Mateus 3
3
Ca pijim' nucun João co ja' nonon pain com oro wari'
Marcos 1.2-8; Lucas 3.1-18
1Pain pin iri na ne, maqui' ac ne na oro xec nein ca ja' taxipa' com João pane, pain ca pijim' pe cain mahweri pain Judeia pane. 2Ca' na ca pijim' nucun: Cwirin' je, xi om ne ca wixicam pin ta' ara ne xec nein ca taramaxicon pe ho' pin ton cocon oro wari' Iri' Jam ta na. 3Wirico João co xirao' pe ca profeta Isaías cara pane. Ca' na ca xirao' pe nucun pane:
Ma' na wari' co merem pe nain mahweri.
Wara quep xo' mi' jun pain wana Taramaxicon nuhu'.
Quep tan pan mi' jun pain wana ta.
Ac i ma' na ca xirao' pe nucun Isaías pane#3.3 Ca' na ca tomi' mao nein ca xirao' pe nucun Isaías: Wari' co quep xo' mi' non pain wana Taramaxicon nexi' ma', co quep tan pan mi' non pain wana ma' quem, ac ca winim' xo' con na. Ac ca an pe xo' cain na ximicon con. Ac je na ca tomi' mao ne ca xirao' pe nucun profeta Isaías cara pane. .
4Pe taxipa' nain tenenein camelo João pane, wirico co ma' womicon pane. Tucu pan xucun pain tapari carawa pain ximijacon. Cao' taxipa' na can, xac taxipa' na tawi quem. 5Xuruxut xuruxut hwet nonon João oro wari' co to nanain Jerusalém. Co to nanain oro xijein cidade pain Judeia, co to ja' pan nanain iri' cwerein com ma', pain Jordão ma', xuruxut xuruxut hwet nonon quem. 6Tomi' hwet pin iri nanain ca caracat nucucun ne, ja' pan ac cocon na pain com João ma'. Ja' pe tata pain Jordão ma'.
7Mija nana oro fariseu cocon oro saduceu#3.7 Judeu nana oro fariseu cocon oro saduceu pane. Taramaxicon to ho' nonon oro win ma' caca. Hohot tiquin' ca' ururun oro win ma' nexi' cwa' pan xucucun oro fariseu. Oro saduceu ma' iri nana ne, om ca howa xo' caca. Om nana oro jam co taramaja mi' nonon Iri' Jam, om ca e' mami' xi' caca oro wari' co cono' nana quem nana. co hwet nonon João ma'. Ma' ta ja' capari' pain com ta nana. Querec iri nonon João pain ca maqui' nucucun ma' ne, tomi' ac cocon na: He! Ja' xi' com hwe ra oro caxicon em', ac i ma' na ca tomi' tococwa ma'. Witan ca' xin hwein ca mana' tamana nucun Iri' Jam ra? Ma' co jein ca' jun nuhu' ma' quem? 8Xi iri'o' hwe ta ac tococwa na. Xucun wari' pin xihwe. Ma' ta querec pin' xine ca cwirin' nuhu' pain ca caracat nuhu' ta. 9Ta tomi' ximama' ca' hwe me: Om na, om ta wap caparut Iri' Jam, xi iri' hwanana ne ara urut con hwanana nuxut Abraão cara pane ta, om ca na camain' ne, pain ca tomi' ximama' ac i ma' hwe ta. Cain' cain' xihwe quem? Je ca tomi' xuhu' ca' ac tococwa na. Ha' ara xi' non Iri' Jam pain ca to' waram winacon Abraão pin cain oro pacun ca' inuhu'. 10Wap ho' xim cuhu' Iri' Jam ma' ira. Noro jun wari' co wara an pin nain iriquixi quit ma', co ta' caracat pin tain nain oro pana pain iri' caximain ma'. Oro panaji memem ca om mi xo' winain ma', ta' caracat pin tain tara, wixicaracao' mi' ac ca pain xe tara quem. Ac i ma' xim turuhu' Iri' Jam pain ca wap xim cuhu' quem. Ac i ma' na ca tomi' tococwa ma'.
11Ja' inuhu' pain com, xi om ne ca cwirin' pin ara hwe ta ac tococwa na. Wara maqui' paxi' ina, ane maqui' ta' pa'ao' ca xucun co hwara' opa tiquin' ca' napa' ne. Iri' wari' na quem. Om ca hohot ne pain ca quep xiho' camain' ton pain ca cut mi' ton pain caji caximacon ma', xi iri' wari' ta' ta. Mo ta cwirin' pin hwein ca caracat nuhu' ma', mi' ac cuhu' tara pain Tamataracon Iri' Jam. Mo ta om cwirin' je na hwein ca caracat nuhu' ma' quem, wixicaracao' mi' ac cuhu' tara pain cote ne xe ta. 12An to ni ca' toton nonon oro co tomi' ha' nonon cocon oro co om tomi' ha' nonon quem. Win ca wari' co an pe ni ca' tain nain ca xao pe xine tocwi trigo pain tocoxi ma' quem. An nain ca mam' pahop nucun, pahop ac cain na tocoxi, an pe ni ac cain na iri' tocwi pain xirinain, wixicaracao' mi' ac cain na tocoxi pain xe ca om jo' ra ha' ma' quem na ca tomi' cocon oro wari' João pane#3.12 Pain ca tomi' mi' con wari' co pahop nain tocwi trigo João ma', wirico Jeju co tomi' mi' ca. Main an to ni totoron oro wari'. Co cwirin' pin nana ma', an to ni ac tococwa tara. Co om cwirin' je na nana ma' iri nana ne, wixicaracao' mi' ac tococwa tara pain cote ne xe ca om jo' ra ha' ta na. .
Ca ja' con pain com Jeju João
Marcos 1.9-11; Lucas 3.21-22
13Maqui' ac cain na macarain Galileia Jeju ma'. Hwet ac cain na Jordão ma'. Ma' ta ja' capa' pain com João ta na.
14Ja' ne pain com ta ac con na.
He, cain' cain' xima quem ac ca na João. Para ja' ne pain com mapa' quem? Xi caracat ma ta. Ja' pan ximapa' ta non. Tomi' paxi' non, ane om ca na con ne.
15Je i ma' ira João ac con na. Tomi' ha' ne e', ja' ne e'. Na e' na pain ca tomi' ha' xun Iri' Jam ta non.
Ma ac con na, ja' ac con na quem.
16Ja' pin iri ta ne, hwet ca' ac cain na com. Ane ane pa ac ne na nanawin. Querec ac cain na Tamataracon Iri' Jam pain ca quiji' hwet con ma'. Ac ca quiji' qui' ca xucu' na pain ca quiji' hwet con ma', pain ca xat con ma'. 17Tomi' pan ac con na Iri' Jam. Maqui' nain pawin ca tomi' nucun. Mon cwa' panxita' co om noc camain' ta' cwa'. Hohot tamana napa' ta na ca tomi' con ma'.
Currently Selected:
Mateus 3: TBPN
Highlight
Share
Copy
Want to have your highlights saved across all your devices? Sign up or sign in
Copyright 2023 Missão Novos Tribos do Brasil