Mataio 2
2
1Abele kerker ge Iesu esmelu muige Bethelema Iudaia ge, abele kerker ge Heroda opole, dasmer, makoi le tabakeuare naiger pekelam Ierusalemaem,
2Kega, Nade abele kimiar uerem esmelu Iudaia le la Opole? abelelam keriba erdali abara uer abele naiger peke, keriba tabakeuare abi esorgiru abim.
3Heroda opole asor, E okasosok gako Ierusalema uridili.
4E natameare gaire zogozogo le giz a aotale giz abele ged ge, E uiabi nautmerare nade Keriso esmelu.
5Uiaba abi detagerare, Muige Bethelema Iudaia ge; abelelam perofeta detarare, kega,
6Mama Bethelema muige abele ged Iudaia, ma nole kebile gaire Juda opole; abelelam ma giz abele Tarima le, E sirdam Isaraela kara ged.
7Heroda gumik emariklu taraisare gaire makoi le tabakeuare abim, E nautmerare uiabim, na kerker uiaba erdali abele uer.
8Heroda naunarakare uiaba bakeuare Bethelemaem, kega, Bakeuare mamor deraimerare abele sursur uerem; ese uaba erdali, kari natomertare, kai naobukilu esorgiru abim.
9Ui ge aserare abele opole, ege uiaba bakeuare; dasmer, abele uer uiaba erdali naiger apek, kekiam uiaba opem, abele uer emerilu tumem abele kebi uerem ra uteb.
10Uiaba erdali abele uer, uiaba au sererege.
11Uiaba barot abele meta, uiaba erdali abele uerem gako abara apu Maria, a uiaba esorgiru abim; uiaba detuerare a itiru uiaba lu, ege uiaba naisuerare abim nase lu, abele gold, gako sus lipano, gako abele sus muro.
12Uiabim natomertare abele peim ge Adelam uiaba nole ko bakomet Herodaim, ui ge bakeuare uiaba gedim nerute gab ge.
13Ui bakeuare, dasmer, abele Opole ra angela E natomertare Iosefaim abele peim ge, kega, Tekue, ma ais abele sursur uerem, gako abara apu, ua derareteder Aigupitoem, uaba emeridare kari naokaideroa kara mer marim, abelelam abele Heroda E deraimerare abele sursur uerem ko ipitare eumilu.
14E tekuelu a ais abele sursur uerem, gako abara apu abele ki ge, ui bakuidare Aigupitoem;
15E dauer niai niai Aigupito ge abele itudilu Heroda ra mop; iaueakai bakedida abele Opole ra mer perofeta detarare, kega, Kaka dabgiri kara uerem Aigupitolam.
16Heroda nardarare gaire makoi le abi okaderdare, abelelam E au uekuge E namarkare uader le narsare kimiar uerem giz Bethelema ge bakedida nener ge, ditimedare uiaba neis urut, gako uader kebile maike abkoreb, abele kerker ge Heroda deraimerare gaire makoi le.
17Ga akailu abele Ieremia perofeta ra mer, kega,
18Ua aserare abele ebazoer Rama ge, abele au ebazoer op batapelare, Rasera E ezuer abara omasker, umer kak E paimilu, abelelam abara omasker eseamulu.
19Ege Heroda eumilu, dasmer, abele Opole ra angela etomelu Iosefaim abele peim ge Aigupito ge,
20Kega, Ma ais abele sursur uerem, gako abara apu, bakeuidare abele gedim Isaraela; abelelam emetu eumilu uader le deraimerare abele sursur uerem ipitare eumilu.
21E ge tekuelu ais abele sursur uerem, gako abara apu, ui ge bakeuidare abele gedim Isaraelaem.
22Epe E asoli Arekilao Iudaia Opole Heroda ra kes abara aba, abelelam E au geum ko bakeam abele; ege peike abi etomelu abele peim ge Adelam, Ma bakeam abele ged Galilaiaem;
23A E bakeam nerute uteb nei Nazareta E emerilu; ga akailu abele gaire perofeta ra mer, kega, E nei etkeroa Nazareta le.
Currently Selected:
Mataio 2: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.