LUKA 12
12
Gurbu'uungw daanduú hhaahhafiingw
(Mat 10:26-27)
1Boo/oó kumér yaariir iri burumburiít tam tiri kilooín adaráh. Qoomaadae Yesu iri dír eeharuuseerós i axweés ngiwa babay, «Ti harmagahhe' nee gár ta mikaátér sluuftimamisi ar múk Farisayo, gídaabá a hhaahhafingw'ín. 2Umuúqo gaaro ar taa tuuntuúk ka kiis, nee umuúqo gár naaqooro i xu'utís. 3Asma tidá' taa katé' baraá giwtír wa ale, ka axaas dír gwa/aát wa aleeró, slám tidá' taa saasahhaandé' baraá qul/áy wa ale, ka tsee' gawaá daandeemaá maráy wa ale.»
Heé daér wa hariím
(Mat 10:28-31)
4«Kuungá' mulqer'eé', án kuungá' nu baw, kudá' slaqo ngi tsu/á' mi da'ayumitaara', ala gár aluuwo tleehhamooro i aleeslaya' i káhh. 5Ala oo kuungá' ta da'ayuta' án ngu xu'utís. Mungú na da'ayumitaak, kudá' aleesleemu gu koóm oo hee nguwa kwahhi baraá asltá baloó gwaa'aaká, alaá gaasaro burngwa hhe'eés. Eeít, án a kah, kwí na da'ayumitaak.
6«Ahaá, qawoó kooán kwa weeriísiíke ar senti tsár. Ala tam oo wák kwa gunqareesiiká dír Munguhe. 7Slám se'éngw gawaá sagerhúng sleémeero kwaa faár. Kuungá' ma da'ayumitaara', asma kuungá' tundun ak afhhamít ta qawoó yaariire.»
Yesu kuwa lamabu'un dír geeraá muko
(Mat 10:32-33; 12:32; 10:19-20)
8«Án a kah, heé aníng iga lamabu'un dír geeraá muko, inós ku ya/án nee Garmoó Hee dír geeraá malaykér Munguhe. 9Nee kudá' án iga sa tlaank dír geeraá muko, nee inós ku sii' dír geeraá malaykér Mungú wa ale.
10«Umuúqo heewo oo /aymuú /ooslima gu oó' daanduú Garmoó Heewo ku gurtláy, ala umuúqo heewo oo /aymuú /ooslima gu oó' daanduú Qeeruú hhoohhoó' oo Munguhe ku baloó gurtlayká.
11«Kuungá' burtunda huúw dír geeraá maraá saaliingw, nee dír geeraá waawitá nee mukduú hara'ayár koóm, as tunduwa sakwasleemuuti, ala kuungá' ma daawimitaara' as tiwa aleekala/a nee ar ta dir'íní oa' ma leelehhitara'. 12Asma siiwadae Qeeruú hhoohhoó' oo Mungú kuungá' nu intsaahhatis tidá' hariim ooaro.»
Slaqsoó daqaarmoó daktani
13Heeko wák baraá boo/aydae Yesu guri báy, «Intsaahhatusámo, hhiyaaeé' ádbaweek aalir'eé' ngi qasiisi.»
14Yesu heedaádá' guri báy, «mulqúmo, heé án iga qaas a heemá tawa har'ohusmo dirhunge, laqaá daqaari'iimarhúng ngiwa qasmiis?» 15Yesu giri báy, «Qaytsité', ti harmagahhe' nee qahángw umuúqo adooro. Asma daqaari'iima tam ka yaariír dír heewo, i slafíngw hupká.»
16Yesu slaqsaywí guri dir'ín i oó', «Qaymór heeko daqaarmo ina ló'wa hamát. 17Iri kilós baraá muunaáwósí oó', ‹Adór ni laaq a adoomá? Asma dír balangw'eé' nguy qaas i káhh.› 18Aluuwo iri oó', ‹Adoorí an tleéhh: Kuuntáy'eé' un feé/, kuuntoó ak urén nguri tleéhh. Nee balangw'eé' sleémeero ngway baraadií qaás nee muruueé' oo hatlá' sleeme.› 19Daqaní nay kilooeé' oo', ‹Balángw yaariír u koóm oo ni /aay kureeraá yaariire, nee muruú hatlá' sleeme. Aníng daxta an iwiwiít, an /ayiím, an wahaám, an qwalalaá/.› 20Ala heé aáng kuri báy nee Mungú, ‹Kuúng a daktani. Xweerakaá laarihe kuúng a gwá'. Nee muruudá' taa amohhe'eemaamís oo heemá?›
21«Múk daqaari'iimár baraaká' yaamaá leelehhiít, nee laatí inooín dír geeraá Munguhe gár ta kon i káhh, alhhe'eesoó slafingw'ín a adór slafíngw heewí.»
