Luke 1
1
1Uria na toa oro kera ili uria alu ofu la asi do ba ki na kera ilia ka mamana naa i maalutamilia, 2Ka ’uria fale la na toa eki kera falea ifamilia, toa kera tala rikia ana maada, ma keka ra asi baea eri too mai i thafali lana si do eki, 3E lea ana manataku lau boo, uria nau ku mamanata sulia si do eki sui boo ka too ita mai i thafali lana, kwai kekeda kau isamu sulia lae lana, Thiofilasi, wane no inoto ka tatha; 4Fasi oko thaitoomana mamana lana si do na kera toodaki isamu.
5Asi maṉa na tha Heroda kai to bana, kiṉa ana fanua i Judia, tee wane ni foa, thatana tha Sakaraiasi, wane ana talee wane ni foa tha Abia ki: ma nia ana ta kwai ana baree thari tha Erona, ma thatana ni Elisabetha. 6Ma keroa sui boo keko kokoto inaofatha God, keko abula sulia si ṉata fifi ma si ṉata too ṉado tha Lord ki, keko dodoloa. 7Me ai adaroa ta wela, uria ni Elisabetha e abaato, ma kero arai naa.
8Ma lalae mai, si maṉa na nia kai abarua ana ra wane ni foa inaofatha God i fuliṉana fa boṉi nia, 9Sulaania biraṉana ra wane ni foa, si kula ana ilala lana na kotho la i la biu baita tha Lord ana naare lana do thasune makwa lea. 10Ma malului wane eki sui boo keki foa bada i maa asi maṉa ana naare lana do thasune makwa lea. 11Ma angel tha Lord ka fula fatai isana, kai takwe ibali aola ana fulii era ni naare lana do thasune makwa lea. 12Ma si maṉa na tha Sakaraiasi e riki nia, ka taa iana, ma mau la ka durufi nia. 13Ma angel eri ka soree isana, Osi mamau, Sakaraiasi: uria na kera roṉoa naa foa la oe, ma kwaimu ni Elisabetha kai tharea amu ta kaluwane, ma kio alaṉia atha Jone. 14Ma toto oki fulatoona seethathala la ma ele la; ma toa oro toto keki seethathala sulia futa lana. 15Uria na tha Lord kai riki nia e baita, ma nia toto si kuufia waene ma kafo bubula; ma keki faafuṉu nia atha Spirit Abu, i rakena thainana u bomai. 16Ma toa oro ana kwalafa tha Isirela nia kai oli fafia isatha Lord na God kera. 17Ma nia kai lae inaona ana spirit ma sukwaia tha Elaeja, fasi kai oli fafia ruruuna wane kera welaa ki isana kala wela ki, ma toa na kera ade faisia si do ki fasi keki abula ana liotooa imole na kera kokoto; kai beta ta toa na keki thathai maakwalia tha Lord. 18Ma tha Sakaraiasi ka soree isana angel eri, Kwai thaitoomana ufita asi do eri? uria na ku arai naa, ma ai nau ka kukue naa. 19Ma angel eri e luua, ka soree isana, Ni nau tha Gebiriela, na kwai takwe inaofatha God; ma kera arasi nau mai fasi kwa ṉata isamu, bia kwa ṉalia mai si faaroṉoa lea eki isamu. 20Ma rikia fasi, ni oe oko bona ma oko dora ana ṉata la, lalae ka fula afa boṉi na do eki kai mamana, uria nosi faamamanea bae laku, na toto kai mamana asi maṉa na kera alua uria. 21Ma toa eki kera mamaasia tha Sakaraiasi, ma keka kwele uria nia to ka tau i la biu baita eri. 22Ma lalae e kotho i maa, nia ka dora ana ṉata la bida: ma keka thaitoomana lea na nia e rikia si na kera fatai lalaa ania i la biu baita tha God: uria nia fafafuilala urida, ma fokona ka ato bonaa. 23Ma lalae mai, ka fula naa ana fuliṉana fa boṉi na ra nia kai sui naa, nia ka lae nana uri maafera nia.
24Ma iburiana fa boṉi eki kwaina na ni Elisabetha ka to ana wela; ma ka thaufuni sulia lima madami, ka una eri, 25Tha Lord e ade una eri iaku afa boṉi eki ne lio fafi nau, fasi ka ṉalia si do ne faaseenoni iaku faisia i maalutana imole.
26Me fula ana ona madami, angel eri tha Gebiriela tha God e arasia uria ta toaa susu i Galili, thatana Nasaretha, 27Isane tee thari ne ado bia tee wane thatana tha Josefa, wane ana kwalafa tha Defeta; ma thari eri thatana ni Meri. 28Ma angel eri e kotho isana, ma ka sorea, Oki seethathala, ai na kera ala fafi oe ana lea la, tha Lord e ni isamu: kai lea iamu i maalutana kini ki. 29Ma si maṉa na thari eri ka rikia, nia ka mau faamau asi ṉata eri, ma ka manata uria maalutana kwaiaratai la eri. 30Ma angel eri ka soree isana, Osi mamau, Meri: uria na tha God e ala fafi oe. 31Ma rikia fasi, toto oki to ana wela, ma oki tharea ta kaluwane, ma oko alaṉia atha Jesus. 32Nia kai baita, ma keki alaṉia ana Kaluwane Nia ne Inoto ka tatha: ma tha Lord God kai falea do ni ono la ana inotoa maka nia tha Defeta ifana: 33Ma nia kai inoto ana kwalafa tha Jekofo toto si sui; ma tooa nia toto si funu. 34Ma ni Meri ka soree isana angel eri, Si do eri kai mamana ufita, na nau kwasi toowane bakua? 35Ma angel eri e luua, ka soree isana, Tha Spirit Abu kai fula fafi oe, ma sukwaia Nia ne Inoto ka tatha kai nunufi oe: mania lau boo si do abu na kai futa ani oe keki alaṉia ana Kaluwane tha God. 36Ma rikia fasi, ina lamu na ni Elisabetha ka to lau boo ana kaluwane i kukue lana: ma madami nei ona naa madami nia neri, ai na kera alaṉia ana abaato. 37Uria na tha God e ai ta si do si afetai iana. 38Ma ni Meri ka sorea, Rikia fasi, ai ni ra tha Lord; keki ilia boo iaku sulaania bae lamu. Ma angel eri ka lae nana faisi nia.
39Ma ni Meri e tatae afa boṉi eki, ka lae fofoa uria fanua na gwa tolo ki ni iei, uria ta toaa susu i Juda; 40Ma ka kotho i maafera tha Sakaraiasi, ka aratai nia ni Elisabetha. 41Ma lalae mai, si maṉa ni Elisabetha e roṉoa aratai la ni Meri, wela ka thaka alaa i la rakena; ma ni Elisabetha kera faafuṉua atha Spirit Abu; 42Ma nia ka ai asi ai la baita, ma ka sorea, Lea iamu i maalutana kini ki, me lea iana do na kai thauwai i la rakemu. 43Ma nifana ade lana si do nei ka fulatooku, na thainana Lord nau ka fula isaku? 44Uria rikia fasi, si maṉa na liṉana aratai la oe e fula i aliṉaku, wela ka thaka alaa i rakeku uria nia seethathala. 45Ma lea iana ai ne fitoo; uria na toto do eki kai mamana na kera soree isana too mai atha Lord.
46Ma ni Meri ka sorea,
Maṉoku kai faabaita tha Lord,
47Ma spirit nau e seethathala atha God ne faamaruki nau.
48Uria nia e lio uria thafee to faekwa lana ai ni ra nia:
Uria rikia fasi, too asi maṉa eri ka liu alaa unii wane ni sui bana keki alaṉi nau ana ai ne lea iaku.
49Uria nia ne sukwai e ilia si do baita ki ifaku;
Ma thatane abu.
50Ma tatakomia nia kai to bana fafia toa na kera mau ani nia
Too ata unii wane lae ka fula ata unii wane.
51Nia e fatai nia sukwaia ana abana;
Nia e foatata ana toa na kera fafakao kera asi lio ana ruruuda.
52Nia e sifolaṉai nia toa sukwai ki faisia do ni ono la ana inotoa kera ki,
Me faainotoa toa na kera thafee to faekwa.
53Toa na kera thaofa nia e faaabusuda ana do lea ki;
Ma toa na kera rikii do nia ka arasida keka tona oli bada.
54Nia adomia wane ni ra nia na tha Isirela,
Fasi nia kai onotoona tatakomia nia;
55’Uria lau boo na nia e ṉata isana maka kulu nai nao ki,
Isatha Aberahamo ma kwalafa nia toto si sui.
56Ma ni Meri e to isana sulia fuliṉana ta ulu madami, sui ka oli uri maafera nia.
57Ma si maṉa ni Elisabetha e fula naa fasi nia kai thare; ma nia ka tharea tee kaluwane. 58Ma toa nia ki ma ina lana kera keka roṉoa na tha Lord e faabaita tatakomia nia tale nia; ma keka seethathala bi nia. 59Ma lalae mai e fula ana kwaula fa boṉi, keka fula uria kwaikakali la ana wela eri; ma kera thathamia sa keka alaṉia atha Sakaraiasi, sulia thatana maka nia. 60Ma thainana e luuda, ka sorea, E ai; keka alaṉia atha Jone. 61Ma keka soree isana, E ai ta wane ana ina lamu kera na kera alaṉia ana thata eri. 62Ma kera fafuilala uria maka nia, uria thata na nia thathamia keka alaṉia ania. 63Ma nia ka gania ta rebee do ni kekeda la, me kekeda, ka una eri, Thatana na tha Jone. Ma toa eki sui boo keka kwele. 64Ma fokona ka laa si maṉa eri u boo, ma meana ka alube, ma nia ka ṉata, ka taṉoa tha God. 65Ma mau la ka fula fafia toa eki sui boo na kera to kakalida mai: ma si ṉata eki sui boo keka ṉata bada sulia i la fanua eri sui bana na gwa tolo ki ni iei i Judia. 66Ma toa eki sui boo na kera roṉoa kera alua i ruruuda, keka una eri, Ma wela nei toto kai ufita nania? Ma abana tha Lord e ni bi nia.
67Ma maka nia tha Sakaraiasi keka faafuṉua atha Spirit Abu, ma nia ka ṉata mala porofeta, ka una eri,
68Taṉoa tha Lord God Isirela;
Uria nia e thai sulia toa nia me tae faisida,
69Ma ka falea susukee do ana marukia ifakulua
Ana kwalafa wane ni ra nia tha Defeta;
70’Uria lau boo na nia e ṉata ana fokona porofeta abu nia ki na kera to ita mai asi maṉa na kera boa fanua nei iano;
71Fasi keki faamaruki kulu faisia maalimae kulu ki, ma faisia abana toa eki sui na kera riki kulu ka taa;
72Fasi ka faamamanea tatakomia talea maka kulu nai nao ki,
Ma kai onotoona alaofua abu nia;
73Othi la ne othia isana maka kulu na tha Aberahamo,
74Kai ilia si kula eri ifakulua na kera lau kulu naa faisia abana maalimae kulu ki
Sa kuki ra naa ifana, kusi mau,
75Ana abu la ma kokoto la inaofana sulia fa boṉi na kuki to ki.
76Iu ma ni oe, wela nei, toto keke alaṉi oe ana porofeta ni Nia ne Inoto ka tatha:
Uria na toto oki lae inaona maana tha Lord uria beta lana tala nia ki ka kwaimaakwali;
77Fasi ka falea thaitoomana lana marukia ifana toa nia ki
Ana doanita la ana abula taa la kera ki,
78Sulia tatakomia i ruruuna God kulu,
Na thato ne raraṉia fanue too mai ia e thai suli kulu sulia,
79Fasi ka laafia toa na keka ono i la maerodo ma nuna maea;
Kai alua aaekulua kai lae sulia tala ana enenoa.
80Ma wela eri ka baita alaa, ma spirit nia ka sukwai alaa, ma nia ka to i la fanua kwasi lalae ka fula afa boṉi na kera fatai nia isana Isirela.
Currently Selected:
Luke 1: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951