JOHON 9
9
Chotok Arleng poyok Jisu Kapame
1Jisu dam jongsi kido amun, kiplang para chotok kido arleng ihutyok thekngo. 2Anang adun hel anangyok pulo, “Rabbi, labang arleng chotokne kiplang ke, labang arlengpo pap tiki lo ma, lale anang ape-apo pap katiki parasi chiplango ma?” 3Jisu pulo, “Labang arlengpo pap tikilo, lale ape-apo pap tiki lo, ladi kalek, manta kachotok poyok Arnam asal pachiklang ayoksi chokdo. 4Ili arni kido amunsi neyok wang kitol asal ili tiki nange. Ladi arni kaita sal tiki un-eh, ladi anuwe wangsi do. 5Pirthepe long kido hlong adak, hane si pirthepe long katha-ang.” 6Labang alam thansi Jisu lungle long ingthoksi, ingthipo pen inghan otesi, labang inghan arlengpo amek long helsi, 7anangyok pulo, “Damot, Silom [Silom, achoke kitol] kipu phukrikpo long nang mahang chicham damot.” Lasi anang damsi chichamo, aro amek thek phaksi wango. 8Adung arel abang, pen ango anangyok kachohrek-wor kithek, anali pulo, “Iningsi kachohang-wor arleng bangpo kalek ma?” 9Angkhan ke pulo, “Anango;” Angkhan ke pulo, “Kalek, manta anang badisi thekman.” Anang bithang si pulo, “Ne si labang arlengpo lo.” 10Lalong anali anangyok arjulo, “Tene nang mek pot badi charo?” 11Anang pulo, “Inghoyok Jisu puman, anang inghan otesi, nemek long helsi neyok pu lo, “Silom yok damne chicham damot;” Lalong ne damsi chichamo aro nemek thekngo.” 12Anali anangyok arjulo, “Bang arlengpo daklongte do?” Anang pulo, “Ne than un-eh.”
Pharisi hel Kiso Kapame Alam A-udi Kapa-en
13Anali ango para chotok kido arlengpo yok Pharisi hel adung wano. 14Minon ke konam arni Jisu inghan otesi anangmek hel mek kapathek, la arni kisang-arni kido. 15Lasi Pharisi hel anang yok arju phakngo, “Pot badi nang mek hel thekngo.” Aro anang analiyok pulo, “Anang nemek long inghan helo, aro ne chichamsi nemek thekngo.” 16Angkhan Pharisi hel pulo, “Labang arlengpo Arnam para kiwang kalek, piyok pu tene anang kisang arni mainotne.” Manta angkhan ke pulo, “Papi arleng pot badi labadi asombhik asal tiki une?” 17Ladisi analidak chibhak ngo. Lasi anali mek chotok arlengpo yok arju phakngo, “Anang nangmek kapathek apot, anang alam nang ke pot puye?” Anang pulo, “Anang ihut turkipo.” 18Anang mek chotok kido aro mek charo, anang lam Jihudi hel mek kithek hlong arlengpo ape-apo yok taramre lengke, anali krolkre yongo, 19aro analiyok arjulo, “Nali inghoyok kiplang para chotok do puman, lalo nang sopo ma? Tene minon anang pot badi thekngo?” 20Anang ape-apo hel pulo, “Lalo hali sopo, aro kiplang para mek chotok, labang hali thek; 21manta anang minon pot badi amek thekdo, bangpoke than un-eh, aro inghosi anang amek pathekngo, bangpo ta hali than un-eh. Anangyok arju; anangke abo chokngo. Anang abithang alam abithang chithane.” 22Jihudi helyok kaphere anatsi anang ape-apo labadi pulo, piyok pu tene inghosi Jisu yok Khristo pusi krole, anangyok ke Arnam ahem para prek padoye, labadi kachipachip kreng. 23Lasi anang ape-apo pulo, “Anang akirelo; anang yokne arju not.” 24Lasi anali phong-ni apor mek chotok arlengpo yok taramsi anali anangyok pulo, “Arnam yok parklam! Labang arlengpo papi pusi hali than un.” 25Lalong anang pulo, “Anang papi la ne kalek, bangpo neke than un-eh; ne mek chotok kido, aro minon ne mek thekdo, la imung alamsi ne thek.” 26Anali anangyok pulo, “Anang nangyok pot te ka-ote? Anang nang mek hel pot badi mek pathekngo?” 27Anang analiyok pu phakngo, “Angosi nali than tango, aro nalike onene yongot; tene piyok te nali ka-one phakyok aneng do? 28Laparake anali anangyok hao pisi pulo, “Nangsi anang dun; manta halike Mosi po adunsi. 29Arnam Mosi po yok lam kithan, pusi hali thek; manta anang daklong arleng, bangpo than un-eh.” 30Labang arlengpo analiyok pulo, “Anang nemek pathek ngo layong ta anang daklong arleng, bangpo nali than un-eh, bangpo konbak asombhik alam! 31Arnam ke papi arleng hel alam onehne, manta inghone bak anangyok kachirdom arlengpo, aro anang kar-ih alam meng, tene anang yoksi Arnam oneman, bangpo ili thek. 32Inghone bak pirthepe long kiplang para mek chotok arlengyok amek kapathek, pirthepe kicheng para jatsi arju hlonghle yong. 33Labang arlengpo Arnam para kiwangwe tene, anang pene bak tiki un-eh lo hoi.” 34Anali anangyok pulo, “Nang pap long plangsi the-dingo aro nang hali kapaklang yok oledo ma?” Aro anali Arnam ahem para prek bisi tolo.
Jiulilong Kachotok Klak Alam
35Anali arleng poyok kamprek yok tol hrolo, labang alam Jisu arju hlongsi, aro anangyok thek hlongsi anangyok arjulo, “Nang Arleng Aso yok kroldo ma?” 36Anang pulo, “Hemphu, ne anangyok krole, manta anangke ingho te?” 37Jisu anangyok pulo, “Nang anangyok thek ngo; aro nangpen anang lam chithando, labang si anango.” 38La-amun, “Hemphu, ne krol do” ladi pusi, anang Jisu yok chirdomo. 39La-amun Jisu pulo, “Inghosi mek thekthe, anali mek kithek aphan, aro ingho si mek thekman, anali ke mek chotokman, la-anatsi bisar ka-ote aphan ne pirthepe long wangdo.” 40Labang kithan arjusi anang dung kido Pharisi hel anangyok arjulo, “Hali ta mek chotok hlongo ma? 41Jisu analiyok pulo, “Kachotok nang tene, nali pap dode lo hoi; manta minon pudo ‘Hali mek thekdo,’ labang anat nalilong pap dolo.
Currently Selected:
JOHON 9: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.