Matiusu 5
5
O Yesusu o loku ma geleforino de wadotoko o nyawaika
Lukasa 6:20-23
1De o Yesusu wamake o nyawa duru ko manga ngoe gea abe yoboaka Unangino ma ngioka gea, ho Una wodoaiye ma hohutulu o loku ma geleforoka de genangoka wogogeruku. De ona abe iwinii-niiki yomatoomuino Unangoka. 2De ahao Una womulaenge wadotoko onangika ma titi o nyawa abe yamake ma hiowa Ma Jouoka de aino gea. Ho o Yesusu wadotoko wato,
3“O nyawa abe yomahinganono ka Ma Jouika dika, ona gea yamake ma hiowa Ma Jouino, angamoi Ma Jou ka idadi wahikoano onangika gea.
4De abe o nyawa naga de manga hininga ma huha, onangoo yamake ma hiowa Ma Jouino angamoi Una ahao walaru ona manga hiningaka.
5De abe o nyawa manga hininga ma dodipokouku, onangoo yamake ma hiowa Ma Jouino abe o dunia naa ma amokika ahao idadi to ona.
6De abe o nyawa duru yohafini de manga hininga ma gahumu la ato ka Ma Jou ai totiaiika dika yanii-niiki manga wowangoka, onangoo gea yamake ma hiowa Ma Jouino, angamoi Una ahao wahiakunu la hiadono ona duru yototiaioka Ma Jou ai himangoka.
7De abe o nyawa manga dora ma hiokoo itagi o nyawa utuika, onangoo gea yamake ma hiowa Ma Jouino abe to Unangoli ai dora ma hiokoo ahao itagi onangika.
8De abe o nyawa manga hininga ma gahumu itagi ka Ma Jouika dika, onangoo gea yamake ma hiowa Ma Jouino angamoi ona ahao duru iwihioriki Unangika de hiadono yomafafoino Unangoka.
9De nako naga abe yomaketeribuutu de o nyawa utuoli yatobaduhunu onangika la hiadono yahikadame ona de o dame ilaku genangoka, ona abe yahikadame gea yamake ma hiowa Ma Jouino. Angamoi ona gea ahao wahiromanga onangika wato to Una ai ngofa-ngofaka.
10De o nyawa abe iwitobanii-niiki Ma Jouika de ma titi genangino hiadono o nyawa utu yahikangela onangika, onangoo gea yamake ma hiowa Ma Jouino, angamoi Ma Jou ka idadi wahikoano onangika gea.”
11De ahao o Yesusu wogila-gila wadotoko iwinii-niikika wato, “De nako ngini nihinii-niiki Ngohi de genangino ma titi abe o nyawa iniwea-weara nia roma-romanga de inihikangela nginika, de abe inihiade-ade de o ngeluku ma dorou nginika, de gea nginioo niamake ma hiowa Ma Jouino. 12Ho gea koaho ngini nigogaragoka de nimaimonoka! Angamoi ahao dokena nanga himangika abe ma oraha nimahiadono daku o Horogaiye de ti ngini nia utumu duru kohaamoko niamake Ma Jouino! De ngini ufa niawohanga abe ma dodihiraino de to Una ai uru ma dodofanga onangoo o nyawa yahikangela onangika, masara hohioriki abe to ona manga utumu yamakeoka o Horogaka. Ho gea nginioo ahao nia utumu niamake Unangino.”
O Yesusu wahiketero ona iwinii-niiki wato ona hoka o gahi o duniaika
Maruku 9:50; Lukasa 14:34-35
13De ahao o Yesusu wohigila-gilali ai dodotoko onangika de Una wodiai o hiketero wato, “Ngini naa nia wowango o duniaka imaketero hoka o gahi abe hohidogo nanga inomuku. Angamoi o gahi yoduhunu nanga inomika la ma mao irahai, de hokogenangoo de ti ngini nia wowangoino la ka idadi niaduhunu nia date-datekika la onangoo yao manga wowango irahai. Masara nako o gahi la to ena ma magahi ko iwaka, gea done sarakia? Ka idadiohi o gahi gea yoduhunu utuikali? Ko idadiokaua! Ho sarakia ngone hodiai enangika la ma magahi ilioli hoka ma dodihirali? Genangoo ma ko idadiuali! De ma gahi gea abe ma magahi ko iwaka, gea ahao o nyawa yaumo dika o ngekomika la o nyawa ka yadoko-doko dika, angamoi duru ko iwaka ma utumu genangino ho ka parahaja dika. Ho ngini kiani nigila-gila abe nia wowango niao irahai la genangino idadi abe ka ihikaika niahiutumu o dunia ma nyawaika, de gea ti ngini nia wowango duru ko parahajaua.”
O Yesusu wahiketero ona de o dararono o dunia ma nyawaika
Maruku 4:21
14De o Yesusu wogila-gilali wadotoko onangika wato, “De ka idadi tinihiketero de moioli, abe ngini naa nimaketero abe hoka o dararono moi abe o dunia ma nyawa ka idadi yamake. Angamoi nia wowango ma datoro ma rorahaiino gea de niahimatoko o nyawaika Ma Jou ai totiai ma ngekomo la onangoo ka idadi yaniiki enangika. Ho ufa nia wowango ma rorahai niagogono o nyawaka dika angamoi done ko niahiutumua onangika. Angamoi ti ngini nia wowango duru imaketero hoka o kota moi abe o lokuoka imanoa de to ena ma hilo ma dararono duru itararono, abe gea duru ko idadiua imagogono la ufa o nyawa yamake ma kota gea. Ho gea nginioo ko idadiua nimagogono nia wowango o nyawa utuino.”
15“De nako o hilo moi o nyawa atufukika, gea sarakia, ona ahao ihidatamunu de o kiarono? Gea ko idadiua angamoi ko yahitararonua ho ko yahiutumua o nyawaika. Masara gea kiani yakelenga to ena ma ngioka la duru itararono, la o nyawa mata-mata o tau ma goronaka yomahioriki. 16De hokogenangoo ti ngini nia wowangoka de kiani nia datoro ma rorahai nitobadiai la gea idadi hoka o dararono moi onangika abe ka o fufutuokahi yomanoa. De ipaha ma oraha o nyawa yamake nia datoro ma rorahai gea, ona ahao iwihigiriiri nia Babaika o Horogaka.” De hokogea o Yesusu ai hiketero ma demo abe ma titi manga wowango ma datoro.
O Yesusu wadotoko onangika ma titi o Musa ai Pareta
17De o Yesusu ka wadotokohi onangika wato, “Ufa ngini niataoko ihowono abe ma titi ahi hininga o paretaika. Angamoi bote ngini utu niataoko niato Ngohi toboa nginika la tinidotoko abe ka idadi homahipipidili o Musa ai Paretaino de ibootohi haniiki ena gea. Masara Ngohi duru ko hokogenangua ahi hininga. Abe Ngohi toboa ko ma titiua tahihihanga ma Pareta de to Una ai uru ma dodofanga manga demo abe naga Ma Jou ai Demo-demoka, masara Ngohi toboa la gea mata-mata tohingodumu.”
18“De naa tagou-goungu tinihingahu abe Ma Jou ai Pareta ma demo mata-mata gea duru itongohono hiadono ena homoi-homoi ihingodumoka de idadioka duru imaketero abe hoka ma dihiraino Una wonahibehehongoka ngoneino. Abe ngaro ai Pareta ma demoka de naga utu ma dulihi ma hurufu abe duru ma hohumuduru, masara enangoo ko ihihangua ma ka iwango dika. Ho imaketero hoka o dunia naa de ma dihangoo itongohono ka hiadono ma oraha ma baha adonoka, hokogenangoo to Una ai Pareta ma dongohono abe hiadono ma bahaika.”
19“De mangale ma titi to Una ai Pareta duru ikurutiye ho Ngohi tinihitiari moi nginika. De hokonaa tinihitiari tato ngini onagona dika abe niaetongo ai pareta moi ko kia-kiaua ho hiadono ka niatilakuru dika, masara enangoo niahowonoka Unangika. De nagali abe ma oraha niatilakuru ai demo gea de genangino ngini niadotoko de niahigaro o nyawa utuika la hiadono onangoo yatilakuru ma pareta gea, ho genangino de nia howono ka idogo ilamoko. De nako hokogea nia hininga ma datoro, de ahao Ma Jou winietongo ngini gea abe ti ngini nia gogere hatoli itipokouku ma oraha Una wahikoano ai nyawa. Masara abe onagona dika yatobanii-niiki ai pareta mata-mataika de yadotoko utuika la onangoo yatobaniiki enangika, ona gea ahao manga gogere ikurutiye abe ma oraha Una ai nyawa wahikoano.”
20“De naa tinihingahu abe ngini kiani naga nia totiai ma gou-goungu la dokena nanga himangika de ka idadi Ma Jou winihikoano nginika. De igoungu abe ona yotobadoto-dotoko o Musa ai Paretaino de abe ona o Farisi ma doomuino, ona gea yomaetongo ona ma hirete ato yototiaioka. Masara to ona manga totiai ko ma gou-goungua, ho ahao ko idadiua ona Ma Jou wahikoano abe ma titi manga totiaiino gea. Ho ngini naa kiani naga ti ngini nia totiai ma gou-goungu la ahao Una ka idadi winidafongo de winihikoano nginika.”
O Yesusu wadotoko onangika ma titi o ngamo
Lukasa 12:57-59
21De o Yesusu ka wadotokohi onangika wato, “Ngini naa nihiorikoka abe o Musa ai Pareta ma demo ma dodihiraino de Ma Jou wahidoakoka nanga totoforaika. De ma pareta gea ma goronaka de inahuloko itemo ato ko idadiua o nyawa hatoma. De nako hatoma, gea kiani hodafongo nanga hohowono.#5:21 Huhupu 20:13; Higalioli 5:17 22De ma demo gea duru igoungu. Masara Ngohi tato ka onangua dika abe yototoma gea abe ahao kiani yamake manga hohowono, masara ngaro ona abe manga howono manga hiningaka dika ipuda de onangoo kiani manga hohowono yadaene.”
“Abe hoka o nyawa duru yangamo manga gogianongoruika ma onangoo kiani yamake manga hohowono. De nako ma titi nia ngamoino gea hiadono niahohedu o nyawaika de niato, ‘Ngona naa duru nobodo!’ gea ka idadi iniurusu abe o urusu ma ngioka la yaputuhu nia hohowono.”
“Ho hongoli nako ma titi nia ngamoino gea hiadono niadoana o nyawaika niato, ‘Ngona naa toigo la Ma Jou wonihohowono de o hohonenge angamoi ani hiningaka gea ka o bodo dika!’ Ho nako hokogea nia demo, gea ka idadi ngini de ahao inihohowono o Naraka ma ukuoka.”
23“Ho ngini naa ufa nihigunoa o hininga ma ngamo ilaku ti ngini nia hiningaka. Ho nako ngini niboainoka o huhuba ma ngioka gea abe naga Ma Jou ai Tauoka, ho naga nimagaoinoka nia huhuba gea abe niato nimahihuba Ma Jouiye. Masara de ahao naga ipuda nia hiningaka abe naga ma titi moi hiadono nia gianongoru eko nia dodiawo womatengo abe ona gea naga manga hininga ma ngamo ma titi nginika. 24De nako hokogea koaho bole-boleohi nimahihuba Unangiye. Ma koaho nia huhuba nianoaikahi gea o huhuba ma ngi ma himangoka de niloiki niwitutumu nia gianongoru gea la nimahiketehilooakahi de ahao ka idadi niogilioli o huhuba ma ngiino de gea ahao ka idadi nimahihuba Unangiye. Ho iti ufa nihigunoa o hininga ma ngamo ilaku ti ngini nia hiningaka.”
25De o Yesusu wogila-gilali wadotoko wato, “Nako idadi nginioka abe nimaketeliliaroka de o nyawa utu, gea koaho itaiti nimahiketehilooa la nia gogao itiaiokali. Angamoi done ona gea iniao o hiurusu ma ngiika la done initae genangoka. Ho koaho ko niloikuahi ma hiurusu ma ngiika de nimahikaaturoka la nia hininga iboriuwinoka de ko iwaka nia hininga ma ngamo ma dohata. Angamoi nako ngini iniurusu, gea ahao ka idadi yoputuhu ato ngini kiani nifangu nia musuika de inihidoaka o bui ma tau ma gogoanika la inibuioka. 26De nako hiadono inibuioka, gea ahao marai nia dekana o bui ma tau ma goronaka. Angamoi kiani nimabanguokahi nia bobangu ma gahumu de ahao inihihupuoli ma rorahaiika. Ho nako nikangela nifangu gea nimagoo-gogere dika nia dekana o bui ma tauoka. Ho irahai ngini nimataiti nimahikaaturu la ufa o hininga ma ngamo ilaku nginioka.”
O Yesusu wadotoko onangika ma titi o howono nanga badangoka
Maruku 9:43-48
27De o Yesusu wogila-gilali wadotoko onangika wato, “Ngini naa nihiorikoka abe o Musa ai Pareta ma demoka inahuloko ato,
‘Ngini ko idadiua nimakitigi de o nyawa ngaro onagona dika nako ko nia fekatua eko ko nia rokatua.’ # 5:27
Huhupu 20:14
28De gea igoungu, masara Ngohi tato ka onangua dika yahowono. Angamoi o nauru onagona dika abe womalega o nyawa manga fekatika de ai badanga ma hafini ipuda ai hiningaka hiadono woigo la yomakitigi de muna, gea imaketero dika abe hoka wahowonoka ai badangoka ngaro tanu ai hiningaka dika.”
29“Ho gea hiadono Ngohi tinihitiari nginika la ngini ka nioporete dika o howonika. Abe nako ani lako ma hononga inihiatara la hiadono ani badanga ma hafini itagi ma dorouika de norehene Ma Jouino, gea koaho ani lako ma gomono nahuputu de naumoka dika. Angamoi koaho ani badanga ma kiahonanga moi ihihanga la idadi ani toba genangino de ahao nodoa o Horogaiye. Masara abeika, nako ko notobaua ho ngaro ani badanga ka iahumohi masara ahao kiani noiki o Narakaika, gea done o kia ani utumu namake genangino?”
30“De hokogenangoli de nanga giama. Abe nako ani giama ma hononga inihiatara la hiadono ani badanga ma hafini ilaku ngonaka ho norehene Ma Jouino, gea ani giama koaho naafoko de naumoka dika. Angamoi koaho inihipoloka la idadi ani toba genangino la ahao namake o wowango ka hiado-adonika. Masara abeika, nako ko notobaua ho ngaro ani badanga ka iahumohi masara ahao kiani noiki o Narakaika, gea done o kia ani utumu namake genangino? Ho gea Ngohi tato kiani ngini duru nioporete dika o howono done inihirehene Ma Jouino.”
O Yesusu wadotoko onangika ma titi manga ngo-ngolukino
Maruku 10:2-12
31De o Yesusu ka wogila-gilahi wadotoko onangika wato, “Ngini naa nihiorikoka abe o Musa ai Pareta ma demoka itemo ato,
‘Nako naga hiadono o nauru womatengo wato womioluku ngoi fekata, gea o ngo-ngoluku ma hurata moi ka idadi wodiai dika de gea ahao ka idadi womioluku.’ # 5:31
Higalioli 24:1
32Masara tanu hokogenangua ma ngekomo. Abe Ngohi tato o nauru wahowono nako womioluku ngoi fekata gea, sawali nako muna mahowonoka ami badangoka de o nauru utuika. Gea dika ma titi hiadono ka idadi o nauru yaoluku manga fekata. Ho Ngohi tato abe nako o nauru womatengo womioluku ngoi fekata abe muna ko mahowonua de utuika, una gea duru wahowono. Angamoi muna ahao bote o nauru womatengoli womile de womihidadi to unangoli ngoi fekata, de genangino idadi to ona yahinooto manga howono manga badangoka ma titi to muna ami rokata wohira-hira nagahi. Masara manga howono gea idadi to ami rokata ihira-hira ai howono, angamoi una gea abe womioluku la ahao modadi womatengoli ngoi fekata. De nako womatengo abe o ngofeka gea womile de womihidadi to unangoli ngoi fekata ngaro ma dihiraino modadioka o nauru utu manga fekata, gea unangoo wahowonoka ma titi to muna ami rokata wohira-hira una nagahi.”
