यूहन्ना 1
1
किन्ज्योकी सुङ मिह ग्युर्ती फेप नाङग्यो
1जाम्बुलीङ छ्या़गे म़ेदी तोहङले सुङ ज़्य़ू नाङदी येहकें, ओ़ह सुङ किन्ज्यो ङ्याम्बु ज़्य़ू नाङदी येहकें, ओहले ओ़ह सुङॱराङ किन्ज्यो यिहन्गे। 2मिहरो जाम्बुलीङ छ्या़गे म़ेदी तोहङ यिहन्ज्युराङ किन्ज्यो ङ्याम्बु ज़्य़ू नाङदी येहकें।
3सुङ लाहमलेॱराङ किन्ज्योगी ना थाम्ज्यी छ्या़ च्य़ू नाङसीन। छ्या़ नाङग्योकी ना थाम्ज्यी मिहरोगी जेते मिहम्बा लेहमेन च्यि लाहमलेॱआङ माह-छ्या़। 4मिहरो ङ्याम्बु मिहली येहकें, ओहले ओ़ह मिहली मिहया़गी येहसेर येहकें। 5ओ़ह येहसेर ना़-जुबेला येहपा छ्या़गे ओहले ना़-जुबेगी ओ़ह येहसेरला नाहमॱआङ क्याहल मा़हखु।
6किन्ज्योगी यूहन्ना#१:६यूहन्ना : दि यूहन्नादी दि छ्य़े प्रुहएँन्गी यूहन्ना मिहम्बा, यिहॱनाङ बप्तिस्मा तेर्केन्गी यूहन्नादी यिहम्बा। मत्ती ३:१; मर्क १:४; लूक ३:१,२ मिहन थो़क्यो मेहन्दा च्यी़ला ताङ नाङसीन। 7खो लाहमले मिह थाम्ज्यीगी यिह-छ्य़े ख़ूज्यु म़ेदी ओ़ह येहसेरकी तेहन्दाला प्रा-साल्ज्येला खो पाङबु पेहती ओहङसीन। 8यूहन्ना खोराङनी ओ़ह येहसेर मिहम्बा यिहन्गे, यिहॱनाङ खो ओ़ह येहसेरकी तेहन्दाला प्रा-साल्ज्येला ओहङसीन। 9मिह थाम्ज्यीला क्या-साङे नाङगेन्गी तेहन्दामकी येहसेर जाम्बुलीङला फेप नाङगेराङ येहकें।
10मिहरो जाम्बुलीङला ज़्य़ू नाङदी येहकें, जाम्बुलीङ मिहरो लाहमलेॱराङ छ्या़सीन, यिहॱनाङ जाम्बुलीङगी मिहरोला ङोह मा़हस्ये। 11मिहरो राहङदीराङ मिहया़साला फेप नाङसीन, यिहॱनाङ राहङदीराङ मिहया़गी मिहरोला ची़नाङ माहबे। 12यिहॱनाङ काहजे मिहया़गी मिहरोला ची़नाङ पेहपा ओहले मिहरोगी छेन थो़ला यिह छ्य़ेबा, मिहरोगी खुङया़ला किन्ज्योकी छार्क्यीन डोएँगी ओङ नाङसीन। 13खुङ ठा़ दाङ, ज़ुबुकी सेम्बाया़ लाहमले ओहले मिहगी सेमगी ने़जेबा लाहमले क्येक्यो मिहम्बा, यिहॱनाङ किन्ज्यो लाहमले क्येक्यो ओहङगे।
14ओहले सुङगी मिहगी मिहली नोम्दी ङ्यिहगी पाहरक्यीला ज़्य़ू नाङसीन। मिहरो काटीन दाङ तेहन्दामकी काहङदे येहकें। ङ्यिहगी मिहरोगी ज़िज्यिद थोङसीन। ओहले ओ़ह ज़िज्यिदती याहपकी च्यिमे च्यी़राङ स़ेबुदी यिहन्गे।
15यूहन्नागी मिहरोगी तेहन्दाला मिहया़ला प्रा साल्गेनॱराङ क़े छ्यिम्बु तेन्दी मासीन, “ङाह म़ेदी तिङले फेप नाङगेन्दी ङाह म़ेदी चा़ छ्यिम्बु ज़्य़ू नाङदी येह, च्यिबेमाना मिहरो ङाह क्येएँ म़ेदी तोहङ यिहन्ज्युराङ ज़्य़ू नाङदी येहकें। ‘ङाहगी माक्योकी दि तामया़ मिहरोगी तेहन्दालाराङ यिहम्बा’।”
16मिहरो ङ्याम्बु काटीन बोलो-छ्योलो येहकें सोङबे ओ़ह लाहमलेॱराङ ओहराङगी काटीन थो़ला राहङसा काटीन ज्योर्ती येहबा। 17च्यिबेमाना मोशा लाहमले ओहराङगी छ्य़े-ठिम ज्योर्ती येहकें, यिहॱनाङ येशू मास्यीका लाहमले ओहराङगी किन्ज्योकी काटीन दाङ तेहन्दाम ज्योर्ती येह। 18किन्ज्योला सुगीॱआङ नाहमॱआङ थोङदी म़ेह, यिहॱनाङ किन्ज्यो याहप ङ्याम्बु ज़्य़ू नाङगेन च्यिमे च्यी़राङ स़ेबु किन्ज्योगी मिहरोला तेन नाङदी येह।
बप्तिस्मा तेर्के यूहन्नागी पाङबु तेरक्यो
(मत्ती ३:१-१२; मर्क १:१-८; लूक ३:१-१८)
19यरूशलेमकी यहूदी गोबाया़गी पूजाहारीया़ दाङ लेवीया़ला “यूहन्ना सु यिहम्बा नि?” म़ेदी टी़हज्येला खोसाला ताङसीन। 20ओहले यूहन्नागी ताम माहसाङबा पेहती थेका सिरेराङ ल़ेहन क्याहप्ती मासीन, “ङाह थार्पा तेर्केन्गी मास्यीका मिहन।”
21ओहजेला खुङया़गी यूहन्नाला दि ल़ेहमु म़ेदी टी़हसीन, “आहन्डा यिहन्सीमाना ख्ये सु यिहम्बा ले? च्यि ख्ये एलिया यिहम्बा?”
यूहन्नागी मासीन, “अहँ, ङाह मिहन।”
“आहना ख्ये ओ़ह लुहङतेम्बा#१:२१ ओ़ह लुहङतेम्बा : माक्योदी मास्यीका यिहम्बा। मला ४:५; व्य १८:१५,१८ यिहम्बा ले?”
यूहन्नागी मासीन, “मिहम्बा!”
22ओहले खुङया़गी खोला मासीन, “ओ़हठी यिहन्सीमाना ख्ये सु यिहम्बा ले? ङ्यिहला म़ेदोङ नाह, ओहले ङ्यिहला ताङग्योगी गोबाया़ला ङ्यिहगी ल़ेहन क्याहप ख़ूज्ये येह। ख्येगी राहङला सु यिहम्बा म़ेदी माएँ ले?”
23यशैया लुहङतेम्बागी सुङ नाङग्यो ल़ेहमु “ङाह, ‘चो़वो छ्येवा फेप नाङगेन्गी लाहमया़ ठाबे पेहतोङ’ म़ेदी रिह-काम्बुला क़े तेन्गे मेहन्दा च्यी़गी क़े यिहम्बा”#यशै ४०:३ म़ेदी यूहन्नागी ल़ेहन क्याहप्सीन।
24खुङया़ला फरिसीया़गी ताङग्यो यिहन्गे। 25ओहले खुङया़गी यूहन्नाला टी़हसीन, “ख्ये मास्यीकाॱआङ मिहम्बा, एलियाॱआङ मिहम्बा, ओ़ह लुहङतेम्बाॱआङ मिहम्बा मासीमाना, च्यिबे बप्तिस्मा तेर्के ले?” 26यूहन्नागी खुङया़ला ल़ेहन क्याहप्सीन, “ङाहगीनी छ्युगी च्यी़राङ बप्तिस्मा तेर्के, यिहॱनाङ ख्याया़गी पाहरक्यीला मेहन्दा च्यी़ ज़्य़ू नाङदी येहबा, ओ़हदीला ख्याया़गी ङोह मे़हस्येएँ 27ङाह तिङले फेप नाङगेन्दी मिह-रो़हराङ यिहम्बा। ओहले ङाह मिहरोगी स्याहप्चेनगी थाक्पा स्यी़ज्येॱआङ सी़हज्ये म़ेह।”
28दि केच्या यूहन्नागी बप्तिस्मा तेर्केॱराङ पेहक्योकी यर्दन चाङबुगी फार्केन देपला येहकेन्गी बेथानिया युहलला काहल्ग्यो येहकें।
