JOHON 3
3
Nikodimas po Jisu yok Kapochak
1Minonke Pharisi hel adak Nikodimas amen ihut Jihudi hel akithepo kido. 2Anang anuwe jarlo apun Jisu adungyok wangsi anangyok pulo, “Rabbi, nang Arnam para kiwang ihut paklang po pusi hali nang thekdo; piyok pu tene Arnam pen dode tene ihut labadi katiki asin kaita paklang un-eh.” 3Jisu anangyok pulo, “Khanangsi, ne nang thando, akimine plang phakphe lengke, kaita Arnam-alongri thek hlonghle.” 4Nikodimas po anangyok pulo, “Ihut arleng akisar amun anang pot badi plang phak une? Ihut arleng anang ai pe apok long phong-ni yok lut dam phaksi plang une ma?” 5Jisu pulo, “Khanangsi, ne nang thando, lang aro jiuli pen plangple lengke, ihut Arnam-alongri lut dun un-eh. 6A-ok pen potsi plange, anang a-oksi doye; aro jiuli pen potsi plange, anangke jiuli lo. 7‘Nang akimisi plang nange, pusi ne nangyok thano,’ lalong nang asombhik hlongek. 8Tomon dak aga kidam anengdo, la agasi damman, aro nang labang arki arju hlongdo, manta anang daklong para wangdo, daklong damman, labang than un-eh. Ajiuli para kiplang abangten arleng labadi lo.” 9Nikodimas po anangyok pulo, “Lamehel pot badi chiplang un?” 10Jisu anangyok pulo, “Nang Israyel hel paklang po, aro yongta nang lamehel alam abhu hlonghle ma?” 11Khanangsi, ne nang thando, ili pot thek hlong, labangsi than hlongdo, aro ili potsi thek hlong hakhi pihlongdo; yongta nangke hakhi chidengde yong. 12Ne naliyok pirthimipe abihini alam nali thano, aro nali ke krolkre, tene ethakpe abihini alam nalithan tene pot badi krole? 13Ethakpe para wang kisunpo lake Arleng Aso, anang aparke ihut ta ethakpe yok thur un-eh yong. 14Aro ingnam kido amun Mosi po jibadi phurul yok kirung, labadi si Arleng Aso yokta rung nange, 15la-apot ingho anangyok kroldo anang or-eh len ajiu pahlong man.” 16Piyok pu tene, Arnam pirthepe yok la-an nengdok ngo, lasi anang bithang ihutdet Aso yok banta pilo, lasi ingho anangyok krol anang inghonhe manta or-eh len ajiu hlongman. 17Piyok pu tene pirthepe bisar ka-ote yok Arnam Aso yok wang tolte yong, manta pirthe pe anang para kijok aphansi wang tolo. 18Ingho anangyok krol anali bisar dode ye; manta ingho krolkre anali bisar dotango, piyok pu tene anang ihut det Arnam Aso amenyok krolkre yongot. 19Aro labang bisar ke ladi, pirthepe long katha-ang wango, manta arleng hel katha-ang yok ke kangtingsi nengdokngo; piyok pu tene anali katiki asal hel kangho kido. 20Piyok pu tene inghosi kangho kengkam-chijor, anang katha-angyok simman aro anang katha-ang long wangwe, lake anali kangho asalhel paklangkle. 21Manta ingho potsi khanang asal tiki anang katha-angyok wangman, lake Arnam along dosi anali katiki hel me-atsi pachiklang man.
Jisu Pen Johon Baptist po
22Labang aphel Jisu aro anang adun hel Judiya alongri yok damo, aro anang bekso arni yok lalong dolo, aro baptist otesi kido. 23Johon po ta Salim adung Ainon arong long lang ako-ong kido apot baptist otesi kido, aro arleng hel wang wangsi kido aro baptist chiplango. 24Johon po, la amunyok, akrol long thalthe lang. 25Minonke abang kachipangthir alam anat ihut Jihudi arleng pen Johon po adun hel pen lam chingje lo. 26Anali Johon po adung wango, aro anangyok pulo, “Rabbi, inghosi Jordan pe apar nangpen kido, ingho alam nang hakhi kipi, anang holek baptist otesi do, aro ahuwit arleng anang dungyok damdo. 27Johon po puduno, “Ethakpe para arlengyok pipot pilo, labang aparke anang jatsi penebak pahlong un-eh ye. 28Nali bithangsi nehakhi do, ne ke Khristo kalek, manta anang ngo-ngosi wang tolo. 29Inghosi anang oso pe do anang oso pota do. Oso po alokpo, ingho anang dung arjap aro anang lam arju dunman, anang oso po asi hlongsi aneng arong ongman. Labang minon neneng arong ongo. 30Anang ke chan ponchot nange, manta ne ke chipabek pon chot nange.
Ethakpe Para Kiwang po Alam
31Inghosi ethakpe para wangdo anang ahuwit yok thechot; inghosi pirthimipe para anang pirthimipe arleng aro pirthimipe alamsi thanman. Ingho ethakpe para ihut wangdo, anang ahuwit yok thechot. 32Anang pot thekngo aro arjulo, labang hakhi pido; layongta anang hakhi kaita chideng de. 33Inghosi anang nenghong chidengo, Arnam ke khanang pusi labang alamthe anang long aporman pilo. 34Piyok pu tene inghoyok Arnam wang tolo, anang Arnam alam thando; piyok pu tene anang apun yok ta ong chotsi Jiuli pido. 35Apa Aso yok nengdokman, aro anang arideng ahuwit abihini champidet no. 36Inghosi anang Aso yok kroldo anang or-eh len ajiu do; ingho anang Aso yok mengme anang jiu long kachimangka hlonghle, manta Arnam akangsi anang phuthak chiparpu hlonge.
Currently Selected:
JOHON 3: AMRI-BSI
Highlight
Share
Copy
Want to have your highlights saved across all your devices? Sign up or sign in
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.