Mungú na harahhifeek
(Mat 6:25-34)
22Yesu eeharuuseerós gari báy, «Gawaá adoorihe, án a kah, ma daawimitaara' as slafingwhúng, tawa kata', ‹Ma /ayaán?› laqaá slaqoohunge, tawa kata', ‹Ma tsiitaán?› 23Asma slafiingw a gár afhhamít ta muruú /aymaaro, nee slaqwa a gár afhhamít ta tsitaywo. 24Xwaa'aro ga/aawaak, i dahasiindaaká, slám i bu'uundaaká, quuroó i koon i kaahh, tam kuuntáy sleeme. Ala Mungú ga /aymiis. Kuungá' tundun ak afhhamít ta tsir/ooro. 25Hee i deéro dirhunge oo slafiingós doogaro gu aleesláw tam har qoomár niina, tam ti daawiitamisi? 26Ala bar kuungá' gár niina tleehhamooro ta aleesleera' i káhh, kuungá' mahar daawiimitá' as muruuwuú hatlá'? 27/Ayo ga/aawaak, i gadiyuská, slám i hhutlitká. Án a kah, Solomon tam ló'wa daqaarmoowo, aa tsiitinká ar hhoohhooari adór /ayoorír alé. 28Ala bar Mungú /ayór yaamaá tawór wa ti'imiit gan tsiitimiis, ar laarí dáw nee matlo kari kwaahh gawaá ufuú xwaansláy, xáy, kuungá' nu ak tsiitiísiíke? Kuungá' mustundu haratlintaao niiná.
29«Kuungá' gár ta /aga' laqaá ta wata' ma leelehhiitara', slám ma daawimitaara'. 30Asma múk xoordu tí sleémeero gan leelehhiit. Ala Baabuúhúng ga xuu', adór muruuwí kuungá' kur sla'á'. 31Ala waawuti'iimár Mungú na leelehhiitaak, nee Mungú muruuwí sleémeero ngu dirhúng i haniis sleeme.»
Daqaari'iimár gawaá doori
(Mat 6:19-21)
32«Ma da'ayumitaara', kuungaá daqtá niina. Asma Baabuúhúng gaa slaá' waawuti'iimadá' ngiwa haniisi. 33Muruudá' ta koonda' weerisaak, nee peésaadá' ta sleera' ka hanisá' dír narkuute. Sandadaá qaruwa'aaká hiriitaak, daqaari'iimarhúng qaasaak gawaá doori, didá' iwa baloó /aaruuraaká, didá' fisusmo iwa hardihiiká, nee babi ngiwa hhitiindaaká. 34Asma didá' daqaari'iimarhúng i diri', an didá' munerhúng sleeme i diri'.»
Sagadiyuusér dalaa'
35«Masók aga siinootiindé' nee tsaa'asayhúng masók i gwa/aat. 36Nee kuungá' masók a adór múk aakooín daamaaraám oo ni amór doó aakoó duuxór wa kií/. Nee qoomár binda hardáh nee bir ateetín, inooín piindo kawa adaá duuxi. 37Múk amohhoó' a sagadiyuuseedá' aakooín binda hardáh i dala'amaayérí ay. Án a kah, inós in siinootín, nee sagadiyuuseedá' gari dahi'is dír muruú /ayma, gari muruú /aymárí qasmiis. 38Inós binda hardáh xweeraá amsiwo, laqaá xweeraá dakiingo, sagadiyuuseerós binga adoodí áy, sagadiyuuseedá' a múk amohhoó'. 39Ala xuaak, adór heé do' loó' geera siiwár fisusmo do'ós ngu gaasi birngi xuu', geera fisusmoodá' pa/aangw gu slayká oo do'odá' ngur gaasi. 40Ala kuungá' ti amohhe'ese', asma Garmoó Hee ni hardah siiwár kuungá' kuwa haraxuaa'aaká.»
Sagadiyusmoó inkihhím nee oo inkihhimu wásl
(Mat 24:45-51)
41Petro iri oó', «Aáko, slaqsaywí nguna atén kilootén i ói, laqaá tam dír muu sleémeerowo ugwa ó'?»
42Aako iri oó', «Sagadiyusmoó inkihhimuú koóm nee oo sagalooár koóm a gaalá, oo aakoowós i qaasi gawaá daanduú sagadiyuuseerós sleémeero, as muruú /aymar'ín nguwa hanmiisi qoomár hariima. 43Heé amohhoó' a sagadiyusmoodá' adoodá' ga tlehhiít, nee aakoowós gway adoodií áy. 44Ar ló' án a kah, aakoowós gu qaas daanduú muruuwós sleémeero. 45Ala i ya/aán sagadiyusmoodá' iwa baraá muunaáwósí ooi, ‹Qaytsiít, aakooeé' ki/imawo naa tliík.› Ala tí ooaro binga hhe'eés, sagadiyuuseedár hatlá' ar hhawaate nee ar /ameenaaro gari muxtár áy. Inós iri /ayín nee iri wahán nee iri ooniit. 46Sagadiyusmoó adoorí ga tleéhh, ku adoodí áy nee aakoowós baalár inós aa haraxuiiká, nee siiwár i xuiiká. Nee inós gun tlaaq nee guri haragaas dinkwa nee múk inkihhimu wásl.
47«Sagadiyusmoodá' gár aakoowós i slai ga xuu', aluuwo inós tiri amohhe'eesiiká, laqaá slám adoodá' aakoowós i slai gari tleehhiiká, inós ku kángw kilá' wa muúx. 48Ala sagadiyusmoodá' gár muxtár wa hariim gaa tleehh, asma ngiwa xuiiká, inós muxtaaros ka ureeká. Kudá' muruú yaariír gwa slay, ar dirose ta slai ka yaariir. Kudá' taa muruú yaariír i saayín, inós kuqo iinuus muruú yaariire.»
Yesu wakaari ngina huúw
(Mat 10:34-36)
49«Aníng nina hardáh asla ngiwa huuw baraaká' yaamu. Alók geeraawo masók ina qaroó ót. 50Ala baatiísmo u sláw oo tir baatisi. Hamí aníng a baraá slahh'amuú yaariír i dirií' ay dír i boo/i. 51Xáy, kuungá' ka xua', aníng nina baraaká' yaamií hardáhi as wayda nguwa huuw? Aasla'áy, án a kah, ala gár naa huúw a wakaari. 52Asma iimír hamí baraá doó múk kooane, mukdá' kooán ti wakaawaak. Awa tám i awa tsár tlaampa'aamisiyá', nee kudá' tsár i kudá' tám tlaampa'aamisiyá' sleeme. 53Baabá garmaawós gu sii', nee garma baabuúwós gu sii'. Slám aayo dasiirós ga sí', nee dasi aayoorós ga sí'. Aayo harér garmaawós ga sí', nee harér garma aayór hhawaatuuwós ga sí'.»
Qooma tsaahha
(Mat 16:2-3)
54Yesu boo/oó muu guri báy, «Qoomár kuungá' huunkoó laweei bura aandé' an adaá oa', ‹Tluwaay ni hardah.› Ala adoodá' iri qo tleehharút. 55Slám bar aga aandé' looa kinga tawó kwaáhh matlaatleero, kuungá' an oa', ‹Laarí siiree/i ka hatlá'.› Ala adoodá' iri qo tleehharút. 56Kuungaá' hhaahhafuúse. Kuungá' doori nee yaamu i tsatsahhaandá', ala tí tleehharumiit de'emaakae mas tsatsahhaanda'aaká?»
Ti axweesani axase' nee wakusmoowók
(Mat 5:25-26)
57«Ala kuungá' kiloohúng mas waagwedita'aaká tidá' ganaa'? 58Nee sakwasleemusmoowók ti axweesani axase' ar gaanslaay, qoomár tawa dinkwaárí diria' baraá loohiro, tawa doó sakwasleemár keera', as sakwasleemusmoowók muwa huúw amór doó sakwasleema, doó sakwasleemaro kuúng turi malé haniis dír askaarmo, inós kuúng uri dahaas baraá doó tseegamo. 59Án a kah, a baloó ti'itaká baraadae ay dír heelmooduú alhhe'eesaay kway bu'.»
Currently Selected:
LUKA 12: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.