Matius 28
28
Yesus hidop kombali
28:1-10
(Markus 16:1-8; Lukas 24:1-12; Yohanis 20:1-10)
1Waktu su lewat orang Yahudi pung hari Barenti Karja, pas hari Minggu amper siang, Maria Makdalena deng Maria yang laeng lai pi di Yesus pung kubur. 2Skrek bagini, tana goyang paleng kuat, tagal Tuhan pung malekat turung dari sorga la pi di kubur tu, la guling batu yang tutu mulu kubur tu, la dudu di atas akang. 3Malekat tu pung rupa manyala macang deng kilat la dia pung pakiang puti macang deng santang pukat. 4Tantara-tantara yang jaga kubur tu gamatar takotang la seng bisa bagara macang deng orang mati.
5Mar malekat tu bilang par parampuang-parampuang tu kata, “Jang taku! Beta tau kalo kamong ada cari Yesus yang su dapa salib tu. 6Antua seng ada di sini! Antua su dapa kasi hidop kombali macang deng apa yang Antua su bilang! Mari lia tampa dong taru Antua pung mayat. 7La pi capat-capat la bilang Antua pung murid-murid kata, ‘Antua su dapa kasi hidop kombali. Antua pi ka propinsi Galilea kamuka kamong. Kamong nanti lia Antua di sana.’ Inga apa yang beta su bilang par kamong ni bae-bae!”
8Tarus, dong langsung pi dari kubur tu. Dong paleng taku, mar dong pung hati jua sanang paskali. Dong lari capat-capat par carita samua-samua yang su jadi tu par Yesus pung murid-murid. 9Waktu dong masi di jalang, skrek bagini, Yesus datang baku dapa dong la bilang kata, “Tabea!” Tarus, dong datang dekat Antua, polo Antua pung kaki, la somba Antua. 10La Antua bilang par dong kata, “Jang taku! Pi kasi tau Beta pung sudara-sudara biar dong pi ka propinsi Galilea. Dong nanti lia Beta di sana.”
Carita parlente soal Yesus pung mayat
28:11-15
11Waktu parampuang dua tu masi di jalang lai, satu dua orang dari tantara-tantara yang jaga Yesus pung kubur tu pi ka kota Yerusalem par kasi tau samua yang jadi tu par imam-imam kapala. 12La imam-imam kapala tu pi bicara deng orang Yahudi pung pamimping-pamimping. Dong putus par kasi kepeng banya par tutu tantara-tantara tu pung mulu 13la bilang par dong kata, “Kamong musti bilang kalo Dia pung murid-murid datang ambe Dia pung mayat malang-malang waktu kamong ada tatidor. 14La kalo Gubernur Pilatus dengar soal ini, katong nanti bicara deng dia biar kamong jang dapa masala apapa.”
15Tarus, tantara-tantara tu ambe kepeng tu la biking macang deng apa yang imam-imam kapala dong su parenta. La carita dari tantara-tantara tu tasiar par samua orang Yahudi sampe oras ni.
Yesus pung parenta par Antua pung murid-murid
28:16-20
16Tarus, Yesus pung murid sapulu satu orang tu pi ka gunung satu di propinsi Galilea, macang deng apa yang Yesus su pasáng.#Matius 26:32; Markus 14:28 17Waktu dong lia Antua di situ, dong somba Antua. Mar, babarapa orang masi balong parcaya kalo itu batul-batul Antua. 18La Yesus datang dekat-dekat dong la bilang kata, “Allah Bapa su kasi kuasa par Beta par parenta samua yang ada di sorga deng di dunya. 19Jadi, kamong musti pi ka sagala bangsa di dunya la ajar dong biar dong jadi Beta pung murid. Baptis dong deng nama Bapa, Ana, deng Allah pung Roh.#Utusang pung Carita 1:8 20Ajar dong par biking samua yang Beta su parna parenta par kamong biking. Inga bae-bae! Beta ada sama-sama deng kamong tarus sampe dunya ni kiamat.”
Currently Selected:
Matius 28: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku