Yohane 11
11
Okhwa wa Lazaro
1 #
Luk 10.38,39 Muthu mmodda, nnddina naye Lazaro aamavoriiwa. Akhalla o Betaniya, m'muzi mmo Mariya ni mwanamunne Marita yakhalliiwa. 2#Yoh 12.3Mariya yoolla tti olle aazozille Apwiya makhura a nthuko naphaama ni waapukuta manyallwiiwa ni meehaaye. Lazaro oovoriiwooyo aari murokoriye. 3Vano arokoriyaayo yaamurumiha amithenga wa Yesu, allota wi, “Apwiya, mukhwiinyu ookondiwa animavoriiwa.”
4Yesu iiwalleeye aallota wi, “Ovoriiwanko khori wookhwana koma tti ekaamba ya ntitimiho na Mulluku wi miyaano Mwaana a Mulluku kititimihiwena.”
5Vano Yesu aanaakonda Marita ni mwanamunne ni Lazaro. 6Naari iiwalle wi animavoriiwa aakhalla mallapo meelli vanipuroni vaavo. 7Vano ddiviralle nndda ahaalleella oohudderaaye wi, “Hankoni nihokollweelle o Yudeya.”
8Oohudderaalle yahaakhulla wi, “Ahuddihi, Ayuda wenko yaheeseesa owiiphani vawuuvokhani malluku nave vano munayattho wenko?” 9Yesu ahaakhulla wi, “Otthaana onakhalla maora khumi ni meelli, khe ddiiddo? Muthu eeta otthaana khanakwakwatuwa vawi annoona ekaamba ya owala wa ellapo yavatthi. 10Koma muthu eeta mahiiyu annakwakwatuwa vawi khanna owala.”
11Vano Yesu aallotattho wi, “Mukhwiihu Lazaro animakona nave kinaya kamuvenyihe.”
12Oohudderaalle yahaakhulla wi, “Apwiya aarimi akonaka, aneerochira.” 13Yesu allota dda okhwa wa Lazaro koma alliwaayo yaganiza wi allota dda okona wa ekhove. 14Sika Yesu ahaalleella moohikhuwa wi, “Lazaro ookhwa 15Nave kinnahakallalla wi miyaano ngaariwo wenko sika muneerokhulupilila. Vano hankoni niye wa olliyooyo.”
16Vano Tomasi, ooromolliwa Didimo, ahaalleella oohuddera akhwaaye wi, “Hankoni niyeewo wi nakhwena vamodda ni Yesu!”
Yesu annaavenyiha athu wa ookhwa ni waavaha okumi
17Yesu aphiyalleeye o Betaniya, aamuphwanya Lazaro akhanlle mu mahame mallapo masese. 18Betaniya aari vakhuviru ni Yerusalemu orekamella waye waatamella makilomita mararu. 19Nave Ayuda anchichi yaari ewiille wa Marita ni Mariya wi yaakhurumuse murima ekaamba ya okhwa wa Lazaro. 20Vano Marita iiwalleeye wi Yesu animawa, aaya woomuchingamella koma Mariya aahalla mpa. 21Marita aamulleella Yesu wi, “Apwiya, mwakhanlleke wuno, murokoraka khaakhwe! 22Koma kinnadduwella wi ddeko ddittheddene munaavekeenyu wa Mulluku aneerewuuvahani.”
23Yesu aamulleella wi, “Murokoriyo aneerovenya wa ookhwa.”
24Marita aallota wi, “Kinnadduwella wi aneerovenya wa ookhwa nllapo noomallihella, nno athu attheene enaavenyihiwiiwa.”
25Yesu aamulleella wi, “Mi tti oyo anaavenyiha athu wa ookhwa ni waavaha okumi. Ayo enakikhulupilila miyaano aneerokhalla ni okumi woohimalla naari ekhwille. 26Nave oyo ari mukumi nave anakikhulupilila miyaano khawa akhwa. Onnakhulupilila ddenndda?”
27Ahaakhulla wi, “Ddawoona, Apwiya kinnakhulupilila wi nyuwaano tti Mesiya,* Mwaana a Mulluku oyo namutiyeraahu wi awe mu ellapo yavatthi.”
Yesu anamuvenyiha Lazaro wa ookhwa
28Marita allotilleeye ella, aamwiithana mwanamunne Mariya vaweekhiiwa nave aamulleella wi, “Ahuddihi aaphiya nave ennawiithana weyaano.” 29Nave Mariya iiwalleeye nndda, aatimulla mwawaakuva aya wa olliyooyo. 30Yesu aari ahinaphiye owaaninko nave aari vanipuroni mvo Marita akumanneeyena. 31Vano Ayuda ayo yaari mpa, emukhurumusaka murima, yaamoona Mariya atimullalle mwawaakuva akhumaka vaatte. Alliwaayo yaamuthwara vawi yaganiza wi anaya o mahame wi inlleke wenko.
32Mariya aaphiya vaari Yesu nave aamoonilleeye, aakokhora vakhuviru ni Yesu allota wi, “Apwiya, mwakhanlleke wuno murokoraka khaakhwe!”
33Yesu aamoonilleeye Mariya ni Ayuda ayo yaari ni olliye yinllaka, aahoowa wunchichi m'murimani mwaye. 34Ahaakoha wi, “Mumuvitthalle wuuwi?”
Yahaakhulla wi, “Apwiya, hankoni moone.” 35Vano Yesu ahinlla. 36Sika Ayudaalle yaallota wi, “Ngamooneni, aamukonda wunchichi!”
37Nave amodda a yaayo yaallota wi, “Muthu yoolla aamooniha muthu oohoona. Khaawonre omweeriha Lazaro wi ahikhwe?”
38Vano Yesu, aahoowattho m'murimani mwaye, aawa o nihame. Naari nikhungu nave nlluku naahiyiwa vamullakoni vaye. 39Yesu aalamula wi, “Venyihaniwoni nllukunno!”
Marita, murokoriye a ookhooyo, ahaakhulla wi, “Apwiya, mutembwaaye wohaamba wunkha vawi wookhallamo mumahamenimmu mallapo masese!”
40Yesu aallota wi, “Ngawuulleelle wi wakhulupilila oneerewoona ntitimiho na Mulluku?” 41Sika yaavenyihavo nllukunne. Nave Yesu aaweha oddullu allota wi, “Attiitthaaka, kinnuuthokozani wi munnakiiwellella miyaano. 42Kinnadduwella wi munnakiiwa miyaano mallapo mattheene koma kinallota ella ekaamba ya athwaalla wi ekhulupilile wi mwaakiruma.” 43Nave allotille nndda, aakhuwa wi, “Lazaro, khuma!” 44Nave ookhooyo aakhuma ari oomakiwa meto ni matta ni ekuwo ahuruwelliweeyena ni ekhovaaye ekhuneelliwe ni ekuwo. Yesu ahaalleella athwaayo wi, “Muttaphulleni nave muhiyeni aroweke.”
Opanganella ddoomwiipha Yesu
(Mat 26.1-5; Mrk 14.1-2; Luk 22.1-2)
45Anchichi a Ayuda, ayo yawiille wa Mariya nave yoona eyo Yesu eerilleeye, yaakhulupilila mwa olliyooyo. 46Koma amodda mwa yaayo yaaya wa Afarisi* yaalleella nnddo Yesu eerilleeye. 47Sika allupa mukutho uullupalli ni Afarisi yahiithaniha mutthukumano wa attekweene a millatu a Ayuda,* ellota wi, “Nineere tini hiyaano? Vawi muthoolla anneera ddoottikhiniha ddinchichi. 48Namuhiya mwawi ddiidda arive muthu aneerokhulupilila mwa olliyooyo nave Aroma* eneeroowa wi yoononge enyumbaahu ya Mulluku ni mutundwaahu.”
49Nave mmodda a yaayo, nnddina naye Kayafa, oyo aari owaahoollella allupa mukutho uullupalli muyakha yooyo, aallota wi, “Khamunadduwella munalloteenyu. 50Khamunoona wi tti waphaama wa nyuwaano wi muthu mmodda akhwe munipuroni na athu attheene ohiyana wi mutundu muttheene woonongeye.” 51Khaallotille ella mwa olliye yeekhaaye koma vookhallani oohoollella a allupa mukutho uullupalli muyakha yooyo, allotella wi Yesu aneerokhwa munipuroni na mutundooyo, 52ohiri munipuroni na mutundu yooyove komattho wi aatthukumanihe vamodda anamwani a Mulluku ayo yaapallalleyille.
53Sika waambeella nllapo nenno attekweene a Ayudaalle* yahiiwanana wi emwiiphe Yesu. 54Sika Yesu khaaweteentettho mwawooneya vamiitthoni va Ayuda koma aavenyavo aya o echigawo yawaatamella echipululu, o etawoni yooromolliwa Efuraimu. Wenko aakhallawo ni oohudderaaye.
55Vano Ehakallallo ya Paska a Ayuda yahaatamella. Sika athu anchichi yaavenyera m'muzi oya o Yerusalemu Paskooyo ahinaphiye wi yeellihiwe. 56Vano yaamwaashaasha Yesu nave yatthukumanniiwa mu enyumba ya Mulluku yaakohana wi, “Ethiyo yoolla aneeroowa o ehakallallweella? Maganizwaanyu tti awi tini?” 57Vano allupa mukutho uullupalli ni Afarisi yaalamula wi muthu mmodda adduwella nko ariiyewo, aalleelle wi yammake.
Currently Selected:
Yohane 11: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.