O Yesusu wahitiari onangika ma titi manga behehongo ma koboto ma demo
Yakobusu 5:12
33De o Yesusu ka wogila-gilahi wadotoko onangika wato, “Ngini naa nihiorikoka abe o Musa ai Pareta ma demoka de inahuloko ato, ‘Nako o behehongo moi abe ngini nimahibehehongoka de nimahikoboto Ma Jouika la niato duru nimahitaana abe nia behehongo ma demo duru igou-goungu, gea ngini ko idadiua niawohanga nia behehongo masara kiani nihingodumu abe imaketero niwihibehehongoka Ma Jouika.’#5:33 Gegetongo 30:2 Hokogea o Musa ai Pareta ma demoka.”
34“Masara Ngohi tato koaho ufa ngini nimahibehehongo de o koboto. De igoungu utu yodotoko ato ka idadi niapake de o koboto ma demo iti ufa Ma Jou ai romanga niapake. Masara nako nihibehehongo de o koboto de nia koboto ma goronaka de nifetongo o Horoga, gea ka imakadaene dika abe nako nifetongo Ma Jou ai romanga angamoi o Horoga gea to Una ai kuahaka ma kadera ma ngi.”
35“De naga moioli tinihitiari. Abe nako nia behehongo ma koboto ma goronaka de nifetongo o dunia naa, gea enangoo ka imakadaene dika angamoi o dunia naa idadi to Una ai lou ma hiaini ma ngi.”
“De nagali nako nia hikoboto ma goronaka nifetongo niato o Yerusaleeme ma kota ma romanga, masara enangoo ma ko idadiua. Angamoi ma kota gea idadi to ngone nanga Koano wokokurutiye ai kota genangoka.”
36“De moioli ngaro ngini niato nihibehehongo de o koboto ma demo abe nifetongo de ti ngini ma hirete nia pea, ma enangoo ufa hokogea nidiai. Angamoi ti ngini nia pea enangoo to Una ai kuahaka imanoa, de ngini nia tadauru o ngai moi ma hengo-hengo de ko niakunua nihidadi ma gare-garehe. De nako nia tadauru iarehoka, gea ngini ko niakunua nihidadi la ma hengo-hengo idadioli.”
37“Masara Ngohi tato ngini koaho ufa niapake o hikoboto ma demo abe ma oraha nimahibehehongo. Abe nako nihibehehongoka ma titi moi niato nidiai, gea ufa nieluku ma kiani nidiai dika. De ngaro nihibehehongoka ma titi moi niato gea ko nidiaiua, gea ufa nidiai! Ho iti niagou-goungu nia behehongo ma demoika gea de ngaro ufa dika de nihidogo nia behehongika abe o kobotino ma demo. Ho nako nia behehongika ngini nihidogo de o koboto ma demo, gea tanu ko Ma Jouokaua de aino iboa, masara gea ihititi o Ibilihi ma haekoka abe ena gea duru itobatorou.”
O Yesusu wadotoko onangika ma titi manga hibalaha kiani hokokia onangika abe yodiai itorou
Lukasa 6:29-34
38De o Yesusu ka wadotokohi onangika wato, “Ngini naa nihiorikoka abe o Musa ai Pareta ma demoka itemo ato,
‘De nako naga o nyawa yomakopoha de womatengo ai lako ihirusakoka gea una wopoha-poha unangoo kiani ai lako ihirusaka. De nako womatengo ai ingiri atofioka gea abe una wopoha-poha to unangoo kiani ai ingiri atofi.’ # 5:38
Huhupu 21:24
Hokogea itemo o Pareta ma demoka. 39Masara Ngohi naa tinidotoko tato ufa nialawana o nyawa ma dorouika! Ho nako womatengo winipoka nia kikihinino, de gea ngini nimaleloro nia pea la nia kikihini ma honongali enangoli yapoka.”
