Matayo 7
7
Ŋolo kop i kom jo ocele
(Nen daŋ Luka 6.37-38, 41-42)
1“Kur iŋol wunu kop, me wun daŋ kur ŋolliwu kop; 2#Mar. 4.24pien kodi kop ame iŋolo wunu obino ŋolliwu kede, dok kit gin ame ipimo wunu kede, en ame daŋ obino pimmiwu kede. 3Piŋo ineno cuŋ kal ame tye i waŋ ominni, aco kono ikoŋ a tye i waŋi ikomi neno loi oko? 4Onyo itwero kobo ominni niŋo ni, ‘Wek akwany cuŋ kal a tye i waŋi oko’, a kun yin twon ikoŋ tye oyimere i waŋi? 5Yin agoba, koŋ ige kwanyo ikoŋ a tye i waŋi, eka ite doŋ neno aber me kwanyo cuŋ kal a tye i waŋ ominni.
6“Kur imi wunu gin acil baŋ gwogi, daŋ pe ibolu tiggiwu me wel i nyim punni, me gin kur nyon piny i tyengi, te dok lokere, tojowu.
Kwa wunu, obino miyowu
(Nen daŋ Luka 11.9-13)
7“Kwa wunu, obino miyowu; yeny wunu, ibino wunu nwoŋo; twom wunu kika, obino yabbiwu. 8Pien dano acel acel ame kwao, omie, ŋat a yenyo, nwoŋo; ŋat a goo doggola oyabbe kika. 9Kara ŋa i akinawu, ka atin okwae ogati, lunyo miye gweŋ? 10Onyo ka okwae rec lunyo miye twol? 11Ka wun jo areco iŋeo miyo itinowu mot abeco, Papawu a tye i polo mom doŋ bino kato meicel imiyo jami abeco baŋ jo a kwae? 12#Luk. 6.31Doŋ ba, gin luŋ ame imito wunu ni jo timwu kede, wun daŋ tim wunugi amannono, pien man en cik a Muca kede pwony odwarpiny.
Doggola adiŋ
(Nen daŋ Luka 13.24)
13“Dony wunu i doggola adiŋ, pien yo a woto i to lac, dok ber, jo ame lubo pol. 14Pien doggola me kwo diŋ, yo a woto iye daŋ rac, jo a bea iye nok.
Yat ŋeye pi nyige
(Nen daŋ Luka 6.43-44)
15“Gwokere wunu i kom odwarpiny ame ogoba, ame gin bino baŋwu kun orukere bala rommi, ento oger i yigi bala epet. 16Ibino wunu ŋeyogi i kom nyiggi. Olok opwono i kom oryaŋ? Ibuu opwono i kom ocokocok? 17Amannono yat acel acel aber nyako nyige abeco, ento yat arac nyako nyige areco. 18Yat aber mom twero nyako nyige areco, dok yat arac mom twero nyako nyige abeco. 19#Mat. 3.10; Luk. 3.9Yat acel acel a mom nyako nyige abeco, otoŋo, obolo i mac. 20#Mat. 12.33Pi mannono ibino wunu ŋeyogi i kom nyiggi.
Anaka cene an mom aŋeowu
(Nen daŋ Luka 13.25-27)
21“Mom ni dano acel acel ame lwoŋa ni, ‘Rwot, Rwot,’ en a bino donyo i loc me polo, ento kono dano ame tio gin a Pappa a tye i polo mito. 22I nino-nono jo apol bino kobba ni, ‘Rwot, Rwot, wan yam mom orabo kop Obaŋa i nyiŋi? Wan yam mom oryemo cen i nyiŋi? Mom wan otio tic atek adoŋo apol kede nyiŋi?’ 23#Jab. 6.8Cite i kare-nu abino kobbigi ni, ‘Anaka cene an mom aŋeowu gira. Wot wunu teŋe i nyima, wun otim tim areco!’
Udi aryo ame ogero
(Nen daŋ Luka 6.47-49)
24“Pi mannono, dano acel acel ame winyo koppa, daŋ te tiyo, bino rom aroma kede dano ame aryeko, ame agero ode i kom lela. 25Doŋ ka kot ocwe, alele omol, yamo okuto, obukoro i ot-tu kede teko, naka ot mom orette, pien acakki tere onwoŋo ocibo i kom lela. 26Ento dano acel acel a winyo koppa, mom te tiyo, en rom aroma kede dano ame amiŋo, a rik ogero ode i kwoo. 27Doŋ ka kot ocwe, alele omol, yamo okuto, obukoro i ot-tu kede teko, ot orette, orette orwop.”
Twer ame Yecu obedo kede
(Nen daŋ Marako 1.22)
28 #
Mar. 1.22; Luk. 4.32 Ame Yecu doŋ otyeko kobo kop magu luŋ, lwak owuro pwonnyere atek, 29pien opwonyogi acalo ŋat a tye kede twer, mom acalo opwony-cikgi.
Currently Selected:
Matayo 7: La79
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fka.png&w=128&q=75)
Want to have your highlights saved across all your devices? Sign up or sign in
Lango New Testament © Bible Society of Uganda, 1979.