Matiusu 24
24
Abe ma titi naga ma oraha Ma Jou ai Tau ikilianga
Maruku 13:1-2; Lukasa 21:5-6
1De o Yesusu ka de ibooto wadotoko de ahao Una de iwinii-niiki Ma Jou ai Tau ma loaka de yosobo. De ko yokurutikauahi de ona iwitemo o Yesusika ato, “Mia Baluhu, abeika ma hohailoa Ma Jou ai Tau naa!” 2De o Yesusu wopaluhu onangika wato, “Igoungu, gea mata-mata duru ma hohailoa. Masara naa tinihingahu abe ika-ika de to ena ma hakaru gea ko imaritabiokaua, angamoi ma tau gea duru ikokikiliangoka!”
Ma dodunguu hokokia ahao idadi abe ma oraha itigioka o Yesusu woboali?
Maruku 13:3-13; Lukasa 21:7-19
3De o Yesusu wotemo ibooto de yogila-gila yohupu o Yerusaleemino de youtiuku o dolaka, de ahao yodoali de yomahiadono o Saitunu ma lokuiye. De genangoka wogogeruku o Yesusu de iwinii-niiki yoboaino Unangino la ka ona dika genangoka de ahao iwileha ato, “Mia Baluhu, abe kangano Ngona notemoka nato Ma Jou ai Tau gea ahao ikilianga, gea ma titi o kia? Ho done ka muruonoka de ahao idadi Ma Jou ai Tauika gea? De ma dodunguu o kia abe ahao idadi la miamake de genangino mihioriki abe itigioka Ngona noboali de ka idadi mihiorikoo abe ma oraha ma bobaha adonoka? Ho abeika nomihingahu ma titi gea.”
4De o Yesusu wapaluhu de wahitararono onangika wato, “Igoungu, ahao ma baha ko adonuahi de naga idadioka ma dodunguu. Ho ngini kiani ka ihikaika nimaagoana la ufa o nyawa inibudi abe ona ato, ‘Naa ma oraha itigioka o dunia ma bobaha.’ 5Angamoi de ahao o nyawa manga ngoe yoboa de ona gea yomahingahu-ngahu nginika ato, ‘Ngohi naa nia Mesia, nia Koano abe ma dodihiraino Ma Jou winihibehehongoka.’ Hokogea yomahingahu angamoi inihioriki abe ngini nia Koano gea niwidodamaa la nako woboa, gea nihioriki abe ma oraha itigioka o dunia ma bobaha. De ona gea ma titi manga hingahu ma demo hiadono o nyawa manga ngoeika ahao yabudi hiadono yafikiri ato ma bobaha adonoka. Masara ngini naa ufa inibudi. Angamoi ahao naga ma ngoe idadiohi masara gea ma bobaha ko adonuahi.”
6“Abe hoka ngini ahao niihene o parangi ma gigoro itigi-tigino de utu ahao naga iniade-ade ma titi o nyawa manga gurutika de yomaketeparangi, masara gea ngaro ufa dika de nihawana. Igoungu gea kiani idadi, masara nako gea, ko ma titiua ma oraha ma bobaha adonoka. 7De gea o nyawa yomahikapongo moi de manga musu yomaketeparangi, eko o nuuhu hinooto de yomakumusu. De ma oraha gea o dunia ma amokika de ko manga ngoe yohonenge angamoi naga o hafini ma amoko manga tona-tonakoka, de nagali o tonaka idadi ikelu-kelu ma ngoe o duniaka naa. 8Masara gea mata-mata ka ma dodunguu ihira-hira dika, de ka idadi hohiketero abe o ngofeka momatengo abe ami gahe itigioka ho hiadono ami pokoroka naga igoli-goli. De ino-ino de utuohi idogo ami kangela. De gea imaketero abe nako utuohi itigi o dunia ma bobahaika, utuohi idogo ma kangela.”
9De o Yesusu wahitararonoli wato, “De ngini kiani ka ihikaika nimaagoana, angamoi ahao o nyawa initaoko de inihidoaka onangika abe yotobauru-urusu o nyawa la inipoha-poha hiadono nihonenge. De o dunia ma amokika de naga manga ngoe abe duru inidohata nginika ma titi to Ngohi ahi romanga ngini niatobanii-niiki. 10De ma oraha gea o nyawa manga ngoe ahao ihiporete Ngohi, de naga ahi nyawa utu abe manga gogianongoru yahidoaka o nyawaika la yahikangela onangika. De ma oraha gea ahao o nyawa manga ngoe yomakodohata ona de manga dodiawo.”
11“De nagali ma oraha gea o nyawa manga ngoe yoboaino de yomahingahu abe ona Ma Jou ai uru ma dodofanga, masara ona ko yagou-goungua. De ona yoboaino la ato yahirehene o nyawa, de gea igoungu ahao yahirehene o nyawa manga ngoe Ma Jouino. 12De ma oraha gea o nyawa manga datoro ko itiaiokaua ka idogo-dogo, ho o nyawa manga hininga ma dora ka ihutulu moduku. 13Masara onagona dika abe yomatongohono manga ngongakuoka de ko idomo-domoua ka hiadono o dunia ma bobaha adonoka, ona gea ahao Ma Jou wahihohe manga kangelaino gea.”
14“De o Abari ma Rorahai abe ma titi hokokia ahao Ma Jou wahikoano ai nyawa, ma abari gea ahao ahi nyawa ihiabari o dunia ma amokika la o nyawa abe o dutu homoi-homoiino ka idadi yoihene. De nako hiadono o dutu mata-mata yoihenoka, gea de ahao ma oraha adonoka o dunia ma bobaha.”
Ma dodunguu moi abe gea duru itotorou hokokia ahao idadi
Maruku 13:14-20; Lukasa 17:31, 21:20-24
15De o Yesusu wahitararonoli onangika ma titi ma dodunguu abe ahao idadi nako ma oraha itigioka o dunia ma bobaha. De Una wato, “Ngini marai ka niohiningahi nanga tofora o Danyele ai demo abe ma dodihiraino de wohitulihukuoka Ma Jou ai hingahu ma demo. Abe una gea to Ma Jou ai uru ma dodofanga, de una ma deka-dekanuku de wonahingahuokau abe ma titi naga moi duru itotorou Ma Jou ai himangoka abe ahao ngini niamake de nia lako, abe gea ihiromanga ato o hikangela ma dorou. De ma hikangela ma dorou gea niamake ma oraha igogere Ma Jou ai Tauoka. De gea ena ihiboa nia kota o bobinaahaika. Iya, ahi dogogono ma demo gea kiani duru niongano-nganono la ka idadi niataoko ma titi.”
16“Ho ma oraha ngini niamake abe ma hikangela ma dorou gea iboaino de ka idadi nihioriki abe ma bobaha itigioka, ho kiani ngini abe nigogere o Yudea ma tonakoka kiani nimataiti niloara o loku-lokuika gea. 17Abe nako ngini utu naga nia tau ma poretoka, ufa ka niwohamohi nia tau ma goronaika de niato, ‘Ahi kiahonanga ma hohutulu toleohi jai-jai.’ Gea ufa, ma kiani niloara dika o loku-lokuika. 18De ngini utu nako nia redioka ufa nilio de niato, ‘Ahi ngoere ma biri-birini dika toleohi.’ Masara ngini kiani nikokiloara la ufa hiadono ma kokangela inidaene.”
19“De hiokoo manga kangela ma ago-agomo o ngo-ngofeka abe de manga bada-badangoka ma oraha gea de ngaro onangoo abe manga ngofa-ngofaka ma gogilau de ka yahuhuohi. 20De kiani Ma Jouika nimagahoko la ma kokangela gea ko iboauahi abe ma oraha ma maata done duru nikangela niloara ma hoanika angamoi ma maata gea. De nimagahokoo la ma kokangela gea ko iboauahi o Hiaini ma wangeoka done nikangela nihupu o loku-lokuika. 21Abe ma oraha gea duru o kangela de o huha ma ngoe niaohana. De ngaro mata-mataika, masara ka ma oraha genangohi ma kokangela ilago-agomo. Abe duru ma dodihiraka abe Ma Jou wotobatulaada ka hiadono ma oraha naa, ko iwahi ma kangela hokogea ma amoko. De ma kokangela gea ahao ipahaino, de duru ko iwakau hokogea ma kokangela idadi ka hiado-adonika. 22De tanu o kokangela ma oraha gea hatoli itedekana de o nyawa mata-mataika o duniaka naa ahao yahikokibinaahaka, masara Ma Jou ahao wabatingi o kokangela ma dekana la ufa hiadono o nyawa mata-mata yokokihonenge. Abe gea Una wato, ‘Masara naga to Ngohi ahi nyawa abe duru tasanangi onangika, ho naa tabatingi o kokangela ma dekana la tato ufa ahi nyawa gea yokokihonenge.’”
De ahao o nyawa yoboa abe yomahingahu-ngahu ato ona Ma Jou ai uru ma dodofanga de utu yomahingahu ato manga Koano abe Una wonahibehehongoka
Maruku 13:21-23; Lukasa 17:23-24
23De o Yesusu ka wahingahuokali wato, “De ma oraha gea nako naga o nyawa initemo ato, ‘Abeika ngini niwilega unangika gea! Gea Una nanga Koano abe Ma Jou wonahibehehongoka!’ eko utu ato, ‘Gea una abe dokena, Una gea woboaka!’ Nako hokogea niihene, manga demo gea ufa ningaku! 24Angamoi naga manga ngoe ahao yoboaino de yomahiromanga ato, ‘Ngohi naa ma Koano abe Ma Jou winihibehehongoka,’ eko utu ato, ‘Ngohi naa Ma Jou ai uru ma dodofanga,’ masara ona gea yotobabudi dika, ko yagou-goungua. De ona gea o heheranga ma ago-agomo yahimatoko o nyawaika la ato yomahitaana abe manga dodunguu gea Ma Jouoka de aino. Gea yodiai la ato o nyawa yabudi, de tanu yoigo ato Ma Jou ai nyawaikaoo yabudi, masara gea ko adadiua yabudi onangika gea.”
25“Ho naa ma dodunguu mata-mata tinihingahuokau la ngini nihioriki abe ahao hokokia idadi ma oraha o dunia ma bobaha itigioka. Ho nako ma dodunguu gea ko idadiuahi, ufa o nyawa inibudi la hiadono niataoko abe ma bobaha gea adonoka. Ho naa ma moioli tinihitiari tato ngini kiani ka ihikaika nimaagoana done inibudi ma titi o dunia ma bobaha!”
Abe hokokia idadi ma oraha o Yesusu woboali
Maruku 13:24-27; Lukasa 21:25-28
26De ahao o Yesusu wahitararonoli iwinii-niikika abe hokokia idadi ma oraha Una woboali o duniauku. De Una wato, “De ma oraha gea nako naga o nyawa inihingahu ato, ‘To ngone nanga Koano abe Ma Jou wonahibehehongoka Una woboaka! De Una naga o tonaka ma kakaahaka, ho abeika niminiikohi la hilega Unangika gea!’ De nako hokogea manga demo, gea ngaro ufa dika de niloiki angamoi gea ko Ngohiua. De ngaro naga abe inihingahu ato, ‘To ngone nanga Koano abe Ma Jou wonahibehehongoka Una woboaka! De Una naga womagogonohi o nyawaka doka o tau ma goronaka, ho abeika niminiikohi la hilega Unangika gea!’ De ngaro hokogenangoo ma ngaro ufa niangaku manga demoika gea. 27Angamoi nako ma oraha adonoka abe Ngohi o Nyawa ma Ngofaka toboali, gea ahao o nyawa mata-mataika o duniaka naa ka ma moi ihimake ahi boa. Abe imaketero hoka ma oraha o leletongo de o nyawa mata-mata ka idadi yamake ngaro ona dai eko dina, hokogenangoo ahao o dunia ma nyawa mata-mataika ahao ihikokimake ma oraha abe toboali.”
28“De naa tinihingahu nginika ma dodunguu o kia abe kiani ihira idadioka de ahao Ngohi toboali, la gea ka de ma dodunguu gea niamake de nihiorikoka abe duru itigioka ahi boa. De gea duru imaketero abe hoka nia demo ma dulu abe niato, ‘Nako daku ma hoanino de hamake o koyo-koyo imatoomuino, gea hohiorikoka abe naga ma honenge daena ma timiuku.’ De nia demo ma dulu gea igoungu, angamoi nako hamake o koyo-koyo imatoomu, gea hohiorikoka naga ma honenge angamoi ma dodunguu gea hohiorikokau. 29Ho ka de o nyawa manga kokangela mata-mata gea ipahaino de ahao ma dodunguu naa ngini niamake. De ma dodunguu naa ihitulihuku ma dihiraino itemo ato,
‘O wange idadi ifufutuoka de o medeoo ko ihitararonokaua o duniauku,
De o muru-murumu daku ma hoanoka de auku ikokiotaka.
Gea ma titi daku ma hoanino ma kiahonanga mata-mata ihikelu-kelu hiadono ma dodagi ko itiaiokaua.’” # 24:29
Yesaya 13:10, Yesaya 34:4, Yoele 3:14-16
30“De ma oraha gea de ahao to Ngohi ahi dodunguu o nyawa mata-mataika ka idadi yamake daku ma hoanino. De gea yamake de ahao duru ihihiorikoka abe Ngohi tagou-goungu o Nyawa ma Ngofaka abe toboa o Horogaka de tauku. De o nyawa o dunia ma amokika ka de yamake ahi dodunguu gea de duru yoari-ari ma titi manga hininga ma huhaino angamoi itigioka abe manga wowango yauru-urusu. De gea ahao ihimake Ngohi o Nyawa ma Ngofaka toboa o lobi-lobi ihihawoka. De gea Ngohi naga de ahi kuahaka de ahi medebini ma dararono duru ilamoko, de gea mata-mata o nyawa amake de manga lako.#24:30 Danyele 7:13-14 31De gea ipaha de ma guguli moi yowuwu duru kohaamokiye. De gea ahi momalaekata tahidingoto o dunia ma amokika la to Ngohi ahi nyawa dika abe duru tasanangi onangika, ona mata-mata ka idadi ahi momalaekata yatoomuino de yakokiaoino Ngohino.”
O hiketero ma ade-ade ma titi hokokia ai boa ma dodunguu
Maruku 13:28-31; Lukasa 21:29-33
32De o Yesusu wogila-gilali wahitararono onangika wato, “Abeika tohiketero. Nako o gogilioro ma gota, ka idadi genangino homadotoko, e? Abe nako ma jaga-jaga iboleoka de ihokaka, gea ka de hamake de hohiorikoka hato, ‘O, marai itigioka o hiwara ma oraha, angamoi hamakeoka ma dodunguu.’ 33De gea imaketero hoka o kangela ma dodunguu mata-mata abe tinihingahuokau kanganoika. Angamoi nako ma dodunguu gea hiadono niamake idadioka, gea ka idadi nimatemo niato, ‘O, marai duru itigioka ai gahe abe wohibehehongo wato ahao woboali.’”
34“De naa moi tagou-goungu tinihingahu. Abe ma dodunguu tinihingahuoka naa, gea mata-mata, abe ngaro ma dodunguu ihira-hira ka hiadono ma dodunguu duru itoturuino, masara gea mata-mata ko itedekanokaua de idadioka. Abe ma titi nako o nyawa yowango ma oraha naa naga, ona utu ko yohonenguahi de yadaene mata-mata ma dodunguu de ma kokangela gea.”
35“De mangale ma titi to Ngohi ahi Demo-demo duru ko iwa ma baha, ho ka idadi nihioriki abe gea ahi demo nginika duru igou-goungu ka hiado-adonika. Angamoi ahao naga ma oraha abe igoungu o dunia naa de o dihangoo duru ko iwaka, masara ahi Demo-demo duru itongohono ka hiado-adonika.”
Ma Jou o Baba dika wohioriki o Yesusu ai gahe abe ma oraha woboali
Maruku 13:32-37; Lukasa 12:41-48, 17:26-30, 17:34-36
36De o Yesusu wahitararonoli wato, “Masara abe ma titi Ngohi ahao toboali, duru ko moiua de ihioriki abe o wange o kia eko ma takoro muruono de toboa. De ngaro o momalaekatoo daku o Horogaka ma ko ihiorikua. De ngaro Ngohioo ma ko tohiorikua ahi gahe. Duga-duga Ma Jou o Baba dika, Una wohioriki.”
37“De abe ma titi Ngohi o Nyawa ma Ngofaka toboali, gea ahao o nyawa yatodokana manga hininga abe imaketero hoka ma dodihiraino ma oraha o Nuhi nagahi o duniaka de ma nguihi iboa ho o nyawa duru yatodokana. 38Angamoi ma dodihiraino gea abe ma nguihi ko iboauahi de ma nyawa gea duru ko ihiorikua abe manga hohowono itigioka, ho ona manga wowango ma biaha ka yatobanii-niikohi. Abe hoka ona yatobaniikohi manga ngolo-ngolomo de manga rame-rame, de ka yotobaila-ilakohi abe hoka manga biaha yotobadiai ka hiadono ma wange abe o Nuhi wowohamika ai kapa ma goronaika. 39De ma nyawa gea kiani yamake iboakahi ma nguihi gea de ahao ona ka idadi ihioriki de yongaku abe manga hohowono adonoka, de gea ma nguihi yahikokiofi ona mata-mata. De hokogenangoo ahao idadi ma oraha Ngohi o Nyawa ma Ngofaka toboali la tahohowono o nyawaika. Angamoi ahao ma oraha genangoo de o nyawa duru yatodokana ma titi ko ihiorikua abe manga hohowono ma gahe itigioka.”
40“Abe ahao ma oraha gea de idadi hokonaa. De naga o nyawa yahinooto yomakuduhunu yokarajaanga manga redioka de gea Ngohi toboali. De gea womatengo ka itodokanino de ka aiaho naga, masara ai dodiawo ka nagahi ma redioka. 41De nagali o ngofeka yahinooto yomakuduhunu yokarajaanga abe o pine yotuu-tutuku o luhungoka de ka itodokanino de momatengo ka aiaho naga, masara ami dodiawo muna nagahi o luhungoka gea. 42Ho gea hiadono Ngohi tinihitiari nginika la nimahidiaioka, angamoi duru ko nihiorikua to Ngohi nia Baluhu idodutu ahi gahe abe toboali.”
43“De abe ma titi tato kiani nimahidiaioka, abeika ahi demo naa ngini nimafikirohi. Nako o tau ma dutu womatengo de una duru wohioriki o futu o kia de o takoro muruono de wotobatohi-tohiki woboaino la widohiki, gea ko wohigunoaua la idadi. Angamoi ma tau ma dutu nako wohiorikoka ma oraha, gea ka idadi wigoana de woduhunu ai tau la ufa wotobatohiki gea wowohamino de widohiki. 44De hokogenangoo ngini ka ihikaika kiani nimagoa-goana, angamoi ngini ko nihiorikua muruonoka de ahao Ngohi o Nyawa ma Ngofaka toboali, ho done ko nimahidiaiuahi de ka initodokana.”
45De ahao o Yesusu wahingahu o hiketero ma ade-ade moioli abe ma titi Una ko woboauahi ma hinootoka de kiani o nyawa yomahidiaioka done yatodokana. De woade-ade hokonaa wato, “De naga o tau ma dutu ai duduhunu womatengo abe ai karajaanga wao duru irahai ma dutu ai tauoka. Ho ma dutu gea widosanangi unangika ma titi ai tagongo mata-mata wodiai irahai, abe hoka ma duduhunu gea wahiaturu ma duduhunu ma nyawa utuoli manga karajaanga ma tauoka gea, de wohiaturoo abe manga inomo o kia yaolomo o tau ma goronaka gea. 46De nako ma dutu kiani wanoaikahi la woiki ai dodagioka, gea de wihitagongo ai duduhunika gea la una ahao wohiaturu mata-mata o tau ma goronaka. De nako ma duduhunu gea ai tagongo wao irahai ma oraha ai dutu ko iwiwa, ahao ma oraha ai dutu wolioino de wihidoaka ai duduhunika o hidoaka moi abe ai karajaanga ma hasilino. 47De gea tagou-goungu tinihingahu abe ai duduhunu gea ai dutu ahao widosanangi unangika hiadono wigoraka de wihitagongoli unangika la wohiaturu ma dutu ai kiahonanga mata-mataika ai tauoka gea.”
48“Masara naa tinileha moi. Nako hoka ma dutu wosoboka ai dodagioka de ahao ai duduhunu gea ai hininga ma dorou ipuda de womafikiri wato, ‘Marai ahi dutu ka ai dekanohi de ahao woboali, ho ka idadi taniiki to ngohi dika ahi mau ai tauoka naa.’ Nako ai hininga ma dorou hokogea, sarakia, ahao ma dutu widosanangi unangika eko koua? 49Abe nako ma duduhunu gea womulaenge wapoha-poha ai dodiawo abe onangoo o duduhunu o tauoka gea, de watobaniiki o rame-rame, de hiadono ka iwitobadaluku, gea ahao done hokokia idadi? 50De gea tinihingahu abe ahao ma tau ma dutu woboali masara ma duduhunu gea duru ko wohiorikua ma wange o kia woboa eko o takoro muruono de woboa, ho o tau ma dutu duru wihitodokana unangika abe ma oraha woboali.”
51“De ma dutu woboaka de ahao kiani wihohowono abe duru wihikangela ai duduhunika gea, de ka hiadono wihihupu ma homoaika abe genangoka naga utuoli o nyawa abe yomadokangelukino dika masara ko yagou-goungua yaniiki manga dutu manga mauika. De genangoka o nyawa manga hohowono kohadubuho ho hiadono ona ahao yopoa-poaka ma amokiye de manga ingiri ka ihikaika ihidokagoli ma titi manga odiri ko apoaua.” De hokogea o Yesusu ai demo onangika abe wato kiani ka ihikaika ai nyawa yomahidiaioka angamoi o nyawa duru ko moiua de ihioriki ai gahe ma wange gea muruonoka de woboali.
Currently Selected:
Matiusu 24: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman