San Mateo 11
11
Juan Bautista kyexyo'oybyu̶du̶jk
(Lc 7.18-35)
1Ko je̱'e̱ Jesús je̱'e̱ nimajmé̱tzkpu̶ dyiscípulotu̶jk wingapx ju̶jpkapxu̶u̶ydyaay ajku̶xy, chi jim choñ, ñu̶kxy yaj'u̶xpu̶jkpu̶, y ayuuk kapxwa'kxpu̶ majaty je̱'e̱ kajpt je̱'e̱ jimbu̶ naaxjooty.
2Juan Bautista pujxtu̶gooty najty je̱', y ñejwu̶u̶y je̱' tii je̱'e̱ Cristo najty tyuumby y'ijxypyu̶ñ. Mu̶'it je̱'e̱ y'u̶xpu̶jkpu̶du̶jk nije̱' kejxy ma je̱'e̱ Jesúsu̶ñ, 3ko wan nu̶kxy yajtu̶u̶gu̶xy pu̶nu̶ je̱' najty je̱'e̱ jaanch, je̱'e̱ Cristo mu̶dyiibu̶ najty minaambu̶ñ, o pu̶nu̶ jya'ay'ejxypy je̱'e̱ wiingpu̶ ajku̶xy.
4Chi je̱'e̱ Jesús y'adzoowu̶ ajku̶xy: “Nu̶kx je̱'e̱ Juan du'un nu̶maaygyu̶x neby yam m'ijxku̶xy mmu̶doogu̶xyu̶ñ. 5Yajmu̶dmu̶dyaakku̶x ko je̱'e̱ wiindzpu̶ja'ay tu̶ wyindu̶kxu̶'kku̶xy, ko je̱'e̱ tekymya'atpu̶ja'ay tu̶ yo'oyu̶'kku̶xy, ko je̱'e̱ ju̶bu̶k pu'udzpa'ammu̶u̶dpu̶ tu̶ chookku̶xy, ko je̱'e̱ natpu̶ja'ay tu̶ myu̶doowu̶'kku̶xy, ko je̱'e̱ o'ogyjya'ay tu̶ jyuugypyu̶jkku̶xy y je̱'e̱ ayoobu̶du̶jk yajmooygyu̶xp je̱'e̱ ayuuk tu̶y'ajt mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. 6¡Y jootkujk je̱'e̱ ajku̶xy mu̶dyiibu̶ je̱'e̱ myu̶bu̶jku̶ñ ka'p yajtu̶gooygyu̶xy ma u̶u̶chu̶ñ!”
7Ko je̱'e̱ Juan kyexyo'oybyu̶ wyimbijttaaygyu̶xnu̶, chi je̱'e̱ Jesús nimu̶dyaaktu̶gu̶u̶y je̱'e̱ Juan ma je̱'e̱ mayjya'ayu̶ñ, myu̶naañ: “¿Miich ajku̶xy tii oy tu̶ m'ijxku̶xy jim adu'ugtuum? ¿Nej tu̶ m'ijxku̶xy tu'ug je̱'e̱ ja'ay aamé̱tzk jootmé̱tzk du'un neby tu'ug waaxk'aay mu̶dyiibu̶ pojmiimb pojxu̶jpu̶ñu̶? 8Y pu̶nu̶ ka'p, ¿ti oy tu̶ m'ijxku̶xy? ¿Tu'ug je̱'e̱ ya'aydyu̶jk mu̶dyiibu̶ oywyit oydyukxy mu̶u̶d xyóxyu̶chu̶? Ka'p du'un tu̶ m'ijxku̶xy. Miich mnejwu̶u̶by du'un ajku̶xy ko je̱'e̱ oybyu̶ xoxypyu̶ ja'ay ajku̶xy jim je̱'e̱ yajpaatku̶xy ma je̱'e̱ mu̶jtuungmu̶u̶dpu̶ tyu̶jk ajku̶xyu̶ñ. 9Peru̶, ¿ti oy tu̶ m'ijxku̶xy? ¿Tu'ug je̱'e̱ Dios y'ayuuknajtzkapxu̶u̶ybyu̶? Jaanch tu̶ m'ijxku̶xy tu'ug je̱'e̱ Dios y'ayuuknajtzkapxu̶u̶ybyu̶, y jakni'igyu̶ je̱'e̱ myu̶ju̶ch ka'p je̱'e̱ju̶ñu̶ba je̱'e̱ Dios y'ayuuknajtzkapxu̶u̶ybyu̶du̶jk mu̶dyiibu̶ jékyu̶p tzu̶naaygyu̶xu̶ñ. 10Je̱' adaa je̱'e̱ Juan mu̶dyiibu̶ je̱'e̱ Dios ñigapx ma je̱'e̱ ñakyu̶ñ ma du'un myu̶na'añu̶ñ.
‘U̶u̶ch nguejxypyu̶ch je̱'e̱ ngugapxy'ajtpu̶ jayu̶jp ma miichu̶ñ,
wan je̱'e̱ mnu̶u̶'aa mdu'u'aa xyaj'oyu̶u̶yu̶ch.’
11Janch tu̶y'ajtu̶ñ du'un nnu̶maaygyu̶xy ko ka'p je̱'e̱ ja'ay jii ni tu'ug Dios y'ayuuknajtzkapxu̶u̶ybyu̶ mu̶dyiibu̶ jakni'igyu̶ mu̶ju̶ñ ka'p je̱'e̱ju̶ñu̶ba je̱'e̱ Juan Bautista, y je̱'e̱ mu̶dyiibu̶ naty mu̶bu̶jkku̶xpu̶ñ je̱'e̱ Dios y'ane̱'e̱mu̶ñ; jakmu̶j je̱'e̱ ni'igyu̶ y'ídu̶ch, ni'igu̶ ka'p je̱'e̱ Juan Bautista.
12“Mu̶naabu̶ je̱'e̱ Juan Bautista Dios y'ayuuk tyu̶y'ajt kapxwa'kxtu̶gu̶u̶yu̶ u̶xtu̶ chamnu̶baad je̱'e̱ ju̶bu̶kja'ay myu̶dzip'ajtku̶xypy je̱'e̱ Dios y'ane̱'e̱mu̶ñ, y je̱'e̱ mu̶dyiibu̶ du'un mu̶k mu̶dzip'ajtku̶xpu̶ñ jya'adimyajku'udu̶gooyaangu̶xypy je̱' tu'ook yajku'udu̶góyu̶. 13Ku̶xyu̶ je̱'e̱ Dios y'ayuuknajtzkapxu̶u̶ybyu̶du̶jk y je̱'e̱ Moisés kyu'utujku̶ñ je'eyu̶ je̱'e̱ nigápxku̶xy je̱'e̱ Dios y'ane̱'e̱mu̶ñ, u̶xtu̶ koonu̶ je̱'e̱ Juan kapxwa'kxtu̶gu̶u̶y je̱'e̱ Dios y'ayuuk tyu̶y'ajt, 14y pu̶nu̶ mmu̶bu̶jkku̶xypy adaa du'un neby je̱'e̱ Dios y'ayuuknajtzkapxu̶u̶ybyu̶du̶jk y je̱'e̱ Moisés kyu'utujku̶ñ myu̶na'añu̶ñ, je̱'e̱ Juan je̱' je̱'e̱ Dios y'ayuuknajtzkapxu̶u̶ybyu̶ Elías mu̶dyiibu̶ najty minaambu̶ñ. 15Pu̶njaty adaa ayuuk winju̶wu̶'u̶waamb, wan winju̶wu̶'u̶y.
16“¿Pu̶n u̶u̶ch mu̶u̶d n'ok'yajkipxyxu̶'u̶wu̶ch adayaaba ja'ay ajku̶xy mu̶dyiibu̶ jada'achámbu̶ xu̶u̶ tiempo tzu̶naaygyu̶xpu̶ñ? Du'un je̱'e̱ tyu'knaxu̶u̶ygyu̶xy neby je̱'e̱ pi'k'ana'ktu̶jk mu̶dyiibu̶ naaxwé̱tzku̶xpu̶ñ ma je̱'e̱ ja'ay jyuuygyu̶xy tyókku̶xyu̶ñ cham y'u̶yu̶u̶y kyuy'ajtku̶xy y mu̶j'yaax mu̶jjojku̶xy je̱'e̱ myu̶gu'ugtu̶jk: 17‘Tu̶ u̶u̶ch je̱'e̱ tzajpkapyxuuxk nja'ayajxu'uxy ajku̶xy, y ka'p miich tu̶ m'e̱jtzku̶xy; tu̶ nja'a'u̶u̶wu̶ ajku̶xy u̶y jootmaymyu̶u̶dpu̶, y nan ka'p miich tu̶ myaaxku̶xy.’ 18Y ko je̱'e̱ Juan y'ooy, ka'p najty kaagy je̱'e̱ kay, nan ka'p najty viino je̱'e̱ u'ugy, chi miich mmu̶naangu̶xy ko je̱'e̱ Juan kya'a'oybyu̶mu̶u̶du̶ch. 19Chi u̶u̶ch je̱' je̱'e̱ ja'ay mu̶dyiibu̶ tzon tzajpjooty tu̶ nmiiñu̶ch, kaabyu̶ch uukpu̶ch, y du'un miich mmu̶naangu̶xy ko u̶u̶ch njanchkáxu̶ch y ko u̶u̶ch je̱'e̱ viino njanch'u'ugy, y ko u̶u̶ch je̱'e̱ pokyjya'aydyu̶jk nmu̶gu'ug'áty y je̱'e̱ yajkugube̱jtpu̶du̶jk ajku̶xy mu̶dyiibu̶ je̱'e̱ gobierno romano mu̶duungu̶xpu̶ñ. Peru̶ je̱'e̱ Dios tyu̶y'ajt jii je̱'e̱ ñi'igu̶xu̶'u̶gy ma pu̶njaty je̱'e̱ tu̶y'ajt nigapxp nimu̶dyaakku̶xpu̶ñ.”
Je̱'e̱ kajpt mu̶dyiibu̶ ka'p kyapxymyu̶doyu̶ñ
(Lc 10.13-15)
20Mu̶'it je̱'e̱ Jesús kajptja'ay ojtu̶gu̶u̶y ma najty je̱'e̱ mu̶jwinma'añ ni'igyu̶ may tu̶ tuñu̶ñ, je̱' ko je̱'e̱ jimbu̶ ja'ay mu̶dyiibu̶ najty jim tzu̶naaygyu̶xpu̶ñ ka'p najty je̱'e̱ tu̶ jyootwimbijtku̶xy ma je̱'e̱ Diosu̶ñ. Chi je̱'e̱ Jesús myu̶naañ: 21“¡Miich y'yoobu̶ ajku̶xy Corazín ja'ay! ¡Miich y'yoobu̶ ajku̶xy Betsaida ja'ay! Ko u̶u̶ch u̶xyu̶py jim Tiro kajpt y Sidón kajpt je̱'e̱ Dios myu̶jwinma'añ tu̶ nduunu̶ du'un neby u̶u̶ch je̱'e̱ mu̶dyiibu̶ ya tu̶ nduñ ma miich ajku̶xyu̶ñ, jékyu̶p u̶xyu̶py je̱'e̱ jyootwimbijtku̶xnu̶ ma je̱'e̱ Diosu̶ñ, y tu̶ u̶xyu̶py yajni'igu̶xu̶'kku̶xy mu̶u̶d je̱'e̱ wyit tyukxy ajku̶xy y'u̶ñaaygyu̶xy saacu̶ ni'ijéñ ni'ikuyjyaam u̶xkuyjyaam. 22Peru̶ u̶u̶ch miich nnu̶maaygyu̶xypy ko je̱'e̱ mu̶'it xu̶u̶ ko naty je̱'e̱ Dios tu̶ yajmu̶baad'áty mu̶naa tu̶ydyuna'añu̶ñ je̱'e̱ naaxwiiñjya'ay, ni'igu̶ mu̶k je̱'e̱ tzaachpyu̶ ayo'on miich mbaadku̶xu̶ch, ni'igu̶ ka'p je̱'e̱ Tiro ja'ay y Sidón ja'ay ajku̶xyñu̶ba. 23Y miich Capernaum ja'ay ajku̶xy, ¿nej mmu̶naangu̶xpu̶, mja'tku̶xu̶p jiiby tzajpjootyu̶? ¡U̶xtu̶ jaktimy'o'ogaam ayodaaktuuby myajku'uju̶bijpnajxku̶xu̶ch! Ko u̶u̶ch u̶xyu̶py jim Sodoma kajpt je̱'e̱ Dios myu̶jwinma'añ tu̶ nduunu̶ du'un neby u̶u̶ch je̱'e̱ mu̶dyiibu̶ ya tu̶ nduñ ma miich ajku̶xyu̶ñ, jim u̶xyu̶py je̱'e̱ jimbu̶ kajpt chamnu̶baadnu̶ y ka'p u̶xyu̶py je̱'e̱ Dios yajtu̶gooy. 24Peru̶ u̶u̶ch miich nnu̶maaygyu̶xypy ko je̱'e̱ mu̶'it xu̶u̶ ko naty je̱'e̱ Dios tu̶ yajmu̶baad'áty mu̶naa tu̶ydyuna'añu̶ñ je̱'e̱ naaxwiiñjya'ay, ni'igu̶ mu̶k je̱'e̱ tzaachpyu̶ ayo'on miich mbaadku̶xu̶ch, ni'igu̶ ka'p je̱'e̱ ja'ay ajku̶xy mu̶dyiibu̶ Sodoma naaxjooty tzu̶naaygyu̶xu̶ñ.”
Miingu̶x ma u̶u̶chu̶ñ y pókxku̶x
(Lc 10.21-22)
25Je̱'e̱ mu̶'it xu̶u̶ je̱'e̱ Jesús myu̶naañ: “Nyejkypyu̶ch je̱'e̱ Dioskujuuyu̶p ma miichu̶ñ, Dios Teedy tzajpjootypyu̶ Windzú̶n y naaxwiimbu̶ Windzú̶n, je̱' ko je̱'e̱ ayuuk tu̶ myu'uch mu̶dyiibu̶ yajni'idzookpu̶ñ ma je̱'e̱ kuwinma'añjya'aydyu̶jk y wijyjya'aydyu̶jk ajku̶xyu̶ñ, y tu̶ myajnejwu̶'u̶y je̱'e̱ ja'ay mu̶dyiibu̶ ka'p y'u̶xpú̶kyu̶chu̶ñ ajku̶xy. 26Dios Teedy, du'un miich tu̶ mduñ, je̱' ko du'un tu̶ mdzoky.
27“Je̱'e̱ nDeedyu̶ch tu̶ xyajku̶'u̶du̶gu̶u̶ydya'ay ku̶xyu̶ tijaty mu̶k'ajt oy'ajt. Ka'p ni pu̶n ixy'aty pu̶n je̱'e̱ Dios y'ung'ajtypyu̶ñ, je'eyu̶ u̶u̶ch je̱'e̱ nDeedy tu'kpajk pu̶n u̶u̶ch xy'ixy'ajtpu̶ñ; y ka'p ni pu̶n ixy'aty pu̶n u̶u̶ch nDeedy'ajtypyu̶ñ, je'eyu̶ je̱'e̱ Dios'ung tu'kpajk mu̶dyiibu̶ ixy'ajtpu̶ñ, y mu̶u̶d je̱' ajku̶xy pu̶njaty je̱'e̱ Dios'ung yaj'ixy'ajtu̶'u̶ge̱e̱mbyu̶ñ. 28Miingu̶x ma u̶u̶chu̶ñ nigu̶xyu̶ miich ajku̶xy mu̶dyiibu̶ anukxu̶'u̶ yajpaatku̶xpu̶ñ mu̶u̶d je̱'e̱ ñu̶u̶ tyuung ajku̶xy y chu̶my kyu̶'u̶y ajku̶xy, y u̶u̶ch miich je̱'e̱ pokxu̶ñ nmooygyu̶xu̶py. 29Ku'ubu̶jkku̶x je̱'e̱ ane̱'e̱mu̶ñ mu̶dyiibu̶ nmooygyu̶xypyu̶ñ, du'un neby je̱'e̱ wajyuubu̶ kyu'ugu̶'u̶ ku'ubu̶jkku̶xyu̶ñ, y jajtku̶x abu̶jkku̶x du'un ko u̶u̶ch je̱'e̱ me̱kxtujku̶ñ nmu̶u̶du̶ch y ko u̶u̶ch je̱'e̱ joot winma'añ yuung naaxypy nmu̶u̶du̶ch, y mu̶'íttu̶tz je̱'e̱ m'aanu̶mu̶ jootkujk'ajtu̶ñ paatku̶xu̶ch. 30Je̱' ko je̱'e̱ ane̱'e̱mu̶ñ mu̶dyiibu̶ nyajnu̶maaygyu̶xypyu̶ñ y je̱'e̱ tuung mu̶dyiibu̶ nmooygyu̶xypyu̶ñ ka'p je̱'e̱ myú̶ku̶ch.”
Currently Selected:
San Mateo 11: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005