Medhetethi 2
2
1Salotinne sa7i entan de7iyaba ubbabay haysada medhetidi poletis. 2Xoossay ba oosuwa polidi, laapuntha gallasan shempis. 3Xoossay laapuntha gallasan ba oothiya oosuwa ongidi shempida gisho he gallasaa anjis; gallasatape dummayis. 4Salotinne sa7i hessada hani medhetis.
Addaamenne Hewaanno
Godaa Xoossay sa7anne salota medhida wode, 5sa7a bolla iri bukiboona gishonne oothiya asi bayna gisho mithinne maati dolibeenna; aaciyabayka baawa. 6Gidoshin, sa7ape haathi pultidi, biitta ubbaa laakisees. 7Hessafe guye, Godaa Xoossay biitta baanape ase#2:7 Ase: Ase geysi Ibraawetho doonan “Addaame” geetetees. “Addaame” guussay “Biitta” guussu. medhidi iya siidhera de7o shempo punnidi gelsis. Yaatin, he addey de7ora de7iya ase gidis.
8Godaa Xoossay doloha baggara Edene gannate giigisis; yan ba medhida addiya wothis. 9Godaa Xoossay xeellanaw lo77iya, maanawuka mal7iya ubba qommo mithi biittafe dolisis. Gannate giddon de7o immiyanne lo77onne iita erisiya nam7u mithata wothis.
10Gannate ushshiya shaafa haathay Edenepe goggees. He shaafay Edenepe keydi oyddu shaafu keyidi shaaketees. 11Koyro shaafa sunthay Fisoone. Fisooney worqey de7iya Hawila biitta bolla goggees. 12He biitta worqey geeshsha worqa. Qassi al7o shittoynne shuchi yan de7ees. 13Nam7antho shaafa sunthay Giyoone. Giyooney Tophe biitta#2:13 Tophe biitta: Beni Tophe biittay ha77i de7iya sudaanepenne Tophefe bagga ekees. yuushuwan goggees. 14Heedzantho shaafa sunthay Xegroosa. Xegroosi Asoorepe doloha baggara goggees. Qassi oyddantho shaafay Efraxiisa.
15Godaa Xoossay asi Edene Gannate oothana melanne naagana mela iya efidi yan wothis. 16Godaa Xoossay ase, “Gannate mitha teera ubbaafe neeni maanaw danda7aasa. 17Shin lo77onne iita erisiya mitha ayfiyape moopa. Ayis giiko, neeni iyape mida gallas tuma hayqana” yaagidi kiittis.
18Hessafe guye, Godaa Xoossay, “Addey barka de7eysi lo77o gidenna. Taani iya maaddana mela iyaw injetiya lagge medhana” yaagis.
19Godaa Xoossay meheta, do7atanne salo kafota ubbaa biittafe medhis. Yaatidi, enta woygidi sunthaneko be7anaw Addaameko ehin, Addaamey de7oy de7iya medhetetha ubbaa sunthida sunthay enta sunthi gididi attis. 20Hessadaka, Addaamey meheta, salo kafotanne bazzo do7ata ubbaa sunthis. Shin Addaames injetiyanne iya maaddiya laggey bentibeenna.
21Hessa gisho, Godaa Xoossay Addaame wolqaama dhiskon yeggis. I dhisko hayqidashin iya miye meqethafe issuwa ekidi, he bessaa ashon kunthis. 22Godaa Xoossay Addaamepe ekida meqetha macca oothidi medhis; yaatidi iyo iyako ehis. 23Addaamey, “Ha meqethiya ta meqethafe, ha ashshiya ta ashope eketidaro. Iya addefe eketida gisho macca#2:23 Macca: Ibraawetho doonan Macca geysaranne adde geysara nam7ay issino. Ibraawethon “Adde” geysi “Ish” geetetees; “Macca” geysi “Isha” geetetees. geeteto” yaagis. 24Hessa gisho, asi ba aawanne ba aayiw aggidi, ba machera issife de7ees; nam7ay issi asi gidoosona. 25Addaameynne Hewaanna nam7ayka xire kallo de7oosona; shin issoy issuwas yeellatokona.
Currently Selected:
Medhetethi 2: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia