Uan 4
4
Isus ay sik Taw Samarya fag Mangena
1Taw Parisiyu nadungug tibak taw longan sas Isus baliwa te, “Isus at ngay tagadal ayu yap sis Uan at ngay tagadal, ay anggan at nafasurung.” 2Roro ngap Isus we nasurung nus di sadi, at ngay tagadal wadi at tagsurung. 3Ay Isus nu nadungug katanya, kanya nalo wan siginans Udiya ay infoli wa sas talun Galiliya. 4Isus at dalan sas fulan Samarya laman umdasug sas Galiliya. 5Ay Isus indasug wan sas fulan Sikar, makbang Akub at nafon ebi sa at baguwama Use fag daga. 6Sanya ebi Akub e naawat sik falinoan. Ay Isus malunggung sanyas day bibig falinoan, anway kalufuy at naloan. Ginanya swa bilug menit. 7Ay ginanya ndasug sik mangena, sik taw Samarya, laman nanfanagub. Ay Isus glong sanya fag mangena te, “Fainumi angku.” 8Ginanya at ngay tagadal nalo wa sas fulan laman nanbili at fakonun. 9Ay ka fag mangena nainto sas Isus te, “Taw ro am fagetun angku mamam? Madyay sik taw Udyu way o, ay aw sik taw Samarya, ay sik mangena kway.” (Anway taw Udyu ay taw Samarya at ugali wa gsulitanan ebi ginan.) 10Ay Isus nabalus ka fag mangena te, “Nu nasaful di o te, nataw Diyus at fagnamonun sas taw, ay nu nasaful di o te, sinu taget sa emu mamam, o sigon eti yangay angku, ay mon kyangay emu sik mamam tagfon leleg.” 11Ay ka fag mangena nalong Isus te, “Ku fun, ngabasad way tuy fag falinoan, ay wo e ba fantas. Ay sangay daginan ro am fagbulan sik mamam tagfon leleg? 12Go sangay glabi yay o tam aguyangan Akub, at nafon emi ebi ebi tuy fag falinoan? Iste wan ebi fagayu at ngay sisiyan, ay anggan at ngay balan nu ginum.” 13Ay Isus nabalus te, “Nus nga sinu taginum ste ginan fag mamam, gdog yay ban kadanum. 14Ay nus nga sinu at minum ku fagafonun fag mamam di ban kadanum faggugat. Teway ku fagafonun fag mamam kata tuwa sik bulbug sat basad ay gtunglusanan tuwa kalimus, laman gfon leleg faggugat.” 15Ay ka fag mangena nalong sas Isus te, “Ay kin, ku fun. Nu katanya, foni angku ka fag mamam, laman ban dakdi kadanum, ay dakwa gdog kafoli ste laman managub.” 16Ay Isus nasugu ka fag mangena te, “Ulii wan, ay tabani yap ste am mangama.” 17Ay ka fag mangena nalong sas Isus te, “Dakwa e mangama.” Ay Isus nabalus te, “Kin. Matuyan am longan te, wo e mangama, 18teway ebi lima wan am mangama. Ay am mangama katsi bunwa o at ke mangama. Matuyan wa fiya am longan.” 19Ay ka fag mangena nalong te, “Ku Fun, o wa mangaro Diyus at taglong at sadi. 20Em aguyangan nu gseg Diyus ste wa fag muyud. Ay am taw Udyu, glong am te, nu gseg am Diyus, sas Erusalem yakman.” 21Ay Isus nabalus ka fag mangena te, “Sena, afanudi ku foyungan emu te, umdasug ban sik menit, am taw Samarya bundi ste fag muyud ay sas Erusalem nu gseg am sa tam Tama. 22Ay am taw Samarya, wam nasaful te, sinu ay fagsegan. Ay ami taw Udyu, nasaful tuwami em fagsegan, anway siginan emi, taw umlangfe. 23At matuyan, umdasug ban sik menit, ay indasug wan katsi, at matuyan fag ngay tagseg, gseg tam Tama siginan fiya at falad ay fagmatuyanun. Takatanya tuwa fag ngay taw tam Tama at fagsarapun tagseg. 24Diyus sik falad wayay, nu katanya, nus nga sinu tagseg Diyus, matuyani nu gseg anya; siginani tuwa ka fag taw at falad.”
25Ay ka fag mangena gfasulitanan sas Isus te, “Nasaful aw te, umdasug ban tam Mesias. (Mesias at masuwad te, Diyus at nafili fag Fun.) Ay nu mdasug ban, kanya ban at nanfamoyung sa emi fagayu nus nge wain.” 26Ay Isus nabalus te, “Aw wan am fasulitanan am longan takadasug ban.”
27Ay ginanya Isus at ngay tagadal indasug ay gamatangan dawdaw te, “Taw ro Isus fagfasulitananun ka fag mangena?” Ay at ngay tagadal wa mafalong sanya fag mangena te, “Nataw am fakaumsigun?” Ay anggan wa mafalong sas Isus te, “Taw ro am fagfasulitananun ka fag mangena?”
28Ay ka fag mangena naubun at fagsuwadan mamam ay infoli yay sat fulan laman nanlong sa sangay taw te, 29“Bastam. Glo watam laman nanlag tam aro fag taw at nafoyung angku ebi ataw ku fagbulun fagayu. Kanya wa manga Diyus at nafili fag Fun.” 30Ay ka fag ngay taw nalo wan nanlag Isus.
31Ay Isus at ngay tagadal matvngvd nu gfabulun sas Isus te, “Em takamoyung, fangoni yap.” 32Ay Isus nalong sat ngay tagadal te, “E ba fakonun aktuwa. Ay wam nasaful te, nataw ka fag fakonun.” 33Ay at ngay tagadal gfangintoanan sit dayu te, “Go sinu manga at nafon anya at fakonun?” 34Ay Isus nalong sat ngay tagadal te, “Ku fakonun gfaning aw at nasugu angku at fakaumsigun, ay manga nanfatabu aw at fagbulun. 35Ay anggan am glong yangay am te, ufat ya bank magdanun nu kataba ay tanuman. Ay glong aw ayu te, katsi fanganiun wan. Linggati nu kin sa sangaba gamasun, mataba wan, masine wa gani. 36At tagani gbul ban at nalufuyan, ay at naani fag ngay taw Diyus mon ban leleg at yud e fakatabuwan. Nu katanya, tagtanum ay tagani gasfuwan guseganan. 37Matuyan tuy fag longan te, ‘Sik taw igtanum ay tibak taw gani.’ 38Nasugu aw ayu laman nangani am ay yud natanum. Dewa gyud am inlufuy igfagbulunan gtanum, am way at nangani ay iba dewa nlufuy.”
39Ay sanya fag fulan ngayuk taw Samarya tagafanud sas Isus. Fakatanyaun, ka fag mangena nafoyung sa sangay taw te, “Isus nafoyung angku ebi ataw ku fagbulun fagayu.” 40Ay ka fag ngay taw Samarya nu ndasug wan glong sas Isus te, “Banwani yap sirut ste.” Ay Isus nabanwan yay sanya duwak menit. 41Ay inkayu yay at tagafanud sas Isus gina nadungug at longan. 42Ay ka fag ngay taw nalong sa ka fag mangena te, “Gafanud wami katsi, anway nadungug wa long ami Isus at longan, ay bundi fagtvngvd am longan. Nasaful ami te, kanya wa ngaro fiya Tagfalangfe taw sas fagdaul daga.”
Isus Nafafiya sik Fun Sirut at Baguwama
43Ay nu nlangfe duwak menit, Isus natunglus wa sas Galiliya. 44(Ebi ataw Isus nalong te, Diyus at taglong dewa nasat fulan, at ngay taw wa galang anya.) 45Ay gina Isus indasug sas Galiliya, taw Galiliya guseganan dawdaw, anway ka fag ngay taw ebi si yays Erusalem gina e fagmafulun sa baliwas Tagfabarita nu Glangfe ay nalag Isus at ngay nafagbulun fagayu.
46Ay Isus infoli yay fiya sas fulan Kana sis Galiliya fag talun. Sanya ebi ataw Isus nu gfasik fangaranug sik mamam. Ay makbang yangay sanya fulan Kapernaum. Ay sanya e sik fun sirut at baguwama gadaylan. 47Ay ka fag fun sirut nu nadungug te, Isus infoli wa sas Galiliya siginans talun Udiya, kanya nananlag sas Isus ay nalong te, “Sai yap ku bale ay fafiyai ku baguwama tagakateun katvngvdan nu gadaylan.” 48Ay Isus nabalus te, “Nu dyay am nalag at madulawan ay at madaragang fag ngay fagbulun, yam gafanud angku.” 49Ay ka fag fun sirut gfafali Isus te, “Em Fun, glo wata laman ro ku baguwama di mkate.” 50Ay Isus nabalus te, “Ulii wan, am baguwama nfiya wan.” Ay ka fag fun sirut gafanud wa sas Isus at longan, ay noli wan. 51Ay gina ka fag fun sirut sa sangaba dalan, at ngay fanuguwan nafablang anya ay nafoyung te, “Am baguwama nfiya wan.” 52Ay ka fag fun sirut ginto te, “Seduge nu kafiya ku baguwama?” Ay at ngay fanuguwan nabalus te, “Nu kafiya egmenit sfafun sfasadi.” 53Ay tama gamatangan te, “E kin. Ginanya wa long fiya fag buknga Isus nu glong te, ‘Am baguwama nfiya wan.’ ” Nu katanya, fagayu sanya fag bale at taw gafanud wa sas Isus.
54Kanya at faduwa ginan Isus at nafagbulun at madulawan sis Galiliya, siginans talun Udiya.
Currently Selected:
Uan 4: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines