Matiusu 11
11
Ona iwitobaniiki o Yohanese Wotobaohi-ohiki yoboa de yomakoketemo de o Yesusu
Lukasa 7:18-35
1De o Yesusu wahibehehongo ipahaino iwitobaniiki yangimoi de yahinootoika de ahao ona yosobo. De ona yosoboka de ahao Unangoo wosobo woiki o kapo-kapongika o Galilea ma tonakoka la o nyawaika wadotoko de duru wahigaro onangika de to Una ai dodotoko ma demo.
2De abe ma oraha o Yesusu wotagi-tagi wadotoko o nyawaika de o Yohanese Wotobaohi-ohiki una iwitaokoka ho una naga o bui ma goronaka. De o Yohanese una o buioka de woihenino ma abari abe o nyawa yomaketeade-ade ato bari o Kristusu ai datoro hokonaa de hokonaa wodiaioka. De o Yohanese woihenino ma titi o Kristusu ai datoro gea masara ka nagahi ai leleha o Yohanese ai hiningaka. Ho abe to Yohanese ai nyawa utu wahidingoto yamuruono naga o Yesusika la o Yohanese ai leleha ona ka idadi yadofanga iwileha o Yesusika. 3De gea ai lelehaino ma demo wato, “Sarakia, Ngona naa igou-goungu Una abe iwihiromanga Ma Jou ai Behehongo abe ma dodihiraino Ma Jou womihibehehongokau? Ekola ko Ngonaua? Angamoi nako hoka Ngona ko to Unangua ai Behehongo, bote koaho womatengoli ngomi wiwilingiri abe Una wodadi ma Behehongo Ma Jouino.” Hokogea to Yohanese ai leleha o Yesusika.
4De abe iwinii-niiki o Yohanese ona yoboa o Yesusino de iwileha Unangika, de o Yohanese ai leleha ma demo aniiki. De gea o Yesusu wapaluhu onangika wato, “Ngini naa niamakeoka ahi datoro, ho ka idadi niwigilio o Yohanesika de niwiade-ade unangika abe ngini ma hirete niihene ahi dodotoko ma demoino de abe de nia lako niamake to Ngohi ahi datoroka. 5Abe Ngohioka de ngini niamake abe ona yorafi-rafi tahitogumu la yomahiorikoka. De abe o nyawa ko yomangakunokaua yotagi-tagi abe ona yolugu-lugu de gea tahitogumu la ka idadi yomadagioli. De nagali abe ona yapado-pado manga panyake iaikoka ho manga kai itebinokali, de abe ona yatotopongono masara ona ahao yomahiihenoli. De nagali ngini niamake abe ona yohone-honengoka de gea Ngohi tahimomikoka manga honengino la ona ka yowangokali, de nagali niamake abe o hu-huha ma nyawaika tahingahu-ngahu o Abari ma Rorahai onangika.#11:5 Yesaya 35:5-6, 61:1 Ho ngini niaika de ahi datorino gea mata-mata ka idadi niwiade-ade o Yohanesika la ka idadi wongano-nganono.”
6“De naa ahi demo moioli niwihingahu unangika niato, ‘De abe o nyawa manga hininga ko ijaga hinootokaua masara gea ma gahumu itagi ka Ngohino dika la ihingaku, ona gea ahao yamake ma hiowa Ma Jouino.’” De hokogea o Yesusu ai babaluhu ma demo onangika la ahao itararono o Yohanesika abe o Yesusu Una wagou-goungu nanga Duduhunu abe ma dodihiraino wonahibehehongoka Ma Jou ngoneino. De abe o Yohanese ai nyawa gea ona yosobo yolio o Yohanesika.
O Yesusu wahitararono ma titi o Yohanese ai wowango
7De o Yohanese ai nyawa gea ka de yosobo de o Yesusu wahitararono o nyawa ko manga ngoeika abe ma titi o Yohanese Wotobaohi-ohiki ai wowango ma datoro. De gea wotemo wato, “Sarakia, nako ngini nimafikiri ma titi o Yohanese ai wowango ma hidumutu gea niataoko hokokia? Abe ngini nia ngoe ma dihiraino de niloiki o tonaka ma kakaahaika la niwimake de niihene ai demoino. Ho ngini niwimake abe o nyawa hokokia ai hininga? Bote niwimake abe una ai hininga hinooto eko wolilifanga ho ka ihikaika ai hininga watoturuuru? Koua, una gea ai hininga ko wangali-ngaliua! 8Eko bote ma oraha niloiki unangika de gea niato niwimake womatengo abe ai baju duru ma rorahai de ma hali? Marai hokogenangua, angamoi o nyawa abe manga baju hokogea ma rorahai yomahinoauku, ona gea yogogere o kokoano ma tauoka dika. Masara nako o Yohanese ai baju hokogenangua angamoi una womanoa o tonaka ma kakaahaka dika. 9Eko bote ngini utu niloiki unangika la niato womatengo Ma Jou ai uru ma dodofanga niwimake? De nako hokogea nia hininga ma dumutu de genangino ngini duru niataana, angamoi una wagou-goungu wodadi to Una ai uru ma dodofanga womatengo. Masara o Yohanese una gea Ma Jou ai uru ma dodofanga ka biahaua dika. Angamoi una gea Ma Jou wiiriki de wihidingoto la wohidiai o nyawa manga hininga la hiadono ka idadi ihidafongo Ngohi naa. 10De Ma Jou ai Demo-demo naa moi abe ma dodihiraino wotemo to Una ai Ngofakika de hiadono ihitulihukuoka, gea ena ma demo ma dumutu o Yohanese Wotobaohi-ohikika. Abe ma demo gea itemo ato,
‘Abeika Ngohi ahao tihidingoto womatengo la wototaka ahi Demo-demo o nyawaika. De una gea tihidingoto wohira la to Ngona ani ngekomo wonihidiai, de ahao Ngona nihidoduruika ai poretino.’ #11:10 Maleaki 3:1
De hokogea Ma Jou o Baba ai demo ma dihiraino abe wotemo ai Ngofakika ma titi o Yohanese.”
11“De naa tinihingahu nginika abe nako o Yohanese Wotobaohi-ohiki de o nyawa utu mata-mataika abe ma dodihirainohi de ka hiadono ma oraha naa, ma ka unangohi wokurutiye Ma Jou ai himangoka. De ngaro ka unangohi wokurutiye ma oraha naa, masara ahao ma oraha Ma Jou wahikoano ai nyawaika gea ko imakadaenokaua. Angamoi ma oraha gea de Ma Jou ai nyawa mata-mataika naga de manga utumu duru ma amoko abe ahao yamake Unangino. Ho ahao dokena nanga himangika de Ma Jou ai nyawa onagona dika abe ngaro manga gogere itipokouku dika, masara ka onangohi yokurutiye abe nako de o Yohanese Wotobaohi-ohiki eko Ma Jou ai nyawa utu abe ma oraha naa yowango. Ho abeika duru ma rorahai abe Ma Jou ai nyawa yamake ma oraha dokena nanga himangika!”
12“De abe ma oraha o Yohanese womulaenge wahingahu-ngahu de watobaohi-ohiki o nyawa ka hiadono ma oraha naa, de naga o nyawa abe yapake manga hininga ma dorou abe duru ihitaili de manga buturungu ma gahumu la yalawana Ma Jou ai hingahuika gea. Angamoi manga hininga ma dorouino gea ho duru ko yoigoua la o nyawa iwingaku Ma Jouika de hiadono yodadi to Una ai nyawa abe wahikoano onangika. Ho o nyawa ma dorou gea duru yototualono ho duru iwilawana Ma Jouika.”
