Matiyu 12

Yeso a Etsodwe mo Nò nya Etkem

(Marku 2:23-28; Luka 6:1-5)

1Nò nya Etkem akan, Yeso è tku ken anga a tswa kpèn mo fwen mowa a be fǝ́ anga alkama. Mbe è fu be etsonchi mbwe anga, enona, bè kwa ara fwen alkama hon ekpanm a bu mo be nè ti kǝ́n anga. 2Tea atan a be Farisi è di enò ángá, bè jan Yeso jan, “Di, be etsonchi mbo bwe mò e tse-etsem a be e bwe Nò nya Etkem anga.”

3Gè ká be Farisi hon eka jan, “Nye chà ká nye mò a Dawuda è bwe a engga a gè no ngge be ya emmeken mbwe, atan a mbe è fu be ángá ra? 4Gè kwashi a tswa Àtá mo Ehwya, a ge ngge be ya è no ngge ángá nè de borodi a bè tsǝ̀pe ti nyino a buetkwa, a edon è cha ye dwa be nobǝ efki e de nó ra, tea è kpwà be ekǝ́n. 5Eno e ra, nye chà ká nye adi edon a Ehwya è ti no Mosa e jan ne, bi adia be ekǝ́n a Àtá mo Ehwya bwe mochi Nò nya Etkem anga, be chà dan be ra ra? 6M jan nye anga, ende akan nwene e twafǝ̀ Àtá mo Ehwya ángá no ana. 7M jan nye anga, nye è ma yi ara be Fwaebam e jan, ‘M dgyan ángá fǝedwam, fwa ye mò etinom ra,’ nyà a tso nye be ya ena e chà bwe be edan ra na, efya ra. 8Adia Nwen Nobǝ hon no Etsodwe èé ḿ mo Nò nya Etkem.”

Yeso matswa modwa Nò nya Etkem

(Marku 3:1-6; Luka 6:6-11)

9Atan a Yeso è gwa zǝn hon ángá, gè ken kwashi a àtá chuefǝnm mo be. 10Nobǝ akan è no a zǝn, bu mbwe akan è ngǝfǝ ara. Adia bè nda efwa anga be e fu ye ngge edan ángá, be Farisi è ká ye eka jan, “Edon chadwa jan be e ma e tswa nobǝ Nò nya Etkem?”

11Gè jan be jan, “Ano ende akan a engga mo nye no ngge son, son hon kposhi a tswa edu Nò nya Etkem, ga ti nó a gwa ye a je nò eni ra? 12Nobǝ twafǝ̀ ye son ra? Enona, edon chadwa jan nobǝ e bwe mò esese Nò nya Etkem.”

13Kǝnggwa gè jan ya bu engǝfǝfǝ hon jan, “Ywa bu mbo” Gè ywa bu mbwe, bu hon è twanga no gu ematswatswa abu bu cha akan. 14Tea be Farisi è vǝ́ a je nè senvǝ abu ba gu Yeso ángá.

Yeso a ya mochi eswavǝm mo Ehwya

15Tea adia Yeso è yi ara mò a bè ka anga, enona gè nyagwa zǝn hon. Be nobǝ embo è ba ye, gè matswa binbin mo be ya modwa è no a engga mo be ángá, 16nè twa be echa jan be e jan be, be nobǝ ende a ge no ángá ra. 17Mò ena a Yeso è jan ángá, è defǝ tén ngge mò a efojan Eshaya è jan,

18“Ena a ya mochi mam a m swa ara,

nwene a m dgyan anga,

m fo etkwa mbwe àywá.

Ma no ye Engǝ́ mam,

ga kpèn be efi mo zǝnchaje ena binbin,

kǝ́n e no ebi ángá.

19Ga bwe ye ebwedwavǝ ra,

ga tàn ye dwa ra;

nobǝ akan a fo ye aken mbwe a

tswa be efǝku ra.

20Ge kǝn a bǝ ye gwakan e

bǝ dan nwofyan ángá ra,

èé petila e din dan nwofyan ángá,

ga din ye nó ra,

ge no a kpwà a di fwa mo Ehwya etum,

ti ken a ngga atan a fwa ekpènm adi

ebi a de a vǝ́ a chu mofǝ̀ ángá.

21Adi ti mbwe,

binbin mo be ya e yi be Ehwya ra,

a nyishwa mo be.”

Bè jan Yeso no ngge Bayezebu a ju ye

(Marku 3:20-30; Luka 11:14-23)

22Kǝnggwa be nobǝ ya ehwyà è ti nobǝ akan a engǝ́ esera è no ye a ju bwa a zǝn Yeso. Nobǝ hon è no ya fǝzǝn ebwibwi nè jan yi ye fwa ra. Yeso è matswa ye, enona gè kwa ara fwa ejanm ngge zǝn edim. 23Binbin mo be nobǝ è tàn ebwikpe nè jan, “Chú ende ena fwa ye Nwen Dawuda hon ra?”

24Tea atan a be Farisi è fo fwa hon ena ángá, bè jan, “Kpwà ngge echakpo mo Bayezebu, tì mo engǝ́ esera, a nobǝ ena ti nyonvǝ́ be engǝ́ esera anga.”

25Adia a Yeso è yi ara mò a bè ka anga ángá, gè jan be jan, “Ano be nobǝ a tswa eyasǝnsen akan, ma nggakwa ara e sojube, eyasǝnsen hon a no ye akan efwe ra. Ano be nobǝ a tswa eten efifi akan eno e ra kpenmu akan ma nggakwa ara e sojube, ba no be abibi efwe ra. 26Ano Shetan nyonvǝ́ ya mochi mbwe a ju be nobǝ, zǝnotì mbwe nggakwa ara. Bwe engǝ zǝnotì mbwe a vǝ́ chu? 27Ano m nyonvǝ́ be engǝ́ esera anga ngge echakpo mo Bayezebu, a ngge echakpo mo ara, a be nobǝ ya e ba nye anga nyonvǝ́ ḿ mo be anga? Enona, mò a be ya e ba nye anga bwe anga, a tú nye a ge jan, nye dan ara. 28Tea ano m nyonvǝ́ engǝ́ esera anga ngge Engǝ́ mo Ehwya, zǝnotì mo Ehwya hon bwangga ara a chu nye.

29“Efwe, nobǝ kwa a ti a àtá mo ya echafǝju akan, na kpu atkimo mo nó? Ge bwe a ti enò ra, kpwà tén ano ge kwafya tè ti ara ya echafǝju hon sangǝ́, ge chà a kpu be atkimo e no a mu hon ángá.

30“Egwa egwa e fwa ye ngge me ra, a ya eze mam, egwa egwa e tefǝn ye anga ngge me ra bushan be anga. 31Enona, m jan nye anga, egwa egwa mo ebgen eno e ra fwa esera a nobǝ jan anga, Ehwya a gwa a no ye nó. Tea ende e jan fwa esera anga a chu Engǝ́ mo Ehwya, Ehwya a gwa a no ye ye nó ra. 32Egwa egwa e jan fwa esera anga a chu Nwen Nobǝ, be gwa a no ye nó. Tea egwa egwa e jan fwa esera a chu Engǝ́ mo Ehwya, Ehwya gwa a no ye ye nó ra, e ma no a tswa zǝnchaje ena eno e ra a tswa zǝnchaje nwone a bwa ángá.

Tumo ngge ga mbwe

(Luka 6:43-45)

33“Bwe tumo ge e no esese, ga mbwe a no esese. Bwe tumo ge e no esera, ga mbwe a no esera, adia be diyi abu tumo no anga adi ga mbwe. 34A nye mbǝgya mo fkonde. Bwe engǝ a nye ya mofǝ̀, nye jan a yi fwa akan e no esese? Adia a tswa mo be mò embo e dwa a tsuruku ángá, kpevǝ jan fwa gwa anga a je. 35Nobǝ esese hon ti mò esese a tswa be mò esese e fǝnno a tswa tsuruku mbwe ángá gwa anga a je, nobǝ esera hon ti mò esera a tswa be mò esera e fǝnno a tswa tsuruku mbwe ángá, gwa anga a je. 36Tea m jan nye anga, atan a Ehwya a kpèn be nobǝ kǝ́n ángá, ga kpèn kǝ́n a chu egwa egwa mò fwakukwa a bè jan di ara ángá. 37A chu be fwa mbo, ba gwa o; ngge a chu be fwa mbo ba tso o efya.”

Be Farisi ngge be etumo mo edon è nda be e di echi akan

(Marku 8:11-12; Luka 11:29-32)

38Nò kè akan, be etumo mo edon ya ehwyà ngge be Farisi ya ehwyà è bwa a zǝn Yeso nè jan, “Etumo, je dgyan anga je e di echi mo moeditanm akan a zǝn o.”

39Gè janfwe be, “A nye be ya mofǝ̀ mo ekǝn ena, nye nda anga nye e di echi mo moeditanm. Tea ba tú be nye echi efki ra, kpwà tén ḿ mo efojan Yunana. 40Abu Yunana è dwa a tswa dgyèn mo gwejo ekeke mo nò a zǝkpe ta ngge zǝn etsǝ ta ángá, enò gaten Nwen Nobǝ a no a tswa dì mo nò a zǝkpe ta ngge zǝn etsǝ ta. 41Nò a Ehwya a kpèn be nobǝ kǝ́n ángá, be ya a Ninive a nyi etkyen na jan be nobǝ mo ekǝn ena bwe ara mò esera, adia a bè twa be etwa atan a bè fo edgon edum mo Yunana ra ángá. Asuswana ende akan e twafǝ̀ Yunana ángá no ana, tea nye se nye e buton e fo edgon edum mbwe. 42Adi ekpengga a Ehwya a kpèn be nobǝ kǝ́n ángá, ndegwa akan è no Étì mo sǝnsen a Sheba, a jan be nobǝ mo ekpengga ena, be mò esera a bè bwe ángá adia gè vǝ chá zǝn adabonbon bwa, evǝa ge e fo fwa enggaton mo Sulemano. Asuswana ende e twafǝ̀ Sulemano ángá no ana, tea nye se nye e buton e fo edgon edum mbwe.

Etwabǝbwam mo engǝ́ esera a tswa ju nobǝ

(Luka 11:24-26)

43“Atan a engǝ́ esera vǝ́ a je, a ju nobǝ, ge tkukwa gu be ehwen n no tkunda zǝn a ga tke nya anga, tea atan a ge ben ye ra ángá, 44ga jan chu ye jan, ‘M twabǝ a ken a mu ehwe mam.’ Atan a ge twabǝ bwa ara, ge di àtá hon no ejwasem, nobǝ fwa be a zǝn ra, be atkimo no efǝsem. 45Kǝnggwa, ga nya, n ken kpu be engǝ́ esera chwen a fà efki, ya e bgen twafǝ̀ ye ángá, be bwa no anga a ju nobǝ hon. Zǝno ekǝn-etkyen mo ende hon bgen twa a fǝ̀ ekwafya. Eni a abu ga no ngge ekǝn mo ya mofǝ̀ ebwem ena.”

Ayi Yeso ngge be nwenjwa ye ndedon

(Marku 3:31-35; Luka 8:19-21)

46Atan a Yeso è chà no adi fwa ejanm ngge be nobǝ ya è fǝnno a zǝn ye ángá, ayi ye ngge be nwenjwa ye ndedon è bwa a zǝn, bè ywano a je, nè nda anga be e jan fwa ngge ge. 47Ende akan è jan Yeso jan, “Ya mbo ngge be nwenjwa o ndedon ywano a je, be nda anga be e jan fwa ngge bo.”

48Yeso è ká ye eka jan, “Yaà m hon ngge be nwenjwa m hon a be ara?” 49Gè tú bu ken a ju be ye è ba ye anga nè jan, “Be ya ena, a yaà m ngge be nwenjwa m ndedon. 50Adia egwa egwa e bwe mò a Àtà m e no a kpe dgyan anga, a nwenjin m ndedon, nwenjin m ndegwa ngge yaà m.”

Currently Selected:

Matiyu 12: ICH

Highlight

Copy