40“Eko nako idadi abe o nyawa initaere nginika angamoi bari niahowonoka. Ho ona initaere de yomagahoko o baju moi la idadi ti ngini nia bobangu ma demo ma dodaere. De gea Ngohi tato nia baju ko moiua dika masara irahai nihifoloi de niahidoakoo nia baju ma biri-birini onangika.”
41“De nako naga o tentara ma nyawa womatengo winihuloko nginika la wato niwiduhunu niamoku to una ai kiahonanga abe o kilo moiika, gea irahai ngini nihifoloi de niamoku o kilo hinootoika la nimahimatoko ti ngini nia hininga ma rahai unangika gea.”
42“De nako o nyawa yoboa nginino de naga moi yomagahoko, gea niahidoaka onangika. De nako utuoli yoboaino la ato yomabauohi ti ngini nia kiahonanga, gea niahibau onangika.” De hokogea o Yesusu ai dodotoko abe hokokia hohibalaha onangika abe yodiai itorou ngoneino.
O Yesusu wadotoko onangika ma titi kiani yadora manga musuika
Lukasa 6:27-28, 6:32-36
43De o Yesusu ka wogila-gilahi wadotoko onangika wato, “Ngini naa nihiorikoka abe ka ma dodihirainohi nanga totofora yomakodotoko abe ma titi nanga date-datekoka ato,
‘O nyawa utuika kiani niadora.’ # 5:43
Gogao 19:18
Masara abe ma titi nanga musu gea ka ma dihirainohi de nanga totofora yomakodotoko ato ka idadi nia dohata itagi nia musuika. 44Masara Ngohi naa tato ngaro ti ngini nia musu ma onangikaoo ngini kiani niadora onangika! De nako naga abe inihikokangela, ngini niagahoko ma owa ma titi ona gea Ma Jouiye la ona ahao yamake o hiowa Ma Jouino!”
45“De nako nia hininga hokogea nia musuika, gea nimahitaana abe nia hininga duru imakiniiki de ti ngini nia Baba o Horogaka ai hininga, ho ngini nidadioka to Una ai ngofa-ngofaka idodutu. Angamoi abeika ngone homafikirohi to Una ai hininga de ai datoro ngone o nyawaino. Abe Una wohiaturu la ai wange ma dararono ihitararono o nyawa mata-matauku ngaro manga hininga ma rahai ekola manga hininga ma dorou, ma wonahikokidoaka mata-mataika. De ngaro o nyawa abe yao manga wowango itiai ekola abe yao ko itiaiua, masara ngone mata-mataino wonahidoaka o awana ma akere la haborimake de inahikokiutumu genangino.”
46“Ho gea Ngohi tato nako ngini naa nia dora ko itagiua nia musuika masara itagi ka onangika dika abe inidora nginika, gea done o kiaka ma utumu niamake Ma Jouino? De gea nia utumu ko niamakeua angamoi genangino de nia hininga ko imakiniikua de to Unangoli ai hininga. De ti ngini nia hininga gea tanu imakiniiki de to ona manga hininga abe o pajaka ma tiwi yotobagaho-gahoko, abe ona gea ngini duru niadohata onangika. Angamoi ona gea ka idadi yomakodora de manga dodiawo dika, masara nako utuika marai manga dora ko itagiua.”
47“Ho nako ngini naa nimakao irahai de nia dodiawo dika de nako o nyawa utuika niao ko irahaiua, gea done sarakia ti ngini nia hininga? Angamoi gea ka imakadaene dika de o nyawa manga hininga abe ko iwihiorikuahi Ma Jou. Masara nako ngini de ona de tanu koaho ka nginiohi nia hininga irahai abe o nyawa mata-mataika.”
48“Ho mangale ma titi ngini naa nioigo la nimakiniiki de Ma Jou, ho koaho irahai ngini niadora o nyawa mata-mataika. Angamoi Una gea ka ihikaika wahidoaka ma owa o nyawaika ma titi ai hininga ma gahumu gea ma rorahai dika, ho nginioo kiani nia hininga ma gahumu ma rorahai de hiadono nitobadiai ma rorahai dika o nyawa mata-mataika.”
Currently Selected:
Matiusu 5: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman