Jone 10
10
1Mamana, mamana, ku soree isamulua, Wane ne ai si kotho mai ana maethaka i la thakali sifi ki, ka raa mai ata kula eeta, nia wane ana bili la ma wane na kai laulau. 2Ma nia na ka kotho mai ana maethaka, nia wane kai fono toi kalia sifi eki. 3Nia wane ni ifini lana maethaka kai ifi uri nia; ma sifi eki keki roṉoa liṉana ṉata lana: ma nia ’ai thatana sifi nia ki, ka toleda kau. 4Ma si maṉa na nia e arasia do nia ki ni sui i maa, nia tatha inaofada, ma sifi eki keki lae iburiana: uria na kera thaitoomana liṉana ṉata lana. 5Ma ta wane eeta sa keka lae iburiana e ai, keki thaka faisi nia: uria na kesi thaitoomana liṉana ṉata lana toa eeta ki. 6Si tarifula eri tha Jesus e uunu sulia isada: sui kera dora ana maalutana si do ne uunu sulidaki isada.
7Mania tha Jesus e soree lau isada, Mamana, mamana, ku soree isamulua, Nau ṉa maethaka ana sifi ki. 8Toa ni sui na kera lae mai inao kera toa ana bili la ma toa na keki laulau: sui sifi eki e ai kesi roṉoa ṉata lada. 9Nau na ṉa maethaka: mada sa ta wane kai kotho mai ani nau, keki faamaruki nia, ma kai kotho mai ma kai kotho kau, kai fulatoona faṉa nia. 10Wane ana bili la e ai si lae mai uria ta do lau, talitoona fasi kai bili, ma kai kwaithauṉi, ma kai labatania: ni nau ku lae mai fasi keki maruki, ma keki sukwai. 11Ni nau ṉa wane ade lea na ku fono toi kalia sifi ki: wane ade lea eri ka falea maṉona uria sifi eki. 12Wane na kera usi nia, wane ni fono toi la kalia sifi e ai neri, wane ṉa sifi nia ki e ai, e rikia koito kwasi kai lae mai, kai akwasia sifi eki, ma ka thaka nana, ma koito kwasi eri ka lauda, ka ilia na keka thaka kwailiu: 13Nia kai thaka uria nia ṉa wane na keki usia bada, ma ka ai si oga nia uria sifi eki. 14Ni nau ṉa wane ade lea na ku fono toi kalia sifi ki; ma nau ku thaitoomana si do nau ki, ma si do nau ki kera thaitoomaku, 15Talafana lau boo ṉa Maka ka thaitoomaku, ma ni nau ku thaitoomana ṉa Maka; ma nau ku falea maṉoku uria sifi eki. 16Ma nau akua tei sifi lau, na kesi to i la thakali nei: kera lau boo kwai tolea mai e ai si ei boo, ma keki roṉoa liṉana ṉata laku; ma toto keki ofu ana tee aini sifi, ma tee wane ni fono toi la kalida. 17Na Maka kai liothau iaku uria si kula eri, uria na ku falea maṉoku, fasi toto kwai ṉalia lau bakua. 18E ai ta imole si ṉalia faisi nau, nau talani nau ku falea. Sukwaia ni isaku fasi kwa falea, bia fasi kwa ṉalia lau. Si do na Maka nau e faaroṉo nau mania nai nia.
19Ma Ju ki thafali lana kera to lau ana ro si lio sulia si baea eki. 20Ma toa oro iada kera sorea, Spirit taa ni ani nia, ma nia oewanea; uria ta na muki roṉoa ṉata lana? 21Tei toa lau kera sorea, Si ṉata eki ṉata lana wane spirit taa ni ani nia e ai. Spirit taa e thaitoomana ifini lana maana toa maade boko?
22Ma si maṉa eri fafaṉa ana faaabu lana biu baita tha God i Jerusalema: si maṉa ana unii gwagwaria; 23Ma tha Jesus kai liliu i la biu baita eri la taofa tha Solomona. 24Mania Ju ki kera lae mai kakali nia, keka soree isana, Ta fita fa boṉi oki adea manatamilia kai rurua? Mado so Christ ba, oki faaroṉo fatai ani kamilia. 25Tha Jesus ka luuda, ka una eri, Ku faaroṉo kamulua naa, sui musi fitoo: ra ba ki na nau ku ilia ana thatana Maka nau, keka faamamane nau. 26Sui musi fitoo, uria na ni kamulua do ana sifi nau ki e ai; si do nau ku soree isamulua na ba neri. 27Sifi nau ki kera roṉoa liṉana ṉata laku, ma nau ku thaitoomada, ma kere lae iburiaku: 28Ma nau ku falea marukia tatha ifada; ma toto kesi sui, me ai ta imole si lauda faisia abaku. 29Maka nau, ne faleda iaku, e sukwai ka tatha asi do ki sui bana; me ai ta imole si talaana lau lada faisia abana Maka nau. 30Ni nau ma ṉa Maka, kamarea tee Do boo. 31Mania Ju ki kera ra lau uria fau ki fasi keki ufauna. 32Tha Jesus e luuda, ka una eri, Ra oro lea ki ne ita ana Maka nau ku fatai nia naa isamulua; nifenia si ra ana ra eki muki ufauku fafia? 33Ju ki kera luua, keka una eri, Misi ufaumu uria ta ra lea e ai, uria si ṉata ana fare toliṉi lana tha God; ma uria ni oe, no imole ni bana, oko alaṉi oe ana God. 34Tha Jesus e luuda, ka una eri, Ta na sa kera keda ana lo kamulua na ba, Nau ku sorea, Kamulua god ki, mado? 35Mada sa nia alaṉida ana god ki, toa na bae lana tha God e lae mai isada (ma kekeda la abu eri kesi ade faisia), 36Muki sorea suli nia, na ṉa Maka e faaabua ma ka arasi nia mai la fanua nei iano, O ṉata ana fare toliṉi lana tha God; uria na ku sorea, Nau Kaluwane tha God? 37Mada se ai kwasi ilia si ra Maka nau, musi fitooku. 38Sui mada sa ku ilia boo, musi fitooku mena, muki fitoona si ra eki: fasi muki thaitoomana ma muki faamamanea na ṉa Maka ni ani nau, ma ni nau ku ni ani nia. 39Mania kera rofe lau uria rau lana: ma nia e lae nana faisia abada.
40Me tatha lau uri bali laba i Jodana asi kula na tha Jone e babataesi iei totonao: ma ka to i kula eri. 41Ma toa oro kera lae mai isana; ma keka sorea, Tha Jone molo e ai si ilia bana bala ta si do: sui si do ki sui bana na tha Jone e sorea sulia wane nei e mamana. 42Ma toa oro kera fitoona i kula eri.
Currently Selected:
Jone 10: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951