Yohane 3
3
Yesu ni Nikodemo
1Vaakhalla muttekweene a Ayuda,* nnddina naye Nikodemo, oyo aari a mulloko wa Afarisi.* 2Nave aawa wa Yesu mahiiyu nave aallota wa yooyo wi, “Ahuddihi, ninnadduwella wi nyuwaano tti muhuddihi oorumihiwa ni Mulluku. Khaavo muthu anawora weera ddoottikhiniha muneereenyu Mulluku aahikhalla ni olliye.”
3Yesu ahaakhulla wi, “Ddawoona, kinimuulleellani wi, khaavo muthu anaawore woona omwene wa Mulluku aahiyariwa wiilli.”#3.3 aahiyariwa wiilli: apaalle aahiyariwa ovenyera oddullu.
4Nikodemo ahaakoha wi, “Muthu anaayariwe wiilli mwawiidde ari unnuwalle? Olliyooyo khawora ovollowa m'mirimani mwa amennya ni oyariwa wiilli!”
5Yesu ahaakhulla wi, “Ddawoona, kinimuulleellani wi, khaavo muthu anaawore ovollowa mu omwene wa Mulluku aahiyariwa mwa maaddi ni Munepa Waweella. 6Athu enaayara athu, Munepa Waawella ttuuwora ovaha okumi wa minepa ddiwa. 7Ohittikhine kaambiiwa kohuulleella wi, ‘Onaphwanella wi muyariwe wiilli.’ 8Ephevo enoopella nko enapaalliiwa nave onniwa moopellwiiwa koma khonadduwella nko enavenyeriiwa naari nko enayiiwawo. Emoddamoddave yeeyo enaphwanaphwana ni arive muthu oyo anayariwa wiilli mwa Munepa Waweella.”
9Nikodemo ahaakoha wi, “Nndda ddineereye mwawiidde?”
10Yesu ahaakhulla wi, “We ori muhuddihi muullupalli mu Israele nave khonadduwella nndda? 11Kinimuulleella ddawoona wi, ninallota yeeyo ninadduwelleehu nave ninavelleella omboni dda yeeyo nonneehu koma nyuwaano khamunamukhulupilila ombonaahu. 12Kuulleellani dda ddeko ddaweereya vatthimva khamunakhulupilila, munaakhulupilile mwawiidde kuulleellani ddeko ddaweereya oddullu? 13Khaavo muthu awenlle oddullu koma miyaanove Mwaana a Muthu, sika kakitthalle ovenyera oddullu.”#3.13: Mawu yallotiwe ni Yeswaalla yaavirellella mpaka mu evesi 21. 14#Num 21.9Nave Mose aatthomeya niphwanaphwaniho na enowa vamuteekhoni muchipululuni, emoddamoddave yeeyo mi Mwaana a Muthu kinaphwanella wi kitthomeyiwe vamutandani, 15wi arive muthu anaakikhulupilile miyaano akhalla ni okumi woohimalla. 16Vawi Mulluku aakonda ellapo yavatthi wunchichi, sika aavaha Mwanaye mmoddave yooyo wi arive muthu anakhulupilila mwa olliyooyo ahikhwe koma akhallena okumi woohimalla. 17Vawi Mulluku khaamurumalle Mwanaye wa ellapo yavatthi wi ayillake koma wi ayivulluse.
18Ayo enakhulupilila mwa Mwaana khaneeruziwa koma oohikhulupilila aheeruziwa khalle kaambiiwa khekikhulupililalle miyaano Mwaana mmoddave a Mulluku. 19Nave echiweruzweeyo tti ella, owala waawa mu ellapo yavatthi koma athu yaakonda epiphi ohiyana ni owala kaambiiwa yaheera ddeko ddoonanara. 20Vawi attheene eneera ddeko ddoonanara enniitana ni owala. Nave khenawa nko ori owala kaambiiwa khenapaalla wi mitteko ddiwa ddoonanara ddooneye. 21Nave ayo eneera ddawoona ennawa nko ori owala wi owalanko woonihe wi mitteko ddiwa tti ddoomwiiwellella Mulluku.
Yesu ni Yohane oobatiza
22Ddimallille nndda Yesu ni oohudderaaye yaaya o echigawo ya Yudeya. Wenko aakhallawo ni alliwaayo wa milungu ddooyeva nave aanabatiza. 23Yohanettho aanabatiza mu Ayinoni vakhuviru ni Salimu kaambiiwa waakhalla maaddi manchichi. Athu yaanaya wa olliye nave aanaabatiza. 24#Mat 14.3; Mrk 6.17; Luk 3.19,20Vawi Yohane aari ahinahiyiwe mundende.
25Vano oohuddera amodda a Yohane yahaamba ovaanyihana ni Muyuda mmodda#3.25 Muyuda mmodda: Ddoolemba ddimodda ddakhalle ddookhalla ni mawu awi Ayuda amodda. malamulo dda meellihello. 26Sika yaawa wa Yohane emulleella wi, “Ahuddihi, munnamuupuwella muthu oyo aari ni nyuwaano okhopella wa muhinje wa Yordani, olle mwamuvelleellelleenyu omboni? Vano arina obatiza nave athu erina othamakella wa olliyooyo!” 27Yohane ahaakhulla wi, “Khaavo muthu anawora okhalla ni ello aahivahiwa ni Mulluku. 28#Yoh 1.20Nyuwaano tti amboni wi kaallota wi, ‘Miyaano khe Mesiya* koma kaarumiwa muhoollo mwaye.’ 29Ootthelliwa mwaneena tti ootthella. Koma mukhwaaye a ootthellooyo aniimella vakhuviru ni omwiiwellella moohakallalla. Nave anahakallalla iiwa mawu a ootthella. Sika emoddamoddave yeeyo koohakallalla ni murimaaka muttheene. 30Yoolla tti oophwanella wi akhalle oopaalleya wunchichi nave miyaano kikhalle oopaalleya vang'ono.”
Oyo anavenyera oddullu anallota mawu a Mulluku
31Oyo anavenyera oddullu tti oowakhwaranya attheene. Oyo anavenyera va ellapo yavatthi anakhalla a va ellapo yavatthi nave anallota dda ddeko ddaweereya va ellapo yavatthi koma oyo anavenyera oddullu ari ookhwaranya attheene. 32Annavelleella omboni dda eyo oonilleeye nave iiwalleeye koma khaavo muthu aakhullelle ombonaaye. 33Koma Oyo anaakhullella ombonaaye annasimikiza ni yeella wi Mulluku tti awoona. 34Vano oyo arumiwe ni Mulluku anallota mawu a Mulluku kaambiiwa Mulluku annamuvaha munepaaye mookwakhwanella. 35#Mat 11.27; Luk 10.22Attiitthinnya ennamukonda Mwaniwa nave aahiya ddeko ddittheddene mu olamulellwaaye. 36Oyo anamukhulupilila mwaana ookhalla ni okumi woohimalla koma oyo ahinamukhulupilila Mwaana khakhalla ni okumi nave Mulluku khahiya omullaka olliyooyo.
Currently Selected:
Yohane 3: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.