Uan 7
7
Isus At ngay Fadugsay wa Gafanud Anya
1Ay sanya ginan, Isus nalo sas talun Galiliya. Ay kanya wa kaumsig glo sas talun Udiya, anway taw Udyu at ngay tagmagurang kaumsig wayay gananfateun anya. 2Ay ginanya makbang wan taw Udyu at fagmafulun sa baliwa nu Kawat Bale Sirut. 3Ay Isus at ngay fadugsay glong sa anya te, “Loi wan ste ginan, sai was talun Udiya, laman am ngay tagadal sanya lumag wa fiya am ngay fagbulun at madulawan. 4Teway sik taw wa gsuksuk at fagbulun nu kaumsig wa te, fagayu taw sumaful anya. Ay nu gfagbulun wa ngap o madulawan, falagi am fagbulun sas fagayu taw ste swa daga!” 5(Fakatanyaun, teway anggan Isus at ngay fadugsay wa gafanud sa anya.) 6Ay Isus nabalus at ngay fadugsay te, “Ya ndasug ku lungud nu gfagbulun aw, ay si ayu long nus nga ginain wa fag lungud masine way am gfagbulun. 7Ay fagayu taw ste swa daga wa kadotama ayu, sa way angku at fakadotamaun, anway gfoyung aw te, mauri way at ngay fagbulun. 8Am loi wan, ay adasugi sanya fag fagmafulun. Ay aw, dakya sanya, teway bunya katsi ku lungud.” 9Nu ntabu wan Isus at longan sat ngay fadugsay, Isus sanya yay sis Galiliya.
Isus Nalo wa sas Erusalem
10Isus at ngay fadugsay nu nalo wan sanya fag fagmafulun, kanya sigon nalo yangay ay roro masuksuwanan way. 11Ay taw Udyu at ngay tagmagurang gsarap Isus, ay glong te, “Dada wa manga ka fag taw?” 12Ay ngay taw sanya gibugan ayuwayu. Tiba glong te, “Kanya fag taw masine tuwa.” Ay tiba glong te, “Yaya, kanya gfanlamangan way at longan sa sangay taw.” 13Ay dewa katanya, ka fag ngay taw wa gfadaul nu gelongan, anway kalimu taw Udyu at ngay tagmagurang.
14Ay nu gwabilug wa at fagmafulun Isus nasakbo sas Diyus bale ay kamoyung sa sangay taw sanya. 15Ay taw Udyu at ngay tagmagurang gadulawan te, “Sinu at nafoyung ka fag taw at fagsafulun, dewa yud batang e naadal?” 16Ay Isus nalong sanya fag ngay taw te, “Ku foyungan bunwa ku longan mandi, at nasugu tuwa angku at ke longan. 17Nus nga sinu fag taw nu kaumsig tuwa gfaning Diyus at fakaumsigun, kanya fag taw at sumaful te, go siginans Diyus ku longan ay ate go siginan way ku longan mandi. 18Sik taw at foyungan nut siginan way at longan mandi, kanya kaumsig way tiba nu gseg anya. Ay roro ngap nus nga sinu fag taw at foyungan nu gfauseganan tuwa at nasugu anya, kanya fag taw at longan matuyan wa fiya ay at ugali di e mauri. 19Go sangay Muisis wa nafoyung ayu Diyus at Suguwan? Ay dewa katanya, nus di sadi wam nafaning at longan. Taw ro ay fagafateun angku?”
20Ay ka fag ngay taw gbalus te, “E mafurat o fag falad! Sinu takaumsig gafateun emu?” 21Ay Isus nalong te, “Sadi way ebi ku nafagbulun at madulawan fag fagbulun gina sis Fakamatoun fag Menit. Ay fagayu am nadulawan am. 22Muisis at longan nafoyung wayu sa baliwa nu gtuli. (Ay roro bunya Muisis at longan at nafasigad ka fag ugali, kanya siginan yay ay aguyangan.) Ay gfaning wam ka fag ugali dewa sis Fakamatoun fag Menit. 23Ay katsi, katanya wan ay fagbulun sa ay ngenge, dewa Fakamatoun fag Menit gtuli wam laman di am kamabo Muisis at longan. Taw ro ay fakadotamaun angku te, nafafiya aw sik taw sis Fakamatoun fag Menit? 24Lag am gfanmafali gelongan yap ngay am namatangan ay nasaful at matuyan. Nu gelongan am matuyani tuwa.”
Go Isus Tam Fun Diyus at Nafili?
25Ay tibak taw Erusalem nalong te, “Go kanya wa fag taw tam ngay tagmagurang at fagafateun? Go kin? 26Linggati anya, nu kamoyung wa gsuksuwanan, ay tam ngay tagmagurang we longan sa anya. Labon tam ngay tagmagurang gsaful wa te, kanya wan Diyus at nafili fag Fun. 27Roro ngap, nasaful watam te, sanya ginan ka fag taw. Ay Diyus at nafili fag Fun we taw gsaful te, sanya ginan.”
