ᐅᐸᓓᑭᔅ ᓘᒃ 13
13
ᑴᔅᑭ ᑭᒪᒋᐃᑎᐎᓂᐙᐤ ᐅᒋ ᓀᔥᑕᐱᑯ ᓂᔑᐗᓈᑎᓯᒃ
1ᑮ ᐃᑖᐗᒃ ᐁᑯ ᒣᒀᒡ ᐋᑎᑦ ᐊᐌᓂᑭ ᑳ ᐋᓕᒧᑕᒪᐙᒋᒃ ᑳᓕᓕᐎᓕᓕᐗ, ᐅᒥᑯᓕᐤ ᐹᐃᓚᑦ ᑳ ᑭ ᐊᓯᑎᓇᒸᑦ ᐅ ᓵᓵᑭᐎᓕᐌᐎᓂᐙᒃ 2ᒋᓴᔅ ᒫᑲ ᐁ ᓇᔥᑴᐗᔑᐋᑦ, ᑮ ᐃᑌᐤ, ᑭᑦ ᐃᑌᓕᒪᐙᐗᒃ ᓈ ᐅᑯ ᑳᓕᓕᐎᓕᓕᐗᒃ ᐊᐙᓯᑌ ᐁ ᑮ ᒪᒋᑣᒋᒃ ᐃᔥᐱᔥ ᒥᓯᐌ ᑳᓕᓕᐎᓕᓕᐗᒃ ᐅᒪ ᐁ ᑮ ᐃᔑ ᐎᓴᑫᓕᑕᑭᒃ? 3ᑭ ᐎᑕᒫᑎᓇᐗᐤ, ᓇᒪᐎᓚ: ᒫᑲ, ᑮᔥᐱᓐ ᐁᑳ ᑴᔅᑳᑎᓯᔦᑴ, ᒥᓯᐌ ᑭᓚᐗᐤ ᓀᔥᑕ ᑭ ᑳ ᓂᔑᐗᓈᑎᓯᓇᐗᐤ᙮ 4ᓀᔥᑕᐱᑯ ᐊᓂᑭ ᔭᓇᓀᐅᔖᑉ ᑳ ᒫᑕᑲᐅᑯᒋᒃ ᐊᔕᐙᐱᐎᑲᒥᑯᓕᐤ ᓴᐃᓗᐊᒥᒃ, ᓀᔥᑕ ᑳ ᓂᐹᐃᑯᒋᒃ, ᑭᑦ ᐃᑌᓕᒫᐙᐗᒃ ᓈ ᐊᐙᓯᑌ ᐁ ᑮ ᒪᒋᑣᒋᒃ ᐃᔥᐱᔥ ᒥᓯᐌ ᐃᓕᓕᐗ ᑳ ᐃᑖᓕᒋ ᒋᕉᓴᓚᒥᒃ? 5ᑭ ᐎᑕᒫᑎᓇᐗᐤ, ᓇᒪᐎᓚ: ᒫᑲ, ᑮᔥᐱᓐ ᐁᑳ ᑴᔅᑳᑎᓯᔦᑴ, ᒥᓯᐌ ᑭᓚᐗᐤ ᓀᔥᑕ ᑭ ᑳ ᓂᔑᐗᓈᑎᓯᓇᐗᐤ᙮
ᓈᔅᐱᑐᐌᐎ ᐋᑕᓗᑳᓐ ᐁᑳ ᑳ ᒥᓂᔑᐎᑦ ᐸᑫᓵᓂᒥᓈᑎᒃ
6ᑮ ᐃᑗᐤ ᓀᔥᑕ ᐅᒣᓕᐤ ᓇᔅᐱᑐᐌᐎ ᐋᑕᓗᑳᓂᓕᐤ: ᐯᔭᒃ ᐃᓕᓕᐤ ᑮ ᐋᔭᐌᐤ ᐸᑫᓵᓂᒥᓈᑎᑾ ᐁ ᓂᑖᐎᑭᐋᑲᓂᐎᓕᒋ ᐅ ᔓᒥᓈᑎᑯ ᓂᑖᐎᑭᒋᑲᓂᒃ: ᑮ ᐯᒋ ᓇᑕᐙᐸᑕᒻ ᒫᑲ ᒥᓂᔕ ᐊᓐᑕ, ᓇᒪ ᒫᑲ ᐅᒋ ᒥᔅᑲᒻ᙮ 7ᐁᑯ ᐁᑖᑦ ᐊᓂᐃ ᑳ ᑲᓇᐌᓕᑕᒥᓕᒋ ᔓᒥᓈᑎᑯ ᓂᑖᐎᑭᒋᑲᓂᓕᐤ, ᒫᑎᑲ, ᐅᐅ ᓂᔅᑐ ᐱᐴᓋ ᓂ ᐯᒋ ᓈᓇᑕᐙᐸᑌᓐ ᒥᓂᔕ ᐊᐗ ᐸᑫᓵᓂᒥᓈᑎᑯᒃ, ᓇᒪ ᒫᑲ ᓂ ᒥᔅᑫᓐ; ᑳᐗᐤ; ᑖᓀᑭ ᐌᒋ ᐅᑕᒥᔅᑲᒃ ᐊᔅᑭᓕᐤ? 8ᐁ ᓇᔥᑴᐗᔑᐋᑦ ᒫᑲ, ᑮ ᐃᑌᐤ, ᐅᑭᒪᐤ, ᐁᑯᔑ ᐁᑳᐎᓚ ᑐᑕᐤ ᐊᓄᒡ ᐁ ᐱᐴᒃ ᓀᔥᑕ, ᐹᑎᒫ ᐙᔅᑲ ᑮ ᒧᓇᐃᑫᔮᓀ, ᓀᔥᑕ ᑮ ᐊᔅᑖᔭᓀ ᑳ ᐌᐸᐃᑳᑌᒃ ᐊᐗᑳᓂᑲᒥᑯᒃ ᐅᒋ: 9ᑮᔥᐱᓐ ᒫᑲ ᒥᓂᔑᐎᑌ, ᑲᑕ ᒥᓨᔑᓐ, ᑮᔥᐱᓐ ᒫᑲ ᐁᑳ, ᐁᑯ ᐹᑎᒫ ᑫ ᑲᐙᐗᑦ᙮
ᒋᓴᔅ ᒥᓇᐙᒋᐁᐤ ᐁ ᒫᔅᑭᓯᓕᒋ ᐃᔅᑴᐗ ᐁ ᐋᔭᒥᐁᐎᑭᔑᑳᓕᒃ
10ᑮ ᑭᔅᑭᓄᐊᒫᑫᐤ ᒫᑲ ᐯᔭᒃ ᐋᔭᒥᐁᐎᑲᒥᑯᒃ ᐁ ᐋᔭᒥᐁᑭᔑᑳᓕᒃ: 11ᒫᑎᑲ ᒫᑲ, ᐁᑯᑕ ᐁᑖᑦ ᐃᔅᑴᐤ ᐁ ᐋᔮᐙᑦ ᐊᓕᒥᓯᐎ ᐊᒑᑾ ᔮᓈᓀᐁᔕᑉ ᐱᐴᓋ, ᓈᔅᐱᒡ ᓀᔥᑕ ᐁ ᐙᑭᓯᑦ, ᓇᒪᐎᓚ ᒫᑲ ᑮ ᑕᔕᑳᐸᐎᐤ᙮ 12ᐃᔅᐱ ᒫᑲ ᒋᓴᔅ ᐎᐋᐸᒫᑦ, ᑮ ᓇᑐᒣᐤ, ᓀᔥᑕ ᑮ ᐃᑌᐤ, ᐃᔅᑴᐤ, ᑭᑦ ᐊᐸᐅᑳᐎᓐ ᑭᑦ ᐊᓕᒥᓯᐎᓂᒃ ᐅᒋ᙮ 13ᑮ ᓵᒥᓀᐤ ᒫᑲ: ᑣᔦᒃ ᒫᑲ ᑮ ᑕᔓᑳᐸᐎᐊᐤ, ᓀᔥᑕ ᑮ ᑭᔅᑖᒋᒣᐤ ᑭᒋᒪᓂᑐᐗ᙮
