Matiyu 13
13
Malofalinba ma sana
Malɛkɛ 4.1-9; Luka 8.4-8
1Wo lon kelen na, Isa ka bɔ bon na ka t'i sii kɔɔ kawun na. 2#Luka 5.1-3.Jama ba k'i ladɛn mingɛ a laminin nɔ, a ka don kulun dɔ kɔnɔ k'i sii. Jama lɔnin ka to kawun na, 3a vɛ ko siyama fɔla ai yɛ sanalu lɔ, a vɛɛ: «Sɛnɛkɛba dɔ ka taa malofalinya lɔ. 4A ka to malo falinna, a dɔlu ka ben siya dala. Kɔnɔnilu ka na ka wolu dɔn. 5Malo dɔlu ka ben fala kɔkan, fulumuu siyayanin tɛ tɛɛminja. Malo wolu ka fɛlɛn jona, kɛɛ ai lilen ma don duu kɔlɔ kosɛvɛ. 6Tele ba ka bɔ mingɛ, ai ka ja, kamasɔlɔn ai lilen tɛɛ ma don duu kɔlɔ kosɛvɛ. 7Malo dɔlu ka ben wonilu tɛma, minu ka buɲa ka malo wolu lɔgbalin. 8Malo dɔlu fana ka ben duu kein nɔ. Wolu ka sawati kosɛvɛ. A dɔlu k'ai den kɛmɛ (100) kɛ, a dɔlu biwɔɔlɔ (60), a dɔlu bisawa (30). 9Tolo yi mɔɔ min kun, wo tii y'a tolomalɔ kuma min ma.»
Isa ka sanalu la dailu min na
Malɛkɛ 4.10-12; Luka 8.9-10
10Wo kɔ, Isa kɔbiladennu k'i madon a la k'a maɲininga, ai vɛɛ: «Mindɛ lɔ i yi kumala mɔɔlu fɛ sanalu lɔ?»
11Isa k'ai javi, a vɛɛ: «Haijɛnɛ masaya gbonolu lɔnni vɛ di àilu ma, kɛɛ a ma di a dɔlu ma. 12#Matiyu 25.29; Malɛkɛ 4.25; Luka 8.18; 19.26.Kamasɔlɔn ni fen ka kɛ mɔɔ min bolo, a dɔ latɔ wo tii ma ta kɔkan ka siyaya. Kɛɛ ni fen ma kɛ mɔɔ min bolo, hali minni y'a bolo, wo minatɔle a la. 13Wo le y'a kɛla, ǹ'i kumala ai fɛ sanalu lɔ, kamasɔlɔn ai y'ai ɲa kaana, kɛɛ ai tɛ foi yena. Ai y'ai tolomalɔla, kɛɛ ai tɛ foi mɛnna, ai do tɛ foi ɲayena. 14Nabi Ezayi na kuma min fɔla ka bɛn ai ma, wo ma vɛ fa, ko:
‹Ài kɛtɔ ài tolomalɔla kosɛvɛ,
kɛɛ ài tɛnala foi ɲayena.
Ài do kɛtɔ ài ɲa kaana,
kɛɛ ài tɛnala foi yena.
15Kamasɔlɔn bi mɔɔlu josokun vɛ ja,
ai vɛ ai tolo datuun,
k'ai ɲa masili,
alako ai ɲa kana yeni kɛ,
ai tolo kana ko mɛn,
ani ai josokun kana koɲaye,
ani ai kana ai jɛlɛ lasei m̀ ma,
min y'a kɛ, ǹ'ai lakisi.›
16 #
Luka 10.23, 24. «Àilu koni yi duwawuden ne le, kamasɔlɔn ài ɲa yi yeni kɛla, ani ài tolo yi ko mɛnna. 17Ǹ'i tuɲa fɔ ài yɛ, ài ɲa yi ko minu yena yi ne, kela ni telenmande siyama tɛɛ a fɛ ka wolu ye, kɛɛ ai do ma ai ye. Ài do tolo yi ko minu mɛnna, ai tɛɛ a fɛ ka wolu mɛn, kɛɛ ai do ma ai mɛn.»
Isa ka malofalinba ma sana kɔlɔ fɔ teme
Malɛkɛ 4.13-20; Luka 8.11-15
18Isa vɛɛ: «Ài y'ài tolomalɔ, ǹ'i malofalinba ma sana kɔlɔ fɔ ài yɛ. 19Malo minu na benna siya dala, wolu le mɔɔlu le minu yi Ala ya masaya ko mɛnna, ai do t'a ɲayena. Soitana yi nala wo le lɔ ka kuma wo bɔ ai josokun nɔ. 20Malo minu na benna fala kɔkan, wolu le mɔɔlu le minu yi Ala kumakan mɛnna k'ai bolo sii a kɔlɔ telemanin sawa boloma. 21Kɛɛ kuma wo lilen tɛ donna ka jaanfa ai josokun nɔ, a do tɛ tola ai kɔnɔ. Gbeleya vɛ ai masɔlɔnna, niwotɛ mɔɔlu vɛ ai tɔlɔyala ka bɛn Ala kumakan ma, ai yi limaniya siya bilala telemanin. 22Malo minu na benna wonilu tɛma, wolu le mɔɔlu le minu yi Ala kumakan mɛnna, kɛɛ do dunuɲakolu hamin ni nafolo ladiyaɲɛ yi donna ai josokun nɔ ka Ala kumakan lɔgbalin, a do tɛ sawatila ai ma. 23Malo minu na benna duu kein nɔ, wolu le mɔɔlu le minu yi Ala kumakan mɛnna k'a ɲaye. Kumakan wo yi donna ai josokun nɔ ka sawati iwo malo minu y'ai den kɛmɛ (100) kɛla, niwotɛ biwɔɔlɔ (60), niwotɛ bisawa (30).»
Bin yon ma sana
24Isa ka sana gbɛlɛ la ai yɛ, a vɛɛ: «Haijɛnɛ masaya ko kɛyine iwo kɛ́ min na malosi ɲuma falinna aa sɛnɛ lɔ. 25Kɛɛ mɔɔlu tɛɛ sunɔɔ lɔ waate min nɔ, a juu ka na ka bin kolo falin malo tɛma, ka bɔli. 26Malo k'a wuli k'a tizan labɔ mingɛ, bin fana ka ye a lɔ. 27Wo kɛnin, bɔidennu ka taa wo fɔ sɛnɛtii yɛ, ai vɛɛ: ‹Kuntii, i ma malo le falin iya sɛnɛ lɔ? Mindɛ kɛnin bin vɛ fɛlɛn a lɔ?› 28Sɛnɛtii vɛɛ: ‹Ǹ juu nɔ le.› Baaledennu do vɛɛ a yɛ: ‹I y'a fɛ m'i taa bin bɔn?› 29Kɛɛ a do vɛɛ ai yɛ: ‹Ɛnɛn, ài y'a to ten. Niwotɛ, ài vɛ kɛla bin bɔnna, ài kɛtɔ malo dɔlu fana bɔnna. 30Ài y'a bɛ to je, ai yi wuli i ɲɔɔ fɛ haan fɔɔ malo kali waate vɛ sena. Wo waate, ǹ kɛtɔ a fɔla malo kalibalu yɛ, ǹ ko: Ài yi bin yonnu bɔn kunfɔlɔ le k'ai lasili ai ɲɛninko lɔ, kɛɛ ài yi malo ladɛn ǹa kele la.› »
Isa ka sana gbɛlɛlu la
Malɛkɛ 4.30-32; Luka 13.18-21
31Isa ka sana gbɛlɛ la ai yɛ, a vɛɛ: «Haijɛnɛ masaya ko kɛyine iwo mutaadi kolo, kɛ́ dɔ ka min sɛnɛ aa gbele lɔ. 32Hali a dɔɔyanin ka kɛ ka timin sɛnɛfen kolo bɛ la, kɛɛ a vɛ fɛlɛnna, a yi buɲala ka timin gbelelɔfen bɛ la. A yi kɛla kɔlɔmanju le, kɔnɔnilu y'ai ɲaa lɔla min bololu la.»
33Isa ka sana dɔgbɛlɛ la ai yɛ, a vɛɛ: «Haijɛnɛ masaya ko kɛyine iwo bululafununsɛɛ, moso na min ɲaamina fainimuu tasa ɲa sawa le, haan fɔɔ a bɛ ladɛnnin ka funun.»
34Isa ka wo bɛ fɔ mɔɔlu yɛ sanalu le lɔ. A ma ko ko fɔ ai yɛ, ni a ma min fɔ sana lɔ. 35A k'a kɛ ten fɔsa kuma min fɔnin kela bolo, wo ma yi fa teme, ko:
«Ǹ kumatɔ sanalu lɔ.
Ko minu doonnin ka ta dunuɲa dan waate ma,
ǹ kɛtɔ wolu le fɔla.»
Isa ka bin yonnu ma sana kɔlɔ fɔ teme
36Wo kɔ, Isa ka bɔ jama lɔ ka don bon na. A kɔbiladennu k'i madon a la k'a fɔ a yɛ, ai vɛɛ: «Bin yonnu minu ka fɛlɛn sɛnɛ lɔ, i yi sana wo kɔlɔ fɔ mɔ yɛ.» 37Isa k'ai javi, a vɛɛ: «Malo falinba, wo le Mɔɔnivin Tanin ne. 38Sɛnɛ yi dunuɲa le le. Malosi ɲuma, wo yi mɔɔlu le le minu fɛ yi Ala ya masaya la. Bin yonnu yi Soitana ya mɔɔlu le le. 39Juu min na bin yon kolo falinna sɛnɛ lɔ, wo le Soitana le. Malo kali waate, wo yi dunuɲa laban ne le. Malo kaliba wolu yi mɛlɛkalu le le. 40Bin yonnu la yi dɛnna k'ai ɲɛnin taa lɔ teme, wo suu le kɛtɔ dunuɲa laban waate lɔ. 41Mɔɔnivin Tanin kɛtɔ aa mɛlɛkalu lataala ka mɔɔlafilibalu ni koyonkɛbalu ladɛn k'ai bɛ fɛ bɔ aa masaya la, 42k'ai lafili taa ba lɔ, ai kasitɔ k'ai ɲii sii i ɲɔɔ na dimin bolo je. 43Wo waate lɔ, Ala ya mɔɔ telenninu kɛtɔ mɛnɛnna iwo tele ai Fa Ala ya masaya lɔ. Tolo yi mɔɔ min kun, wo tii y'a tolomalɔ kuma min ma.»
Nafolo doonnin ni lulu kein ma sanalu
44«Haijɛnɛ masaya ko kɛyine iwo nafolo min doonnin sɛnɛ dɔ lɔ. Kɛ́ dɔ ka nafolo wo ye k'a doon kɔtunun. A do vɛ taala sawa boloma k'a bolofen bɛ fele, ka na ka sɛnɛ wo san.
45«Haijɛnɛ masaya ko kɛyine fana iwo jula min yi lulu keinnu ɲininna. 46A vɛ lulu daagbɛlɛn ba dɔ yena, a taatɔ a bolofen bɛ felela ka na ka wo san.»
Jɛɛminajɔ ma sana
47«Haijɛnɛ masaya ko kɛyine fana iwo jɔ, kɔɔsɔmɔnilu na min lafilila kɔɔ lɔ ka jɛɛ suu bɛ dɔ mina. 48Jɔ la ka fa mingɛ jɛɛ la, ai ka jɔ sama k'a labɔ kawun na. Wo kɛ, ai k'i sii ka jɛɛlu lɔtɔmɔn, k'a keinyanilu bila tasa lɔ, k'a kɛwonnu lafili. 49Dunuɲa laban kɛtɔ ten ne. Mɛlɛkalu kɛtɔ mɔɔlu lɔtɔmɔnna, ka mɔɔ yonnu bɔ telenmandelu tɛma, 50k'ai lafili taa ba lɔ, ai kasitɔ k'ai ɲii sii i ɲɔɔ na dimin bolo je.»
Fen kulalu ni fen kɔlɔlu ma sana
51Isa k'a kɔbiladennu maɲininga, a vɛɛ: «Ài na kuma wolu bɛ ɲayena?» Ai vɛɛ: «Aan, mɔ n'a ɲayena.» 52Isa do vɛɛ ai yɛ: «Seliya kalanmɔɔ minu vɛ kalan haijɛnɛ masaya kolu la, wolu bɛ kɛyine iwo lutii min yi fen kula ni fen kɔlɔ bɛ labɔla aa nafolo ladaloya lɔ.»
Nazalɛtikalu k'i ban Isa lɔ teme
Malɛkɛ 6.1-6; Luka 4.16-30
53Isa wɔlinin sana wolu lala, a ka bɔ je ka taa. 54A ka na mingɛ a fɛso, a ka mɔɔlu kalan damina aiya Aladalibon na. A lamɛnbalu ka kawakoya, ai vɛɛ: «Kɛ́ min na hangili min suu sɔlɔnna min ne, ani kawananko see? 55Jilisaba den ne tɛ ve? A ba le tɛ Mɔyamu le? A dɔɔkɛ le tɛ Janguba ni Jusufu ni Simɔn ni Jude le? 56A dɔɔmosolu bɛ tɛ mɔ fɛ le lɔ jan? A na hangilimaya ni seetiiya minu sɔlɔnna mineja wo lɔ?» 57#Yohana 4.44.Wo le ka kɛ sabu le ai ma la Isa la. A do vɛɛ ai yɛ wo lɔ: «Kela tɛ dɔɔyala dingila suu suu lɔ, mafɔ ale gbu fɛso ani aa bonnamɔɔlu tɛma.» 58Isa ma kawananko siyama kɛ woja, ka bɛn je mɔɔlu ya limaniyabaliya ma.
Currently Selected:
Matiyu 13: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023