येशू, किन्ज्योकी ल़ूह स्ये़बु
29नाहङबार च्युङ यूहन्नागी येशूला राहङ ङो़ले फेप्केनॱराङ जेक्यो थोङदी मासीन, “त़ेदोङ, जाम्बुलीङकी तिहक्पा क्या़दी नोम फेप नाङगे किन्ज्योकी ल़ूह स्ये़बु! 30मिहरोगी तेहन्दालाराङ ङाहगी माक्यो येहकें, ‘ङाह तिङले मेहन्दा च्यी़ फेप नाङगेराङ येहबा, मिहरो ङाह म़ेदी चा़ छ्यिम्बु येहबा च्यिबेमाना मिहरो ङाह क्येएँ म़ेदी तोहङ यिहन्ज्युराङ ज़्य़ू नाङदी येहकें।’ 31ङाह राहङगीॱआङ मिहरो मास्यीका यिहम्बा म़ेदी ङोह स्य़ेदी म़ेहबा येहकें, यिहॱनाङ मिहरोला इस्राएली मिहया़की पाहरक्यीला ङोहस्यी ताङज्येलाॱराङ ङाहगी बप्तिस्मा तेर्ते ओहङग्यो यिहम्बा।”
32यूहन्नागी दि ल़ेहमु म़ेदी पाङबु तेर्सीन, “ङाहगी नाम्पार-ताहक्पा थुला दुङगुकुर ल़ेहमु जेती स्यिहङगामले माहर फेप्ते मिहरो थो़ला ज़्य़ू नाङग्यो थोङसीन। 33ङाहगीनी मिहरोला ताहन्दा थुॱआङ ङोह स्य़ेदी म़ेहबा येहकें, यिहॱनाङ किन्ज्योगी ङाहला छ्युगी बप्तिस्मा तेर्तोङ सुङदी ताङ नाङसीन, मिहरोगीॱराङ ङाहला सुङ नाङसीन, ‘का़हन्दी थो़ला ख्येगी नाम्पार-ताहक्पा थु फेप्केनॱराङ जेक्यो दाङ ज्यू़गेॱराङ जेक्यो थोङगे, नाम्पार-ताहक्पा थुगी बप्तिस्मा नाङगेन्दीॱआङ मिह-रो़हराङ यिहम्बा।’ 34ङाहगी थोङदी येह, ओहले पाङबु तेर्ती येह, किन्ज्योगी स़ेबु मिह-रो़हराङ यिहन।”
येशूकी तोहङस्यो स्याहप्च्यीया़
35नाहङबार च्युङ येहपाराङ यूहन्ना राहङगी स्याहप्च्यी ङ्यी़ ङ्याम्बु ओ़ह ग्या़लाराङ लाहङदी तेहती येहकें। 36यूहन्नागी येशूला फेप्केनॱराङ जेक्यो थोङदी मासीन, “त़ेदोङ, किन्ज्योकी ल़ूह स्ये़बु!” 37यूहन्नागी माक्यो दि ताम थे़सीम्बाराङ ओ़ह स्याहप्च्यी ङ्यी़ येशूगी तिङदा तिङ काहल्सीन। 38येशूगी क्याहप लो़हदी ज़ी़ नाङगेमु खुङ ङ्यी़ तिङदा तिङ ओहङग्यो ज़ी़दी खुङया़ला टी़ह नाङसीन, “ख्याया़ च्यि छोल्गेराङ येहबा?” ओहले खुङगी येशूला मासीन, “रब्बी#१:३८ रब्बी : दिगी तेहन्दा लोबेन लाह म़ेदी माक्यो यिहम्बा।, राहङ का़हला ज़्य़ू नाङगो येहबा ले?” 39येशूगी खुङया़ला सुङ नाङसीन, “स्यो, ओहले ख्याया़गी थोङज्ये येह” खुङया़ काहल्सीन, ओहले खुङगी येशू ज़्य़ू नाङग्योकी ग्या़ थोङसीन। खुङ ओ़ह ङ्यिहमु येशू ङ्याम्बुराङ तेहसीन, च्यिबेमाना ओ़ह ती़हजीला कुहङॱसेगी छ्युजी ज़्यि काहल सिहन्दी येहकें।
