Yohane 18
18
Omakiwa wa Yesu
(Mat 26.47-56; Mrk 14.43-50; Luk 22.47-53)
1Yesu amallihalleeye ovekella, aatimulla ni oohudderaaye oya okhopella wa muhinje wa Kedroni. Wenko waakhalla emata nave Yesu ni oohudderaaye yaavollowamo. 2Yudasi, oyo amuvelleelle Yesu wi iiphiwe, aadduwella nipuronno kaambiiwa Yesu aanaya wiilliwiilli ni oohudderaaye. 3Vano Yudasi aakusa mulloko wa akhoto a o Roma ni oowehera enyumba ya Mulluku oorumihiwa ni allupa mukutho uullupalli ni Afarisi,* ayaana omatanko. Yaatukhulla enyali ni mitthiko ni ezida dda ekhoto. 4Yesu aadduwella ddittheddene ddawa wi ddimweereyelle, sika ahiimella aakoha wi, “Munamwaasha aani?”
5Yahaakhulla wi, “Yesu a o Nazareti.”
Ahaakhulla wi, “Tti meene.”
Yudasi, olle anaamuvelleelle wi iiphiwe, ahiimellattho vaavo ni yaayo. 6Yesu allotilleeye wi, “Tti meene.” Yaahokollweella mutulli yiikuha. 7Yesu ahaakohattho wi, “Munamwaasha aani?”
Yahaakhulla wi, “Yesu a o Nazareti.”
8Yesu ahaakhulla wi, “Kohuulleellani wi tti meene. Vano mwaakipaallaka miyaano ahiyeni amoddaalla eroweke.” 9Aallota ddenndda wi mawu aallotilleeye ekwakhwanelle awi, “Mwa ayo mwaakivahilleenyu khaavo mmodda akirimeellevo.”
10Simoni Petro, oyo aari ni nsupada, aanihullulla amuphaddana naaru noonnattanatta kaporo a mullupa mukutho muullupalli. Nnddina na kaporooyo naari Malkusi 11#Mat 26.39; Mrk 14.36; Luk 22.42Yesu aamulleella Petro wi, “Hokollosella nsupada nawo mu nigonelo mwiwa! Ethiyo kihimuwirye kapu a ddoohoosa oyo Attiitthaaka yaakivahilliiwa?”
Yesu wa Anasi
12Vano mulloko wa akhoto a o Roma ni oolamulelliiwa ni oowehera a Ayuda yaamphara Yesu emmaka. 13Vawaamba yaamukusella wa Anasi. Kayafa aari mukamwene a Anasi navettho mullupa mukutho muullupalli muyakha yooyo. 14#Yoh 11.49,50Kayafa tti yoolle aalleelle Ayuda wi, “Tti waphaama wa nyuwaano wi muthu mmodda akhwe munipuroni na athu attheene.”
Petro anamuruna Yesu
(Mat 26.69-70; Mrk 14.66-68; Luk 22.55-57)
15Simoni Petro ni oohuddera mmodda yaamuthwara Yesu. Nave oohuddera mmoddooyo aadduwelliwa ni mullupa mukutho muullupalli nave aavollowa vamodda ni Yesu mu nthato na mullupa mukutho muullupalli. 16Koma Petro ahiimella vamullakoni vaatte. Oohuddera mmodda oyo adduwelliwe ni mullupa mukutho muullupalli aakhuma allota ni namwalli oowehera vamullakoni wi amwaakhullelle wi amuvollochihe Petro. 17Namwalli oowehera va mullakooyo aamukoha Petro wi, “We khohiyo mmodda a oohuddera a muthu amakiwoolla?”
Petro ahaakhulla wi, “Khe miyaano.”
18Vano akaporo ni ooweheraalle yaakhariha munllo wa mankhalla kaambiiwa waamariirya nave yahiimella enootha. Nave Petro aaya iimellattho vaavo anoothana.
Mullupa mukutho muullupalli anamukoha Yesu
(Mat 26.59-66; Mrk 14.55-64; Luk 22.66-71)
19Vano mullupa mukutho muullupalli aamukoha Yesu dda oohudderaaye nave dda ehuddihwaaye. 20Yesu ahaakhulla wi, “Mi kaanallota moohikhuwa wa arive muthu. Kaanaahuddiha wiilliwiilli ddittheddene mu enyumba ddamavekello* ni mu enyumba ya Mulluku nko watthukumana Ayuda attheene. Ngaallotillevo erive ello mookhuwa. 21Vano munakikohera tini? Mwaakohe athu ayo yiiwalle eyo kaalleelleemi, ennadduwella eyo kallotilleemi.”
22Yesu aallotilleeye ella, mmodda a akhoto oyo amwaatamenlle aamuukutha, allota wi, “Onamwaakhulla mullupa mukutho muullupalli mwawi ddiidda?”
23Yesu aamwaakhulla wi, “Kaariimi killotille yoonanara velleella omboni dda yoonanareeyo. Koma kaariimi killotille yawoona, onakuukuthella tini?”
24Vano Anasi aamurumiha olliyooyo oomakiweene wa Kayafa mullupa mukuthoolle.
Petro anamuruna Yesu wiilli
(Mat 26.71-75; Mrk 14.69-72; Luk 22.58-62)
25Simoni Petro ahiimellave vaavo oothaka munllo. Vano amodda yaamukoha wi, “We khohiyo mmodda a oohuddera a muthu amakiwoolle?”
Nave Petro aaruna, allota wi, “Khe miyaano.”
26Mmodda a akaporo a mullupa mukutho muullupalli, mbalaaye a muthu olle Petro amuphaddilleeye naaru, aamukoha wi, “Mi ngaawoonille weyaano m'matani vamodda ni muthu yoolla?” 27Petro aakhoota wiilli nave enthawi yeeyo mutthupi wahinlla.
Yesu anakuselliwa wa Pilato
(Mat 27.1-2,11-14; Mrk 15.1-5; Luk 23.1-5)
28Vano osaka wene ohinase Ayuda yaamukusa Yesu ovenyera wa Kayafa emuyaana o nthato namillatu na Aroma. Ayuda kheyaavollowillemo munthatonimmo wi ehiripihiwe kaambiiwa yapaalla wi yachena yoocha ya Paska 29Sika Pilato aakhumellella wa alliwa aakoha wi, “Mumphwanyille ni mullatu wawiidde woomuvaanyiihana muthu yoolla?”
30Yaamwaakhulla wi, “Ahaariki ni mullatu khanaamuvelleelle wa nyuwaano.”
31Pilato ahaalleella wi, “M'mukuse nyuwaano mwamweeruze moollikana ni malamulwaanyu.”
Yahaakhulla wi, “Khaninna olamulello woomwiipha muthu.” 32#Yoh 3.14; 12.32Ella yaheereya wi mawu a Yesu oollota dda mmo anaakhwelleeye ekwakhwanelle.
33Sika Pilato aavollowattho munthatoni mulle. Amwiithana Yesu amukoha wi, “We tti Mwene a Ayuda?”
34Yesu ahaakhulla wi, “Munallota ddenndda mwa weekhiinyu apaalle athu amodda yahuulleellani dda miyaano?”
35Pilato ahaakhulla wi, “Mi tti Muyuda? Mutundwaanyu ni allupa mukutho uullupalli sika yuuvelleelleni wa miyaano. Ethiyo mwenre tini?” 36Yesu aallota wi, “Omwenaaka khori wa ellapo yavattheella. Omwenaaka wakhanlleke wa ellapo yavattheella akhotwaaka yaawerowanana ekhoto wi kihivelleelliwe wa Ayuda koma omwenaaka khori wa ellapo yavatthimva.” 37Sika Pilato amukoha wi, “Vano weyaano tti mwene?”
Yesu ahaakhulla wi, “Nyu sika munallota wi miyaano tti mwene. Kaayariwa nave kaawa mu ellapo yavatthi wi kivelleelle omboni dda yawoona. Muthu oyo anakhalla mu yawoona anniiwa mawaaka.”
38Pilato ahaakoha wi, “Vano yawoona tti tini?”
Yesu analamuliwa wi iiphiwe
(Mat 27.15-31; Mrk 15.6-20; Luk 23.13-25)
Nave aallotilleeye ella, Pilato aayattho wa Ayuda allota wi, “Nginamphwanyana orive mullatu. 39Nave moollikana ni mmo muddollweellelleenyu kinnuuttaphullellani muthu oomakiwa mmodda va Ehakallallo ya Paska. Munapaalla kuuttaphullelleni Mwene a Ayuda?”
40Yaamwaakhulla mookhuwa wi, “Ohiri muthu yoolla koma Baraba.” Baraba aari muthu oowukila niboma.
Currently Selected:
Yohane 18: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.