Like 3
3
Jan atooso mbari e Njyami
1Tibeere aki nkʉmu esi e Rome, esibi emiyira kuumi na etaani. Posi Pilaate aki lepatima o Jide. Erode Atipase aki nkʉmu o Ngalili. Filipe okulu Erode aki nkʉmu a Iture bɨla Takonite. Lisana nkʉmu Abilene. 2Aane bɨla Kayife aki ankʉmu ma asi ma avwoŋi ma anini. Jya ntini e Jan ayuhi mbari e Njyami, Jan a mwana Jakari o nca kayi. 3Jan opori angaala ama osyese okeri a Jurde aso. Nde otoosi mbari ndi: «Leyaha ateeme, ma olaha mbɨri be na njala okaala lebihi le be, mo vwa Njyami oboloho ambiini a be.»
4Lemihi le Esayi owobi a mbari e Njyami ateendi nca osaangumu o nde ndi:
«Mvuuru awʉla ankɨma nca kayi:
Be leyeese njila e Nkʉmu,
Be lesiila nde ewoombo eka tele.
5Ma aje okiisa ambye aso.
Ma aje obula ekuri eso bɨla enguma eso.
Ma aje osiila avunu, aka tele,
ma aje oyeese anjila ma abi.
6Ŋa baari aso amono ndi Njyami asaha ovusaha bo.»
7Jan na lemvuuru leyi mpili e nde ma oyaha ateeme ndi: «Be mva lekaha le antaari, ayisihi be mo oduma nkala e Njyami eje oya na? 8Lesa maami ma ave, ma olaha bu mbɨri be lemi kaala lebihi le be. Leka cimiŋa be anku mbɨri: “Abraame taara a bisi” ni. Ŋa me eduha be Njyami abuuna okaala akele ma, akirihi baana ma Abraame. 9Opami a Njyami aya mva mvuuru ali na owunu o jyala aya tuha na okumuha eti mpili ekaŋa. Ŋa eti ma eli mburu e mve kali, ma aje okumuha jo atena o mbaa.»
10Lemvuuru lepɨsi nde ndi: «Ŋa bisi lesa buni?» 11Nde okaali bo ndi: «Ali na amfa mwele ompi buha mo, aki na biila ompi buha.» 12Atoniŋi ma lepo#3.12 Baari ma tonoho adoro a mo osi., ayi se ma oyaha ateeme, bo na Jan ndi: «E Nkʉmu, bisi osa buni?» 13Nde okali ndi: «Ntini e be letonoho adoro leka nyuraha mvunu ma ama pɨsa be ni.»
14Aworo se na Jan ndi: «Ŋa bisi, bisi se osa buni?» Nde ndi: «Lekyele okyehe ma mpa be, leka piiniha baari adoro na lebanaha le baari ni.»
Jan awobo ma ejihi e mvuuru avʉli nde
15Baari ma dilihi Krisi, acimiŋi ndi Jan oma kaha nde. 16Jan na bo aso ndi: «Ateeme a me, ateeme ma anja. Okima aya avʉli me, o mwa nde me nkara nci me i buuna ocyese endi e ma akoroho a nde ni. Nde ampa be ateeme mo Oduduma Santi, ateeme a mbaa. 17Nde oli ma lebuhu na nyengese o jyala, nde aje ocyese mfɨsi nca mburu e mve, nde aje oyaha mburu e mve olehe ma otala. Ŋa nde aje ocuha mfɨsi o mbaa eli i dima ni.» 18Jan otoosi Ncya e Mve, na lempa le baari andwo.
Erode bɨla Jan Batise
19Jan obye na Erode a nkʉmu a Ngalili ma obila o nde ayahi Erodyade olehi ma anjo, na maami akɨmakuna ma abi a nde asi. 20O ngula maa aso, Erode ovurihi olehi Jan ongeneŋe.
Jesu ayaha ateeme
21Baari aso amana oyaha ateeme, Jesu se oyi na ayaha a nde. Ntini e nde avwonihi, yulu enahi. 22Oduduma Santi osurihi o yulu a nde mva kuumbi, juuhi lewi yulu ndi: «We Mwana a me emavʉla odya, oswere o me oso oli o yula we.»
Ombɨsa o Jesu
23Jesu aki abuuna oto ekuumi me esibi etari e nde a baani janja le nde. Baari acimihi ndi nde mwana a Jusefe a mwana Eli. 24Eli mwana Matate, Matate mwana Levi, Levi mwana Meleki, Meleki mwana a Janayi, Janayi mwana a Jusefe. 25Jusefe mwana a Matatyase, Matatyase mwana Amose, Amose mwana a Naume, Naume mwana a Eseli, Eseli mwana Nagayi. 26Nagayi mwana Maate, Maate mwana Matatyase, Matatyase mwana Semeyine, Semeyine mwana Yoseke, Yoseke mwana Yoda. 27Yoda mwana Yoana, Yoana mwana Resa, Resa mwana Sorobabele, Sorobabele mwana Salatyele, Salatyele mwana Neri. 28Neri mwana Meleki, Meleki mwana Adi, Adi mwana Kosame, Kosame mwana a Elimadame, Elemadame mwana Ere. 29Ere mwana a Jesu, Jesu mwana Elyesere, Elyesere mwana a Yorime, Yorime mwana a Matate, Matate mwana a Levi. 30Levi mwana a Simyon, Simyon mwana a Jida, Jida mwana a Jusefe, Jusefe mwana a Yoname, Yoname mwana a Elyakime. 31Elyakime mwana a Meleya, Meleya mwana a Mena, Mena mwana a Matata, Matata mwana a Natame, Natame mwana a Davide. 32Davide mwana a Jese, Jese mwana Obede, Obede mwana a Buuse, Buuse mwana a Sala, Sala mwana a Naasone. 33Naasone mwana Aminadabe, Aminadabe mwana Adimine, Adimine mwana Arini, Arini mwana Eserone, Eserone mwana a Farese, Farese mwana a Jida. 34Jida mwana a Jakobe, Jakobe mwana a Isaake, Isaake mwana a Abraame, Abraame mwana a Tera, Tera mwana a Naore. 35Naore mwana a Seruke, Seruke mwanaa Rago, Rago mwana a Faleke, Faleke mwana Ebeere, Ebeere mwana a Sala. 36Sela mwana a Kena, Kena mwana Apasade, Apasade mwana a Seme, Seme mwana a Nowe, Nowe mwana a Lameke. 37Lameke mwana Atusaleme, Atusaleme mwana Enoke, Enoke mwana Yerede, Yerede mwana a Malalele, Malalele mwana a Kena. 38Kena mwana Enose, Enose mwana a Sete, Sete mwana a Adam, Adam mwana a Njyami.
Currently Selected:
Like 3: MDT
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES