Jone 5
5
1Buriana si do eki tee fafaṉa Ju ki; ma tha Jesus ka tae uri Jerusalema.
2Sui tee gwa osi e ni Jerusalema karafia maana olofolo sifi, ma thatana kafo eri i ṉata lana Hibaru ki na Betheseda, ma lima ooba kera to kakalia. [ 3Ma toa oro kera teo mai la ooba eki, ana toa na kera matai, toa maade rodo, toa aaeda ka katu, toa afemae e thauṉida, keka maasia si maṉa kafo sa kai isuisu. 4Uria tee angel kai sisifo mai ana tee si mana uri la gwa osi eri, kai igiigia kafo: sui ni tei bana na kai sifo totonao uri la kafo eri iburiana na kera igiigia, keka faamarukia faisia atona bana ta mataia ne thauṉi uia.] 5Ma tee nonii wane e ni iei, ne to bana ana feda la sulia ulu tafulu fa ṉali ma kwalu fa ṉali. 6Si maṉa na tha Jesus e riki nia ne teo, ma ka thaitoomana na nia e to una eri ka tau naa, ka soree isana O thathamia keki faamaruki oe? 7Wane eri ne matai e luua, ka una eri, Arai ena ae, e ai akua ta wane, fasi si maṉa na kafo kai iṉiṉo, nia kai alu nau i la gwa osi nei: sa kwai lae mena kau, ma ta wane ka sifo ana totonao. 8Tha Jesus ka soree isana, Tatae, ṉalia thamataia oe, oki lae. 9Ma si maṉa eri u boo wane eri e maruki naa, ka ṉalia thamataia nia, ka lae.
Ma fa boṉi eri fa boṉi mamaloa. 10Mania Ju ki keka soree isana wane eri na kera faamaruki nia, Fa boṉi mamaloa nania, me ai kesi alamatania oki ṉalia thamataia oe. 11Nia luuda, ka una eri, Wane ne faamaruki nau, nia lau boo e soree isaku, Ṉalia thamataia oe, oki lae. 12Sui keki soetoona, Ma ni tei na ṉa wane eri ne soree isamu, Ṉalia, oki lae? 13Ma wane na kera faamaruki nia ka dora lau bana ani nia: uria na tha Jesus e lae thaufuni, uria na malului wane kera ni kula eri. 14Sui iburi tha Jesus ka fulatoona i la biu baita tha God, ka soree isana, Rikia fasi, o maruki naa: osi abula taa lau, ada ta do ne taa ka tatha ana do ba ka thauṉi oe. 15Wane eri e lae nana, ka faaroṉoa Ju ki na tha Jesus wane ne faamaruki nia. 16Mania Ju ki keka ilamatai nia tha Jesus, keki rofe uria si ade la na keki ilia fasi keki thauṉi nia, sulaania nia e ilia do eki ana boṉi mamaloa. 17Tha Jesus e luuda, ka una eri, Maka nau kai ra ka fula asi maṉa eri, ma ni nau ku ra. 18Mania sulia si kula eri Ju ki keka bii rofe ka faamau uria si ade la na keki ilia fasi keki thauṉi nia, uria bana ne faawaluda fa boṉi mamaloa e ai, uria lau boo na nia e alaṉia tha God na Maka nia tee nia, kai ili nia ka totoo bia tha God.
19Mania tha Jesus e luuda, ka soree isada,
Mamana, mamana, ku soree isamulua, Na Kaluwane e ai si sukwai ana ili lana ta si do i talaana, talitoona bana si do nia rikia ṉa Maka kai ilia: uria na atona bana si do ni nia ka ilia, si do eki ṉa Kaluwane kai ili una eri ania lau boo. 20Uria na ṉa Maka e liothau ana ṉa Kaluwane, ma ka fatai nia si do ki sui bana isana na nia talani nia kai ilia: ma si ra ki ne baita ka tatha ana do eki toto kai fatai nia isana, fasi muki kwele. 21Uria talafana ṉa Maka ka tataea toa mae ki ma ka faamarukida, alafana lau boo ṉa Kaluwane ka faamarukia ni tei bana ne thathamia. 22Uria ṉa Maka e ai si ṉata mala wane ni kotu sulia ta wane, e falea naa si kula eri i abana ṉa Kaluwane, na nia Wane ni Kotu asi do ki sui bana: 23Fasi toa ni sui bana keki fare baita ana ṉa Kaluwane, talafana lau boo na keki fare baita ana ṉa Maka. Wane ne ai si fare baita ana ṉa Kaluwane, e ai si fare baita ana ṉa Maka ne arasi nia mai. 24Mamana, mamana, ku soree isamulua, Wane na kai roṉoa bae laku, ma kai fitoona nia ne arasi nau mai, ana marukia tatha, ma Wane ni Kotu toto ka ai si ṉata suli nia, me tatha naa faisia maea uria marukia. 25Mamana, mamana, ku soree isamulua, Si maṉa eri karaṉi na mai, ma ka fula naa, na toto toa mae ki keki roṉoa ṉata lana Kaluwane tha God; ma toa na keki roṉoa keki maruki. 26Sulaania talafana ṉa Maka marukia ni ani nia i talaana, alafana lau boo nia e falea si kula eri ana ṉa Kaluwane lau boo na marukia kai ni ani nia: 27Ma nia e alu nia kai gwauwai fasi nia Wane ni Kotu lau boo, uria ni nia Kaluwane imole. 28Musi kwekwele asi do eri: uria na si kadee maṉa eri karaṉi na mai, na toto toa ni sui na kera ni la kwaiṉeia ki keki roṉoa ṉata lana, 29Ma keki kotho i maa; toa na kera ilia si do ne lea, keki tatae ana marukia: ma toa na kera ilia si do ne taa, keki tatae ana kotu la.
30Talani nau ku dora ana ili lana ta si do: nau, ṉa Wane ni Kotu, ku ṉata sulia si do nau ku roṉoa: ma ṉata laku e kokoto; uria ni nau kwasi rofea si do ku thathamia i talaaku, kwai rofea si do ni nia ne arasi nau mai e thathamia. 31Mada sa nau kwa faamamanea si do nau ku thaitoomana suli nau i talaaku, do nau ku sorea e ai si mamana. 32Nia lau nana kai faamamanea si do ne thaitoomana suli nau; ma nau ku thaitoomana si do nia faamamanea suli nau e mamana. 33Kamulua mulu kwaiarasi isatha Jone, ma nia e sorea naa si do ne thaitoomana sulia mamana la eri. 34Ma faamamane la na kera faamamanea suli nau si do ana imole e ai: una ena mena nau ku sorea si do nei ki fasi muki maruki. 35Wane eri na ṉa laeta ne tharu ma ka laa: ma ni kamulua mulu thathamia muki seethathala ta kasi maṉa faekwa ana laa lana. 36Ma faamamane la na kera faamamane nau ania asi do kera thaitoomana, e baita ka tatha ana faamamane la tha Jone: uria na si ra ki na ṉa Maka e falea ifaku sa kwai ilia, si ra eki boo na nau kwai ilia bakua, ka faamamane nau, na ṉa Maka e arasi nau mai. 37Ma ṉa Maka ne arasi nau mai, ni nia e faamamanea si do ne thaitoomana suli nau. Kamulua e ai musi roṉoa liṉana ṉata lana ta si maṉa, ma musi rikia seena. 38Ma bae lana e ai si to ani kamulua: uria na wane ne arasia mai, ni kamulua musi fitoona. 39Muki rofe i la kekeda la abu eki, uria na manatamulua soso na marukia tatha ni iei ifamulua; ma si do eki boo na kai faamamanea suli nau; 40Ma mulu lalakwee lae mai isaku, fasi muki maruki. 41Nau kwasi rofea sa imole ki keki faainoto nau. 42Sui nau ku thaitoomamulua, na liothau la uria tha God e ai si ni ani kamulua. 43Ni nau ku fula ana thatana Maka nau, ma kamulua musi thathagoni nau mai: mada sa ta wane lau kai fula ana thatana i talaana, wane na muki thathagoni nia neri. 44Muki fitoo ufita, toa na muki faainoto kamulua kwailiu, ma inotoa ne ita atha God tee nia e ai musi rofea? 45Ada manatamulua soso na nau kwai alaṉi kamulua ana ta si do isana ṉa Maka: tee wane e to bana na kai alaṉi kamulua, tha Mosesi, wane na mulu lio uri nia. 46Sulaania mada sa mulu fitoona tha Mosesi, muka fitooku lau boo; uria ne kekeda suli nau. 47Sui mada sa musi fitoona kekeda la nia ki, muka fitoona ufita bae laku?
Currently Selected:
Jone 5: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951