Matiusu 2
2
Ona yososawaro o murumu ma dodagi iwitutumu o Yesusu
1-2De abe ma oraha o Yesusu womaboa o Beteleheeme ma kapongoka abe o Yudea ma tonakoka, de naga manga koano o Herodese abe wahikoano ma tonakoka gea. Ho o Yesusu womaboaka de ipahaika o wange moiuku naga o nau-nauru abe yoboa o wange ma hiwaroka de yaiha. De ona gea manga tonaka imakitingaka de o Isiraele ma tonaka ma gurutika. De ona duru yosoo-sosawaro o murumu ma dodagi abe gea naga de ma titioka. De ona ma oraha abe ka manga tonakokahi de naga yamake o murumu moi abe genangino de duru ihioriki o koano womaboa ma dodunguu. Ho ona naa yoboa o Yerusaleeme ma kotaino abe genangoka o Isiraele ma nyawa manga balu-baluhu yogogere la ka idadi o ngofaka gea iwilingiri o kotaka gea.
Ho ahao yomahiadono o Yerusaleeme ma kotaka de o nyawaika yaleha ma titi o ngofaka gea ato, “Ho gea Una o kiaka abe naa ma duruika de ahao womaboa la wodadi o Yahudi ma nyawa manga koano? Ngomi doka mia tonakoka o wange ma hiwaroka de o murumu moi miamake o dihangoka abe miato gea to Una ai dodunguu womaboaka. Ho ngomi naa miboaino wiwilingiri la Unangika mimahuba.” Hokogea manga demo yosoo-sosawaro gea.
3De ahao naga o nyawa iwihingahu manga koano o Herodesika ato, “Naga o nyawa yoboaino nanga kotaino naa abe ona yosoo-sosawaro o murumu ma dodagi ma titi. De ona yato bari naga o ngofaka womaboaka ngoneoka naa abe yamake ma dodunguu o murumoka gea la ka idadi ihioriki abe una gea ahao wodadi nanga koano. De o ngofaka gea iwilingiri la ka idadi yomahuba Unangika.” Ka de o Herodese woihene manga hingahu gea de duru iwitodokana ho wato done ko wahikoanokaua genangoka. De ai kokawaaha o Yerusaleemoka onangoo manga hininga ihuha.
4De ahao o Herodese wakokiahokino ona manga hohidemo Ma Jouiye yokokurutiye de onangoo abe o Musa ai Pareta yotobadoto-dotoko. Ho manga hidimono ona mata-mata wakokitoomuinoka de waleha onangika wato, “Una o Mesia gea abe ma dihiraino de Ma Jou wonahibehehongoka ngoneino la ahao wonahikoano, ho o kiaka naga una womaboa?”
O Hitararono ma hidogo
Nako womatengo gea abe ma dihiraino de Ma Jou wonahibehehongo wato wonahikoano, naga to Una ai romanga hinooto. Abe nako o Yahudi ma nyawa manga demo iwihiromanga Unangika o Mesia. De nako o Yunani ma nyawa manga demo, ona iwihiromanga o Kristusu. Masara ma romanga hinooto gea de ma titi ka moi dika.
5De ona yopaluhu o Herodesika ato, “Una kiani womaboa o Beteleheeme ma kapongoka abe o Yudea ma tonakoka. Gea hohiorikoka angamoi abe ma dihira Ma Jou ai uru ma dodofanga o Mika wonahingahu wato,
6 ‘Ngini abe o Beteleheeme ma kapongo ma nyawa,
Ngaro o Yehuda ma tonaka ma kapongo mata-mataika,
Ma ka ti nginiohi nia kapongo ma gogere itipokouku,
Masara Ngohi ahao tinihikurutiye,
Angamoi ahao naga womatengo nginino abe wodadi o Koano,
De Una ahao duru wagoana irahai ahi nyawa, o Isiraele ma nyawa,
Abe imaketero hoka o domba ma gogoana duru watobagoana irahai ai duduono gea.’” # 2:6 Ma Jou ai uru ma dodofanga o Mika ai hingahu naa naga o Behehongo Ihira ma goronaka abe hamake o
Mika 5:2
Hokogea manga hohidimono iwipaluhu o Herodesika de yapake o Mika ai hingahu ma demoino abe ma titi o Koano Ma Jou wonahibehehongoka.
7Ho ka de manga demo ipaha gea o Herodese woihenoka de ahao ona abe yosoo-sosawaro ma titi o murumu ma dodagi gea o Herodese wahidohikika wabehehongo la ka idadi ona yoboa iwihimanga unangika. Ho ona gea yoboaka de wabole ma goa-goa watemo onangika wato, “Ngohi toigo tohioriki ka furuono ngini niamakeoka o murumu gea abe niato bote o Koano ma hungi ai dodunguu?”
8De ona iwihingahu o Herodesika abe ka furuono yamake ma murumu gea de ahao una wahibehehongo moi onangika. Ho una wahibehehongo wato, “Irahai ngini niloiki o Beteleheemika de nihidodiai niwilingiri o ngofaka gea la hiadono niwimake. De ipaha nako niwimakeoka Una gea de ahao nilioli ngohino la nihihingahu ai ngi o kiaka o Beteleheemoka la ngohioo ka idadi toiki tomahuba Unangika gea.” Hokogea o koano o Herodese ai budi ma demo wahingahu onangika.
9-10Ho o koano ai behehongo mata-mata ona yososawaro yototoihene ho yosobo o Beteleheemika. De gea yamakeoli o murumu gea abe ma dihiraino yamakeoka doka manga tonakoka. Ho ona duru yodogaragoholi o murumika gea angamoi ka yamakeokali. De o murumu gea itagi daku ma dihangoka de yahihira-hira o Beteleheemika de ahao imatogumu o tau moi ma lokuiye abe ma ngofaka naga doka o tau ma goronaka. 11Ho ona yoboa o tauino abe genangoka o Yusupu de o ngo Maria yogogere de ka yogila-gila yowohama o tau ma goronaika gea. De o tau ma goronaka iwimake o ngofaka gea de to Una ngoi meme o ngo Maria. Ka de iwimake o Yesusu de yatilabukuku ai himangoka hiadono manga pea itikiuku la yomahuba Unangika. De naga onangoka to ona manga hidoaka abe duru ihali, ho manga hidoaka ma hohailoa gea ihihupu ma ngi-ngiino de iwihidoaka o Yesusika. De gea manga hidoaka o gurasi ma dutu, de o manyanyi, de o muuru abe ma bounu duru ma hohailoa.#2:11 Ma oraha gea o gurasi idadi o hidoaka abe manga biaha o nyawa yahidoaka o koanoika, de o manyanyi ena gea abe ma bounu duru ma rorahai de yotufuku Ma Jouiye, de o muuru gea o gota ma hilo abe o Isiraele ma nyawa yapake yahidahawo de o nyawa manga honenge la ufa yomela. Ho ma hidoaka hange gea ma dodunguu o Yesusu gea Una o koano, de Una Ma Jou, de Unangoo o nyawa.
12Ho ona yososawaro yomahuba ibooto de ahao ma oraha yomaidu de yobuluhara. De manga buluhara ma goronaka de Ma Jou wahitiari onangika wato, “Ufa ngini niwigilio o Herodesika.” Ho ona iwirehenoka o Herodese ho yaniiki o ngekomo mungalioli la yolio to ona manga tonakika.
O Yesusu iwihiloara o Mesiiri ma tonakika
13Ho ona yosoo-sosawaro gea yosoboka de ahao nanga Baluhu idodutu ai malaekata womatengo womahimatoko o Yusupika ai buluhara ma goronaka. De ma malaekata gea witemo unangika wato, “Yusupu, naa nototoihene, o Herodese ahao wilingiri o ngofaka gea de ai hidee witoma. Ho kiani nimataiti o Mesiiri ma tonakika niloara. Ho nomomikoka de o ngofaka gea de ngoi meme nahiloara o Mesiirika la nigogere genangoka hiadono ahao tonihingahuoli ngonaika.” Hokogea Ma Jou ai hitiari ma demo o Yusupika.
14Ho o Yusupu ka de woihene gea de ngaro o futu ma goronaka ma ka wosobo dika de wao o Yesusu de ngoi meme o Mesiiri ma tonakika. 15Ho yogogere o Mesiiri ma tonakoka gea hiadono o Herodese wohonengoka de ahao yolio to ona manga tonakika. De hokogea idadi la duru imaketero hoka ma dodihiraka nanga Baluhu idodutu Ma Jou wonahingahuoka ai uru ma dodofanga o Hosea ai demoino. De gea Ma Jou wotemo wato,
“Ngohi naa ahi Ngofaka tiahoko o Mesiirino.”