13“De o Yohanese una tihiromanga tato una hoka Ma Jou ai uru ma dodofanga ma baha. Abe una ko woboauahi de naga Ma Jou ai uru ma dodofanga mata-mata utu abe ihitulihuku de inahingahu abe hokokia ahao idadi ma oraha naa. De nagali o Musa ai demo-demoino abe unangoo wonahingahu hokokia ma oraha naa de idadi. Masara gea mata-mata ma oraha naa abe o Yohanesoka de ihibobaha, angamoi to una ai hingahu hatoli imakohowono. Abe una gea dika wonahingahu-ngahu wato itigioka ma oraha abe Ma Jou wahikoano ai nyawaika. 14De igoungu abe ai uru ma dodofanga ihitulihuku ato o nyawa manga Mesia eko manga Duduhunu ko woboauahi Ma Jouoka de waino de naga womatengo wohira woboa. De una woboa gea ai hininga de ai demo imaketero hoka o Eliali ma dodihiraino ai hininga de ai demo. De womatengo gea wohira woboa la wohidiaiohi o nyawa manga hininga la ona ahao iwidafongo manga Duduhunu abe ma dodihiraino de Ma Jou wahibehehongoka.”
“De naa tinihingahu moi abe marai ngini utu ko niongakua enangika. Masara ngaro nia hininga hokogea masara ka tinihingahu dika abe manga demo gea ma titi o Elia abe ma dodihiraino ihitulihukuoka, tanu gea ma hidumutu o Yohanesika. Angamoi una gea wohira woboa de ahao Ngohi tihidoduruino ai poretino, de to una ai wowango ma dumutu ka imakadaene dika abe hoka to Eliali ma dodihiraino. 15Ho onagona dika abe naga de manga ngaukoka kiani ihigihene ahi demoino gea!”
16De mangale ma titi o nyawa manga ngoe ko yodafongua o Yohanese ai demo de ngaro o Yesusoo ai demo ma ona ko yodafongua, ho o Yesusu watemo onangika wato, “Masara ngini naa ka nioluku dika niodafongo to ngomi mia demo. Ho koaho tinihiketero de onagonali? Marai irahai tinihiketero ngini naa hoka o ngofa-ngofaka o doomu moi abe ona ko yasanangiua manga dodiawoika. De o ngofaka gea yogoo-gogeruku o paharoka la ona yogogule genangoka, masara yomaketeloliliara ona de manga dodiawo ho yahigurubungu onangika. 17De manga gurubungu ma demo ato, ‘Ngomi miato irahai hogogule abe hoka o nyawa o gogilaka ma rame-rameoka, ho mia sulingi miwuu-wuwu la homakutuono hohirame-rame de nanga hininga ma garago, masara ngini naa duru nioluku ho nia hininga ko igaragoua.’”
“‘De ipahaino ngomi minihigaroli abe miato irahai hogogule abe hoka nanga hininga ihuha, abe hoka o nyawa yomatoomuino ma titi manga dutu womatengo wohonengoka. Ho ngomi miato honyanyi de o hininga ma lalaru ma nyanyianga abe hoka nanga biaha nako o nyawa yohonenge. Masara ti ngini nia hininga nihikawalimi abe niato ufa homaaduru abe hoka nanga hininga ma huha masara ngini niato koaho hogarago dika. Ho ngini ngaro hokokia dika minihigaro masara duru ko niminiikua to ngomi naa mia hininga!’”
De gea o Yesusu ai hiketero ibooto de ahao wogila-gila wahitararono onangika wato, “Hokogea o ngofa-ngofaka manga gurubungu ma demo, ho manga hininga gea tato imaketero abe hoka ti nginioli nia hininga, angamoi ngini ka nimioluku ngomi mata-mata, abe ngaro Ngohi de ngaro o Yohanesoo Wotobaohi-ohiki. 18Angamoi nengokadau abe ma oraha o Yohanese woboa de to una ai hininga ma dumutu ko o rame-rameikaua ho una ko wokerua o angguru ma gohaka ma teongo de ma ngoe wopuaha dika ho ko wolo-olomua. Masara ngini naa nia hiningaka niato o Yohanese ai wowango ufa womahihuha hokogea masara koaho wogogarago dika, de genangino nihititi la niwioluku una. De gea hiadono niwitaere unangika niato, ‘Una gea iwikitokatoka.’ 19De ahao Ngohioli toboa, abe Ngohi naa o Nyawa ma Ngofaka. De Ngohi toboaino de ahi datoro imakohowono de o Yohanese, angamoi igoungu Ngohi tatobaniiki ti ngini nia rame-rameoka de Ngohioo tokere ma ngokere abe ti ngini nia biaha niatobaokere. Masara to Ngohioo ahi datoro ngini ko niodafongua, de hiadono genangino nihititi la nihitaeroli Ngohino! Abe nia dodaere ma demo Ngohino niato, ‘Abeika Una gea duru wolomo ilamokuku de iwitobadaluku! De gea Una hiadono wadodiawo o howo-howono ma nyawaika! Ei! Ngaro ona abe yotobagaho-gahoko o pajaka ma tiwi abe manga hininga duru itorou masara duru yomaketedodiawo ona de Una gea!’ Hokogea ti ngini nia dodaere Ngohino.”
“Ho abeika nimafikirohi. Abe ngaro o Yohanese ai wowangoka abe o rame-rame wodokaowara de ai hininga ma huha naga ma ngoe, masara ngini niwioluku una. De barikua Ngohioo abe ahi hininga hatoli igarago abe hiadono tanii-niiki nia rame-rame, masara gea Ngohioo ka nihioluku dika, de ahi demo nginika ko niodafongua!”
“De ngaro hokogea ti ngini nia hininga la to ngomi mia demo niaoluku, masara itararonoka abe to Yohanese ai demo de to Ngohioo ahi demo de gea mata-mata ihititi o sosawaroino. Angamoi o nyawa onagona dika abe ihigihene to ngomi mia demoino ahao mia demo gea ihihofoko ma datoro ma rorahai to ona gea manga wowangoka. Ho gea imihitaana abe ngomi imihinooto mia demo duru ihititi o sosawaro ma gou-goungino.”
O Yesusu wahingahuohi ma titi Ma Jou ai hohowono onangika abe ko iwingaku-ngakua
Lukasa 10:13-15
20De o Yesusu ai dodagi ma goronaka abe wotulu-tulu o Galilea ma tonaka ma kapo-kapongika de ma ngoe wodiai o heheranga onangoka. Masara ona genangoka manga ngoe ko yotobaua manga howo-howonino ho manga hininga ko itagiuahi Ma Jouika. Ho gea o Yesusu wahingahuohi o nyawaika abe hokokia ahao Ma Jou wahohowono ona ko iwingaku-ngakua. 21De o Yesusu wotemo wato, “Abeika niatotoihene ahi demoino, ngini abe o Korasimi de o Besaida ma kapo-kapongoka nigogere! De ngini ahao nia hohowono kohaamoko niamake abe ma titi ngaro niamakeoka ma heheranga abe Ngohi todiaioka nginioka masara ko nitobaua nia howo-howonino.”
“De naa ka idadi tinihikohowonoli ngini de ona abe yogogere o Tirusu de o Sidono ma kapongoka abe ona genangoka ko o Yahudi ma nyawaua. Abe genangoka ko todiaiuahi o heheranga, masara Ngohi ka idadi tohioriki abe nako hoka ahi heheranga todiai onangoka, ma nyawa gea ka de yamake ahi heheranga de ahao ka idadi yotoba manga howonino ho iwiniiki Ma Jouika. De manga toba gea ahao yomahitunguu abe yomahinoaukuoka de o pakeanga ma kokekekere abe o karongino yodiai, de nagali abe o uku ma kafo yomadoburaraha manga peauku ma titi manga toba ihitunguu. Masara ngini naa ko nitobaua ngaro ahi heheranga niamakeoka nia hidogoronaka! 22Ho naa ngini tinihingahuohi abe ahao dokengika o hohowono ma wangeoka de nako ngini de ona abe o Tirusu de o Sidonoka, ma ka ti nginiohi nia hohowono duru itubuho nginika ma titi ko nitobaua.”
23“De ngini abe nigogere o Kapenaumu ma kapongoka, naa moi tinileha nginika. Ho sarakia, ngini niato bote ka idadi nimahidatao o Horogaiye ma titi ti ngini nia wowango ma datorino? Duru hokogenangua, masara tanu ngini ahao inihigutiuku o Narakauku angamoi nginioo ma ko nitobaua nia howo-howonino abe ma oraha o heheranga gea todiaioka ti ngini nia hidogoronaka.”
“De ngini o Kapenaumoka tinihikohowono de ona ma dodihiraino abe yomanoa o Sodomo ma kotaka. Abe Ngohi ko ihiwa o Sodomoka ma dihiraino gea ho ko todiaiua ahi heheranga onangoka, masara Ngohi duru tohioriki abe nako hoka Ngohi naga o Sodomo ma nyawaka de todiai ahi heheranga onangoka, ona gea ahao tanu yotoba ho Ma Jou ko wahohowonuali onangika. De gea nako hoka ma dihiraino ona yotoba, gea manga kota Una ko wohibinaahauali masara tanu ena gea ma kota ka nagahi hiadono ma oraha naa naga. 24Ho naa tinihingahuohi ngini o Kapenaumu ma nyawaika abe ahao dokengika o hohowono ma wangeoka de nako ngini de ona abe wahibobinaahaka o Sodomoka, ma ka ti nginiohi nia hohowono duru itubuho ma titi ngini ko nitobaua ma oraha niamake ahi heheranga abe todiaioka nginioka.”
O Yesusu womaniata ai Babaiye de ipaha Una wahoko o nyawa la iwinii-niiki Unangika
Lukasa 10:21-22
25De ipaha de o Yesusu womaniata ai Babaiye wato, “O Baba, o dunia naa de o Horogaoo to Ngona ani giamoka ho Ngona dika to ena ma Baluhu idodutu. De Ngohi totarimakase Ngonaika ma titi ma dodihirainohi de nohikaaturu la ngaro o nyawa abe manga sosawaro ikuranga ma ka idadi yataoko itiai o dodotoko ma gou-goungu ma titi Ngona. Masara abe ona yomahiromanga ato yososawaro de manga tobahioriki ilamoko, ona gea ikuranga yataoko ma gou-goungu angamoi Ngona nagogonoka la nato ufa ona yamake. 26De gea Baba ma dihirainohi de nohikaaturoka angamoi imakiniiki de to Ngona ani mau.”
27De womaniata ibooto de ahao wotemo o nyawa manga ngoeika genangoka wato, “Ahi Baba wohihidoaka Ngohino la ahi tobahioriki duru ingodumu mata-mataika. De Ngohi naa Ma Jou ai Ngofaka, ho Ngohi de ahi Baba duru mimahikoriki. De ko iwa o nyawa utu abe duru ihihioriki Ngohi imaketero hoka ahi Baba wohihioriki.
De abe duru iwihioriki ahi Babaika gea bowahu Ngohi de ahi dodiawo dika. Abe ahi dodiawo gea ma titi o nyawa onagona dika abe Ngohi toigo la o Baba tihimatoko onangika hiadono ona ka idadi iwihioriki Una. Ho ona de Ngohi dika abe duru wiwihioriki o Babaika.”
28De ahao Una wotemo wato, “Ngini mata-mata abe nia hiningaka de iniboleoka abe imaketero hoka nia pea ihifefele ma titi nia hininga ma gina duru kohadubuho, de gea ngini mata-mata niainohi Ngohino la ka idadi ti ngini nia hininga tohiuwini. 29Ho irahai ngini niboa Ngohino de nihihingounu la nidadi to Ngohi ahi nyawa. De irahai nimadotoko ahi demoino, la ahao nia hininga ka idadi naga ma miriidi. Angamoi Ngohi naa tabole-bole o nyawaika de ahi hininga ma dodipokouku. 30De nako nihiniiki Ngohi gea ko nihuhaua. De abe nia hiningaka ko tinihitubuhoua masara ahao ka ma goguwini dika ti ngini nia hiningaka.” De hokogea o Yesusu wahoko o nyawa la iwiniiki Una.
Currently Selected:
Matiusu 11: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman