Evvan 1
1
Sääʹnn šõõddi ooumžen
1Aalǥâst leäi sääʹnn
da sääʹnn leäi Vuâsppååʹd åʹrnn,
sääʹnn leäi Vuâsppåʹd.
2Son leäi aalǥâst Vuâsppååʹd åʹrnn.
3Puk lij šõddâm Suu pääiʹǩ.
Suutää iʹlla ni mii šõddâm.
4Suʹst leäi jieʹllem
da jieʹllem leäi oummui čuõvv.
5Da čuõvv čuõvi seuʹnnjõõzzâst,
leša seuʹnnjõs ij tõn fiʹttjam.
6Vuâsppåʹd vuõlttii oummu, koon nõmm leäi Evvan. 7Son pueʹđi tuõđšted čuõvâst, što puk tõn kuulče da ååskče suu pääiʹǩ. 8Son ij leämma jiõčč čuõvv, leša son pueʹđi tuõđšted čuõvâst.
9Tuõđi čuõvv, kååʹtt čuâvv pukid,
leäi pueʹttmen maaiʹlme.
10Son pueʹđi maaiʹlme,
kååʹtt leäi suu pääiʹǩ rajjum,
leša maaiʹlm ij tobddâm suu.
11Son pueʹđi oummees årra,
leša sij jiâ välddam suu vuâstta.
12Leša tõiʹd, kook vaʹldde suu vuâstta,
son uuʹdi viõǥǥ šõddâd Vuâsppååʹd päʹrnnen,
tõiʹd, kook oskku veâl suu nõmmses,
13kook jeäʹla šõddâm võõrâst
jiâ-ǥa vueʹǯǯ täättast,
jiâ-ǥa åumma täättast,
pâi Vuâsppåʹd jiõčč šõõddi siʹjjid Eʹččen.
14Sääʹnn šõõddi ooumžen
da jeälsti mij kõõskâst.
Mij vuõiʹnim suu čuõvvâdvuõđ,
koon Eʹčč leäi ouddam oʹdinakai Pärnnses.
Son leäi tiudd äärm da tuõđšvuõđ.
15Evvan tuõđšti suʹst da čuârvai: «Tät lij tõt, ǩeäʹst mon sarnnum: muu mââibeäʹlnn puätt nuʹbb, kååʹtt lij muu šoorab, tâʹl son lij leämma ooudbeäʹlnn muu.»
16Da Suu tiiudâsvuõđâst mij puk leäʹp vuäǯǯam
äärm äärm ool.
17Vuâsppåʹd uuʹdi Moʹssai pääiʹǩ lääʹjj,
leša äärm da tuõđšvuõđ puuʹti Isõs Kristõs.
18Ij ni ǩii leäkku vuäinnam Vuâsppååʹd ni kuäʹss,
pâi oʹdinakai Päʹrnn, kååʹtt lij Eeʹjj ââʹsǩest,
lij Suu tieʹđtam.
Evvan Ristti tuõđštõs
19Da tät lij Evvan tuõđštõs, ko juudlažneeʹǩǩ vuõlttee Jerusaaʹlmest paappid da leeʹvilaid Evvan årra kõõččâd, ǩii son tuõđi leäi. 20Evvan ij ǩeâlddam tuõđšvuõđ, son tobdsti: «Mon jiõm leäkku Kristõs.» 21Sij eʹpet kõʹčče: «Ǩii šât ton leäk? Leäk-a Eʹllj?» «Jiõm leäkku.» «Leäk-a ton profeʹtt, koon mij vueʹrddep?» «Jiõm», Evvan vaʹsttii. 22Sij cieʹlǩǩe: «Säärn tâʹl ǩii ton leäk, što vuäitčep vaʹstteed tõiʹd, kook miʹjjid liâ vuõlttääm. Mâiʹd ton joordak jijstad?» 23Evvan vaʹsttii siʹjjid: «Mon leäm poostaijânnmest kollʼjeei jiõnn: ’Raajjâd Šuʹrre čuõkku!’, nuʹt mäʹhtt profeʹtt Esai lij ceälkkam.» 24Da vuõlttuum oummu leʹjje farisõõzz. 25Sij kõʹčče suʹst da cieʹlǩǩe suʹnne: «Mõõzz tâʹl riistak, ko jiõk leäkku Kristõs jiõk-ga Eʹllj jiõk-ga profeʹtt?» 26Evvan vaʹsttii siʹjjid: «Mon riistam čaaʹʒʒin; leša tij kõõskâst čuâǯǯ son, koon tij jeäʹped toobd. 27Son lij tõt, kååʹtt puätt muu mââibeäʹlnn da koon kaammikorstõõǥǥ jiõm ââʹnet čåuʹdded.»
28Tät šõõddi Jorddan nuuʹbb peäʹlnn Betaniast, koʹst Evvan leäi risttmen.
Vuâspååʹd lääʹbbes
29Nuuʹbb peeiʹv Evvan vuõiʹni, što Isõs leäi pueʹttmen suu årra. Son cieʹlǩi: «Ǩiččâd, Vuâsppååʹd lääʹbbes, kååʹtt väldd meädda maaiʹlm rieʹǩǩ! 30Tät lij tõt, ǩeäʹst mon cieʹlǩǩem: ’Muu mââibeäʹlnn puätt ååum, kååʹtt lij šoorab muu, son lij leämma juʹn ooudbeäʹlnn muu.’ 31Jiõm ni mon še teâttam, ǩii son leäi, leša tõn diõtt mon leäm puättam čaaʹʒʒin risttâd, što israelneeʹǩǩ äälǥče tobddâd suu.»
32Evvan tuõđšti: «Mon vuõiʹnnem Jiõgg luâšttõõttâm ââʹlmest vuâlas mâʹte låådda da pääʹccem suu oolâs. 33Mon jiõm tobddâm suu, leša Vuâsppåʹd, kååʹtt muu vuõlttii risttâd čaaʹʒʒin, leäi ceälkkam: ’Son, koon ool vuäinak Jiõgg luâšttõõttâm da pääʹccem, restt Pââʹss Jiõggin.’ 34Mon vuõiʹnnem tõn da tuõđštam, što tät lij Vuâsppååʹd Päʹrnn.»
Isõõzz vuõssmõs mättʼtõspäärna
35Nuuʹbb peeiʹv Evvan da kuõʹhtt suu mättʼtõspäärnžes leʹjje eʹpet tåʹben. 36Son vuõiʹni Isõõzz rääjj väʹʒʒem da cieʹlǩi: «Ǩiččâd, Vuâsppååʹd lääʹbbes.» 37Ko mättʼtõspäärna kuʹlle tõn, suäna vuõʹlǧǧe Isõõzz mieʹldd. 38Isõs jåårǥli, vuõiʹni suännaid mieʹldd pueʹttmen da kõõjji: «Mâiʹd tuäna ooccveʹted?» Suäna vaʹsttee: «Rabbi,» — tõt lij: uʹčteeʹl — «koʹst ton jeälstak?» 39Isõs vaʹsttii: «Pueʹtted ǩiččâd.» Suäna vuõʹlǧǧe da vuõiʹnne, koʹst son jeälsti, da leʹjje Isõõzz åʹrnn tõn peeiʹv. Leäi nuʹt neellj äiʹǧǧ jeäʹǩǩespeeiʹv.
40Andreas, Semman Pietar villj leäi nuʹbb tõõn kuâhttsest, kook leʹjje kuullâm, mâiʹd Evvan cieʹlǩi, da leʹjje vuâlggam Isõõzz mieʹldd. 41Son kaauni vuõššân viilljõs Semman da cieʹlǩi suʹnne: «Mij leäʹp kaunnâm Messiaazz», tõt lij jåårǥlââʹtteel: Kristõs. 42Son viiǥǥi viilljâs Isõõzz årra. Isõs ǩiõčči tän da cieʹlǩi: «Ton leäk Semman Evvan âʹlǧǧ, Ton vuäǯǯak nõõm Keefas» — tõt lij kaʹlli, Pietar.
Isõs kåčč Iʹllep da Natanael
43Nuuʹbb peeiʹv Isõs täättai vueʹlǧǧed Galilea da son kaaunõõđi Iʹllpin da cieʹlǩi suʹnne: «Vueʹlj muu mieʹldd.» 44Iʹllep leäi Beetsaidast, Andreaazz da Pietar šâddgåårdest. 45Iʹllep vuõiʹni Natanael da cieʹlǩi suʹnne: «Mij leäʹp kaunnâm suu, ǩeäʹst Moʹssai lääʹjjest da profeeʹtt liâ ǩeeʹrjtam, son lij Isõs Jooʹsef âʹlǧǧ Nasareeʹttest.» 46Natanael kõõjji: «Vuäitt-a Nasareeʹttest šõddâd ni mii puõʹrid?» Iʹllep cieʹlǩi: «Puäʹđ ǩiččâd.»
47Isõs vuõiʹni Natanael pueʹttem årrses da ceälkk suʹst: «Tõʹst lij vuõigg israelneǩ, suʹst iʹlla ni mii ǩeähnaid särnnmest.» 48Natanael kõõjji suʹst: «Mâʹst muu toobdak?» Isõs vaʹsttii: «Mon vuõiʹnnem tuu išttâd åårrmen viikânmuõr vueʹlnn, ouʹddelgo Iʹllep kååččai tuu.» 49Natanael vaʹsttii suʹnne: «Rabbi, ton leäk Vuâsppååʹd Päʹrnn, ton leäk Israel koonǥõs.» 50Isõs vaʹsttii: «Ååskak-a tõn diõtt, što sarnnum: ’tuu mon vuõiʹnnem viikânmuõr vueʹlnn’? Vuäǯǯak vueiʹnned veâl jiânnai šoorbid.» 51Isõs cieʹlǩi: «Tuõđi, tuõđi mon ceälkam tiʹjjid: tij vuäǯǯveʹted vueiʹnned ââʹlm ävvnem da Vuâsppååʹd aʹŋǧǧlid kaggõõttâm pââjas da luâšttõõttâm Oummu Pääʹrn ool.»
Currently Selected:
Evvan 1: SKOLT
Highlight
Share
Copy
Want to have your highlights saved across all your devices? Sign up or sign in
© Lää´dd Pipliaseä´rvv; Suomen Pipliaseura; Finnish Bible Society 1988