De o Hosea ai demo gea ma titi o Yesusu wogogere jai-jai o Mesiiroka de ahao wolioli.#2:15 Ma Jou ai uru ma dodofanga o Hosea ai hingahu naa naga o Behehongo Ihira ma goronaka abe hamake o Hosea 11:1
16De igoungu ona yososawaro ko aniikua o koano o Herodese ai demo onangika. Ho ko iwihingahua unangika abe o Yesusu o kiaka ai ngi, angamoi ona ka iwirehenoka ho ka yogila-gila dika yolio. Ho ka de o Herodese wohioriki yososawaro gea iwibudi dika de duru iwihidafaeoka de ai ngamo ai hiningaka! Angamoi una duru woigo wihioriki ma ngofaka gea onaguna de ai ngi o kiaka la ka idadi iwitoma. De ahao una wohininga ona yososawaro manga demo abe iwihingahuokau ka furuono yamake ma murumu gea abe idadi o Koano ma hungi ai dodunguu. Ho mangale ma titi manga demo gea hiadono naa wahuloko ai tentaraika wato, “Niloiki o Beteleheeme ma kapongika de ma tonaka gea abe ihigilolitino de niakokitomaka to ona manga ngofa-ngofaka o nau-nauru mata-mataika abe gea manga ngumuru o taongo hinooto de imahikauku!” Hokogea o Herodese wahuloko onangika la wato ma ngofaka gea kiani Unangoo iwidaene.
17De gea igoungu idadi o ngofa-ngofaka manga ngoe o Beteleheemoka yakokitomaka! De gea yakokitomaka ibooto de gea idadi duru imaketero hoka Ma Jou ai Demo-demoka moi abe ma dodihiraino to Una ai uru ma dodofanga o Yeremia wohitulihukuoka. Abe ai demo gea ma titi o Beteleheeme ma nyawa manga huha hiadono manga gari ka idadi yoihene ma gurutika. Abe o Yeremia ai demo wohitulihukuokau hokonaa,
18 “Ona o Rama ma kapongoka yokokiihene,
O ngo Rahele ami totoforauku manga gari
De manga gari gea duru kohaamokiye,
Angamoi gea manga ngofa-ngofaka yagari,
De ngaro o nyawa yalaru ma ko yaohonua,
Angamoi manga ngofa-ngofaka gea ko yakokiiwaka.”
Hokogea Ma Jou ai uru ma dodofanga o Yeremia ai hingahu ma dodihiraka abe naa idadioka.#2:18 Ma Jou ai uru ma dodofanga o Yeremia ai hingahu naa naga o Behehongo Ihira ma goronaka abe hamake o Yeremia 31:15
O Hitararono ma hidogo
O ngo Rahele muna o Isiraele ma nyawa manga tofora gea o Yakubu ngoi fekata. De muna gea imilungunu duru o Beteleheeme ma kapongo ma datekoka. Ho ika-ika de ami totoforauku manga ngoe yogogere genangoka.
O Yusupu de o ngo Maria yomaturuuru o Nasarete ma kapongika
19O Yusupu de o ngo Maria de o Yesusu ona ka yogogerohi o Mesiiri ma tonakoka de ipaha o koano o Herodese wohonengoka. Gea wohonengoka de nanga Baluhu idodutu Ma Jou to Una ai malaekata gea womahimatokoli o Yusupika ai buluhara ma goronaka. 20De wihingahu wato, “Yusupu, nengokadau ona ato o Yesusu iwitoma, ona gea yohonengoka. Ho naa nomomiki la ngini nilio o Isiraele ma tonakika ngona de o Yesusu de ngoi meme.” Hokogea Ma Jou ai malaekata ai demo o Yusupika.
21Ho o Yusupu womomiki de o Yesusu de o ngo Maria wahingahu wato, “Naa ma oraha adonoka holio, ho naa hosobo holio nanga tonakika gea.” 22Ho gea yosobo masara ahao o Yusupu woihenoli abe o Herodese ai ngofaka o Akelausu, una wodadi ai baba ai duruuru ho naa unangoli wahikoano ona o Isiraele ma tonaka ma honongaka abe ihiromanga o Yudea ma tonaka. Ho ka de gea woihene, de o Yusupu wohawana wogila-gila manga dumutika gea. De ahao Ma Jou wihitiarioli o Yusupika ai buluhara ma goronaka la manga dumutu waturuuru, ho gea ona o tau moi yoiki o Isiraele ma tonaka ma honongaikali, ma romanga o Galilea ma tonaka. 23De genangoka ona yogogere o Nasarete ma kapongoka. De hokogea hiadono idadi abe ma dodihiraka Ma Jou ai uru ma dodofanga inahingahuoka abe ona yotemo ma titi o Koano abe Ma Jou wonahibehehongoka. De manga demo gea ihitulihukuokau ato,
“Una gea ahao iwifetongo o Nasarete ma nyawa.”
De itiai iwihiromanga hokogea angamoi o Yesusu wodalamoko genangoka ho una wodadioka o Nasarete ma nyawa imaketero hoka ma dodihiraka Ma Jou wotemoka.
Currently Selected:
Matiusu 2: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman