Mateo 5
5
Da' n'aqtaxanaxac 'me hualégue so' qasoxonaxa
1So' Jesús joca'li ỹiláaue da' ỹátaqta jalcote so' siỹaxadipi, qana'chi ỹic'ádisee'ma so' qasoxonaxa, qana'chi ñíiñi, qana'chi so' lapaxaguenatacpi ỹimalégue jeso'me. 2Qana'chi so' Jesús ỹapaxaguéetac so' siỹaxadipi, 'enaaco':
Jen'me ỹátaqta 'eesa da' máchiiñi qa'en
(Lucas 6.20-23)
3—Ỹátaqta máchiiñi qa'en qomle jen'me naatetootela't da' ỹiuen ga' lecochaxac ñi' Dios, qá'a jen'me huétaaue qomle da' l'onataxanaxac ñi' Dios 'me net'ague da' piỹem da' ỹilo'ogue ỹimata'a'téna.
4Qataxa ỹátaqta máchiiñi qa'en qomle jen'me 'uo da' laquicoxo, qá'a ñi' Dios ỹanem ga' lamaic.
5Qataxa ỹátaqta máchiiñi qa'en qomle jen'me sa ỹ'oxodénaxai jañi' liquidiaqte, qá'a jen'me ỹaconguet qomle ga' 'aléua 'me ỹaloxóotapega ñi' Dios.
6Qataxa ỹátaqta máchiiñi qa'en qomle jen'me 'ená'am da' 'uo da' loqouáxa qataxa ỹiliinquip da' sétaaque da' ỹí'et jega'me 'éetapeec ñi' Dios, qá'a jiñi'me lecochiỹa qomle jen'me, da' qaidi ỹañoxot da' ỹí'et.
7Qataxa ỹátaqta máchiiñi qa'en qomle jen'me ỹichoxoden ga' laqáỹa, qá'a ñi' Dios ỹichoxoden qomle jega'me.
8Qataxa ỹátaqta máchiiñi qa'en qomle jen'me ỹoqovíta jan' liquidiaqte, qá'a jen'me nauá'ne' qomle ñi' Dios.
9Qataxa ỹátaqta máchiiñi qa'en qomle jen'me huetapeeguet da' qaidi 'uo ga' nelagaxadic, qá'a ñi' Dios ỹimatá'ac qomle da' ỹátaqta lec'oqtepi.
10Qataxa ỹátaqta máchiiñi qa'en qomle jen'me ni'quichínỹi da' necanáguec, ỹasouaxat da' ỹ'étetac ga' 'éetapeec ñi' Dios, qá'a jen'me huétaaue qomle da' l'onataxanaxac ñi' Dios 'me net'ague da' piỹem da' ỹilo'ogue ỹimata'a'téna.
11Qataxa ỹátaqta 'ami máchidiñi qomle 'ami ỹisoueet'ape na' siỹaxadipi, 'uootaxa da' sa 'te da' 'ami ỹiỹamaxata'pe qataxa da' 'ami ỹasaxalóo'te na' ỹodapecachi noqovínaxanaxacpi, ỹasouaxat da' jaỹim 'oquiit'egue. 12Ỹátaqta 'ami máchidiñi qomle qataxa 'antóñiita't, qá'a 'ami 'auacoñiiỹet qomle ga' sa lec'óxotolec 'anseeténaguiquii 'me hua'ague di' piỹem. Qá'a naqaida da' 'éeta da' necanáguec jeso'me huá'au l'aqtáxanaxanecpi ñi' Dios joca'li maliaxa 'ami qaỹaua.
Ga' qaa'noua qataxa jaga' coỹadáxanaqte 'me ỹiuéetaaque jen'me siỹaxadipi
(Marcos 9.50; Lucas 14.34-35)
13'Ami 'oñí'ỹam ga' qaa'noua 'me ỹiuen jen'me huetalégue jen' 'aléua. Qaláxasa ga' qaa'noua, da' 'uootaxa qaỹa 'te ga' l'ouáxa, ¿séetapega ỹiset da' ỹitaxa v'iỹílaxalégue da' nó'in jega'me? Qana'chi sa 'te da' 'uo ga' taiỹet. Na'chidáta da' qoỹiguem, qataxa 'chi piỹi jen' siỹaxadipi.
