लुका 6
6
येसु सब्बातन परमेश्वर
(मत्ती 12:1-8; मरकुस 2:23-28)
1ओवतेन शब्बाथोन दाहळे चू खेतोमा गोथू जातू होतु, एने तेरा चेला गोहून कोनसे भांग-भांगीन एने हाते कोरीन चुव-चुवीन खाता जाता होता. 2तेत्यार फरुशी मायला कहानास कोयने बाज गोया, “तुमु चो काम काहा कोरतेला जो शब्बाथोन दाहळे कोरनो वारू नी होय?” 3येसु तीनु काजे जोवाब आप्यू, “काय तुमु यो नि भोन्या कि दाऊद, जेतार चे एने तेरा साती भुकला होता ती काय कोऱ्या? 4चू कोसू परमेश्वरोन घोरमा गोयू, एने भेटोन रुटा लीन खादु, जीनुक खाणो पुजारा सिवाय कुदा काजे बी वारू नी होय, एने आपना सातीदार काजे बी आप्यू?” 5एने चू तीनु काजे कोयू, “माणसोन पुऱ्यु शब्बाथोन दाहळे बी प्रभू छे.”
सब्बातन दाहळे मांदालाक वारू करनो
(मत्ती 12:9-14; मरकुस 3:1-6)
6ओसो होयो कि काहना दिसरा शब्बाथोन दाहळे चू प्रार्थना घोरमा जायीन सिकाळने बाज गोयू; एने चा एक माणूस होतु जेरु जेवळ्या हात सुकलू होतु. 7शास्त्री एने फरुशी तीना पोर गुणू लागाळनेन टेमोन वाट जुव रोया होता कि देख होयू शब्बाथोन दाहळे वारू कोरतेलू कि नी. 8बाकीन चु तिंदरू विचार जानतू होतु; इनान कोरता चू सुकला हातोवावा माणसो काजे कोयू, “उठ इचमा उबरोयजा” चू उठीन उबरोय गोयू. 9येसु तीनु काजे कोयू, “मे तुमु काजे यो पुछो कि शब्बाथोन दाहळे काय वारू छे, वारलो कोरणे कि भुंडलो कोरणे; जीव वाचाडने कि नाश कोरणे?” 10तेत्यार चू चारू धोळे एने तिनी सोभा काजे देखीन तिना माणसो काजे कोयू, “तारू हात नांबू कोर” चू तोसुत कोऱ्यु, एने तेरु हात पोछु वारू होय गोयू. 11बाकीन चे घोणा रीसवायीन आपोसमा विचार कोरणे बाज गोया कि आपु येसु साते काय कोरजे?
बारा चेला
(मत्ती 10:1-4; मरकुस 3:13-19)
12तीनु दाहळामा चु बोयळा पोर प्रार्थना कोरणे गोयू, एने परमेश्वर काजे प्रार्थना कोरणेमा आखी रात जावाळ्यु. 13जेतार दाहळू उग्यु ती चू तेरा चेला काजे बुलावीन तीनामा गोथा बारा जोना काजे नेवाळ्यू, एने तीनु काजे प्रेषित कोयू. 14एने चे ये छे शिमोन जेरो नाव पतरस बी होतो, एने तेरु भाश अन्द्रियास एने याकुब, एने योहान, एने फिलीप एने बरतुल्मै, 15एने मत्ती, एने थोमा, एने हलफईन पुऱ्यु याकुब, एने शिमोन जु जीलोत कोवायतू होतु, 16एने याकुबोन बेटू यहुदा, एने यहुदा इस्कारीयोत जू तेरु धोरावने वावू बोन्यू.
येसुन प्रचार एने मांदलाक वारू करनो
(मत्ती 4:23-25; 5:1-12)
17तेत्यार चू तिंदरे साते उतरीन चारखुट जागा पोर उबरोयीन, एने तेरा चेलान बी मोटी गोरदी एने आखा यहुदि, यरुशलेम, एने सोर एने सिदोनोन दरिया धोळेन लोकेत माणसे, 18यो तेरी सोमोवणे एने आपनी बिमारीमा गोथा वारू होयनेन कोरता तेरेनचा आवला होता, चा होता एने भुंडली आत्मान तोकलीत वावा बी वारू होयता होता. 19आखा तीनाक छिमनेन कोरता होता, काहाकि तीनामा गोथो ताकत निकवीन आखा काजे वारू कोरतो होतो.
आशिषोन वचन
20तेत्यार चू तेरा चेला भूनी देखीन कोयू,
“सोयावा छे तुमु जे दीन छे,
काहाकि परमेश्वरोन राज तुमरो छे”
21“सोयावा चे तुमु जे हीमी भुकला छे,
काहाकि आफेरला कोराय जासे”
“सोयावा छे तुमु जे हीमी रोड रोया,
काहाकि हाससू”
22“सोयावा छे तुमु जेतार माणसोन पुऱ्यान
कोरता माणसे तुमरे साते दुष्मोनी कोरसे
एने तुमु काजे निकाव देसे, एने तुमुक ताकलीत देसे,
एने तुमरो नाव बुरो सोमजीन काट देसे”
23“तिने दाहळे खुशी कोरीन कुदजू, काहाकि देखू, तुमरेन कोरीन सोरगोमा मोटलो प्रतीफोव छे; तिंदरा बाप दादान भविष्य कोरता साते बी तोसोत कोरता रोयता होता.”
दुखन वचन
24“बाकीन हाय तुमरे पोर जे मालदार छे,
काहाकि तुमु तुमरी शांती ली लेदा”
25“हाय तुमरे पोर जे हीमी आफेरला छे,
काहाकि भुकला होयसू”
“हाय तुमरे पोर जे हीमी हासणे बाज रोया,
काहाकि दुख कोरसू एने रोडसु.”
दुष्मोनसी मोंग
(मत्ती 5:38-48; 7:12)
26“हाय तुमरे पोर जेतार आखा माणसे तुमुक वारू कोयसे,
काहाकि तिंदरा डाह-डाहान झुटा भविष्य कोरता साते बी ओसोत कोऱ्या कोरता होता.”
27बाकीन मे तुमु सोमवने वावा काजे कोयो कि तुमरा दुष्मोनो पोर मोंग कोरु; जे तुमरे पोर दुष्मोनी कोरे, तिंदरो भोलाई कोरु. 28जे तुमु काजे स्राप आपे, तीनु काजे आशिष आपु; जे तुमरो अपमान कोरे, तिंदरेन कोरीन प्रार्थना कोरु. 29जे तारा एक गालपोर थापुळ देय तेरे भुनी दिसरू बी फिरवी दे; एने जे तारो डोगलो हापकी लेये, तीनाक डोगलो लेणे मा रुके. 30जु कुदू तारे जुव मांगे, तीनाक आप दे; एने जू तारी चीज हापकी लेये, तेरे जुव घोन मांगजी. 31जोसो तुमुक जुवे कि माणसे तुमरे साते कोरे, तुमु बी तिंदरे साते तोसोत कोरु.
32ओगर तुमु तुमरा मोंग कोरने वावा साते मोंग कोरसू, ती तुमरी काय बोढाई? काहाकि पापी बी आपना मोंग कोरणे वावा पोर मोंग कोरतेला छे. 33ओगर तुमु आपना वारलो कोरणे वावा पोर भोलाई कोरे, ती तुमरी काय बोढाई? काहाकि पापी बी ओसोत कोरतेला छे. 34ओगर तुमु तीनुक उदार आपे तिंदरे जूव पोछो जोळणेन आस राखतला छे, ती तुमरी काय बोढाई? काहाकि पापी काजे उदार आपतला छे कि तोतरोत पोसो जोळे. 35बाकीन तुमरा दुष्मोन पोर मोंग कोरु, एने वारलो कोरु, एने ओवी पोछो जोळनेन आस नि राखीन उदार आपु; एने तुमरेन कोरता मोटलो फोव रोयसे, एने तुमु परमप्रधानोन पुऱ्या रोयसू, काहाकि चू तिंदरे पोर जु धन्यवाद नी कोरतेला एने बुरो कोरणे वावा पोर बी दयावू छे. 36जोसू तुमरू बास दोयावू छे, तोसोत तुमु बी दोयावा बोनु.
गुणू मा लागाळू
(मत्ती 7:1-5)
37“गुणू मा लागाळू, ती तुमरे पोर बी गुणू नि लागे, दोषी मा ठेरावू, ती तुमु बी दोषी नी ठेराये, माफ कोरु, ती तुमरी बी माफी होय जासे. 38आप्या कोरु, ती तुमु काजे बी आपसे. माणसे पुरो माप दाब-दाबीन एने हालवी हालवीन एने उगोवतो जायीन तुमरा खुवामा आपसे, काहाकि जीना मापोसी तुमु मापतला छे, तीनासी तुमरेन कोरता मापाय छे.”
39ओवतेन चू तीनु काजे एक दाखलु कोयू “काय आंदवू, आंदवा काजे वाट देखाळ सोकसे? काय दुयूबी खाडामा नी पोळे?” 40चेलू आपना गुरुसी मोटू नि होय, बाकीन जू कुदू सिद्ध होयसे, चू आपना गुरु सारखू होयसे. 41तु तारा भाशोन कोचरा काजे काहा देखणे बाज रोयू, एने तारा डूवा मायलो कोचरू नी देखतलु? 42जेतार तू तारात डूवा मायलो कोचरू नी देखायतो, ती तारा भाश काजे काहा कोयतेलू, “हे भाश; उबरोयजा तारा डूवा मायलु कोचरू निकाव दोम?” हे कोपटी पेहेल तारा डूवा मायलो कोचरू निकाव, तेत्यार जु कोचरू तारा भाशोन डूवामा छे, तीनाक वारू रितीसी देखीन निकाव सोकीस.
जसो झाड तसो फोव
(मत्ती 7:17-20; 12:34-35)
43काहनोत वारलो झाड नि होय जो बिन कामोन फोव लावे, एने नि ते काहनोत बिन कामोन झाड छे जो वारलो फोव लावे. 44होर एक झाड आपना फोवोसी उवखाय जातलो छे; काहाकि माणसे झाडोमा गोथो गुलोर नि तुळतला एने नि ते झडबेरीम गोथो आंगुर. 45वारलु माणूस आपना मोनोन वारला भोंडारमा गोथू वारली वाते निकावतलु, एने भुंडलु माणूस आपना मोनोन भुंडला भोंडारमा गोथू भुंडली वाते निकावतलु; काहाकि जो मोनोमा भोरलो छे चोत तेरे मुयो पोर आवतेलो छे.
घोर बोनावने वावान दुय माणसोन दाखलू
(मत्ती 7:24-27)
46“जेतार तुमु मारो कोयनो नि माने ती काहा मेसेक, हे प्रभू, हे प्रभू, कोयतेला? 47जु कुदू मारेंचा आवतेलु एने मारी वाते सोमवीन तीनुक मानतलु, मे तुमुक कोयो कि चू काहना माणसो सारकू छे. 48चू तीना माणसो सारकू छे जू घोर बांदनेंन टेमे जागू उंडेत खोंदिन चाफऱ्या पोर पायु बांद्यू, एने जेतार पाणी आव्यो ती गारा घोरोपोर लाग्या बाकीन तीनाक हालवी नी सोक्या; काहाकि चो पाको बांदलो होतो. 49बाकीन जू सोमवीन नि मानतलु चू तिना माणसो सारकू छे, जू धुवामा बिना पायान घोर बांद्यू, जेतार तीना पोर गारा लाग्या ती चो तेत्यारुत पोळ गोयो एने पोळीन तेरो पुरो नाश होय गोयो.”
Currently Selected:
लुका 6: BFBNT
Highlight
Share
Copy
Want to have your highlights saved across all your devices? Sign up or sign in
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.