ମାଥିଉ 15
15
ହୁର୍ବାର୍ ଲକ୍ମ୍ନ୍କାର୍ ରିତୀ ନିତି ଆର୍ ଇଶ୍ଵରାର୍ ବାକ୍ୟ
(ମାର୍କ ୭:୧-୧୩)
1ସେଡେବ୍ଳ୍ ଯିରୁଶାଲମ୍ ହ୍ଣି ଫାରୂଶୀ ଆର୍ ମୋଶାର୍ ନିଆଇ ଶିକାଉତା ଲକ୍ମ୍ନ୍ ଯୀଶୁର୍ ଲ୍ଗେ ଆସି କଇଲାଇ, 2“ତର୍ ଚେଲାମ୍ନ୍ କାଇତାକ୍ ଅମାର୍ ହୁର୍ବାର୍ ଲକ୍ମ୍ନ୍କାର୍ ରିତୀନିତୀକେ ନ୍ମାନ୍ତି? କାଇତାକ୍ ସେମ୍ନ୍ କାତାବ୍ଳ୍ ଯିହୁଦିମ୍ନ୍କାର୍ ନିୟମାର୍ ହର୍ ଆତ୍ ନ୍ଦଉତି?” 3ଯୀଶୁ ସେମ୍ନ୍କେ କଇଲା, “ତୁମିମ୍ନ୍ ହେଁ କାଇକ୍ରୁକ୍ ତୁମାର୍ ରିତୀନିତୀକେ ମାନ୍ତାର୍ ଗିନେ ଇଶ୍ଵରାର୍ ଆଦେଶ୍କେ ମାନି ନ୍କେରାସ୍?
4ଇଶ୍ୱର୍ ତ କଇଲା ଆଚେ ଉବା ଆର୍ ଆୟାକେ ଲାଡ୍କ୍ରା, ଆରେକ୍ ଯେ କେ ଉବା କି ଆୟାକେ ଅବିଶାପ୍ ଦେଇଦ୍ ସେ ସ୍ତ୍କ୍ରି ମ୍ର୍ଣ୍ ଡ୍ଣ୍ତ୍ ହାଇଦ୍। 5ମ୍ତର୍ ତୁମିମ୍ନ୍ କ୍ଉତି ରିଆସ୍ କି, କେ ଜ୍ବେ ତାର୍ ଉବା କି ଆୟାକେ କଇଦ୍, ‘ମର୍ତ୍ଇହ୍ଣି ଜୁଇ ଉପ୍କାର୍ ତୁମାର୍ ହାଉତାର୍ ଦ୍ର୍କାର୍ ରିଲି, ସେରି “କୁର୍ବାନ୍” କ୍ରିଆଚି, ବଲେକ୍ ଇଶ୍ୱର୍ ଗିନେ ମାନ୍ସି କ୍ରି ଆତ୍ତି।’ 6ଆର୍ କ୍ବେ ହେଁ ସେ ନିଜାର୍ ଉବା ଆୟାକେ ଲାଡ୍ ନ୍କେରେ। ଅନ୍କାର୍ ତୁମିମ୍ନ୍ ନିଜାର୍ ଅବିଆସ୍ କ୍ଲା ବିଦିବିଦାନାର୍ ଗିନେ ଇଶ୍ଵରାର୍ କ୍ତାକେ ବେକାର୍ କ୍ରୁଲାସ୍।
7ରେ ଅକାରିଆମ୍ନ୍, ଯିଶାଇୟ ତୁମାର୍ ବିଷୟେ ସ୍ତ୍କ୍ରି ଇ ବାବବାଣି କଇଲା ଆଚେ,
8‘ଇ ଜାତି ଆମୁକେ ଟଣ୍ଡେ ସେ ମାନ୍ତି, ମ୍ତର୍ ସେମ୍ନ୍କାର୍ ମ୍ନ୍ ଅମାର୍ ତ୍ଇହ୍ଣି ବେସି ଦୁରି ର୍ଇଦ୍।
9ସେମ୍ନ୍ ମାନାଇମ୍ନ୍କାର୍ ନିୟମ୍ ସ୍ବୁ ଦ୍ର୍ମାର୍ ବ୍ଡ୍ ଆଦେଶ୍ ବ୍ଲି ଶିକ୍ୟା ଦ୍ଇ ବେକାରେ ଅମୁକେ ମୁଣ୍ତିଆ ମାର୍ତି।’”
ଜୁଇରି ମାନାଇକେ କ୍ରାପ୍ କ୍ରେଦ୍
(ମାର୍କ ୭:୧୪-୨୩)
10ଆରେକ୍ ଯୀଶୁ ଲକ୍ମ୍ନ୍କେ ଲ୍ଗେ କୁଦି ସେମ୍ନ୍କେ କଇଲା, “ତୁମିମ୍ନ୍ ସ୍ବୁଲକ୍ ମର୍କ୍ତା ଶୁଣା ଆର୍ ବୁଜା। 11ଅନ୍କ୍ରି କାଇ ବିଷଇ ନାଇ, ଯାଇରିକି ଲକାର୍ ହ୍ଦାଇ ହ୍ଣି ତାର୍ ବିତ୍ରେ ହୁରି ତାକେ କ୍ରାପ୍ କ୍ରୁହାରେ, ମ୍ତର୍ ଜୁଇ ଜୁଇ ବିଷଇ ଲକ୍ମ୍ନ୍କାର୍ ବିତ୍ରେହ୍ଣି ହ୍ଦାଇ ବାରେଦ୍, ସେସ୍ବୁ ତାକେ କ୍ରାପ୍ କ୍ରେଦ୍।”
12ସେଡେବ୍ଳ୍ ଚେଲାମ୍ନ୍ ଯୀଶୁର୍ ଲ୍ଗେ ଆସି କଇଲାଇ, “ଫାରୂଶୀମ୍ନ୍ ଇକ୍ତା ଶୁଣି ଯେ ଲାଜ୍ ହାଇଲାଇ ଆତ୍ତି, ତୁଇ କାଇରି ଇରି ଜାଣ୍ସି?” 13ମ୍ତର୍ ଯୀଶୁ ଉତର୍ଦିଲା, “ଜୁଇସ୍ବୁ ଗ୍ଚ୍ ମର୍ ସ୍ର୍ଗାର୍ ଉବା ଲାଗାଇ ନ୍କେରେ, ସେ ସ୍ବୁ ଜିକି ଅଇଦ୍। 14ସେମ୍ନ୍କେ ଚାଡିଦିଆସ୍, ସେମ୍ନ୍ କାଣା ଆର୍ଗଟ୍ କାଣାକେ ବାଟ୍ ଦ୍କାଉତା ଲକ୍ମ୍ନ୍, ଆର୍ ଜ୍ବେ ଗଟେକ୍ କାଣା ଆର୍ଗଟ୍ କାଣାକେ ବାଟ୍ କାଡାଇଦ୍, ତ୍ବେ ସେ ଜଳେକ୍ କାଣା ହେଁ କାଲେ ଅଦୁର୍ତି।”
15ସେତାକ୍ ପିତର୍ ତାକେ ଉତର୍ଦିଲା, “ଇ ଦ୍କାଇକ୍ରି କ୍ଉତା କ୍ତାକେ ଅମୁକ୍ମ୍ନ୍ ବୁଜାଇଦେ।” 16ଯୀଶୁ କଇଲା, “ତୁମିମ୍ନ୍ କାଇରି ଅବେହ୍ତେକ୍ ହେଁ ସେନ୍କାର୍ ନିର୍ବୁଦିଆ? 17ଜୁଇରି ହେଁ ମାନାଇର୍ ଟଣ୍ତ୍ ବିତ୍ରେ ହୁରେଦ୍, ସେରି ତାର୍ ହେଟେ ହୁରିକ୍ରି ହ୍ଦାଇ ବାର୍ ଅଇଦ୍, ଇରିକାଇରି ବୁଜି ନ୍କେରାସ୍?
18ମ୍ତର୍ ମାନାଇର୍ ଟଣ୍ତେହ୍ଣି ଜୁଇସ୍ବୁ ହ୍ଦାଇ ବାରେଦ୍, ସେରି ମ୍ନେ ହ୍ଣି ବାରେଦ୍ ଆର୍ ସେରି ହ୍କା ମାନାଇକେ କ୍ରାପ୍ କ୍ରେଦ୍। 19କାଇତାକ୍ ମ୍ନ୍ ବିତ୍ରେହ୍ଣି କ୍ରାପ୍ ବାବ୍ନା, ମାନାଇମାରୁ, ଦାରିକାମ୍, ବେଶ୍ୟାଲ୍ଗେ ଜାତାର୍, ଚର୍କାମ୍, ମିଚ୍ ସାକି ଆର୍ ଲିନ୍ଦା ବାର୍ ଅଇଦ୍। ଇ ସ୍ବୁ ହ୍କା ମାନାଇକେ କ୍ରାପ୍ କ୍ରେଦ୍, 20ମ୍ତର୍ ନ୍ଦଇଲା ଆତେ କାତାର୍ ଲକ୍କେ କ୍ରାପ୍ ନ୍କେରେ।”
କିଣାନୀୟା ମାଇଜିର୍ ବିଶ୍ବାସ୍
(ମାର୍କ ୭:୨୪-୩୦)
21ଯୀଶୁ ଆର୍ ତାର୍ ଚେଲାମ୍ନ୍ ସେ ଜାଗାଇ ହ୍ଣି ବାର୍ ଅଇ ସର୍ ଆର୍ ସୀଦନ୍ ସ୍ହ୍ର୍କେ ଗ୍ଲାଇ। 22ଆରେକ୍ ଦ୍କା, ସେ ସ୍ନ୍ଦିଏ ହ୍ଣି ଏକ୍ଲା କିଣାନୀୟା ମାଇଜି ଟକି ଆସି ବେଲ୍କି ଅଇକ୍ରି କ୍ମ୍କେ ଲାଗ୍ଲି, “ଏ ମାପ୍ରୁ, ଦାଉଦ୍ ରଜାର୍ ବ୍ଉଶାର୍ ହିଲା, ମକେ ଦୟାକ୍ର୍, ମର୍ ଟକିକେ ବେସି ଭୟ୍କାର୍ ବାବେ ବୁତ୍ ଡ୍ସିଆଚେ।” 23ମ୍ତର୍ ଯୀଶୁ ହ୍ଦେକ୍ ହେଁ କିଣାନୀୟା ମାଇଜିକେ ଉତର୍ ନ୍ଦିଲା। ଆରେକ୍ ତାର୍ ଚେଲାମ୍ନ୍ ଆସି ଯୀଶୁକେ ଗ୍ଉଆରିକ୍ରି କ୍ମ୍କେ ଲାଗ୍ଲାଇ, “ଇ ମାଇଜିକେ ହ୍ଟାଇ ଦେସ୍, କାଇତାକ୍ ଏ ଅମାର୍ ହ୍ଚେ ହ୍ଚେ ଆସି ବେଲ୍କି ଅମ୍ଲି।”
24ମ୍ତର୍ ଯୀଶୁ ଉତର୍ଦିଲା, “ମୁଇ ଇସ୍ରାଏଲ୍ ବ୍ଉଁସାର୍ ଆଜି ଜାଇରିଲା ମେଣ୍ଢାମ୍ନ୍କେ ଚାଡି ଆର୍ କାର୍ ଗିନେ ଆସି ନ୍କେରି।” 25ମ୍ତର୍ ସେ ମାଇଜି ଆସି ତାକେ ହାଦେ ହ୍ଡି ଜୁଆର୍ କ୍ରି କ୍ମ୍କେ ଲାଗ୍ଲି, “ଏ ମାପ୍ରୁ, ମକେ ସାଇଜ କ୍ର୍।” 26ମ୍ତର୍ ଯୀଶୁ କଇଲା, “ହିଲାମ୍ନ୍କାର୍ କାଦି ନ୍ଇ କୁକୁର୍ମ୍ନ୍କାର୍ ଲ୍ଗେ ହ୍କାଉତାର୍ ଟିକ୍ନାଇ।”
27ମ୍ତର୍ ସେ ମାଇଜି କଇଲି, “ହେଁ, ମାପ୍ରୁ, କାଇତାକ୍ କୁକୁର୍ମ୍ନ୍ ତ ନିଜାର୍ ନିଜାର୍ ମାପ୍ରୁର୍ କାତା ଟେବୁଲେ ହ୍ଣି ଅଦ୍ରିରିଲା ଗୁଣ୍ତ୍ ଗୁଣ୍ତା ବେଟି କାତି।” 28ସେତାକ୍ ଯୀଶୁ ଉତର୍ଦିଲା, “ଗୋ ନୁନି, ତୁମାର୍ ବ୍ଡ୍ ବିଶ୍ବାସ୍, ତର୍ ଇଚାର୍ ହର୍ ତର୍ ସ୍ବୁ ଗଟ୍।” ସେମାଡେ ତାର୍ ଟକିହିଲା ବ୍ଲ୍ ଅଇଲି।
ବେସି ଲକ୍ମ୍ନ୍କେ ଯୀଶୁ ବ୍ଲ୍କ୍ଲା
(ଯୀଶା ୩୫:୫-୬; ଲୁକ ୭:୨୨-୨୩)
29ଯୀଶୁ ସେତିହ୍ଣି ବାରିକ୍ରି ଗାଲିଲୀ ଜିଲାର୍ ସ୍ମ୍ଦୁର୍ ଲ୍ଗେ ଆଇଲା ଆର୍ ଡଙ୍ଗୁର୍ ଉହ୍ରେ ଜାଇ ବ୍ସ୍ଲା। 30ଆରେକ୍, ବେସିଲକ୍ ଚଟା, ବ୍ଇରା, କାଣା, ଗୁଲା ଆର୍ ବିନ୍ବିନ୍ ବେସି ରଗି ଲକ୍ମ୍ନ୍କେ ସ୍ଙ୍ଗେ ଦ୍ରି ତାର୍ ଲ୍ଗେ ଆଇଲାଇ ଆର୍ ସେମ୍ନ୍କେ ତାର୍ ହାଦ୍ତ୍ଳେ ସ୍ଙ୍ଗାଇ ଦିଲାଇ, ଆରେକ୍, ସେ ସେମ୍ନ୍କେ ବ୍ଲ୍କ୍ଲା। 31ଇ ରୁପେ ଗୁଲାମ୍ନ୍ ଯେ କ୍ତା କ୍ମ୍ଲାଇ, ନିର୍କୁଳିମ୍ନ୍ ବ୍ଲ୍ ଅମ୍ଲାଇ, ଚଟାମ୍ନ୍ ଇଣ୍ତୁଲାଇ ଆର୍ କାଣାମ୍ନ୍ ଦ୍କୁଲାଇ, ଇରି ଦ୍କି ଲକ୍ମ୍ନ୍ କାବାଅଇଲାଇ, ଆରେକ୍, ଇସ୍ରାଏଲର୍ ଇଶ୍ୱର୍କେ ମଇମା କୀର୍ତନ୍ କ୍ଲାଇ।
ଚାରିହ୍ଜାର୍ ଲକ୍କେ କାଳାଇଲା
(ମାର୍କ ୮:୧-୧୦)
32ଆରେକ୍ ଯୀଶୁ ନିଜାର୍ ଚେଲାମ୍ନ୍କେ ଲ୍ଗେ କୁଦି ସେମ୍ନ୍କେ କଇଲା, “ଇ ଲକ୍ମ୍ନ୍କାର୍ ଗିନେ ମର୍ ମ୍ନେ ଦୟା ଅମ୍ଲି, କାଇତାକ୍ ଏ ଲକ୍ମ୍ନ୍ ତିନ୍ଦିନ୍ ଅଇଲିନି ମର୍ଲ୍ଗେ ଆତ୍ତି ଆର୍ ଏ ମ୍ନ୍କାର୍ ଲ୍ଗେ କାମ୍କେ କାଇରି ହେଁ ନାଇ। କେଜାଣ୍ ଏମ୍ନ୍ ଜାତାବ୍ଳ୍ ବାଟେ ଚେତା ଆଜେଦ୍, ସେତାର୍ଗିନେ ଏମ୍ନ୍କେ ନ୍କାଇତେ ବୁକେ ଚାଡି ଦେମ୍କେ ମର୍ଇଚା ନାଇ।” 33ଚେଲାମ୍ନ୍ ଯୀଶୁକେ କଇଲାଇ, “ଅତେକ୍ ଲକ୍ମ୍ନ୍କେ ହେଟ୍ ହୁରାମ୍କେ ଅମିମ୍ନ୍ ଇ ଶୁନ୍ସାନ୍ ଚିମ୍ରା ଜାଗା ଟାଣେ, କୁଇତିହ୍ଣି ଅତେକ୍ ରୁଟି ଆଣୁମା?” 34ଯୀଶୁ ଚେଲାମ୍ନ୍କେ ହ୍ଚାର୍ଲା, “ତୁମାର୍ ଲ୍ଗେ କ୍ତିଗଟ୍ ରୁଟି ଆଚେ?” ସେମ୍ନ୍ କଇଲାଇ, “ଅମାର୍ ଲ୍ଗେ ସାତ୍ଗଟ୍ ରୁଟି ଆରେକ୍ କ୍ତିଗଟ୍ ସାନ୍ ମାଚ୍ ଆଚେ।” 35ସେଡେବ୍ଳ୍ ଯୀଶୁ ସ୍ବୁ ଲକ୍ମ୍ନ୍କେ ବୁଏଁ ବ୍ସୁକେ ଆଦେଶ୍ ଦିଲା,
36ଆରେକ୍ ହ୍ଚେ ସେ ସାତ୍ଗଟ୍ ରୁଟି ଆର୍ ମାଚ୍ ଆଣି ଇଶ୍ଵର୍କେ ଦନ୍ୟବାଦ୍ ଦେଇ ସେ ସ୍ବୁ ରୁଟି ଚିଡାଇ କ୍ରି ବାଟା କ୍ରୁକେ ନିଜାର୍ ଚେଲାମ୍ନ୍କେ ଦିଲା, ଆର୍ ସେମ୍ନ୍ ସ୍ବୁ ଲକ୍ମ୍ନ୍କେ ବାଟାକ୍ରି ଦିଲାଇ। 37ଆରେକ୍ ସ୍ବୁ ଲକ୍ମ୍ନ୍ ହେଟ୍ ହୁର୍ନେ କାଇଲାଇ ଆର୍ ଉବୁର୍ଲାର୍ ଚିଡାଇଲା ରୁଟି ବେଟି ସାତ୍ ଡ୍ଲା ବର୍ତି କ୍ଲାଇ। 38କାତା ଲକ୍ମ୍ନ୍, ମାଇଜି ଟକିମ୍ନ୍କେ ଆର୍ ହିଲାମ୍ନ୍କେ ଚାଡି ଚାରିହ୍ଜାର୍ ଅଣ୍ଡ୍ରା ଲକ୍ ହ୍କା ସେତି ରିଲାଇ। 39ଇତାର୍ ହ୍ଚେ ଯୀଶୁ ସେ ଲକ୍ମ୍ନ୍କେ ହ୍ଟାଇ ଦ୍ଇ ଡଙ୍ଗାଇ ଚ୍ଗି ମଗ୍ଦାନ୍ ଦେଶାର୍ ସ୍ନ୍ଦିକେ ଆଇଲା।
Currently Selected:
ମାଥିଉ 15: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.