JOHON 7
7
Jisu Aro Akortehel
1La-aphel Jisu Galili longyok damo. Jisu Judiya long karting dam aneng kangwe, piyok pu tene Jihudi hel anangyok kamari awak langsi kido. 2La-amun Jihudi hel Kuntulu-kamai adung hetno. 3Lasi anang kortehel anangyok pulo, “Nang holek para aro Judiya yok damot la apot jipe asal tikido nang adun helta labang hel pathek ponot; 4piyok pu tene ingho sal pachithang katiki ron tene, kaita jul-julke sal tikike. Lamehel asal tiki, tene nang bithang pirthepe yok chipaklang.” 5(Piyok pu tene abithang akorte helta anangyok krolkresi kido.) 6Lasi Jisu analiyok pulo, “Ne aporpo ke minon hok chokchelang, manta nali aporpo ke arniten dolen do. 7Pirthepe nali sim un-eh; ne yok si simman, piyok pu tene lahel katiki asalhel kangho pusi ne anali lam hakhi pisi wangdo. 8Nali labang kamai ayok damot. Ne labang kamai ayok damde bang; piyok pu tene ne apor ke minon hok chokche lang.” 9Labang alam kithan aphel, anang Galili alongsi dolo.
Kuntulu Kamailong Jisu kido
10Manta anang musohel labang kamai yok kidam aphel, anangta arleng kithek badi damdesi, chibutisi damo. 11Jihudi hel kamai along Jisu yok lang-worsi pulo, “Anang dak longte do?” 12Aro rat hel asitem anang lam anat jokha chingjelo, angkhan ke pulo, “Anang ke akime arleng;” angkhan ke pulo, “Kalek, arleng helyok pangho pondo.” 13Yongta Jihudi hel yok pheresi ananglam ihut ta pudak halhe yongo. 14Konam kamai dojongo, la-amunsi Jisu Arnam ahem damsi paklang pono. 15Lalong Jihudi hel asombhik hlongsi pulo, “Anang jat lo chirlile det yongta agiyan pot badi thekngo?” 16La-apor Jisu analiyok pulo, “Labang kapaklangpo ke ne para kalek, neyok wang kitolpo parasi. 17Inghone bakpo anang ahisa mainotyok chiron, tene labang kapaklang Arnam para ma, ma ne bithang apharan para thando, anang than une. 18Inghosi abithang ajakong pen thando, anangke abithang jortang chilangman; manta inghosi anangyok wang kitolpo jortang chilangman, anangke khanang, aro anang long ke akangho dode. 19“Mosi po, naliyok kanong nali pipe yong ma? Yongta nali ihut ta labang kanong mainotne? Ne kamari yok awak chilangdo?” 20Arleng hel pulo, “Nang long si-ik aghaipo do! Nangyok inghote nang kamari yok bisar do?” 21Jisu analiyok pulo, “Ne sal imung tikisi paklango, la-amun nali ahuwit ta asombhik hlong detdo. 22Mosi po naliyok sunnot kanghol abi-pun pilo [bangpo ke Mosi po para hlongo, ladi kalek, sar-larhel parasi hlongo] lalong kisang-arni so-penso yok sunnot inghol man. 23La-apot Mosi po kanong pangho hlonghle yok nali kisang-arni so-penso hel yok sunnot ingholdo, tene ne ke kisang-arni ihut arleng yok pame lo, lasi nali neyok aneng kang do ma? 24Anglang langke bisarse si, kangthir bisar ote ponot.”
Anango Khristo Ma?
25La-amun Jerusalem long angkhan arleng pulo, “Anali ingho yok kamari awak langdo, bangpo anang kalek ma? 26Aro langot, anang pachiklan daksi lam thando, layongta anali anangyok penebak pu dun chetche. Anangsi Khristo pusi phu-phang hel khanangsi chinido ma? 27Yongta anang daklong para wango, bangpo ili than un; manta Khristo wang tene, anang daklong para wangdo, labang ihut ta than un-eh ye.” 28Laparake Jisu Arnam kachirdom ahem long hang-hangsi kapaklang alam paharsi pu lo, “Nali nechini do, aro ne daklong para wango, labang ta nali than un. Ne ahisa ke wangwe yong, manta inghosi neyok wang tolo, anangke khanang, aro anangyok nali chinine. 29Ne ke anangyok chinido, piyok pu tene ne anang parasi wango, aro anangsi neyok wang tolo.” 30Lalong anali anangyok kinepyok awak lango, layongta kaita anangyok ot halhe yongot, piyok pu tene anang apor chokche lang. 31Yongta rat ako-ong anangyok krolsi pulo, “Konam Khristo wange, labang arlengpo kapaklang asin yokta asombhik chot asin paklang une ma?”
Jisu yok Kinep Aphan Sonturi Ayok Kitol
32Rat hel anang lam ladi kachithanjo, Pharisi hel arjulo, aro bor-bangthe aro Pharisi hel anang yok kinep ayok salchak paton helyok tolo. 33Jisu laparake pulo, “Ne aro bekso apor nalipen dosi, neyok wang kitolpo adunyok dame. 34Nali neyok bisare, manta hlonghle ye; aro ne daklong doye, nali lalong dam un-eh ye.” 35La-amun Jihudi hel ihut para ihut chipulo, “Ili ke anangyok bisarta pahlonghle ye, anangke daklong yok te dame? Grik arleng asitem kachingrum adung damsi, Grik helyok paklang dame ma? 36“Anang ke pudo, neyok bisare, manta hlonghle ye, aro ne daklong doye, lalong dam un-eh ye’ bangpo ke pot te alam?”
Ajiu Kipi Arlok Alang
37Kamai kijut arni, lake akithechot arni, Jisu arjapsi, asi pathesi pulo, “Inghone bak arleng lang-ik pu tene, anang nedung wangne wang-junot. 38Ingho neyok krolman, lo-kangthir long kipu badi, ‘Anang thin arlo para ajiuli alang arlok alangjon hel badi boisi dame.’ 39Anang yok kikrol abang ke Jiuli hlonge, la-aphan anang labang alam pulo; piyok pu tene la-amun yokta Jiuli pipe lang; piyok pu tene la-amunyok Jisu thurke damde lang.
Arleng Hel Adak Kachibhak
40Konam anali lamehel alam arjulo, rat hel angkhan ke pulo, “Khanangsi anangke la turki po.” 41Inghone bak ke pulo, “Anang ke Khristo lo.” Manta angkhanke pulo, “Khristo ke Galili long para wang plang une ma? 42Khristo ke Dabhit po agijing, aro Dabhit po kido Bethlehem arongso para wang plange puke lo-kangthir long pupe yong ma?” 43Ladisi anang lam rat hel asitem chibhakngo. 44Aro angkhan ke anangyok kinep yok aneng kido, yongta ihut ta anangyok ot-halhe yongo.
Jihudi Phu-phanghel Kikrolkre
45Laparake paton hel damsi bor-bangthe hel aro Pharisi hel adung wango, anali paton hel yok arjulo, “Piyokte nali anangyok wanwe yongot?” 46Paton hel pulo, “Labang arlengpo badi ihut arlengta lam thanthe yong!” 47La amun Pharisi hel analiyok pulo, “Nali ta kangho aga pon tango ma? 48Pangdom phu-phang hel lale Pharisi hel adak inghone bak lalong krolman ma? 49Manta kanong kithekthe labang rat abangsi hao hlongo.” 50Anali sitem inhutke ango adak Jisu adung kidam, Nikodimas po analiyok pulo, 51“Kicheng ke arleng para lam arjuje lengke, aro anang sal kithekthe angoke ili kanong badike anangyok ado pi une ma?” 52La amun anali puphakngo, “Nang ta Galili arleng ma? Mesone lo-kangthir langsi than une Galili para ihut turki kiwang alam hlonghle ye.”
Kangho Kidoner Arloso peyok Kinep
53Laparake anali abangten abithang ahem yok damo.
Currently Selected:
JOHON 7: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.