Matáyɔ 8
8
Yéso anamisi nto á sǔ
(Ɔna phɔtɔ Mkɔ 1.40-45; Lók 5.12-16)
1Ɓî Yéso ɗáodida mamba, usɛsɛ á ɓakpa ɓáomɓea. 2Cɔ, nto á sǔ moci, áɔsɛkɛɗa ka mpɛphɛ á Yéso, áogbuka muanku mosá akɛ, áongea: «Mɔkɔta, aoɓá n'okondi, ɔɔtɔka n'omosokosei.» 3Yéso áonanoa njaga, áondunga, áongea te: «Cɔ, nekondi, neosokosei.» Kɛ̌kɛndɔ, nkpa ndɔ áoama ka sǔ nɛkɛ. 4Mpɔ, Yéso áongoɗea: «Ɔ́ka phɔ́, kɔ́ntɔ̌miɛ mɔnɔ nkpa nyɔngɔ ndɔ. Gǎ ndiu óphangisiɛ sasakɔ ka ntoɓeigi-phɛ́a, óphúiɛ phɛ́a ka Mokonga ɓíndɔ Mósa ɗásosi ka gea, ɓakpa ɓɔbu ɓáengekisɛ gea oami#Ɔna Ɓlw 14.2-32.»
Amisa á mbɛɗanigi ndea mɔkɔta á ɓato émani ndea Ɓalɔ́ma
(Ɔna phɔtɔ Lók 7.1-10; Yoá 4.43-54)
5Ɓî Yéso ɗáongia ka Kapɛɛnaúmu, mɔkɔta á ɓato émani á Ɓalɔ́ma áobika bíbí akɛ, áonɗengemisaga, 6áogeae: «Mɔkɔta, mbɛɗanigi nɛmɔ aɗe k'éka n'endu, nnaoemana, aotambaga phɛɛ.» 7Mpɔ Yéso áongoɗea te: «Negande onamisa.» 8Mɔkɔta á ɓato émani ndɔ áonsikisia: «Mɔkɔta, kékeni óngiɛ k'éndu nɛmɔ. Yɔnga gǎkɛ tɔ nyɔngɔ moci, na mbɛɗanigi nɛmɔ aamande. 9Nga eme, nena ɓakɔta íɓundɔ ɓá gǔ ani, ne phɔtɔ na ɓato émani nde ɓá kusi á kɔkɔta nɛmɔ. Neongoɗea ka ɓɔ: ‹Gǎ!› Áoga. Neongoɗea ka ɓɔ: ‹Bika!› Áobika. Neongoɗea mbɛɗanigi nɛmɔ: ‹Gea ɓe!› Áogea ɓó.»
10Ɓî Yéso aɔ́ki nyɔngɔ ndɔ, áoyayama na áǒngoɗea ɓunde ɗáɓátúomɓea: «Nenóngoɗi ɗoni gea, kɛ́mɔnimbɛ mɔnɔ nkpa sɔsɔɓɛ á Ɓaisilaɛ́li n'ana ɓeekea ángbó ɓea nnde á mmbee.» 11«Nenóngoɗi base gea: Ɓakpa ɓásii ɓábikande ka toka n'Okomo, n'Oyonga, ɓáeagande kimoci na Abalaámu, Isáka na Yakɔ́ɓɔ ka koɓoamɛ á na koba. 12Cɔ, ɓunde ɗáɓákeni ngia ka koɓoamɛ ndɔ, ɓáemakande ka keiphe na nsɛngɛ. Kó, ɓágámaeka na ea á minyɔ.» 13Mpɔ Yéso áongoɗea mɔkɔta á ɓato émani ndɔ te: «Gǎ mɔtɛ-akɔ, átɔtɔkɛanɛ k'oɓɛ ɓíndɔ oɓeeki!» Kɛ̌kɛndɔ tɔ, mbɛɗanigi á mɔkɔta ndɔ áoama.
Yéso aéamisi ɓasambi ɓásii
(Ɔna phɔtɔ Mkɔ 1.29-34; Lók 4.38-41)
14Mbusa, Yéso áoga k'éndu ndea Pɛ́tɛɛ. Kó, áondonda ama-nkakɛ na Pɛ́tɛɛ n'aɗe k'éka, nyama akɛ n'ájó. 15Yéso áondunga ka njaga, jóngá á nyama ndɔ áonsia. Nke ndɔ áoma, áokpanga únaneaga akɛ.
16Ɔgɔgɔ, ɓáombikia Yéso na ɓato á kukuwa á ɓansombo ɓásii. Yéso â tɔ ǒphumba ɓansombo ndɔ na yɔnga, â phɔtɔ ǒamisa ɓasambi ɓɔbu. 17Cɔ, nyɔngɔ ndɔ ɗátɔtɔkɛani ɓíndɔ Isáya mɔtu-nyɔngɔ ndea Mokonga ɗáyɔngi: «Yɛ ɗákumbi ɓoɗoko á tambaga asu na áokumba esambɔ nɛsu#Ɔna Isa 53.4.»
Ɓakpa nde ɓaokonda ɓeá á Yéso
(Ɔna phɔtɔ Lók 9.57-62)
18Ɓî Yéso ɗáɔni usɛsɛ á ɓakpa na ɓántimbi, áǒsosea ɓagoigi nɛkɛ ɓájabɛ kubi á etǔ. 19Nɗundu-ɛɔphi moci áɔsɛkɛɗa ka mpɛphɛ akɛ, áongea: «Ngoisigi, nekoɓeande ɔma bubui nde ogande.» 20Yéso áongoɗea: «Ɓanyama ɓea ɓakɛnsɛngɛ ɓá na kubu, ɓambǔ ɓá na iɓɔ. Cɔ, Muna-Nkpa, nna gǎkɛ na ɔma á tɔ̌.»
21Mbusa índɔ, ka ɓagoigi nɛkɛ moci áongoɗea te: «Mɔkɔta, ómososea, négɛ némúmbɛ phɔ́ abɛ.» 22Yéso â gǎkɛ ongoɗea: «Ómoɓea, óɗeketa ɓakpa nde ɓáku ɓéúmbɛ ɓakpa nɛɓɔ íɓunde ɓáku.»
Yéso aphɔngisi sumbu
(Ɔna phɔtɔ Mkɔ 4.35-41; Lók 8.22-25)
23Mpɔ Yéso áokambea ka koko, ɓagoigi nɛkɛ ɓáomɓea. 24Mɔngɔ ímoci, sumbu akpɛ áosinda k'étǔ, iɓo áongia suɓi á koko. Yéso ɗá gǎkɛ oɗa. 25Ɓagoigi ɓáɔsɛkɛɗa bíbí akɛ ɓáonjujukisa na ngoɗea akɛ: «Mɔkɔta, ósoamisa, ɓesi!» 26Yéso áǒsikisia te: «Ɓato á ɓeekea ábɔa nde ca! Eke nde ɓomáoɓanga?» Yéso áoma, áokea sumbu na iɓo, kekanga áɔphɔnga phioo! 27Ɓɔbu ɓáoyayama na gea: «Nkókó á nkpa sina mmbé! Nga, Sumbu n'etǔ a phɔtɔ ɔmɔ́ka#Ɔna Jab 65.8; 89.10; 107.23-32.»
Yéso aéamisi ɓakpa ɓaɓɛ á kukuwa á ɓansombo
(Ɔna phɔtɔ Mkɔ 5.1-20; Lók 8.26-39)
28Ɓî ɓájabi ye kubi á etǔ, ka nji ndea Ɓagɛdáli, ɓakpa ɓaɓɛ á kukuwa á ɓansombo, ɓáotóka ka bóta, ɓáoga odondana na yɛ. Ɓakpa ndɔ ɗáɓákái phɛɛ, nkpa ɗáká ye okinia nyɛ́nya k'aphe ndɔɔ. 29Ɓato á kukuwa ndɔ ɓáokoga: «Muna-Mokonga hoo! Ekende ɓen'oɓɛ kau ee? Obiki osotambisaga mbenɔ nɛsu na ka kpeengeanimbɛ?»
30Wa, ekombo ángbó á ɓangɛa ɗáɓátúoeaga ɗanga na ɓɔ. 31Ɓansombo ɓáonɗengemisaga Yéso gea te: «Aoɓá n'osóɓǐgi, ósososea pɛ ɓéngiɛ suɓi á ekombo ndosi.» 32Yéso áǒgea: «Gǎni!» Ɓansombo ɓáǒjuana ɓakpa ɓaɓɛ ndɔ, ɓáongia suɓi á ɓangɛa ndɔɔ. Kɛ̌kɛndɔ, ekombo bui á ɓangɛa ɓáodida mamba mbangɔ, ɓáoga oguia k'étǔ, ɓáosia ɓɔbu kó!
33Ɓaɓondigi-ɓangɛa ɓáotea, ɓáoga mbangɔ ka ntanga-nji ka tɔ̌miaga á nyɔngɔ nde ɗágeani ka phɔa ɓakpa ɓaɓɛ ndɔ ɗáɓátú na ɓansombo. 34Mpɔ, ɓakpa ɓɔbu á ka ntanga-nji ndɔ, ɓáombikia Yéso, ɓî ɓámɔni ye, ɓáonɗengemisaga gea, átokɛ ka nji nɛɓɔ.
Currently Selected:
Matáyɔ 8: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.