40यूहन्नागी माक्योकी ताम ङ्यिहन्दी येशूगी तिङदा तिङ डोएँ मेहन्दा ङ्यी़ नाहङला च्यी़दी सिमोन-पत्रुसकी नो़ह अन्द्रियास यिहन्गे। 41खोगी थाम्ज्यी म़ेदी तोहङले राहङगी आदा सिमोनला थू़दी मासीन, “ङ्यिहगी मसीहला थ़ूसीन।” (हिब्रू तामला “मसीहकी” तेहन्दाती ग्रीक तामला “ख्रीष्ट” ओहङगेमाना प़ेह तामलादी मास्यीका ओहङगे।) 42अन्द्रियासगी सिमोनला येशूसाला ख्येर्सीन। ओहले येशूगी सिमोनला ज़ी़दी सुङ नाङसीन, “ख्ये योआनेसकी पुह सिमोन यिहन, ख्येला केफास म़ेदी माज्ये येह।” (दिला ग्रीक तामला पत्रुस म़ेदी माएँ।)
येशूगी फिलिप दाङ नथानेलला क़े क्याप नाङग्यो
43नाहङबार च्युङ येशू गालील साने़ला फेप्च्ये म़ेदी थेन फेप्सीन। ओहले येशूगी फिलिपला थु नाङसीन ओहले सुङ नाङसीन, “ख्ये ङाहगी तिङदा तिङ स्यो।” 44अन्द्रियास दाङ पत्रुस ल़ेहमुराङ फिलिपॱआङ बेथसेदा क्याहसादी यिहन्गे। 45फिलिपगी नथानेलला थू़दी मासीन, “छ्य़े-ठिमला मोशा दाङ लुहङतेम्बाया़गी का़हन्दी मिहगी तेहन्दाला प्री़हदी येहकें, मिहरोला ङ्यिहगी ज्याल्सीन। मिहरो नि नासरत युहलला ज़्यू़गेन्गी योसेफकी पुह येशू गा यिहन्गे दुबा।”
46दि थे़दी नथानेलगी खोला मासीन, “नासरतलेगीॱआङ च्यिॱआङ या़हबु स़ेह ओहङ ख़ूएँ ले?” ओहले फिलिपकी मासीन, “ओहङदी ता स्यो नाह ले!”
47येशूगी नथानेलला राहङ ङो़ले ओहङगेॱराङ पेहक्यो ज़ी़दी खोगी तेहन्दाला सुङ नाङसीन, “त़ेदोङ, खो तेहम्बा-तेहन्सुमॱराङ इस्राएली यिहन, खोला च्यिॱआङ क्येन म़ेह।”
48ओहले नथानेलगी टी़हसीन “ङाहला राहङगी काह-ठि पेहती ङोह ख्येन्बा ले?” ओहले येशूगी खोला ल़ेहन क्याहप्ते सुङ नाङसीन, “फिलिपगी ख्येला क़े क्याहप्केन म़ेदी तोहङले ङाहगी ख्येला को़स्यीङ तोहङबो चो़ला थोङग्यो येहकें।”
49नथानेलगी येशूला मासीन, “रब्बी, राहङनी किन्ज्योगी स़ेबु यिहन्गे दुबा, ओहले राहङनी इस्राएलीया़गी क्याहल्बु गा यिहन्गे दुबा।” 50ओहले येशूगी खोला ल़ेहन क्याप नाङसीन, “ङाहगी ख्येला को़स्यीङ तोहङबो चो़ला थोङग्यो माक्यो सुङगोराङ च्यि ख्येगी यिह छ्य़ेक्यो यिहम्बा? ख्येगी दि म़ेदीॱआङ छ्यिम्बु से़हया़ थोङज्ये येह।” 51ओहले येशूगी खोला सुङ नाङसीन, “तेहम्बाराङ ङाह ख्येला माएँ, ख्यागी स्यिहङगाम खा फे़क्यो दाङ किन्ज्योकी स्यिहङगामकी स्याहप्च्यीया़ला मिहगी स़ेबु थो़ला याहर-माहर पेहक्यो थोङज्ये येह।”#उत २८:१२
Currently Selected:
यूहन्ना 1: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.