MOTHI 8
8
Jisu Arje Ibeng Ihutyok Kapame
(Mrk. 1:40-45; Luk. 5:12-16)
1Anang inglong kartulpe para wang kisun amun, arleng ako-ong anang phel duno. 2Aro langot, ihut arje ibeng kiso arleng anang dungyok wangsi, tarhuksi pulo, “O Hemphu, nang aneng do, tene neyok pangthir phlen une.” 3Lalongsi Jisu ari chirungsi anangyok papholo aro pulo, “Ne anengdo, nang ingthir phlenot.” La jong-jongsi anang arje ibeng kiso pame detno. 4Aro Jisu anangyok pulo, “Chilang wenot, labang alam kai yokta thanenot; manta damot, bangthepo ango nang chipaklang damot, bang angot hakhi kipiyok, Mosi po kipu ateng athuli long nibot pidamot.
Sonturi Aghaipo Kikrol Alam
(Luk. 7:1-10)
5Jisu Kaparnaum yok kilutdam amun, ihut Roman sonturi aghai po anang dung wangsi, anangyok chingduksi pulo, 6“O Hemphu, ne murkiya ihut aturu po atot-kangwe kisosi tan-atsi, hemlong tihetsi do.” 7Aro Jisu anangyok pulo, “Ne damsi anangyok pame ye.” 8Labang sonturi aghaipo puphak ngo, “O Hemphu, nang nehem kilut dam yok, ne ladi michangche; manta ithe alamthe det punot, la-amunsi ne turupo medetne. 9Piyok pu tene ne ta ihut bang arlo arleng dohlong do; ne arlo ta sonturi hel do; aro ne ihut yok ‘dam!’ putene, anang daman, ne ihut poyok ‘wang!’ pu tene, anang wangman; aro ne turu poyok labangpo tiki pu tene, lata anang tikiman. 10Jisu labang alam arjusi asombhik hlongsi, aphel wang-kidun arleng helyok pulo, “Ne naliyok khanangsi thando, Israyel asitem ne la-an kikrol jatsi pahlonghle yong. 11Aro ne nali thando, arleng ako-ong ni-hang pen ni-chel aga para wangsi, Abraham po, Aisak aro Jakup po pen ethakpe longri long anali chojun yok wang ininge. 12Manta longri long kido asohel yok mokol kangting aju tidetne; lalong surujo ye aro aso chingkretne.” 13Aro Jisu sonturi aghai poyok pulo, “Nang hemyok damot; aro jibadi krolo, latengne nang pachok dun nang.” Lalongsi labang turu po la-apor jongsi me detno.
Jisu Arleng Ako-ong Kapame
(Mrk. 5:1-20; Luk. 8:26-39)
14Aro Jisu ke Pitor po ahem lutdamsi, anang anipe yok asesi ki-ih thek damo. 15Lalong Jisu arlengpe ari otnosi, parake ase hamo, aro anang thursi mesosi anangyok al eno. 16Anithu apor chokngo, arleng hel ako-ong si-ik kachu-u arleng Jisu adung wano apot, Jisu lamthe ajakong pensi si-ik hel ujharo, aro ahuwit kisohelyok pamelo. 17“Anangsi ili ki-un-eh hel eno, aro ili kiso hel pon detno,” labang alam Jisoya turkipo parasi kipu alamthe, kichok pen ayok lamehel chiplango. 18Jisu anang chikomwolsi rat ako-ong theksi, bilpe ha aga apar anang adun hel ayok kapadam ayok thano. 19Aro labang apor ihut kanong paklangpo wang phitsi anangyok pulo, “Paklang po, nang jotmahal damta, ne ta nang phel-phel dune.” 20Lasi Jisu anangyok pulo, “Mengsurung helke kido ang-gogdo, suneng kangjar awo helta atar do; manta Arleng Aso ke ki-ih aphu kibichok athemso ta ingjong pen. 21Adun hel asitem prek adun ihut pulo, “Hemphu, ango ke damsi, ne apa yok kipep dam aphan neyok hawang nepi not.” 22Manta Jisu anangyok pulo, “Nang ne phel-phel angdunot; kithi arleng hel anali abithangne pachipep nang.
Jisu Tomon Kapangdom
(Mrk. 4:35-41; Luk. 8:22-25)
23Jisu tilong athak arlulo, aro anang adun hel anang phel duno. 24La-amun langot, langpe long tomon akithe wangsi, lang adul anat tilong tol rang-rango; manta Jisu ke amek jangsitsi kido. 25La-amun adun hel anang dung damsi, anangyok pangthursi pulo, “Hemphu, hali ralnot; halike thi hlongbo.” 26Jisu analiyok pulo, “Nali beksodet kikrol abang, nali piyok pheredet do? Laparake anang thursi, tomon pen lang adulyok kapaham aphan pusero; la aphel jongsi ingsam hetno. 27Lalong ahuwit ta asombhik hlongsi pulo, “Anang ke pot badihak arleng! Tomon aro langpe ta anang lam mengman?”
Bang Hiniyok Si-ik Ajiu Kachu-u Kapame
(Mrk. 5:1-20; Luk. 8:26-39)
28Laparake Jisu ha aga apar damsi, Gadara hel alongri yok damsi, lalong si-ik kihap bang hini arleng thiri long para olesi, anang ango wang hlengo; lahel la-an kaphere meme arleng anat, kaita labang aduwar ajon dam wang un-ehsi kido. 29La-amun langot, lahel Jisu yok hangsolsi pulo, “Ei Arnam Aso, halipen nang pot asal do? Apor kichokche angotsi haliyok aduk kipiyok wango ma?” 30La-amun anali para bekso akaholo long, phak ajhakura isi chopansi kido. 31Lasi si-ik kihap abang Jisu yok chingdukngo, “Nang hali ujhare tene, phak ajhakura arloyok hali tolnot.” 32Aro Jisu analiyok pulo, “damot.” La-amunsi si-ik hel mokol olesi, phak helyok hapdamo; aro langot, labang phak hel ajhaksi kat-katsi, langpe akung para chonprulsi, lang along thidetno. 33Phak kiwi arleng hel rongso yok katsi damo aro si-ik kihap arleng hel pot kachiplang ma thandam detno. 34Aro langot, ahuwit rongso para Jisu pen kapochak yok wango; aro anangyok theksi, anali hol para tikangne kapadam yok chingdukngo.
Currently Selected:
MOTHI 8: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.