14ᐊᓇ ᒫᑲ ᑳ ᑎᐯᓕᑕᒃ ᐋᔭᒥᐁᐎᑲᒥᑯᓕᐤ ᑮ ᓇᔥᑴᐗᔑᐃᐌᐤ ᐁ ᑭᓯᐙᓯᑦ, ᐁ ᑮ ᒥᓇᐙᒋᐃᐌᓕᒋ ᒋᓴᓴ ᐁ ᐋᔭᒥᐁᑭᔑᑳᓕᒃ, ᑮ ᐃᑌᐤ ᒫᑲ ᐃᓕᓕᐗ, ᓂᑯᑣᔅ ᐃᑕᑎᓋ ᑭᔑᐗ ᐃᓕᓕᐗᒃ ᑫ ᐊᑑᔅᑫᐙᔅᐸᓐ: ᒣᒀᒡ ᐊᓂᐃ ᒫᑲ ᐯᒋ ᐃᑐᑌᒃ ᑭᒋ ᒥᓇᐙᒋᐃᑲᐎᔦᒃ, ᐁᑳ ᒫᑲ ᐁ ᐋᔭᒥᐁᑭᔑᑳᒃ᙮
15ᐅᑎᐯᓕᒋᑫᐤ ᐁᑯ ᓀᔥᑴᐗᔑᐋᑦ, ᐁ ᐃᑖᑦ, ᑭᓚ ᐅᑖᔭᒥᐁᑳᓱᔉ, ᓇᒪ ᓈ ᑕᑐ ᐁ ᐃᑕᔑᔦᒃ ᐁ ᐋᔭᒥᐁᑭᔑᑳᓕᒃ ᐋᐸᐌᐤ ᐅ ᒥᔅᑐᓱᒪ ᓀᔥᑕ ᐅᑦ ᐋᓯᒪ ᐊᐗᑳᓂᑲᒥᑯᒃ ᐅᒋ, ᓀᔥᑕ ᐃᑐᑕᐁᐤ ᑭᒋ ᒥᓂᑴᓕᒋ? 16ᐊᐗ ᐃᔅᑴᐤ ᒫᑲ, ᐁ ᐅᑖᓂᓯᒥᑯᑦ ᐁᑉᕃᐊᒪ, ᑳ ᒫᒫᒋᑯᐱᑎᑯᑦ ᓭᑕᓇ, ᒫᑎᑲ, ᐃᔥᐱᔥ ᔭᓈᓀᐅᔖᑉ ᐱᐴᓋ, ᓇᒪ ᓈ ᑲᑕ ᐋᐸᐙᑲᓂᐎᐸᓐ ᐅᒣᓕᐤ ᒫᒫᒋᑯᐱᒋᑲᓂᓕᐤ ᐅᒋ ᐁ ᐋᔭᒥᐁᑭᔑᑳᓕᒃ? 17ᐃᔅᐱ ᒫᑲ ᐅᐅ ᑫᒀᓇ ᑳ ᐃᑗᑦ, ᒥᓯᐌ ᐊᓂᐃ ᓇ ᓈᔦᑕᐌᓕᒥᑯᑦ ᑮ ᓇᓀᐯᐎᓯᓕᐗ: ᓀᔥᑕ ᒥᓯᐌ ᐃᓕᓕᐗᒃ ᑮ ᒥᓚᐙᑕᒶᒃ ᒥᓯᐌ ᐊᓂᐃ ᑭᒋ ᑫᒀᓇ ᐅᒋ ᑳ ᑮ ᑐᑕᒥᓕᒋ᙮
ᓈᔅᐱᑐᐌᐎ ᐋᑕᓗᑳᓐ ᒪᔅᑕᕐᑦ ᓯᒥᓐ ᐅᒋ
(ᒫᑎᐤ 13:31–32; ᒫᕐᒃ 4:30–32)
18ᐁᑯ ᐁᑗᑦ, ᑫᒀᓕᐤ ᓀᔅᐱᑕᒧᒪᑲᓂᓕᒃ ᑭᒋᒪᓂᑐ ᐅᑦ ᐅᑭᒫᐎᐎᓐ? ᑫᒀᓐ ᒫᑲ ᑖᐱᔅᑯᒡ ᐃᔑᓈᑾᓂᓕᐤ ᑫ ᐃᑗᔮᓐ? 19ᐃᑌᓕᑖᑾᓐ ᑖᐱᔅᑯᒡ ᐯᔭᑯᒥᓐ ᒪᔅᑕᑦ ᓯᒥᓇ, ᑳ ᐅᑎᓇᒃ ᐃᓕᓕᐤ, ᓀᔥᑕ ᑳ ᐸᑭᑎᓇᒃ ᐅ ᓂᑖᐎᑭᒋᑲᓂᒃ; ᑮ ᓂᑖᐎᑭᓐ ᒫᑲ, ᓀᔥᑕ ᑮ ᐊᑎ ᒥᔑᒥᔅᑎᑯᐒᓐ; ᐱᓓᓯᐗᒃ ᒫᑲ ᑳ ᐸᐸᒥᓛᒋᒃ ᑮ ᑕᔑᑫᐗᒃ ᐗᑎᑾᓂᒃ᙮
ᓈᔅᐱᑐᐌᐎ ᐋᑕᓗᑳᓐ ᐅᐱᓯᑲᓐ ᐅᒋ
(ᒫᑎᐤ 13:33)
20ᒥᓇ ᒫᑲ ᑮ ᐃᑗᐤ, ᑫᒀᓐ ᑖᐱᔅᑯᒡ ᑭᒋᒪᓂᑐ ᐅᑦ ᐅᑭᒫᐎᐎᓐ ᐃᔑᓈᑾᓂᓕᐤ ᑫ ᐃᑗᔮᓐ? 21ᐃᑌᓕᑖᑾᓐ ᑖᐱᔅᑯᒡ ᐅᐱᓯᑲᓐ ᑳ ᐅᑎᓇᒃ ᐃᔅᑴᐤ, ᓀᔥᑕ ᑳ ᑳᑖᑦ ᓂᔅᑐ ᑎᐹᔨᑲᓇ ᐸᑴᔑᑲᓂᒃ ᐱᓕᔥ ᒥᓯᐌ ᑳ ᐅᐱᓯᐸᓕᒃ᙮
ᑳ ᔖᑯᐗᒃ ᐃᔥᒀᑌᒻ
(ᒫᑎᐤ 7:13–14, 21–23)
22ᑮ ᔖᐳᑕᐌᔥᑲᒻ ᒫᑲ ᐃᑖᐎᓇ ᓀᔥᑕ ᐃᑖᐎᓂᔕ ᐁ ᑭᔅᑭᓄᐊᒫᑫᑦ, ᓀᔥᑕ ᐁ ᐱᒧᑌᑦ ᒋᕉᓴᓚᒥᒃ ᐁ ᐃᑐᑌᑦ᙮ 23ᐁᑯ ᐁᑎᑯᑦ ᐊᐌᓕᐗ, ᑌᐯᓕᒋᑫᔭᓐ, ᒐᑲᐙᔑᔑᐗᒃ ᓈ ᐊᓂᑭ ᑫ ᐱᒫᒋᐋᑲᓂᐎᒋᒃ?
ᑮ ᐎᑌᐤ ᒫᑲ, 24ᑯᒋ ᐱᑐᑫᒃ ᑳ ᔖᑲᐙᒃ ᐃᔥᒀᑌᒻ; ᐌᓴ ᒥᒉᑦ, ᑭᑦ ᐃᑎᓇᐗᐤ, ᑲᑕ ᐎ ᐱᑐᑫᐗᒃ ᓇᒪᐎᓚ ᒫᑲ ᑲᑕ ᑮ ᑐᑕᒶᒃ᙮ 25ᐃᔅᐱ ᑳ ᑎᐯᓕᑕᒃ ᐙᔅᑳᔨᑲᓂᓕᐤ ᐯᔭᑾᐤ ᑮ ᐸᓯᑯᒋ, ᓀᔥᑕ ᑮ ᑭᐸᐊᑭ ᐃᔥᒀᑌᒥᓕᐤ, ᑭᓚᐗᐤ ᒫᑲ ᒫᒋ ᓂᐹᐎᔦᑴ ᐗᓚᐎᑎᒥᒃ, ᓀᔥᑕ ᐹᐸᐎᐃᑫᔦᑴ ᐃᔥᒀᑌᒥᒃ, ᐁ ᐃᑗᔦᒃ, ᑌᐯᓕᒋᑫᔭᓐ, ᑌᐯᓕᒋᑫᔭᓐ, ᐋᐸᐊᒫᐎᓈᓐ; ᓇᔥᑴᐗᔑᐃᐌᑌ ᒫᑲ ᐁ ᐃᑎᑖᒃ, ᓇᒪᐎᓚ ᑭ ᑭᔅᑫᓕᒥᑎᓇᐗᐤ ᑖᓐᑌ ᐌᒋᔦᒃ; 26ᐁᑯ ᑫ ᒫᒋ ᐃᑗᔦᒃ, ᓂ ᑮ ᒥᒋᓱᓈᓐ ᓀᔥᑕ ᓂ ᑮ ᒥᓂᒀᓈᓐ ᐁ ᐙᐸᒥᔮᒃ, ᑭ ᑮ ᑭᔅᑭᓄᐊᒫᑳᓐ ᓀᔥᑕ ᓂ ᐱᒧᑌᔅᑲᓈᓈᒃ᙮ 27ᒫᑲ ᑲᑕ ᐃᑗᐤ, ᑭ ᐎᑕᒫᑎᓇᐗᐤ, ᓇᒪᐎᓚ ᓂ ᑭᔅᑫᓕᑌᓐ ᑖᓐᑌ ᐌᒋᔦᒃ: ᐊᐗᓯᒃ ᒥᓯᐌ ᑭᓚᐗᐤ ᑳ ᒪᒋᑐᑕᒣᒃ᙮ 28ᐁᑯ ᑫ ᐃᑕᑾᒃ ᒫᑐᐎᓐ, ᓀᔥᑕ ᐁ ᒫᑗᐋᐱᑌᔑᓂᓈᓂᐗᒃ, ᐃᔅᐱ ᐙᐸᒣᑾᐌ ᐁᑉᕃᐋᒻ, ᓀᔥᑕ ᐋᐃᓯᒃ, ᓀᔥᑕ ᒉᑲᑉ, ᓀᔥᑕ ᒥᓯᐌ ᐅᑭᔅᑭᐙᐃᑫᐗᒃ, ᑭᒋᒪᓂᑐᐗ ᐅᑦ ᐅᑭᒫᐎᐎᓂᓕᒃ, ᓀᔥᑕ ᑭᓚᐗᐤ ᑫᒋᐙᒃ ᐁ ᐗᓚᐎᑎᔑᓂᑲᐎᔦᒃ᙮ 29ᑲᑕ ᐯᒋ ᐅᑐᑌᐗᒃ ᒫᑲ ᐙᐸᓄᒃ ᓀᔥᑕ ᓂᑳᐯᐊᓄᒃ, ᓀᔥᑕ ᑭᐌᑎᓄᒃ, ᓀᔥᑕ ᔖᐗᓄᒃ, ᑲᑕ ᓇᐊᐱᐗᒃ ᒫᑲ ᑭᒋᒪᓂᑐᐗ ᐅᑦ ᐅᑭᒫᐎᐎᓂᓕᒃ᙮ 30ᒫᑎᑲ, ᒫᑲ, ᐃᑖᐗᒃ ᑳ ᒫᒋᒡ ᐃᑌᓕᑖᑯᓯᒋᒃ ᑫ ᓃᔥᑕᒻ ᐃᑌᓕᑖᑯᓯᒋᒃ, ᓀᔥᑕ ᑳ ᓃᔥᑕᒻ ᐃᑌᓕᑖᑯᓯᒋᒃ ᑫ ᒫᒋᒡ ᐃᑌᓕᑖᑯᓯᒋᒃ᙮
ᒋᓴᔅ ᐁ ᐃᔑ ᓵᑭᑖᑦ ᒋᕉᓴᓚᒻ
(ᒫᑎᐤ 23:37–39)
31ᐁᐗᑯ ᑫᔮᐸᒡ ᐁ ᑭᔑᑳᓕᒃ ᑮ ᐯᒋ ᐃᑐᑌᐗᒃ ᐋᑎᑦ ᐸᕋᓯᔭᒃ, ᐁ ᐃᑖᒋᒃ, ᐗᓚᐎ, ᑭᑐᑌ ᒫᑲ: ᐌᓴ ᐦᐁᕋᑦ ᑭ ᑳ ᓂᐸᐃᒃ᙮
32ᑮ ᐃᑌᐤ ᒫᑲ, ᓇᑕᐎ ᐎᑕᒫᒃ ᐊᓇ ᒪᑫᓯᐤ, ᒫᑎᑲ, ᓂ ᐗᓚᐎᐌᐱᓈᐗᒃ ᒪᒋ ᐊᒑᑾᒃ, ᓀᔥᑕ ᓂ ᒥᓇᐙᒋᐃᐙᓐ ᐊᓄᒡ ᐁ ᑭᔑᑳᒃ ᓀᔥᑕ ᑫ ᐙᐸᒃ, ᓂᔅᑐ ᑭᔑᑳᑫ ᒫᑲ ᓂ ᑳ ᒥᑐᓂᐎᐃᑳᐎᓐ᙮ 33ᐁᓕᐌᒃ ᒫᑲ, ᓂ ᑳ ᐱᒧᑖᓐ ᐊᓄᒡ ᐁ ᑭᔑᑳᒃ ᓀᔥᑕ ᑫ ᐙᐸᒃ, ᓀᔥᑕ ᒥᓇ ᐊᑎ ᑭᔑᑳᑫ: ᐌᓴ ᓇᒪᐎᓚ ᑲᑕ ᑮ ᐃᑭᓐ ᑭᒋ ᓂᔑᐗᓈᑎᓰᑦ ᐅᑭᔅᑭᐙᐃᑫᐤ ᐱᑯ ᒋᕉᓴᓚᒥᒃ᙮
34ᐅ ᒋᕉᓴᓚᒻ, ᒋᕉᓴᓚᒻ, ᑳ ᓂᐸᐊᒋᒃ ᐅᑭᔅᑭᐙᐃᑫᐗᒃ, ᓀᔥᑕ ᑳ ᐱᒶᓯᓈᑕᐗᒋᒃ ᐊᓂᑭ ᑳ ᐃᑎᔕᐊᒫᑲᐎᔭᓐ: ᑖᓐ ᐁᔅᐱᒋ ᒥᒉᑡᐤ ᑫ ᐎ ᒪᐗᓴᑯᓇᒀᐸᓐ ᑭᑦ ᐊᐙᔑᒥᔕᒃ ᑖᐱᔅᑯᒡ ᐹᑲᐋᒀᓐ ᐁ ᒪᐗᓴᑯᓈᑦ ᐅ ᐹᑲᐋᑾᓂᔑᔑᒪ ᔑᐹ ᐅᑕᑲᑾᓂᒃ, ᓇᒪᐎᓚ ᒫᑲ ᑭ ᐅᒋ ᐯᑌᓈᐗᐤ! 35ᒫᑎᑲ, ᑭ ᐙᔅᑳᔨᑲᓂᒥᐗᐤ ᑭ ᓇᑲᑕᒫᑲᐎᓇᐗᐤ ᐁ ᓂᔑᐗᓈᑕᒃ: ᑖᐺ ᒫᑲ ᑭᑦ ᐃᑎᓇᐗᐤ, ᓇᒪᐎᓚ ᑭ ᑳ ᐙᐸᒥᓇᐗᐤ ᐹᑎᒫ ᐅᑎᒋᐸᓕᑫ ᑭᒋ ᐃᑗᔨᒃ, ᔕᐌᓕᑖᑯᓯᐤ ᐊᓇ ᑳ ᐯᒋ ᐃᑐᑌᑦ ᐅᑎᐯᓕᒋᑫᐗ ᐅᑦ ᐃᔑᓂᑳᓱᐎᓂᓕᒃ᙮
Currently Selected:
ᐅᐸᓓᑭᔅ ᓘᒃ 13: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.