara lɔ̂i káloai ka nɛnîi, ísuui da nɛnîi ŋɔsuui. Da pâi ƃɔ̂rɔnii íŋuŋ ma, yáŋ ya pâi dínyînii díkɔɔ ma.”
16È mò nɛnîi ma ǹyɛɛ, “Ŋa pâi ímɛni-solii su kɛ̀tɛi lóŋ káa-mɛni su. Ƃa pâi nîa-pɛlɛɛ maa sɔlɔ ƃôi mɛni-soli su. É máŋ kɛ́ tí, ímaa mɛni kélee a pâi kɛ̂i ísurɔ̂ŋ ma, ǹyaŋ a pâi kɛ̂i ímɛi.”
17È mò nalôŋ ma ǹyɛɛ, “Náɣaŋ káa ǹɔii ma ílaai su, kpɛ́ni fêi, ƃa íwoli tɔ́ɔ ínɛnîi wóo ma ƃa ŋ̀úru-ƃai mii, nyii ŋa mò yâ a gɛɛ ífe mìi. Ƃa pâi íkɔnɔŋ sɔlɔ ƃôi ǹɔii su a mɛni-soli káa ífulu-laai su. 18Ŋalêŋ da didi da pâi kulâi ǹɔii ma ímɛni ma. Ƃa pâi ǹɔii ma tuma-laai miî. 19Ƃa pâi fɔ̃nɔ fâyai í lɛ́ɛ pâi íkɔnɔŋ sɔlɔ ƃôi, é lɛ́ɛ la zu í lí pôlu ǹɔii pɔ́. Kpɛ́ni fêi, naa ƃé í kùla naa. Íkaa a pɔ̂rɔ, ǹyaŋ ƃa pâi liî pôlu pɔ̂rɔ pɔ́.”
20Adaŋ è ŋɔnɛnîi láa sèe a Iî, kpɛ́ni fêi, è kɛ̀ a núu-kpune kélee nee. 21Nya ƃe Yâwɛɛ Ɣâla è sua kɔlɔ kpɛ̀tɛ a seɣe Adaŋ mɛni ma da ŋɔnɛnîi dí ŋiri dîa.
Dí Adaŋ da Iî kpɛ̀ zuai su
22È nâa kɛ̀ tí, Yâwɛɛ Ɣâla è mò ǹyɛɛ, “Nalôŋ a nâa kɛ́ yɛ̂ɛ kúta, nyii a nâa mɛni lɛ́lɛɛ da mɛni nyɔ́mɔɔ kɔ́lɔŋ. Ǹyaŋ maa fé nɛ̃ɛ ní a gɛɛ é vúlu-laa wurii m̀á da kula é mii a gɛɛ é kɛ́ ɣele ma wɔlɔ-wɔlɔ da wɔlɔ-wɔlɔ.” 23Mɛni ma Yâwɛɛ Ɣâla è gbɛ̀ Idɛŋ suai su a gɛɛ é tíi kɛ́ ǹɔii ma nyii è kùla zui. 24È nalôŋ kpɛ̀ zûai su, é ŋâla-taa kooŋ-sãai pú Idɛŋ suai vóloi ƃelai-pere da ƃóa-sɔ̂kpɔ fóloɔɔ a gɛɛ dí vúlu-laa wurii maa-perei mɛi káa.
Currently Selected:
Zɛnɛse 3: KWB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fka.png&w=128&q=75)
Want to have your highlights saved across all your devices? Sign up or sign in
© 2012 Bible Society in Liberia