14'Ami nataq'en 'oñí'ỹam jaga' lecoỹadaqte jen'me huetalégue jen' 'aléua. Ga' noic 'me netalégue jega' qasoxonaxa, jega'me sa 'te da' qoỹoxotétapiiñi. 15Qataxa sa 'te da' qoỹitétooue jaga' coỹadáxanaqte, da' qaidi qoỹano'ot na' p'áñi jaga' casón. Na'chidáta da' qoỹanaséguem, qaidi ỹ'oqotelégue ỹima jen'me huétaaue jega' 'emec. 16Qana'chi naq'áita qomle nataq'en da' 'oñíita, ỹátaqta 'au'edáxachiỹoovlo qomle naua' 'adecoỹadáxanaqchídii', qaidi ỹ'oqotelégue na' siỹaxadipi, qaidi jena'me, da' ỹilá'a jeda'me nó'in 'me 'av'íchiitac, qana'chi jena'me ỹi'ỹoxoden ñi' qadet'a 'me netalégue di' piỹem.
So' Jesús dapaxaguenataxáatapeec na' laqátaxacpi so' Moisés
17Sa 'te qomle da' 'aviñíitapega da' jaỹim ñanac da' ñoláxachiñi jen' laqátaxacpi so' Moisés qataxa na' lapaxaguenataxanaxac jeso'me l'aqtáxanaxanecpi ñi' Dios. Jaỹim sa 'te da' ñisoỹíñi jen'me. Na'chidáta da' jaỹim ñanac, qaidi ỹipaquíchiỹi qasen jega'me ỹátaqta náỹi. 18'Eesa 'ami senapegalo da' 'uootaxa maliaxa 'uo na' piỹem qataxa jen' 'aléua, qaláxasa sa 'te da' 'uo ga' qonaqat jen'me sa 'amaqtaq nidíisecpiolec jen'me naqátaxacpi, na'chidato' qomle ma'le ỹipaquíchiỹi ỹima jen'me taỹá'a da' di'ỹoq. 19Chan'eesa ga' sa 'te da' ỹalaxaguet ga' 'oonolec jénjo' naqátaxacpi, temaqaidi da' 'uootaxa ỹágueegue da' sa 'amaqtaqolec, qana'chi jega'me, da' ỹapaxaguenec na' laỹi da' sa ỹalaq, qana'chiga ga' ỹágueegue qaỹa ga' l'amaqchic qoỹin qomle qodíuaiỹi da' l'onataxanaxac ñi' Dios 'me net'ague da' piỹem da' ỹilo'ogue ỹimata'a'téna. Qaláxasa jega'me ỹátaqta ỹalaxaguet jen' naqátaxacpi, qataxa ỹapaxaguen ga' laqáỹa qaidi ỹalaq, qana'chiga qomle ga' ỹátaqta 'amaqtaq qoỹin qomle qouétaaue da' l'onataxanaxac ñi' qan'étoqo't. 20Qá'a 'ami senapegalo da' 'uootaxa sa 'anapaquiỹalégue jen'me dapaxaguenataxanec na' naqátaxacpi qataxa na' nedétaaue na' fariseopi da' 'av'íchii jega'me 'éetapeec ñi' Dios, qana'chi sa 'te qomle da' 'aunoxoñiiuó'o da' l'onataxanaxac jiñi'me.
So' Jesús dapaxaguenataxanec da' qoỹivita'aguet da' nalemataic
(Lucas 12.57-59)
21'Ami 'anaquiáxañiitapeelégue náxa da' napaxaguenataguec jeso'me huá'au qadalémaxaset qadet'alpi 'me 'eet'oi: “Sa 'te qomle da' 'aualaataxan. Qá'a da' 'uootaxa 'uo ga' dalaataxan, qana'chi jega'me qoỹa'uo ga' ne'uaxánaguec.” 22Qaláxasa jaỹim 'ami senapegalo da' 'uootaxa 'uo ga' dalemataỹa ga' laqáỹa, qana'chi jega'me qoỹa'uo ga' ne'uaxánaguec. Qataxa jega'me ỹisouen ga' laqáỹa, qaláxasa jega'me qoỹauée'uo jega'me net'alpi 'me loiquinatac na' naqátaxacpi, da' qaidi qonimit. Qataxa jega'me ỹimatétapeelégue da' qaỹa ga' ỹaỹátenaac ga' laqáỹa, qana'chi jega'me huetalégue qoỹin da' lichic da' tánỹi qoỹin ga' dóle' 'me huá'ña da' ỹa'uo da' ne'uaxánaguec ñi' Dios jen' 'itaxalóxoicpi.
23Chan'eesa 'am, da' 'uootaxa 'audóta'uo jaga' 'ad'ágaxanaqte jaga' neco'ỹoxonaxalate da' 'auanot ñi' Dios, da' táchiỹi 'adauel ga' 'adaqáỹa da' 'uootaxa huet'ot ga' 'adasouaxaset, 24qana'chi 'am 'aupotan'asop jaga' neco'ỹoxonaxalate jaga' 'ad'ágaxanaqte, qana'chi 'au'áuaxañi da' 'anemá'ne' ga' 'adaqáỹa. Ỹim, qana'chi 'am 'av'iỹílaxa'uo jaga' neco'ỹoxonaxalate, qana'chi 'auaneuo jaga' 'ad'ágaxanaqte.
25Da' 'uootaxa 'uo ga' 'am necotaỹapégue', qana'chi 'am ỹauée'uo ga' nimitaac na' nasouaxasetpi. Qaláxasa 'am 'au'áuaxañi da' 'aniỹamaxá'te' jega'me, qaidi sa 'te da' 'am ỹicoñi' jega'me net'a. Qana'chi jega'me net'a 'am ỹaneuó'o ga' huataxanaq. Huá'a, qana'chi 'am qoỹanáaue jaga' cointáxanaxaqui. 26Huá'a, qana'chi 'am sa 'te da' 'anenoxonéegue da' 'uootaxa maliaxa da' sa ỹima da' 'auseeten jaga' 'adavíỹaxasete.
So' Jesús dapaxaguenataxanec da' qoỹivita'aguet da' qonamaqá'ñi' jaga' sa noua
27'Ami 'anaquiáxañiitapeelégue naale da' n'aqtac 'me 'enaac: “Sa 'te da' 'adeuaua jaga' sa 'adoua.” 28Qaláxasa jaỹim 'ami senapegalo da' 'uootaxa 'uo ga' 'chi ỹilótapega jaga' ỹauo da' 'uootaxa 'uo da' loqopi'chi, qana'chi jega'me sóxote da' 'ená'am da' mai'chi necachítapegue' jaga'me jeda'me leenataxac.
29Chan'eesa jana' 'ad'aite p'aiỹi na' 'auaỹáten, da' 'uootaxa ỹa'uo ga' 'adasouaxaset, qana'chi 'ónaxaic da' 'anaqat, qana'chi 'auasaxáiỹi. Qá'a ỹiỹamqáchiiñi da' 'uo ga' daqat naua' 'adoxose'te, qaláxasa sa 'te da' ỹima da' 'adó'oquiaxac da' qoỹasaxá'ña ga' ne'uaxánaqa' na' 'itaxalóxoicpi. 30Qataxa na' 'adouaq p'aiỹi na' 'auaỹáten, da' 'am nasonáñi, qana'chi 'ónaxaic da' 'avicháxaỹi, qana'chi 'auasaxáiỹi. Qá'a ỹiỹamqáchiiñi da' 'uo ga' daqat naua' 'adeuoxose'te, qaláxasa sa 'te da' ỹima da' 'adó'oquiaxac da' qoỹasaxá'ña ga' ne'uaxánaqa' na' 'itaxalóxoicpi.
Jeso' Jesús dapaxaguenataxanec da' lasoxoc jega'me nañíi'me' jaga' loua
(Mateo 19.9; Marcos 10.11-12; Lucas 16.18)
31Joca'li nataq'en qoỹinaaco': “Da' 'uo gamachaqaiga ỹiguem jaga' loua, qaláxasa jega'me ỹanem jaga' lemalate da' ỹiguem jaga'me.” 32Qaláxasa jaỹim 'ami senapegalo da' 'uootaxa 'uo ga' siỹaxaua da' ỹiguem jaga' loua, da' sa 'te da' ỹasouaxatelégue da' lequeséeguetaxa, qana'chi jega'me ỹasouaxateguet jaga' loua da' sega'me queséeguetaxai. Qataxa jega'me 'uoneguet jaga'me qoỹiguem ỹauo, jega'me nataq'en qoỹimatá'ac da' 'uonáxaỹaic.
So' Jesús dapaxaguenataxanec da' lasoxoc da' qoỹan da' n'aqtac
33Nataq'en 'ami 'anaquiáxañiitapeelégue naale da' n'aqtac joca'li jeso'me huá'au qadet'alpi 'me 'eet'oi: “Sa 'te qomle da' sa 'apaguelégue ga' 'ad'aqtac 'me demachíchiỹi 'auen ñi' 'adasoxola' Dios da' 'auan.” 34Qaláxasa jaỹim 'ami senapegalo da' sa 'te da' 'chi 'auan ga' 'ad'aqtac. Sa 'te da' 'aviỹáxatapega di' piỹem da' chiỹoqo'ot ga' 'ane'uaxánaguec da' 'auan ga' 'ad'aqtac, qá'a naqaidi di' nes'ootalégue ñi' Dios; 35'uootaxa jen' 'aléua, qá'a na'chína na' petalégue jiñi'me; 'uootaxa di' noic Jerusalén, qá'a jidi'me naqaidi jidi'me l'acháqa' ñi'me Dios 'me qadet'a let'ádaic. 36Nataq'en sa 'te da' 'aviquíchiỹi na' 'adaqaic da' 'uootaxa 'auan ga' 'ad'aqtac, sétaaque 'auen 'eesa ga' 'ad'aqtac, qá'a sa 'auañoxot da' 'uootaxa mai'chi ỹapagaq 'auen jaga' 'oonole jana' 'adaỹoqte, 'uootaxa léedaxai. 37Na'chidáta da' 'oonolec ga' 'au'achiiỹet. 'Oñiit'oi: já'a, 'uootaxa 'ai'. Qá'a ga' 'chi qochiỹoxotáiỹi n'aqtac, jega'me chiỹoqo'ot jeso'me qadó'o paiỹac.
So' Jesús dapaxaguenataxanec da' qoỹivita'aguet da' qoỹipalátaaque ga' nóvi'
(Lucas 6.29-30)
38'Ami nataq'en 'anaquiáxañiitapeelégue naale da' n'aqtac 'me 'enaac: Ga' naqat jañi' l'aite ga' laqáỹa, jega'me nataq'en qonaqat jañi' l'aite; qataxa ga' naqat jaga' lodaite ga' laqáỹa, nataq'en qonaqat jaga' lodaite. 39Qaláxasa jaỹim 'ami senapegalo da' sa 'te da' 'aualoqtena'aguet jega'me 'uo ga' 'ami ỹ'eteque. Na'chidáta da' 'uootaxa 'uo ga' ỹi'uaxánỹi jana' 'adalíinque, qaláxasa 'auaséet'em jana' laqáỹa. 40Qataxa da' 'uo ga' sétaaque da' 'am necotaỹapégue', qana'chi ỹacona ga' 'ansomaxaqui, qana'chi 'amachít'a da' ỹáchi nataq'en ga' 'adapoto. 41Qataxa da' 'uootaxa 'uo ga' huataxanaxalé'ec Roma lé'ec 'am ỹachoxónaxanec ga' lí'ỹac da' 'auedá'a ga' taỹa'ague, qaláxasa 'anchíỹaxateteegue ga' 'auedá'a. 42Qataxa da' 'uo ga' 'am ỹiỹaxanot, qaláxasa 'auanem jega'me ỹiỹáxanaaque. Qataxa sa 'te da' 'auasoxóteegue da' 'uootaxa 'uo ga' 'am d'áalaxana.
Qoỹauotec ga' dep'aguenataxáatac
(Lucas 6.27-28, 32-36)
43Nataq'en 'anaquiáxañiitapeelégue naale da' n'aqtac 'me 'enaac: 'Auauotec ga' 'adaqáỹa, qaláxasa ỹátaqta 'anquiỹá'a ga' 'am ỹip'aguéetac. 44Qaláxasa 'ami senapegalo da' ỹátaqta 'auauochíỹic ga' 'ami ỹip'agueet'ape, qataxa 'auasaqailégue ga' 'ónaxaic ga' 'ami ỹisoueet'ape, qataxa 'av'íchiic ga' ỹiỹamqáchiiñi ga' 'ami niquiỹátapegalo, qataxa 'antamiñiitalégue jega'me 'ami ỹisoueet'ape, qataxa jega'me 'ami sa ỹiỹamaxata'pe. 45Qaidi ỹátaqta 'ami lec'óqo'te jiñi'me 'adet'ai 'me net'ague da' piỹem. Qá'a jiñi'me ỹicoỹadetalégue qa'en jañi' c'atena jega' lalaỹa't qataxa ga' sóxodaic, qataxa namaq jen' huétep, qaa'le talégue qa'en jen'me 'ónaxaic da' lasoxoc qataxa jega'me sa nó'in da' lasoxoc. 46Qá'a 'ami da' nedóteegue jega'me 'ami ỹauoteque, na'chiga 'auauochíỹic, qana'chi ¿hua'ago' ga' 'éeta da' 'uo ga' 'anseeténaguiquii? Qá'a nataq'en ỹí'et dójo' jen'me ỹacootapeeguet jana' neseetenaqte ga' net'a Roma lé'ec. 47Qataxa da' 'uootaxa nedóteegue ga' 'adaqáỹa da' 'anp'iỹíitapegue', qana'chi ¿jái'chogamaxa nó'in 'me náỹi dójo'? Qá'a cha ỹivíd'a da' ỹí'et dójo' jen'me sonaliaxa da' ỹaateton ñi' qan'étoqo't. 48Chan'eesa ỹátaqta nalóchiiñi qomle da' 'adasoxoquii, qaidi 'aviñí'ỹam da' lasoxoc jiñi'me 'adet'ai 'me net'ague da' piỹem da' ỹátaqta nalóchiiñi.
Currently Selected:
Mateo 5: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.