GENESIS 6
6
1Ma lalae mai, si maṉa na imole ki keka thafalii oro alaa faamau i maana fanua ne i iano, ma keka tharea wela thari kera ki, 2Kaluwane tha God ki keka rikia thari imole ki riki lade lea; ma keka tole kini ana thari eki sui bana na kera filida. 3Ma tha Jihova ka una eri, Spirit nau sa kai susuu ṉado fasi sii nia ka tatha ana imole, e a’i, sulaani nia do asi mariko ni bana: una ena mena, fa boṉi nia ki tee taleṉee fa ṉali ma ro tafulu fa ṉali. 4Wane tekwa faamau ki na keka baita faamau kera to bada i fanua ne i iano afa boṉi eki; ma iburi mai lau boo, si maṉa na kaluwane tha God ki kera ofu bia thari imole ki, ma kini eki ka thare wela ifada, wela eki na ṉa wane rigita ki na kera toto u mai inao, na wane thatade talo ki. 5Ma tha God e rikia abula taa lana imole ki ka baita i la fanua ne i iano, ma lioda ma si do ki sui bana na kera manatatoona i ruruuda talitoona si do taa ki sulia boṉi. 6Sui manatana tha Jihova ka tala faisia thauwaia eri ne thauwai nia ana imole i fanua ne i iano, ma i la ruruuna ka taa faamau sulia. 7Ma tha Jihova ka una eri, Nau kwai faafunuia imole eki na nau ku thauwanida faisia maana fanua na i iano; imole ki, ma do maruki i masuu ki mai, ma do na keka aṉo, ma thaaro eki i mamaṉaa; uria na manataku e tala naa faisia thauwaia eri na nau ku thauwanida mania. 8Ma tha Noa ka fulatoona kwaiofei la i maana tha Jihova.
9Si ade la ne ita mai atha Noa nai nia: tha Noa ṉa wane kokoto, ma si ade la ne ita mai ani nia si ade la oolo ki: tha Noa ka lae ofu bia tha God. 10Ma tha Noa ka tharea ulu kaluwane nia ki, tha Semo, ma tha Hamu, ma tha Jefeta.
11Ma fanua ne i iano e dura bonaa inaofatha God, ma fanua ne i iano ka fuṉu ana kwaisuuwai la ki. 12Ma tha God ka lio fafia fanua ne i iano, ma rikia fasi, e dura bonaa; uria na do maruki eki sui bana kera adea tala kera ki e dura naa fafia fanua ne i iano.
13Ma tha God ka soree isatha Noa, Susui lana do maruki eki sui bana ni inaofaku; uria na fanua na i iano ka fuṉu ana kwaisuuwai lada; ma rikia fasi, nau kwai faafunuida faisia fanua na i iano. 14Thauwai nia ta aka ana ’ai gofa ifamu; oko thauwai nia tei kadee kula i la aka eri, ma oki mokia i lala ma i thara lau boo ana thaia. 15Ma toto o thauwai nia naa, to lana nai nia: tekwa lana aka eri ulu taleṉee kadee aba, ma rerebaa lana lima tafulu kadee aba, ma tae lana ulu tafulu kadee aba. 16Oko thauwai nia sufua ifana aka eri, ana tee kadee aba oko alua kai sui i duuna; ma maana olofolo aka eri oki alua i ninimana; oki thauwai nia kadee faka iano, ma ruana kadee faka fafia, ma ula kadee faka na kai to susui mai iaa. 17Ma rikia fasi, nau, ni nau i talaaku, kwai falea mai kafo ki na kai olo fafia fanua na i iano, fasi kwai faafunuia do eki sui bana na si maṉo ni marukia ni ruruuda, keki sui faisia si kula na ifara thalo lo; ma do eki sui bana na ni fanua na i iano keki mae. 18Ma ni oe, nau kwai kania alaofua nau bi oe; ma oki kotho la aka, ni oe, ma kaluwane oe ki, ma kwaimu, ma ulu kini fuṉao oe ki bi oe. 19Ma ana do maruki eki sui bana seede eeta kwailiu, oki talaia mai too ro do iada uri la aka, fasi keki maruki ofu bi oe; do wane neri ma do kini. 20Ma ana thaaro eki na kera eeta kwailiu, ma ana aini katele na kera eeta kwailiu, ma ana do eki sui bana na kera aṉo fafia fanua na i iano na kera eeta kwailiu, too ro do iada keki lae mai isamu fasi oki faamarukida. 21Ma oki ṉalia mai si do ni ania ki sui bana ifamu, oki ofua ifamu; faṉa oe neri, ma faṉa fani kera sui boo. 22Ma ade lana tha Noa ka una eri boo; si do ki sui bana na tha God e ṉata fifi isana sulia, si ade la nia e ade sulidaki neri.
Currently Selected:
GENESIS 6: MLU1949
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1949, 1951