28Ay Isus gbiya nu gelongan sis Diyus bale te, “Matuyan nasaful wam fiya te, sinu aw ay sanya ginan aw. Dakwa nastiye nu ku fakaumsigun way mandi. At matuyan fag Diyus at nasugu angku. Ay yam nasaful anya. 29Ay aw, gtoglag aktuwa anya, anway aw, sanya ginan kwan. Ay kanya at nasugu angku.” 30Ay taw Udyu at ngay tagmagurang gagamatun wa Isus. Ay roro ngap wa nagamat anya anway at menit ya ndasug. 31Ay dewa katanya, ngayuk taw gafanud sas Isus ay glong te, “Kanya wa fiya tam fagfanyaun fag fun. Madyay we taw mafafagbulun at madulawan iglabi at ngay fagbulun.”
32Ay ngay taw Parisiyu nadungug ngay taw nu gibugan sas Isus baliwa, nu katanya, ka fag ngay taw Parisiyu ay ngay taganyun daul nasugu tagulit Diyus bale fag ngay sundalu laman nan-gamat Isus. 33Ay Isus nalong te, “Wa ban glugo nu gfaygaluwan aw ayu. Ay bandi, guli kwa ban sat nasugu angku. 34Sumarap ban am angku, ay wa ban am e nalag. Ay nut sa ban ku fakadasugan, wa ban am madasug.”
35Ay taw Udyu at ngay tagmagurang gfasulitanan sa tiba te, “Dada unu ro, tam fagyudun ban lumag anya? Go kanya nanlag sa sangay taw Udyu at kinrapyag sa sangay taw Gresiya laman nanfoyung? 36Taw manga at masuwad Isus at fagnalongun te, ‘Sumarap ban am angku, ay wa ban am e nalag. Ay nut sa ban ku fakadasugan, wa ban am madasug’?”
Isus Nafafaskudanan Anya, sik Mamam Tagfon Leleg
37At fagmafulun nu anwa at fakatabuwan, taglabi nu mafanud fag menit. Ginanya fag menit Isus malindug ay gbiya nu gelongan te, “Nus nga sinu takadanum, akbangi sa angku ay inumi. 38Marirukan sis Diyus at longan te, nus nga sinu at tagafanud sa angku, siginan at amatanganan e kata sik mamam tagfon leleg.” 39Isus at longan at masuwad te, at Masine fag Falad kadasug ban sa sangay tagafanud. Kaduge Isus ste at Masine fag Falad ya kadasug sa sangay tagafanud, anway Isus ya noli sas banwa.
Wa Masadi ngay Taw at Amatanganan
40Ngayuk taw nadungug Isus at longan, ay tiba nalong te, “Tuy wa fiya fag taw tam fagfanyaun fag taglong!” 41Ay tiba nalong te, “We tiba kanya wa fiya Diyus at nafili fag Fun!” Ay tiba nalong te, “Diyus at nafili fag Fun wa siginans Galiliya. 42Marirukan sis Diyus at longan te, Diyus at nafili fag Fun siginan tuwa ban fun Dabid at kadagdagan, ay umsalug ban sas fun Dabid at fulan, sas Betleem.” 43Ay at ngay taw wa kata at sadi at amatanganan sas Isus baliwa. 44Ay tiba dewa ganan-gamatun Isus, wa mafagamat.
Taw Udyu at ngay Tagmagurang wa Gafanud
45Aro fag ngay tagulit Diyus bale fag ngay sundalu infoli sa sangay fun taganyun ay sa sangay taw Parisiyu. Ay ka fag ngay fun taganyun ay taw Parisiyu ginto te, “Taw ro ay fagyudun nataban Isus ste?” 46Ay at ngay tagulit nabalus te, “We taw takatvngvd anya nu kamoyung.” 47Ay ka fag ngay taw Parisiyu nalong te, “Nu katanya, anggan am nalukan wam ka fag taw? 48Ay go taw Udyu at ngay tagmagurang ay anggan taw Parisiyu tagafanud sa anya? Go yaya? 49At tagafanud sa anya kanya way at yud nasaful Diyus at Suguwan, Diyus at fakalimataun. Go kin?” 50At sadi tagsanya Nikudemu, ebi at nananlag Isus. Ay kanya nalong sa tibama te, 51“Kamabo way tam Diyus at Suguwan nu gfauri way tam sik taw, yap ngay tam fiya fiya nadungug sanya ginan fag taw, laman sumaful tam te, go masine ay go mauri at fagbulun.” 52Ay at ibama nalong sas Nikudemu te, “Go anggan o siginan o sfulan Galiliya? Fatapuni yap Diyus at longan laman sumaful yangay o te, wa ban e msalug sik taglong sas Galiliya.” 53Ay fagayu taw noli wan.
Currently Selected:
Uan 7: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines