JOHON 5
5
Phukrik Long Kiso Kapame
1Labang aphel Jihudi hel isi kamai wang hlengo, aro Jisu Jerusalem ayok damo. 2Minon Jerusalem long Bherabik-Owa adung kipu hem sarnuk phongo kido, lalong Hibru alam penke Bethsatha kipu phukrik isi do. 3Lamehel along chotok, kengkok aro atot kangwe —ladi ajat-jat kiso arleng ako-ong, 4lang kapachulwak aporyok inghongsi kido. Piyok pu tene konam apor labang phukrik ayok ihut Arnam tharlon wang sunsi lang pachulwak man, la-amun inghosi ango lang pachulwak long sunne, anang jibak kiso-kilakdo, anang labang para anang meman. 5Lalong thom-kep ne narkep anengkan para kiso arleng ihut kido. 6Konam Jisu anangyok thekngo aro jokha adin para lalong kido pusi than uno, anang kiso poyok pulo, “Nang kime yok anengdo ma?” 7Kiso arlengpo anangyok pulo, “Hemphu, konam lang pachulwak amun, neyok phukrik long nekipasun ponyok arleng ingjong; ne kidam jong amunsi, neyok ango bangsi sundam man.” 8Jisu anangyok pulo, “Thurnot, nang tarpo chi-olne keng-kam chijornot.” 9Lajong jongsi arlengpo photsi me penpano, aro anang tarpo chi-ol lo aro akeng chijorsi damo. Minon labang arnike kisang-arni kido. 10Lasi Jihudi arleng hel kiso kime arlengpo yok pulo, “Minike kisang-arni; kanong badike nang tar chi-ol pon hopot.” 11Manta anang analiyok pulo, “Ingho neyok kapame, labang arlengpo si neyok pulo, “Nang tar chi-olne akeng chijornot.” 12Anali anangyok arjulo, “Nang tar chi-olne akeng chijornot pune nangkipu arlengpo inghote?” 13Minonke kiso kime arlengpo inghosi anangyok kipame arlengpo chinine yongo, piyok pu tene Jisu rat ako-ong kido amunsi, chitereksi kidam. 14La-aphel Jisu Arnam ahem long anangyok theksi pulo, “Langot, nang medetno! Pap tikiye not, tangsi duk-lak nang chiplangple ye.” 15Arlengpo damsi Jihudi helyok thano, “Ingho anang yok kiso kapame arleng po ke, Jisu lo.” 16Anang kisang-arni lamehel tikilo, lasi Jihudi hel Jisu yok honjat pilo. 17Manta Jisu anali yok ladi puphakngo, “Ne Apa minon hokta tiki longsi do aro neta tiki longsi do.” 18Labang anat Jihudi hel anangyok kamari yok awak lango, piyok pu tene Jisu kisang-arni yok kamainotne, ladet ke kalek, layok ke Arnam yok anang Apa pusi, anang Arnam pen pachingbaro.
Aso Apharan Alam
19Jisu analiyok pulo, “Khanangsi ne nali thando, Aso ke anang bithang jatsi tiki un-eh, manta Apa yok jibak katiki thek bangsosi tikido, piyok pu tene anang Apa jibak tikido, Aso ta ladisi tikido. 20Apa ke Aso yok nengdokman, aro anang bithang jibak tikido, labang ahuwit anangyok paklang detdo; aro nalike asombhik hlongdo, la anat, layok akithe chot tikisi anangyok paklange. 21Piyok pu tene Apa jibadi kithi yok paburman, Aso ta ingho yok anengdo, ladisi analiyok jiu pisi panghreng do. 22Apa abithang kaiyokta bisar otetesi, ahuwit bisar Aso yoksi pek detno. 23Lasi inghosi Apa yok aman kipi badi Jisu yok aman pi une. Inghone bak Aso yok aman pipe pu tene anangyok wang kitol Apa yok aman pipe. 24Khanangsi ne nali thando, inghosi ne lam arjusi neyok wang kitolpo yok kroldo, labang arlengpo or-eh len jiuli do; aro anang bisar yok wang nangne lo, manta kithi para jiuli yok arpat no. 25Khanangsi ne nali thando, la-apor kithihel Arnam Aso asi arju hlonge, aro ingho arju hlonge, anali hrenge, ladi apor wangdo, minonjong chokdo. 26Piyok pu tene Apa jibadi abithang jiuli do, Aso ta ladisi anang bithang jiuli pilo; 27aro Arleng Aso kachiplang apot, bisar ka-ote yokta anangyok apharan pilo. 28Bangso long nali jatsi asombhik hlongek, piyok pu tene konam apor thiri ahilik kido ahuwit anang asi arjusi, 29aro akime asal katiki abang ajiuli kiburphak yok, aro kangho asal katiki abangyok, bisar aphan pabursi pone, labang apor wangsi do.
Jisu yok Hakhi Kipi
30“Ne bithang ke jatsi tiki un-eh, ne potsi arju hlong, ne bisar otedo; aro ne bisar poke bisar-kangthir; piyok pu tene nebithang chironresi, neyok wangkitol posi chiron man. 31“Ne bithang yok ne hakhi pi tene, ne hakhi khanang kalek. 32Ne phan hakhi kipi kamprek ihut do; aro nephan hakhi kipipo, khanang pusi ne thek. 33Nali Johon po adung arleng tolo, anang khanangpo yok hakhi pilo. 34Ne potsi hakhi chidengdo, labang arleng para ki-en hakhi kalek; layongta nali kijok hlongyok, ne labang alam nali thando. 35Johon po karsi kido katha-ang kipi melur kido; aro nalike bekso arniyok si anang katha-ang long nengrong kidoyok aneng kido. 36Manta ne pot hakhi do, labang Johon po hakhi yokta thechot. Ne Apa jibak asal neyok pachok yok pilo, ne katiki labang asal ne lam, ne Apa neyok wang kitol hakhi pido. 37Aro Apa neyok wang tolo, anangta ne phan hakhi pilo. Nali anang asi jat arju hlonghle yong, anang athok-agor ta nali jat thek hlonghle yong, 38aro anang lam nali nenglong chibibe, piyok pu tene inghoyok anang wang tolo, anangyok nali krolkre. 39“Nali lo-kangthir alamthe langdo; piyok pu tene labang lo-kangthir long nali or-eh len jiuli do pusi chirondo; aro lamehel alam neyok hakhi pido; 40yongta nali jiuli kapahlong yok, nedung kiwangyok nali aneng wangwe. 41Ne arleng para jortang aman en-eh. 42Manta ne nali thekdo, nali sitem nengdok ingjong. 43Ne Apa amen pensi wangdo, aro nali neyok chidengde; kamprek ihut abithang amenpen wang tene, nali anangyok chidenge. 44Potsi Arnam para ajortang wangdo, layok bisarse si, ihut para ihut adak ajortang chideng ponsi, nali pot badi krol une? 45Ne Apa ango nali ado hel piye, puke nali chironek; inghoyok nali chihado, labang Mosi po si naliyok ado kipipo. 46Nali Mosi po yok krol tene, neyok ta krol lo hoi; piyok pu tene anang ne lamthesi wilo. 47Manta anang jibak kiwi alamthe hel nali krolkre, tene ne kithan alamthe pot badi krol le?”
Currently Selected:
JOHON 5: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.