Lukas 24
24
Isus Gdog yay Gleleg
(Mat. 28:1-10; Mar. 16:1-8; Uan 20:1-10)
1Ay ginas linggu sbalabag sirut, ka fag ngay mangena nananlag sas faglibingan, ay nauba at ngay nafamasadan fag ngay famabebanglu. 2Ay nu ndasug wan, manlag di at fandingding sakbawan fag batu mafulidan wan. 3Ay dewa nasakbo, we nalag tam Fun Isus at bilug. 4Ay gina gamatangan, duwak ama nsure way sigad ay inlindug sit day tigyangan. 5Ay ka fag ngay mangena katvngvdan kalimu naarungan way. Ay ka fag duwama nalong te, “Taw ro ay fagsarapun tagleleg swa matean? 6Wa ste Isus, gdog yay gleleg. Go wam namatang at longan ayu gina sis Galiliya? 7Ginanya nafoyung te, e tumaban ban Taw at Baguwama sa sangay tagasalanan, ay tumuktuk anya sas salibagan kayu, ay sis fatuluk menit kanya gdog yay ban gleleg.” 8Ay rodi ka fag ngay mangena namatang Isus at longan. 9Ay ka fag ngay mangena noli wan siginans faglibingan. Ay nafoyung fagayu at nalag sas Isus at Nasugu fag Labi Sadi, ay anggan sa at ngay ufud. 10At tagfoyung at ngayan, Maria sik taw Magdala, ay Uwana, ay Maria, kanya Santiagu tina, ay anggan tiba yak mangena. 11Ay ka fag Labi Sadi gamatangan te, “Ka fag ngay mangena at longan kata way yud e masuwad.” Ay kanya wa gafanud. 12Ay roro Pedru nlindug, ay mafali nu nalo sas faglibingan. Ay nu ndasug wa sanya, kanya naarungan gfatangun sanya sad faglibingan, ay at nalag at fansifig way fag ngay falefe at masine. Ay rodi kanya noli wan, ay gamatangan dawdaw te, “Taw fakatanyaun?”
Isus Insure Sat Duwak Tagadal sa sangaba Dalan
(Mar. 16:12-13)
13Ginanya fag menit, duwak tagadal nalo wan sas fulan Emaus. At kadugayan nu glo siginans Erusalem manga tuluk uras. 14Ay ka fag duwama gsulitanan sa ebi ataw at ngay kin-gurungan. 15Ay gina gsulitanan, Isus inkakbang ay gfaygaluwan sa sangaba dalan. 16Ay ka fag duwama dewa nalag Isus, wa natoglag te, kanya wa mangaro Isus. 17Ay Isus ginto te, “Nataw ay sulitanan gina am glo?” Ay ka fag duwama ntuwas yay sirut nu glo ay mabaluwanan. 18Ay at sadi, at ngayan Kleupas, nabalus Isus te, “Fagayu taglo sas Erusalem, nu nda o way sesadi at yud nasaful at ngay kin-gurungan ebi daw fag ngay menit.” 19Ay Isus ginto te, “Nataw sangay at kin-gurungan?” Ay ka fag duwama nabalus Isus te, “Sa baliwas Isus, sik taw Nasaret. Kanya sik madaragang fag taglong. Tam Diyus nu glag at fagbulun ay anggan at longan madaragang dawdaw. Katanya yangay at ngay taw nu glag at fagbulun. 20Ay tam ngay taganyun daul ay tam ngay tagmagurang nataban Isus sa tiba, laman gfate anya. Ay natuktuk wa anya sas salibagan kayu. 21Ay em fagsegun, kanya wan tagfalangfe taw Israel. Ay katatuy yangay, katsi at fatulu wak menit at kinlangfe. 22Ay dewa katanya, aro em ufud fag ngay mangena nafalipsikanan emi, anway ka fag ngay mangena sbalabag sirut nananlag sas faglibingan. 23Ay we nalag at bilug. Ay noli wan. Ay nafoyung sa emi te, ‘E nalag ami Diyus at tagfabarita ay nalong emi te, Isus gleleg wan katsi.’ 24Ay anggan tiba em ufud nananlag yangay sas faglibingan. Ay at nalag kata yangay aro fag ngay mangena at longan, ay kanya we nalag Isus.”
25Ay Isus nalong sa ka fag duwama te, “E, am way at yud mamatanganan fag ngay taw! Ay am way at marananan nu gafanud fagayu Diyus at ngay taglong at longan. 26Katanya wa ngaro fiya, Diyus at nafili fag Fun dumalan wa fiya katanya fagayu, bagu Diyus nanfauseganan anya.” 27Ay rodi Isus gfasigad nafoyung sas duwama at marirukan sis Diyus at longan sa baliwa anya, siginans Muisis at rirukan, ay anggan Diyus at ngay taglong at ngay rirukan.
28Ay nu makbang wa sat fakadasugan ro fag fulan, Isus galangfeun yama sanya fag fulan. 29Ay ka fag duwama gfatawad yay te, “Lag yap glo, iste yay tam, anway gafalyuun wan at menit ay gakayabiun wan.” Nu katanya, Isus naalo yay ka fag duwama. 30Ay gina Isus malunggung gfasfuwan duwama nu gfangon, Isus nabul sik tinafay ay naseg sas Diyus. Ay naramyuk ay nafon sas duwama. 31Ay rodi tv ka fag duwama nu nalag, natoglag wa te, kanya wa mangaro Isus. Ay rodi tv Isus nalyam way sigad gina ka fag duwama glinggat anya. 32Ay ka fag duwama gsulitanan te, “Ta amatanganan kaumsig wan, kaduge kanya gfasulitanan anta sa sangaba dalan. Ay manga kaduge gfoyung sa anta Diyus at longan at masuwad. Go kin?”
33Ay rodi ka fag duwama nlindug ay infoli wa sas Erusalem. Ay manlag di Isus at Nasugu fag Labi Sadi ay anggan tibak tagadal maful 34ay glong te, “At matuyan tam Fun gdog yay gleleg! Insure wa sas Simun.” 35Ay ka fag duwama nafoyung at kin-gurungan gina sa sangaba dalan, ay natoglag wa Isus kaduge kanya naramyuk sik tinafay.
Isus Insure Sat ngay Tagadal
(Mat. 28:16-20; Mar. 16:14-18; Uan 20:19-23; Fagbulun 1:6-8)
36Ay gina ka fag duwama gelongan, rodi tv Isus insure wa daw ay inlindug sit buknga taw ay glong te, “Manabayani tuwa.” 37Ay ngay taw sanya nlipsik ay inlimu, anway nu gfasad, sik siraw way. 38Ay Isus nalong te, “Taw ro ay fakalimuun? Ay taw ro ay fagaduwanun sa ay amatanganan? 39Linggati wa nu kin, ku daluwap ay ku darafa. Aw wan tuy. Tedi nu kin angku, laman sumaful am te, kwa sik siraw, anway sik siraw we faknul ay we butul kata angku. 40Ay nu nalong wa katanya, Isus nafalag wa at daluwap ay at darafa sa at tiba.” 41Ay ka fag ngay taw katvngvdan guseganan ay gadulawan wa bangan gafanud at nalag. Ay ginanya Isus ginto te, “Go e fakonun am.” 42Ay at tiba nafon anya sik ramyuk uyang masugbaan. 43Ay Isus nabul ay naon si tiba akbang. 44Ay Isus nalong te, “Gina aw gufud ayu ebi, katatuy ku longan sa ayu te, umgurungan wa fiya fagayu Muisis at longan sa angku baliwa, ay anggan Diyus at ngay taglong at rirukan, ay anggan sas Danyu fag fafil.” 45Ay Isus nafoyung sa at nga tagadal laman tumogdungug Diyus at longan at masuwad. 46Isus glong te, “Marirukan sis Diyus at longan te, aw, Diyus at nafili fag Fun, e fauri ban angku ay e fate ban angku, ay roro sis fatuluk menit gdog akyay ban gleleg. 47Ay e gfoyung ban sas fagayu taw, gfasigad siginans Erusalem ay anggan sas fagdaul daga, laman ngay taw gubun at ngay asalanan. Sik taw nu naubun tuwa at ngay asalanan, Diyus gfalyam wan. 48Ay am wan at nalag fagayu at kin-gurungan. 49Ay katsi dungugani ku longan. Nansugu ban aw ku Mama at fatuyanan ebi sa ayu. Fanyai wa sas fulan yap ngay indasug sa ayu at fagmadaragangun siginans banwa.”
Isus Kaurug wa sas Banwa
(Mar. 16:19-20; Fagbulun 1:9-11)
50Ay Isus nataban at ngay tagadal sas day fulan Betaniya. Ay sanya nafaabat at take ay nadarangin sat ngay tagadal. 51Ay gina Isus gdarangin sat ngay tagadal, kasaman wa aba sirut sat iba, ay kaurug wa sas banwa. 52Ay at ngay tagadal noli wa sas Erusalem ay guseganan dawdaw, 53ay si tuwa gugat Diyus bale ay gseg sas Diyus.
Currently Selected:
Lukas 24: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines