GENESIS 2
2
Efiku letulumuko laKalunga
1Osho ngaha eulu nedu nomangafifi alo a xulifwa a pwa. 2Ndele Kalunga okwa xulifa mefiku etiheyali oshilonga shaye eshi a longa, ndele okwa tulumukwa mefiku etiheyali koilonga yaye aishe Ye e i longa. 3Ndele Kalunga okwa nangeka noupuna efiku etiheyali nokwe li yapula, shaashi Ye omo a tulumukwa koilonga yaye aishe e i shita noku i ninga.
Okushitwa kwomulumenhu nomukainhu
4Eshi omahepu taa hepaulula eulu nedu eshi la shitwa.
Mefiku olo Omwene Kalunga a ninga eulu nedu, 5inapa kala nande oshixwa moixwa kombada yedu noshimeno shomoixwa nande oshimwe sha eta ohengo. Osheshi Omwene Kalunga ina lokifa natango odula kombada yedu, ndele inapa kala nande omunhu wokulonga edu; 6ndelenee omuku wa dja medu ndele wa tutika ongonga aishe yedu.
7Ndele Omwene Kalunga okwa ma omunhu nondwi yedu ndele te mu fudile meyulu laye omufudo womwenyo. Osho ngaha omulumenhu a ninga omwenyo u na omwenyo.
8Omwene Kalunga okwa twika oshikunino muEden, moushilo, omo Ye a yandja onhele, komunhu ou a ma. 9Ndele Omwene Kalunga okwa menifa medu omiti di lili noku lili da wapala okutala nodinyenye okuliwa, ndele mokati koshikunino Ye okwa menifa mo omuti womwenyo, nomuti wokushiiva ouwa nowii.
10Ndele muEden mwa dja omulonga wokututika oshikunino ndele oo wa tukuka ndele tau ningi omilonga nhee. 11Edina laau wotete oPishon, ou wa dingilila oshilongo ashishe shaHavila, omo mu noshingoldo. 12Ndele oshingoldo shomoshilongo osho oshiwa. Omo omu na yo eka labedellion noumanya vaoniks. 13Edina lomulonga omutivali, oGihon, ou wa dingilila oshilongo ashishe shaKus. 14Nedina lomulonga omutitatu oTigris, ou wa enda koushilo waAsiria. Omulonga omutine oEufrat.
15Opo nee Omwene Kalunga okwa kufa omunhu, ndele te mu nangeke moshikunino shaEden, oku shi longa noku shi kelela.
Oshipango shaKalunga
16Ndele Omwene Kalunga okwa lombwela omunhu ndele ta ti: “Lya komiti adishe domoshikunino ngaashi wa hala, 17ndelenee omuti wokushiiva ouwa nowii, ino u lya. Osheshi efiku tuu olo to u li, ou na okufya shili.”
Eshito lomukainhu
18Omwene Kalunga okwa tile: “Keshiwa omunhu a kale aeke. Ame ohandi ke mu ningila ekwafo tali mu wapalele.” 19Ndele Omwene Kalunga okwa ma nedu oinamwenyo aishe yomoixwa needila adishe dokeulu, ndele Ye okwe i eta komunhu a tale nhumbi te i luku. Ndele naanaa ngaashi omunhu a luka oinamwenyo aishe, osho omadina ayo e na okukala. 20Osho hano omunhu okwa luka oimuna aishe needila dokeulu noifitukuti aishe yomoixwa, ndelenee omunhu ina monenwa ekwafo, tali mu wapalele. 21Opo Omwene Kalunga okwa kofifa omunhu eemhofi didjuu, ndele fimbo a kofa, Ye okwa kufa mo olupati limwe lomeemhati daye nonhele yalo okwe i fitika nonhumba. 22Ndele Omwene Kalunga okwa tunga olupati e li kufa momunhu, omukainhu, ndele te mu eta komunhu. 23Opo nee omunhu ta ti:
“Eshi ekipa lomomakipa ange
nonhumba yomonhumba yange.
Ye oku na okulukwa omukainhu a dja momulumenhu,
osheshi ye okwa kufwa momulumenhu.”
24Onghee hano omulumenhu oku na okufiya po xe naina nokukanyatela komukainhu waye. Ndele vo otava kala onhumba imwe aike. 25Ndele vo aveshe vavali ova li hamunghele, omulumenhu nomukainhu waye, ndele vo inava fya ohoni nande.
Currently Selected:
GENESIS 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.